Waefeso 6
6
Namuna ya wana na wavyazi wevyonamala kukaiyana
1Nywinywi wana, wat̯iini wavyazi wenu dza vya Ḅwana evyonatsaka, koro ndivyo mwivyonamala kuhenda. 2-3Vyoregwa kwamba,
“Muhile babajo na mamajo
ili uwe na naghea na upate kuishi maisha mayeya hapfa lumwenguni.”
Hi ndiyo amuri ya d̯ura iyo na ahad̯i kahi ya amuri zonse.
4Nanywi wababa, namutsekaa na kuwahendea wana wenu mambo ya kuwarejesa. Ishinu wayeyeni na njia ya kuwayongweeza aḍaḅu na kuwafunda wauḅe haya mayongweezo ya Ḅwana.
Namuna ya wahumwa na maḅwana zao wevyonamala kukaiyana
5Nanywi mwiwo wahumwa, wat̯iini maḅwana zenu wa humu lumwenguni. Wat̯iini na kuwahila na mojo mumodza kwa kula kintu dza mwivyonamut̯ii *Kirist̯o. 6Namutsehenda hivi wakiwa kumuonani ḅasi ili wapate kumushad̯a, ela hendani hivi kwa kwamba mu wahumwa wa Kirist̯o mwiwokuhendani miro ya Muungu na nguvu zenu zonse. 7Humikani na mojo wonse, dza kwamba ntamukwaa kumuhumikiani mwanaad̯amu ela mwakumuhumikiani Ḅwana. 8Ukiwa muhumwa ambu hat̯a, kumbuka kwamba Ḅwana anamumpa t̯ubvo kula muntu kuuḅana na hayaḍe mema ahendeyeyo.
9Dza vivyo, nywinywi mwiwo na wahumwa wahwaeni wahumwa wenu na njia nyema. Namutsewakakat̯ia kwamba munawakuntisa d̯ina. Ni mukumbuke kwamba nywinywi nao Ḅwana jwenu ni mumodza, nae ni huyuḍe eye mbinguni. Jeje wantu wonse anawahwaa vimodza.
Vwaani silaha za kiruhu mupate kumud̯angara muzuka
10Chuuwo changu cha mwiso ni kwamba, Ḅwana namumpe nguvu kuyawana na uwezowe mukuu. 11Vwaani silaha zonse mupfegejwezo ni Muungu ili mupate kuid̯angara mipango mizuka ya Shaat̯ani. 12Koro viha vyehu hwivyokujwanani ntahukwakujwanani na mwazi na nyama dzaswi! Ela hwakujwanani na mahaju ya mpepfo nzuka na sirikali zao. Hwakujwanani na nguvu za kiza zizokujut̯awalani huju lumwengu na nguvu za mpepfo nzuka ziizo humu angani dzuu.
13D̯ubva vwaani silaha zonse za Muungu amumpiyezo, ili kwamba mazuka yakimufika mutseuja na nyuma. Na mukijwana hat̯a mwiso munasumama imara dza viviḍe. 14Ndookomu dzifungeni mukae t̯ayari. Hi hachi naiwe dza mulao wa kudzifunga chunoni. Maisha yenu ya kuhenda yeyo ya hachi nayamuchinge dza hiviḍe vya nguo ya chuma ivyonamuchinga asikari humu ḅagwini. 15Na haya *Maagu Mema yeyonamumpa naghea, nayawe dza viyahu vyenu vya kuvwaa vimumpe kut̯araga gu! 16Zaid̯i ya hayo, faro yenu naiwe dza ngao ya kugija mukononi ipate kumuchinga na vyembe vya moho vya Muzuka Shaat̯ani evyonamupfanukia. 17Upfokeyeni mupfonyo wa Muungu amumpiyeo, uwe dza nkofia ya chuma ya kumuchinga kitswa. Na gijani hichi chuuwo cha Muungu kiwe dza yupfanga mwijonapfegwa ni Ruhu Mudheru.
18Yombani kut̯wa dza vya Ruhu Mudheru evyonamuwezesa, mukimuyomba Muungu kwa haḍya zenu zonse. Wani matso na mugije kuyomba kut̯wa! Na mukwakuyombani wayombeyeni na wantu wonse wa Muungu. 19Niyombeani nami, ili kwamba kula nipfonapata kut̯amuka kunena, Muungu animpe hivi vyuuwo vya kunena, nipate kuwasumwiiya wantu pfasipfo oga dzuu ya hi ngadzi ya haya Maagu Mema. 20Mimi ni ḅalozi jwa Kirist̯o Yesu jwa kusumwiiya haya haya maagu. Ela nifungwa gerenzani kwa dzambo ḍya kuyasumwiiya. D̯ubva niyombeani, niweze kusumwiiya pfasipfo oga uḍewonse dza ivyonanimala.
Maḍamano ya kwisia
21-22Nyakumuhumani Tukiko kwenu amuyeheye maagu dzuu ya hali yangu na haya niyokuhendani huku. Jeje ni muhumisi muhikizika jwa Ḅwana na ni ndugu humutsakiyee muno. D̯ubva nyakumuhumani kwenu adzeamumpe maagu, mumanye hali huiyo na apate kumungiza mojo.
23Muungu Baba jwehu na Ḅwana jwehu Yesu Kirist̯o nawamumpe naghea nywinywi wandugu, na wamumpe kutsakana nywinywi na nywinywi na kugija kuwa na faro. 24Muungu nawavodhye hawaḍe wonse wamutsakiyeo Ḅwana jwehu Yesu Kirist̯o na tsako ḍisiḍyosia.
Currently Selected:
Waefeso 6: pkb
Highlight
Copy
Compare
Share
Want to have your highlights saved across all your devices? Sign up or sign in
© 2004, Bible Translation and Literacy