Waefeso 4
4
Wakirist̯o wanamala kuwa na umodza
1D̯ubva mimi niye mufungwa kwa dzambo ḍya kumuhumikia Ḅwana, nyakumuyombani muishi maisha ya kuyanga kwamba mu wantu wa Muungu ahaniyeo ḍugha! 2Nywinywi meshi wani wantu wa kutsadziona na muwe wampowe kwa wangine. Wani wantu wa kuit̯isa, na yanganani matsako kwa kutsadhimwana. 3Huyu Ruhu kamuunganya mugala dza kintu kimodza. D̯ubva ḍemani muno kuishiana na naghea mupate kukaa dza kintu kimodza.
4Hwonse pfamodza hu mwii mumodza na hupfokea yuyo Ruhu mumodza. Huna madzikwat̯yo mamodza ya kudzapfokea hayaḍe yonse ya Muungu ahuahid̯iiyeyo epfohuhana kuwa wantuwe. 5Hwonse Ḅwana jwehu ni mumodza, faro yehu ni modza na hut̯opyegwa mat̯opyo mamodza. 6Muungu jwehu na Baba jwehu hwonse ni mumodza. Anawat̯awala wantuwe wonse na kuhenda kazize kuchiiya na kwao wonse, na anaishi kuzimuni mwao wonse.
Kirist̯o kayavya t̯ola garagara za kuḍimbakia hiḍi tsanganiko
7Kula mumodza jwehu kapfegwa t̯ola ya kivyakwe kuuḅana na hiviḍe vya *Kirist̯o atsakiyevyo kumumpa. 8Ndiyo maana haya matsoro yamba,
“Epfopfaa dzuu,
ewa kahwaa maheka ya wantu wenji na wenji
na kagawia wantu nt̯unu garagara.”
9Aya matsoro yakyamba, “Kapfaa dzuu,” yana maana ga? Yana maana ya kwamba, Kirist̯o ewa kasuka huku nsi lumwenguni.#4:9 Haya matsoro ya Kiyunani pia yanaweza kuwa na maana ya kwamba: kasuka nsii kwa lumwengu jwa wafu. 10Na huyu muntu asukiye akidza lumwenguni, ndiye yuyo apfaiye akyenda akikaa pfantu pfa hila nkuu ya mwiso mbinguni dzuu, ili kwamba akamilishe na kut̯awala kula kintu. 11Ndiye apfiye wantu mat̯ola ya kuwa *ntumi, wangine wawe manabii na wangine wawe wainjilisti. Wangine kawapfa mat̯ola ya kuwa wat̯ikisa na waalimu. 12Kazi yao ni kuwaelekanya wantu wa Muungu kumuhumikia Muungu ili hu mwii wa Kirist̯o, yani hiḍi tsanganiko, ḍipate kumbakika. 13Wanahenda hivi mumpaka hwonse huwe kintu kimodza, kwa dzambo ḍya hivi humumanyiyevyo na humuserefat̯iyevyo huyu Mwana jwa Muungu. Ndookomu hwonse hunawa wantu hungoreyeo faroni, na hunawa na ukamilifu dza huḍe wa Kirist̯o eo nao. 14Ntahuwezi kuwa dza wana vichuchu kawii wa kukulwakulwa kirahisi ni wantu weonadziona makaro wakayongweeza mayongweezo ya kwaarya wantu. Ntahuwezi kuwa dza chombo cha kubigwa ni mpepfo na mawimbi chikapfiikwa huku na huku. 15Ishinu hunagija kuiuḅa hi hachi huku hukiwa na mojo wa kutsakana. Ndookomu kwa kula njia, hunakuya hunawa dza Kirist̯o, eye kitswa cha hiḍi tsanganiko. 16Wonse wamuhikiziyeo kawaunganya pfamodza dza hiviḍe vya mwii wa muntu wivyonagijaniswa ni haya makano ya mwii. Na kula kiiriiri kikihenda kaziye dza chivyonamala, mwii wonse unambakika na matsako na unawa na nguvu.
Ishini maisha mapfya
17Mimi nyakumukanyani muno dza muhumisi jwa Ḅwana, mutsekaiya kuishi dza hivi vya hawa walumwengu wevyonaishi. Wao mat̯aro yao ni mafu. 18Ntawadzi kintu na ntawa wechonaimuka kwa dzambo ḍya myojo yao myumu ya kutsaatsaka kuuḅa njia za Muungu. Ndookomu ntawa haya maisha mapfya ya Muungu eyonapfa wantuwe. 19Wao ntawa yutswa kawii wakwakuhendani mazuka. Muḍa wao wonse unasiiya kuhendani haya mazuka weyonat̯amani kuhenda. Wakigija kuhenda uḅari ntawasikiye.
20Ela nywinywi mwipfomumanya Kirist̯o, hayo hayo siyo muyongweezejweyo kuhenda. 21Nina hakika kwamba musumwiijwa dzuu ya Yesu, na mwipfomuserefat̯a muyongweezwa hi ya hachi dzuuye. 22Ndookomu haya maisha mazuka mwiyomukiishi d̯ura yayatseni. Ndiyo mala yamuwozya! Mwiiwa mwaara kwa dzambo ḍya kuuḅa t̯amaa zenu nzuka nzuka. 23Ela sasa muyatseni Muungu aiperuye hi myojo yenu na mat̯aro yenu. 24Ishini haya maisha mapfya mupfegejweyo kwa miro ya Muungu.#4:24 Haya matsoro ya Kiyunani pia yanaweza kuwa na maana ya kwamba: Ishini haya maisha mapfya mupfegejweyo ili muweze kuwa dza hiviḍe vya Muungu aivyo. Haya ni maisha ya kuhenda yeyo ya hachi na kuyanga udheru wa ḍugha kwa dzambo ḍya kuimanya hi hachi.
25D̯ubva, mambo ya kwambiana nsuwe yayatseni. Kula muntu namwambiye mwenziwe hi ya hachi, koro hwonse hu viiriiri vya mwii mumodza. 26Siyatse ngoro ikut̯awale uhende nabvise. Na ngoroyo naitsetswesa dzuwa. 27Nkudzomumpe Shaat̯ani namfasi ya kukuḍema akugise nabviseni. 28Ikiwa kwamba wiwa u mwivi, sasa yatsa wivi. Yavya hwekaḍyo kudzilachia kantu na upate cha kuwapfa na hawaḍe weo na t̯uri.
29Namutseewa wantu wa vyuuwo vizuka vizuka. Ishinu mwipfonat̯amuka kunena, nenani vyuuwo vya kuwambaka hawaḍe weonamusikiiya ili vipate kuwafaiḍi. 30Namutsemusikit̯isa huyu Ruhu jwa Muungu. Koro huyu Ruhu ndiyo alama ya Muungu amungiziyeyo kuyanga kwamba mu wantuwe. Anakaa kuzimuni mwenu hat̯a nsiku ya Muungu adzeyomuweka huru kaḅisa kuyawana na mazuka. 31Yatsani kuwekeana ngooko, yatsani mambo ya ngoro, yatsani mambo ya kuheha na vitsolo. Na wala namutseewa na kevo kwa yuḍejwonse. 32Ishinu wani wantu wa kuhendea wenzenu mema na muwe wat̯ei kwa wangine. Wani wantu wa kuyatsiana dza vya Muungu amuyatsiiyevyo kuchiiya na kwa Kirist̯o.
Currently Selected:
Waefeso 4: pkb
Highlight
Copy
Compare
Share
Want to have your highlights saved across all your devices? Sign up or sign in
© 2004, Bible Translation and Literacy