1 Watesalonike 2
2
Kazi ya Paulo ahendeyeyo Tesalonike
1Wandugu zangu, hat̯a nywinywi wenye mumanya ya kwamba, hichi charo chehu hudziyecho kwenu ntahukufwa ḅasi. 2Nywinywi wenye, mumanya namuna ya wantu wa mudzi wa Filipi wahukuntisiyevyo d̯ina na kuhuhendea mambo mazuka mazuka. Ela hat̯a vivyo, Muungu kahupfa mojo wa kudza kwenu hudzehumusumwiiye haya maagu yakwe mema, hat̯a ingawa huku kwenu nako kwiwa upinzani mukali. 3Swiswi kusumwiiya kwehu ntahukumusumwiiya mambo ya nsuwe, wala ntahwiiwa na nia nzuka ambu hutsake kukulakula muntu. 4Kusumwiiya kwehu hunasumwiiya dza wantu wa Muungu atsakizijweo nao. Jeje kahuona wantu wahikizika na kahupfa kazi ya kusumwiiya *Maagu Mema dzuu ya Yesu *Kirist̯o. Naswi hukwakusumwiiyani, ntahusumwiiye kutsakiza wantu, hunasumwiiya kumutsakiza Muungu aimanyiye hi myojo yehu. 5Nywinywi wenye mumanya, na Muungu nae ni shaahiḍi, kwamba, hwipfokudza kwenu kumusumwiiya, ntahukumudzia na vyuuwo vya nsuwe ambu vya kumuhalahala hupate kufaiḍi kuyawa kwenu. 6Swiswi ntahukudzilachia kushad̯wa ndinywi ambu muntu yungine yuḍejwonse. 7Gula, kwa dzambo ḍya kwamba hu *ntumi wa Kirist̯o, t̯ambere hutsakiye kudziyanga mamulaka hwiyonayo kwenu, hundevihenda. Ela hwipfokudza kwenu, humuhwaa na umpowe dza hiviḍe vya muke evyonakwamusa na kut̯unza wanawe. 8Swiswi hwiiwa humutsaka muuno! Hwiimutsaka chima cha kwamba, ntahukumusumwiiya hichi chuuwo cha Muungu t̯u, ela humumpa kula hwichokuwa nacho pia. 9Nywinywi wenye, wandugu, mumanya namuna huhendeyevyo kazi na hiḍu muno! Koro hwipfohukisumwiiya chuuwo cha Muungu kwenu, hufwa kudzihendea kazi siku na musikahi ili hutseewa muzigo kwenu. 10Nywinywi mu mashaahiḍi, na Muungu mwenye nae ni shaahiḍi, kwamba, hwipfokuwa kahi yenu nywinywi muhikiziyeo, huishi maisha ya udheru, yamutsakiziyeyo Muungu na yasiyokuwa na t̯amba zuka ḍiḍeḍyonse.
11Nywinywi wenye mumanya kwamba swiswi hwikimuhwaa dza hiviḍe vya babajwe muntu evyonawahwaa wanawe. 12Hwikimuingamaza na kumungiza mojo, na hwikimufunda kut̯wa mutseyatsa kuishi maisha ya kuyanga kwamba mu wantu wa Muungu. Koro jeje kamuhana munjie maremboni mwa uhajuwe.
13Swiswi huna saḅaḅu ya kumuyaviza ḍuḍa Muungu kut̯wa. Na saḅaḅu yehu ni kwamba, hwipfomusumwiiya chuuwo cha Muungu, nywinywi mukihikiza dza chuuwo cha Muungu. Ntamukuchihwaa dza chuuwo cha mwanaad̯amu, ela muchihwaa dza chuuwo cha Muungu ḍugha. Na hichi hichi chuuwo, chakumuhendezani nywinywi muhikiziyeo, muishi maisha mema.
14Wandugu zanguni, yayaḍe yayapatiyeyo haya matsanganiko ya Muungu yamuhikiziyeo Kirist̯o Yesu hukuḍe Yud̯aya, ndiyo yamupatiyeyo nanywi. Yani, mukuntiswa d̯ina ni wantu wa kyeet̯i chenu wenye dza viviḍe vya hawa Wakirist̯o Wayahud̯i wakuntisijwevyo d̯ina ni wantu wa kyeet̯i chao. 15Wao Wayahud̯i, ndiwo wamuyagiyeo Ḅwana jwehu Yesu na manabii wangine wa Muungu. Na ndiwo wao wahukuntisiyeo d̯ina na kuhud̯aramisa kula hwendeyepfo. Hivi ntavikwakumutsakizani Muungu. Wao, kula muntu wanamupfinga 16wakitsaka kuhuvingira naswi, hutsewasumwiiya hawa wantu wa vyeet̯i vingine ili wapfonywe. Na kwa kuhenda hivi, wagija kudziundukizia nabvise zao ziwe himpi. Ela sasa, Muungu kawarejea na kakuwahukumuni vyumuni!
Hamu ya Paulo ya kuwat̯embeeya Watesalonike
17Wandugu zangu, hwipfohendezwa hukit̯ana nanywi na nguvu, hut̯ana hi mii t̯u kwa muḍa, ela mat̯aro yehu yonse yewa yaa kwenu. Mwiihungiza udhuma mukali muuno, naswi huḍema kula njia hudzehumut̯embeeye kawii. 18Hwiiwa na hamu muno ya kuuja huko kwenu kawii. Mimi Paulo mwenye, niḍema kudza zaid̯i ya mweedha mumodza, ela Shaat̯ani kavihendeza vyumu kwehu kudza. 19Maana yehu ya kutsaka kuuja kawii huko kwenu, ni kwamba, huna madzikwat̯yo makuu ya kwamba, Ḅwana jwehu Yesu adzepfouja mweedha wa pfii, nywinywi munasumama usoni kwakwe, pfasipfo yutswa. Ndookomu munahupfa kutsekea na kudziona kwa dzambo ḍyenu. 20Nanywi hakika, ndinywi wantu wa kuhupfa kutsekea na kudziona!
Currently Selected:
1 Watesalonike 2: pkb
Highlight
Copy
Compare
Share
Want to have your highlights saved across all your devices? Sign up or sign in
© 2004, Bible Translation and Literacy