Mak 3

Wòt kǒ àbu atò a li mpfə la

(Mat 12:9-14; Lk 6:6-11)

1Yesò ghɨ̀ ale, ndɔ̀Ꞌ abot ngà nyi a èbem lob Mbɔ̧ɔ̧mà, wòt kǒ wu a èbem lob və àbu atò a pfə la. 2Bòt ko e mè ngu abot me kɨ nyɨꞋte nê Yesò è ghɨa kàbɔ̀ŋ. Ale, bɔ me nèèta ndȩ̀à tò nê kò taa bəa mbê wu àliapfəèa Bèjuê leꞋ. 3Yesò tɔ wòt wu àbu atò a pfə la nê, “KɔꞋɔ a mbì.”

4Yesò bɔ̂ mbììte bòt bu nê, “Mbɨ̧ ta te laꞋnê bà me ghɨ̀ na ane àliapfəè ya à? Nê bà ghɨa kàbɔ̀ŋ, kò ntsɔ̧̀ à?” Nê, bà bə wòt kò ba buŋa leè? Ka bɔ̀ ka tsɔ̀Ꞌɔ èngǎ̧ tò.

5Yesò me lɨ̀ŋkè àwɔb nè èntɨ̧ɨ̧ bɨ̌, ntsòa ndɨ̀ wu bɔ tu̧ zǐ èntɨ̧ɨ̧ wɔb ane tò la, shu abua mbê wu nê, “Nyààbè àbu ayê.” Tà nyààbè àbu azi yu, a bê nkwèèlê. 6Bèfalèsiì e lɔ̀Ꞌɔ àfɨꞋa mbɔŋ, mbê ngà nkwène ane bòt fɔ̧̀ Elɔ̀d, bɔ̂ tò ba e bùꞋ me taãaã ndɨ bɔ̀ɔ bùŋe a Yesò la.

Ènɔ̧̂ bòt a ngèt èlemè

7Yesò bɔ̂ bɔkatè bi e lɔ̀Ꞌ ngà èlemè Galìlî, ènɔ̧̂ bòt e me kùŋe atò e dzəa Galìlî nè Jùdià, 8nè Jèlusalèm, nè Idùmìà, nè èdziꞋ bu agua èdzî Jodàn la. Èbeko nè bòt e li ndzə a ngèt èpfəè nɨ̧ bu è wu Tȩê bɔ̂ Sidɔ̀n la, ngu ndɨ bɔ zə èghɨ tàa ngɨ̀à la. 9Ènɔ̧̂ bòt yu e li ndzaã tê Yesò tsiꞋi shu abua bɔkatè bi nê bɔ̀ kɨ ànkànuꞋ ye nyi a èbèm nyaꞋ ngà a èbem èlemè wu mbɨ̀Ꞌɨ̀ ènɔ̧̂ bòt bu e ŋèꞋnè àvi. 10Tà li mbəâ bòt nyaŋ tè bòt àghɔ̧ e me ŋwèèla nkɨ ebaãaãte atò. 11Àfɨ̀Ꞌ àgème bòt bu fote kàbɔ̀ŋ tèa ane yɔb la e ye atò la, bɔ kwene a si a mbì tò ŋȩ nê “À wu Waã Mbɔ̧ɔ̧mà!” 12Ka Yesò sèntè shu abua fote kàbɔ̀ŋ tu nê tè ka shu wòt ye wu wùà la.

ÀfɨꞋa Yesò li ndàà bɔntu̧ bi ntsɔ̀b babe la

(Mat 10:1-4; Lk 6:12-16)

13Ale, Yesò kɔꞋ ngà a ègwet èku̧u̧nè, ntɔ bòt bu tàa nkɨa wɔb la. Bɔ kɨꞋɨ̀, 14tà là bòt ntsɔ̀b babe, ntɔ awɔb ane bɔntu̧ nê bɔ̀ wu nè nì. Mbɔ̂ shu abua yɔb nê, yea nga tsàà àwɔb bɔɔ ghǎ me làꞋa èngǎ̧ Mbɔ̧ɔ̧mà, 15e mě ŋa awɔb mètàŋ ndɨ bɔɔ me fəâ fote kàbɔ̀ŋ la. 16Eyaa wu bòt bu ntsɔ̀b babe tà li ndà la: Simùn (wu Yesò li ntsì èlen tò ko nê Pità la), 17Jimsì bɔ̂ wanyɨ vi Jɔ̌n, bɔ̧ Zebèdiì. (Yesò li ntsì tèlen tɔb ko nê Bòànejì, ngua shua nê, “Bòt Èfàŋ.”) 18Andùlù, Filìb, Bàtòlomiò, Màtìù, Tɔmasì, Jimsì waã Alfeɔ̀, Tàdià, Simùn wu tà lè taꞋa wua nùà mènəè àlaꞋ la, 19nè Judàs Iskaliòt wu tà lè fɨ̧̀ɨ̧̀nè a Yesò la.

Yesò bɔ̂ Belzebùl

(Mat 12:22-32; Lk 11:14-23; 12:10)

20Yesò li ngɨ̀ ale ngà àpfəè, ènɔ̧̂ bòt e mè mbù̧ù̧te abot tè bɔ̂ bɔntu̧ bi è ka tsi mbɔ àfɨ̀Ꞌ bɔ̌ jɨ èghɨjɨ bɔb la. 21ÀfɨꞋa bɔnyɨ Yesò e zə nê tà wu bɔ̂ ènɔ̧̂ bòt la, bɔ ghà nê bɔ kɨ enɨa tò nkàà nê, bòt e li ngua shua nê “Tà be!”

22BènyɨꞋtà mbɨ̧te Musì ko bè le dzə a Jèlusalèm la e me shu nê, “Tà bɔ Belzebùl, fɔ̧̀ fote kàbɔ̀ŋ ane zi. Wu wùà ka nàa ŋǎ atò mètàŋ tà nɨ̀a fəèà fote kàbɔ̀ŋ ane bòt la.”

23Ale, Yesò tɔ bòt bu, ndàꞋ abua yɔb ane mèngà̧teme, mbììte a wɔb nê, “BetsiꞋa Satàn ko fəè a Satàn? 24Nê àlaꞋ a ghàbtè tè bòt e tsiꞋa nùà èbeko, ko àlaꞋ a mbɔŋ aa kwene. 25Ləlob ghàbtà tè bòt ko e tsiꞋa nùà èbeko, ko betsiꞋa ləlob mbɔŋ ka tsi ko èfetê. 26È wu ale, kèfɔ̧̀ Satàn ghàbtà tè ntsìꞋi a mètsəê tsa tsa, ko è ka tsi kweele mbɨ̀Ꞌɨ̀ nàa anè la a. Ko kèfɔ̧̀ mbɔŋ nàà kwene tê ebee lìa. 27BetsiꞋa wòt kà bəꞋə lob wòt tà bɔ ètɨ̧̂ nyaŋ la tè nɨ̀ èghɨ ŋut nɨŋ ngà. Tà bɔ ndɨ tàa bɨ̌ ekuule wòt kèkweelè wu ka bɔ ko eŋeꞋe èghɨ tò la. 28TsiꞋ è shua wɨ̧ ane nkûŋ nê, Mbɔ̧ɔ̧mà naa li waꞋa kàbɔ̀ŋ bòt nè mènəè kàbɔ̀ŋ bɔ làꞋa ane zi la. 29Ka è wu wòt tà làꞋà mènəè kàbɔ̀ŋ ane Fo Kèfə la, Mbɔ̧ɔ̧mà ka waꞋa ayùà nkàà nê, ŋut è ghɨ̌ kàbɔ̀ŋ kà wu li elìa.”

30(Yesò nàà ndàꞋà èngà̧ waa ale, ngu ndɨ̀ wu bòt ko àa shua nê, “Tà bɔ fo kàbɔ̀ŋ ane zi” la.)

Nyɨ̌ Yesò bɔ̂ bɔnyɨ tò

(Mat 12:46-50; Lk 8:19-21)

31Nyɨ̌ Yesò bɔ̂ bɔnyɨ tò e ghɨ̀ ale, nkɨ̀Ꞌɨ̂ ntɨ̧ɨ̧ àbȩ ntsà ntu̧ nê tà kɨꞋɨ. 32Ènɔ̧̂ bòt e ko nê, e tseke ngààle a Yesò, bɔ shu abua tò nê, “Nyɨ̌ wè bɔ̂ bɔnyɨ bè e wu àbȩ nkɨ̀a wê.”

33Yesò bììte nê, “Nyɨ̌ am wu wa, bɔnyɨ bɔ̧ mè ngu wà ba à?”

34Tà ghɨ̀ ale, tà lɨ̀ŋkè bòt bu bɔ tsekè ngààle tò la mbɔ̂ nê, “Eyaa wu nyɨ̌ am bɔ̂ bɔnyɨ bɔ̧. 35Wòt ègème tàa ngɨ̀à àghɨa Tǎt am a ègwet nàa nkɨà la wu wòt tà wu nyɨ̌ am mè ngu wanɔ̧ la.”

Currently Selected:

Mak 3: mnf

Highlight

Copy