1 Watesalonike 5
5
Dziwekeni t̯ayari Ḅwana anauja nsiku husiyoimanya
1Wandugu, ntaku haḍya iḍeyonse ya kumworea dzuu ya nsiku ambu t̯arehe ya kudza mweedha wa pfii kwa Ḅwana jwehu Yesu! 2Koro nywinywi wenye mumanya tswee, kwamba, nsiku yakwe ya kudza, anakudza pfasipfo kumanyikana dza hiviḍe vya mwivi evyonakudza nasiku pfasipfo kumanyikana. 3Wantu wakiwa kwambani, “Ntaku untu, kuna naghea,” ḅwikira, wanakudzijwa ni d̯ina nkuu iyo dza tsungu wa muke jwa kuvyaa. Na, dza vya muke afikie kudzifunguya asivyoweza kuud̯arama tsungu wa kuvyaa, ndivyo vya hawa wantu wasivyokudzaweza kuyapfuka hi hii d̯ina.
4Ela nywinywi wandugu, ntamukwaa kizani dzuu ya haya mambo hat̯a mudzemuhuswe ni kudza kwa Ḅwana jwehu Yesu dza hiviḍe vya wantu wevyonahuka wakinjiijwa ni mwivi. 5Koro nyonse mu wantu mwiwokuishini muyangani. Ntahukwaa wantu wa kuishi maisha ya kiza. 6D̯ubva swiswi, nahutseewa kuyaani dza hivi vya hawa wantu wangine wevyokuyaani, ela nahuwe matso na huwe wantu wa kudzimiza. 7Koro masaa ya nasiku ndiyo masaa ya wantu weyonayaa, na ndiyo masaa ya walevi weyonaruma. 8Ela kwa dzambo swiswi hu wantu hwiwokuishini muyangani, nahuwe wantu wa kudzimiza. Faro yehu na matsako yehu navihuchinge na mazuka dza hiviḍe vya ngao ivyonamuchinga asikari. Na madzikwat̯yo yehu ya kudzapfonywa na adhaḅu ya Muungu aiwawekeeyo wantu wazuka wonse, nayahuchinge na mazuka dza hiviḍe vya nkofia ya chuma ivyonamuchinga kitswa asikari. 9Koro Muungu nkakuhutsana swiswi ahuadhiḅu, ela kahutsana ahupfonye kuchiiya na kwa Ḅwana jwehu Yesu *Kirist̯o. 10Jeje Yesu kahufwiya, ili kwamba, adzepfouja mweedha wa pfii, hukiwa mojo ambu hukiwa kwamba hufwa, ahuhwae hwende hukaishi nae. 11D̯ubva, ngizanani mojo na kumbakana na hivi hivi vyuuwo dza mwivyokuhendani.
Mafunda ya kwisia na kedhya
12Wandugu, hwakumuyombani muwahile hawaḍe weonahenda kazi na hiḍu kahi yenu, weonamusumamia dza wayongozi humu matsanganikoni na kumukanya mutseegwa nabviseni. 13Na kwa dzambo ḍya kazi weyokumuhendeani, wahileni na muwatsake muno. Ishianani na naghea.
14Wandugu, hwakumuyombani muno muwakanye hawaḍe weonadzikaiya ḅasi, wasiotsaka kuhenda kazi. Wangizeni mojo hawaḍe wafwiyeo mojo, na muwagijiije hawaḍe wasiodzangora faro zao. Na pia wani wampowe kwa wantu wonse. 15Manyani muntu atsemuipfa halo mwenziwe kwa zuka amuhendeeḍyo. Nywinywi kut̯wa, ḍemani muno kuhendeana mema nywinywi na nywinywi na kuwahendea mema wantu wangine wonse.
16Tsekeani nsiku zonse! 17Yombani kut̯wa! 18Muyavizeni ḍuḍa Muungu kwa kula ḍidzeḍyohendeka! Koro haya ndiyo ya Muungu eyonatsaka muhende, nywinywi mwiwo hariani mwa Kirist̯o Yesu.
19Namutsemuvingira Ruhu Mudheru kuhenda kaziye kuzimuni mwa myojo yenu. 20Wala namutsebalifa vyuuwo vya unabii. 21Kipimeni kula chuuwo, muhwae hikiḍe chicho cha ḍugha, 22na muyekeze kula chicho cha nsuwe.
23Nyakumuyombani Muungu, eyenahupfa naghea, amudherese muwe wadheru kaḅisa! Jeje namuweke maisha yenu yonse, ya mwii na ruhu, yatseewa na t̯amba zuka ḍiḍeḍyonse, hat̯a nsiku ya Ḅwana jwehu Yesu Kirist̯o adzepfouja mweedha wa pfii. 24Na kwa dzambo huyu Muungu amuhaniye nywinywi ni muhikizika, jeje anavit̯imiza.
25Wandugu, gijani kuhuyombea naswi. 26Mukwakukedhyanani, noneanani, kuyangana matsako ya kindugu. 27Nyakumuamuruni kwa sari ḍya Ḅwana jwehu Yesu kwamba, hi ḅaruwa muiwasomeye wandugu wonse.
28T̯ei ya Ḅwana jwehu Yesu Kirist̯o naiwe pfamodza nanywi nyonse. Ikaani naghea.
Currently Selected:
1 Watesalonike 5: pkb
Highlight
Copy
Compare
Share
Want to have your highlights saved across all your devices? Sign up or sign in
© 2004, Bible Translation and Literacy
1 Watesalonike 5
5
Dziwekeni t̯ayari Ḅwana anauja nsiku husiyoimanya
1Wandugu, ntaku haḍya iḍeyonse ya kumworea dzuu ya nsiku ambu t̯arehe ya kudza mweedha wa pfii kwa Ḅwana jwehu Yesu! 2Koro nywinywi wenye mumanya tswee, kwamba, nsiku yakwe ya kudza, anakudza pfasipfo kumanyikana dza hiviḍe vya mwivi evyonakudza nasiku pfasipfo kumanyikana. 3Wantu wakiwa kwambani, “Ntaku untu, kuna naghea,” ḅwikira, wanakudzijwa ni d̯ina nkuu iyo dza tsungu wa muke jwa kuvyaa. Na, dza vya muke afikie kudzifunguya asivyoweza kuud̯arama tsungu wa kuvyaa, ndivyo vya hawa wantu wasivyokudzaweza kuyapfuka hi hii d̯ina.
4Ela nywinywi wandugu, ntamukwaa kizani dzuu ya haya mambo hat̯a mudzemuhuswe ni kudza kwa Ḅwana jwehu Yesu dza hiviḍe vya wantu wevyonahuka wakinjiijwa ni mwivi. 5Koro nyonse mu wantu mwiwokuishini muyangani. Ntahukwaa wantu wa kuishi maisha ya kiza. 6D̯ubva swiswi, nahutseewa kuyaani dza hivi vya hawa wantu wangine wevyokuyaani, ela nahuwe matso na huwe wantu wa kudzimiza. 7Koro masaa ya nasiku ndiyo masaa ya wantu weyonayaa, na ndiyo masaa ya walevi weyonaruma. 8Ela kwa dzambo swiswi hu wantu hwiwokuishini muyangani, nahuwe wantu wa kudzimiza. Faro yehu na matsako yehu navihuchinge na mazuka dza hiviḍe vya ngao ivyonamuchinga asikari. Na madzikwat̯yo yehu ya kudzapfonywa na adhaḅu ya Muungu aiwawekeeyo wantu wazuka wonse, nayahuchinge na mazuka dza hiviḍe vya nkofia ya chuma ivyonamuchinga kitswa asikari. 9Koro Muungu nkakuhutsana swiswi ahuadhiḅu, ela kahutsana ahupfonye kuchiiya na kwa Ḅwana jwehu Yesu *Kirist̯o. 10Jeje Yesu kahufwiya, ili kwamba, adzepfouja mweedha wa pfii, hukiwa mojo ambu hukiwa kwamba hufwa, ahuhwae hwende hukaishi nae. 11D̯ubva, ngizanani mojo na kumbakana na hivi hivi vyuuwo dza mwivyokuhendani.
Mafunda ya kwisia na kedhya
12Wandugu, hwakumuyombani muwahile hawaḍe weonahenda kazi na hiḍu kahi yenu, weonamusumamia dza wayongozi humu matsanganikoni na kumukanya mutseegwa nabviseni. 13Na kwa dzambo ḍya kazi weyokumuhendeani, wahileni na muwatsake muno. Ishianani na naghea.
14Wandugu, hwakumuyombani muno muwakanye hawaḍe weonadzikaiya ḅasi, wasiotsaka kuhenda kazi. Wangizeni mojo hawaḍe wafwiyeo mojo, na muwagijiije hawaḍe wasiodzangora faro zao. Na pia wani wampowe kwa wantu wonse. 15Manyani muntu atsemuipfa halo mwenziwe kwa zuka amuhendeeḍyo. Nywinywi kut̯wa, ḍemani muno kuhendeana mema nywinywi na nywinywi na kuwahendea mema wantu wangine wonse.
16Tsekeani nsiku zonse! 17Yombani kut̯wa! 18Muyavizeni ḍuḍa Muungu kwa kula ḍidzeḍyohendeka! Koro haya ndiyo ya Muungu eyonatsaka muhende, nywinywi mwiwo hariani mwa Kirist̯o Yesu.
19Namutsemuvingira Ruhu Mudheru kuhenda kaziye kuzimuni mwa myojo yenu. 20Wala namutsebalifa vyuuwo vya unabii. 21Kipimeni kula chuuwo, muhwae hikiḍe chicho cha ḍugha, 22na muyekeze kula chicho cha nsuwe.
23Nyakumuyombani Muungu, eyenahupfa naghea, amudherese muwe wadheru kaḅisa! Jeje namuweke maisha yenu yonse, ya mwii na ruhu, yatseewa na t̯amba zuka ḍiḍeḍyonse, hat̯a nsiku ya Ḅwana jwehu Yesu Kirist̯o adzepfouja mweedha wa pfii. 24Na kwa dzambo huyu Muungu amuhaniye nywinywi ni muhikizika, jeje anavit̯imiza.
25Wandugu, gijani kuhuyombea naswi. 26Mukwakukedhyanani, noneanani, kuyangana matsako ya kindugu. 27Nyakumuamuruni kwa sari ḍya Ḅwana jwehu Yesu kwamba, hi ḅaruwa muiwasomeye wandugu wonse.
28T̯ei ya Ḅwana jwehu Yesu Kirist̯o naiwe pfamodza nanywi nyonse. Ikaani naghea.
Currently Selected:
:
Highlight
Copy
Compare
Share
Want to have your highlights saved across all your devices? Sign up or sign in
© 2004, Bible Translation and Literacy