Matayo 24

Yesu kat̯aḅiri mambo yadzeyohendeka ngera za mwiso

Marko 13:1-2; Luka 21:5-6

1Yesu epfoyawa na humuḍe Hekaluni akwakuchiani, hawa wanafund̯iwe wayamulot̯ea haya mambako ye *Hekalu ili aone namuna yaivyo mema. 2Yesu kawambukuya kawamba, “Uriye ntamukwakuyayowani wemawe? Ela hachi nyakumwambiani, ntakukudzasaa iwe hat̯a modza dzuu ya iwe ḍingine!”

3Ḅaad̯aye Yesu ewa kakaa chihako Murima wa Mizeituni. Wanafund̯iwe wamwendea wakiwa wao heket̯u na wamuuza wamwamba, “Ḅwana, aya mambo uhwambiiyeyo yanahendeka ngera ga? Kunawa kihambwiizo ga cha kuyanga kwamba ngera ya kuuja kwako na mwiso wa lumwengu vimaafika?” 4Yesu kawambukuya kawamba, “Manyani muntu atsekudzamwaarya. 5Koro wenji wadzadzifwariza kudza kwa sari ḍyangu wakyamba, ‘Mimi ndimi huyu *Masiya.’ Nao wadzawaarya wantu wenji muno. 6Kudzajumuka viha hapfa na hapfaḍe. Vingine vidzajwanigwa hafufi nanywi na vingine mudzavisikia maagu ḅasi. Ela namutsehuka, koro haya haya ni had̯i yahendeke, kenge si maana ya kwamba mwiso umaafika. 7Nsi zidzanuka kujwana na nsi zingine, na uhaju udzajwana na uhaju ungine. Kudzawa nzaa na mihehemo ya nsi kuntu garagara. 8Ela haya haya yonse ni dza ḍabvu t̯u ya tsungu wa kuvyaa.

9Makisa mudzagijwa na kukuntiswa d̯ina na kuyagwa. Lumwengu yuzima judzamukeva kwa dzambo ḍyangu. 10Na wenji wadzaziyekeza faro zao na wadzakevana na kuḍawanyana ḅasi ḅasi. 11Hizo hizo ngera kudzat̯upuka manabii wa nsuwe wenji na wenji, na wadzawaarya wantu wenji. 12Na kwa dzambo ḍya kwamba mazuka yanawa yenjipfa kula pfantu, wantu wenji wadzawa kwamba ntawa matsako. 13Ela huyuḍe adzeit̯isa hat̯a mwiso, kadzapfonywa. 14Na haya *Maagu Mema dzuu ya Uhaju wa Mbinguni yanasumwiijwa lumwengu yuzima ili kula kyeet̯i kiyasikie, ndipfo rhefu, mwiso wa lumwengu unakudza.

15Mudzaona kija cha unanzi wa kinyaya kisumamiswa Hekaluni. *Nabii D̯anieli ewa kanena dzuu ya hiki hiki kija. (Wewe musomai, imuka maanaye!) 16Ḅasi mudzepfokiona, hawaḍe weo ḍyimbo ḍya Yud̯aya nawad̯aramiye mirimani. 17Huyuḍe awee paani dzuu natsesuka anjie nyumbani akahwae vijavye. 18Na wala muntu awee nkondeni natseuja nyumbani kwendahwaa kotiḍye. 19Hizo hizo ngera, wake weo waziho na weokwamusani wadzakunta d̯ina muno! 20Hat̯a yombani kwamba hizi hizi nd̯arama zitseewa ngera ya sika ambu na nsiku ya *Sabato. 21Koro kudzakudza ngera ya d̯ina nkuu muno isiyodzaonekana hangu kuumbwa kwa lumwengu, na wala ntakukwakudzaonekana d̯ina ingine nkuu dzeyohiyo. 22T̯ambere hizo hizo nsiku ntazindehendezwa mfufi, ntakundeewa jwa kupfona. Ela kwa dzambo ḍya watsanwa wa Muungu, hizo nsiku zihendezwa mfufi.

23Ndookomu yuḍejwonse adzeemwamba, ‘T̯ayowani, huyuno *Kirist̯o,’ ambu, ‘Huyuḍe hapfaḍe,’ manyani mutsemuhikiza. 24Koro kudzat̯upuka manabii wa nsuwe na wantu wadzeodzihana Kirist̯o. Wadzahenda mafara ya kumakisa na kuyanga vihambwiizo garagara, ili t̯ambere indewezekana waweze kuwaarya hat̯a hawa watsanwa wa Muungu. 25D̯ubva chimizani, haya haya mambo nimayamwambia d̯ura yasidzahendeka.

26Ndookomu yuḍejwonse adzeemwamba, ‘Huyu Kirist̯o ka hukuḍe yuwandani,’ wala namutsemufwanya. Ambu akimwamba, ‘Huyu Kirist̯o ka humu chumbani,’ namutsemuhikiza. 27Koro dza hiviḍe vya yupfepfe jwivyonamwala jukayangaza hangu muyao dzuwa mumpaka mutso dzuwa, ndivyo kudza kwangu mimi *Mwana jwa Ad̯amu kudzevyowa. 28Kula kwipfo na kivimba, makutsu yanaundukizika.

29Hizo hizo nsiku ze d̯ina nkuu zikisia t̯u,

hiḍi dzuwa ḍinanjia kiza,

na hu mwezi unayatsa kuyangaa.

Hizi nyoha zinagwa,

na hizi mbingu zonse zinanjia sukuso.

30Makisa kudzaonekana mbinguni hichi kihambwiizo cha kuyanga kudza kwangu mimi Mwana jwa Ad̯amu. Hapfo wantu wonse wa vyeet̯i vya lumwengu wadzaiya na kudziut̯i. Wadzamuona Mwana jwa Ad̯amu akidza na nguvu na marembo makuu kuyawa mawinguni. 31Jeje kadzawahuma malaikawe na saut̯i ya t̯arumbet̯a nkuu, nao wadzawat̯ut̯aisa wantuwe wonse awatsaniyeo. Wadzawat̯ut̯aisa kuyawa mpembe zonse za lumwengu, hangu ḍanda modza ya huju lumwengu hat̯a ḍanda ingine.”

Yesu kasumwiiya inganyo ḍya mutini

Marko 13:28-31; Luka 21:29-33

32Makisa Yesu kawasumwiiya inganyo kawamba, “Dziyongweezeni kuyawana na muhi wa mutini. Mwipfonauona uḅaa magomba manana, munakwamba ngera ya dzuwa imaafika. 33Dza vivyo mudzepfoyaona haya mambo nimwambiiyeyo yamaḍabva kuhendeka, ḅasi ni mumanye kwamba Mwana jwa Ad̯amu kamaawa muḍyangoni. 34Hachi nyakumwambiani, hichi hichi kivyazi#24:34 Haya matsoro ya Kiyunani pia yanaweza kuwa na maana ya kyeet̯i. ntakinasia chonse kaḅila haya haya yonse nimwambiiyeyo ntayadzahendeka. 35Mbingu na nsi vinasia, ela vyuuwo vyangu ntavinasia meshi.”

Ntaku amanyiye saa ya kudza kwa Mwana jwa Ad̯amu

Marko 13:32-37; Luka 17:26-30, 34-36

36Yesu kagija kunena kamba, “Ela ntaku muntu yuḍejwonse aimanyiye hiyo hiyo nsiku wala saa. Hat̯a hawa malaika na huyu Mwana, nao pia ntawaidzi.#24:36 Matsoro yangine ya Kiyunani ntayakuhadza Mwana. Koro aimanyiye hiyo hiyo nsiku ni Baba jeje heket̯u.

37Ngera ya kudza kwa Mwana jwa Ad̯amu, wantu wadzahendeka dza hiviḍe wevyohendeka ngera ye zuruwa ya Nuhu. 38Koro hizihiziḍe ngera wantu wambijwa, ela wakaiya raha ya lumwengu: Kuḍya na kunwa, kuhwaa wake na kuyoza wanawake wao, mumpaka hiḍe nsiku ya Nuhu anjiiyeyo humuḍe Safinani. 39Na wantu ntawakuhambuya kwamba kujwakuhendekani, mumpaka hi zuruwa idzepfoikiwayaga madzi tswee. Ndookomu hat̯a kudza kwa Mwana jwa Ad̯amu kudzawa dzevihivi.

40Wantu wawii wadzawa wakihenda kazi nkondeni. Mumodza kadzahwajwa na huyu yungine kadzayatswa. 41Wake wawii wadzawa kupaazani pfamodza. Mumodza kadzahwajwa na huyu yungine kadzayatswa. 42Ndookomu nyakumwambiani mumire, koro ntamuidzi hi nsiku ya huyu Ḅwana jwenu adzeyokudza.

43Natsaka muviimuke hivi: T̯ambere muntu andeemanya kwamba mwivi njwakudza saa nyengani za nasiku amuvunziye hi nyumba, hachi nkandeyaa. Andeemira siku muzima ili hi nyumbaye itsekudzavunzwa. 44Ndookomu nanywi pia ni had̯i muwe t̯ayari, koro Mwana jwa Ad̯amu anakudza saa musiyoit̯aria.

Muhumisi muhikizika

Luka 12:41-48

45D̯ubva muhumisi mwema na eye muhikizika ni dza yu? Ni huyuḍe jwa kwamba huyu ḅwana jwakwe anaweza kumumpa muzigo wa kuit̯unza hi nyumbaye na kuwapfa chakuḍya hawa wantu wa hapfaḍe balabalani. 46Saa ya huyuḍe ḅwana adzeyouja na akiona kwamba huyuḍe muhumisi kahenda kazi nyema, huyu muhumisi anapata t̯ubvo. 47Hachi nyakumwambiani, huyu ḅwana jwakwe anamumpa huyo huyo muhumisi mamulaka dzuu ya kula kintu echonacho. 48Ela ikiwa kwamba huyu muhumisi ni muntu asiye maana, anadzingiza kut̯arani kwamba huyu ḅwana jwakwe nkakwakudza haraka. 49Ndookomu anaḍabva kudziwabigia ḅasi hawa wahumisi wenziwe na kudzingiza jila za kuḍya na kuruma pfamodza na warumi wenziwe. 50D̯ubva nsikuye huyu ḅwana jwakwe kadzagala, saa ya huyu muhumisi asiyoit̯aria kwamba kakudzani! 51Hachi hukumu adzeyomumpa anamuḅaaḅaa kafu, na anamuhenda dza hiviḍe vya wantu wambiimbii wevyonahendegwa! Huko huko adzekowekwa kadzaiya na kurhigha magego.”#24:51 Haya matsoro ya Kiyunani pia yanaweza kuwa na maana ya kwamba: huko huko kudzawa chiiyo na kurhigha magego.

Currently Selected:

Matayo 24: pkb

Highlight

Copy