1 Wakorint̯o 16
16
Yavyani mvuugiya za kuwagija wantu wa Muungu
1Na dzuu ya hizi mvuugiya za kuyavigwa kwa dzambo ḍya ugijo wa wahikiza weo Yerusalemi, hendani dza hivi niyaḍamiyevyo haya matsanganiko ya Galatia yahende. 2Kula nsiku ya ḍyuma, kula mumodza jwenu ni kut̯enga chima cha fwedha mala ya haya mapatoye, muziweke, ili kutseewa na haḍya ya kuhwaa mvuugiya nidzepfokudza. 3Nikidza, nawapfa ḅaruwa za kuwamanyisa hawa wantu mutsaniyeo, kisa nawahuma wazipfiike hizi nt̯unu zenu Yerusalemi. 4Na ikiwa kwamba ni sawa kwangu nami nyende, ḅasi hunagijana pfamodza hunakwenda.
Mipango yangu ya usoni
5Ninkisa kuchia na Makedonia, nakudza kwenu, kwa kwamba Makedonia nawa nyakuchiani t̯u. 6Pfangine huku kwenu nidzakaa kit̯emo, pfangine nikae huyu sika jwonse, ili mupate kunimpa ugijo wa kugija kwenda na charo changu, kuḍekwonse nidzekokwenda. 7Sikitsaka kuonana nanywi dzuu dzuu nikwakuchiani. Nyakuyoweeyani kukaa nanywi kwa kit̯emo Ḅwana akitsaka. 8Ela nakaa nguzi Efeso mumpaka nsiku ya jila ya Pentekost̯e.#16:8 Hii iwa ni jila ya Kiyahud̯i ya mavuno ya nganu. Ikihendeka nsiku miyongo mitsano ḅaad̯a ya jila ya Pasaka. 9Hapfa nina namfasi nyema muno ya kuhenda kazi ya maana, hat̯a ingawa wapinzani wangu nao ni wenji.
10Timoteo akidza kwenu, mupfokeeni urembo, koro nae kakuhendani kazi ya Ḅwana dzami. 11Kwa hivyo nakutseewa muntu jwa kumubalifa. Mumpeni ugijo agije kwenda na charoche salama, apate kuuja huku niiko. Nyakumuyoweeyani auje jeje na hawa wandugu.
12Na dzuu ya ndugu Apolo, ni hivi: Mala nineneyeo nae agijane na hawa wandugu wadze kwenu, jeje nkakutsaka kudza hi hii saasambi. Ela akipata namfasi anakudza.
Maghaghisa ya mwiso na kedhya
13Nywinywi wani matso. Faro yenu igijeni muno na namutseewa woga. Wani wantu mwiwo na nguvu. 14Yonse mwiyonahenda, yahendeni na matsako.
15Mumanya ya kwamba wantu wa nyumba ya Sit̯efanosi ndiwo wantu wa d̯ura wa ḍyimbo ḍya Akaya waperukiyeo wakiwa Wakirist̯o. Na wadziyavya kuwahumikia wantu wa Muungu. D̯ubva wandugu zangu, nyakumuyombani 16muwat̯ii wantu dza hawa hawa na yungine yuḍejwonse eyenahenda kazi na kuhumika pfamodza nao.
17Nitsekea kwamba Sit̯efano, Fotunato na Akaiko wadza huku niiko. Waniyavya hu udhuma wa kumutsowa nywinywi. 18Wao waniingamaza mojo muno dza hiviḍe wevyomuingamaza nanywi. Wantu dza hawa wanamala kuhilwa.
19Matsanganiko ya ḍyimbo ḍya Asia yamukedhya. Akwila na Pirisila, na hiḍi tsanganiko ḍiḍyonayomba humu nyumbani mwao, wamukedhya nto hariani mwa Ḅwana. 20Hawa wandugu weo hapfa wonse nao wamukedhya.
Mukwakukedhyanani, noneanani, kuyangana matsako ya kindugu.
21Mimi Paulo, hi kedhya hi nyakuyorani na mukono wangu mwenye.
22Yuḍejwonse asiyemutsaka Ḅwana, huyo kaḍujwa. Ḅwana jwehu, nzoo!
23T̯ei ya Ḅwana jwehu Yesu naiwe pfamodza nanywi. 24Matsako yangu nayawe nanywi nyonse hariani mwa *Kirist̯o Yesu. Ikaani naghea.
Currently Selected:
1 Wakorint̯o 16: pkb
Highlight
Copy
Compare
Share
Want to have your highlights saved across all your devices? Sign up or sign in
© 2004, Bible Translation and Literacy