Marko 11

Yesu kanjia Yerusalemi na dheli

Matayo 21:1-11; Luka 19:28-40; Yohana 12:12-19

1Yesu na wanafund̯iwe wepfowakyenda Yerusalemi, wafika hafufi na Betifage na Betania, midzi iyo Murima wa mihi ya Mizeituni. Yesu kahuma wanafund̯iwe wawii usoni 2na kawamba, “Endani huḍe mudzi wiwo usoni yenu. Mukwakuunjiani t̯u, munaona mwana hare afungijwe, asiyedzapfajwa ni muntu yuḍejwonse. Mufunguyeni mumuniyeheye. 3Na yuḍejwonse adzeyemuuza maana mwiyokumufungwiiyani, nywinywi mwambeni, ‘Ḅwana ana shuuli nae, kisa anamugalicha saambi.’ ”

4Hawa wanafund̯i wenda na waona mwana hare afungijwee pfantu pfa musita, nze ya muḍyango wa nyumba, nao wamufunguya. 5Kwiwa wantu weosumama hafufi. Nao wawauza hawa wanafund̯i wawamba, “Ayo mwana hare mwakumufungwiiyani?” 6Nao wawambukuya dza viviḍe vya Yesu awambiiyevyo. Na hawaḍe wantu wawayatsa wagonzowa na huyu mwana hare.

7Wamupfiika huyu mwana hare kwa Yesu. Wazihandika hizi nkanzu zao dzuu ya huyu mwana hare, kisa Yesu kapfaa kakaa chihako. 8Wantu wenji wahandika nkanzu zao mutsangani, na wangine wahandika mahambi ya mihi yakentejweyo makondeni, kumukaraḅisha Yesu. 9Hawaḍe weokuwa usoni pfamodza na hawaḍe weokuwa nyuma, wenda na kuḅaa madzwi wakyamba,

“Muungu ashad̯we!#11:9 Haya matsoro ya Kiyunani yanakwamba, ‘Hosana,’ na hichi hichi chuuwo kitumika na maana ya shad̯u.

Jeje awee kudzani kwa sari ḍya Ḅwana

kavodhyegwa!

10Uhaju wa bibi jwehu D̯aud̯i wiwokudzani

uvodhyegwa!

Hakika Ḅwana Muungu awee dzuu nashad̯we!”

11D̯ubva Yesu kanjia mudzi wa Yerusalemi, kenda mumpaka humuḍe Hekaluni na kayowa kula kintu urembo. Ela kwa kwamba dzuwa ḍiwa ḍimaatswa, kenda Betania pfamodza na hawa wanafund̯iwe kumi na wawii.

Yesu kaḍuwa muhi wa mutini

Matayo 21:18-19

12Chamukoche wepfoyawa Betania wakwakugalani, Yesu kagijwa ni nzaa. 13Kaona muhi wa mutini na jwa kuye wiwokuwa na magomba menji. D̯ubva kawendea hafufi akayowe kwamba anaweza kupata matunda yaḍeyonse. Ela epfoufika nkakuona kintu, ishinu kaona magomba mahupfu, koro ntaiwa ngera ya mitini ya kuvyaa. 14Ndookomu Yesu kawamba hu mutini, “Silani kutseewa yuḍejwonse jwa kuḍya tunda ḍyako kawii meshi.” Na epfonena hivi, hawa wanafund̯iwe wewa wamusikia.

Yesu kad̯aramisa waguzi Hekaluni

Matayo 21:12-17; Luka 19:45-48; Yohana 2:13-22

15Wepfofika Yerusalemi, Yesu kenda kanjia humuḍe Hekaluni na kaḍabva kuwad̯aramisa na kuwayavya waguzi na waguya vija weokuwa humuḍe kuzimu. Kazivenuya-venuya hizi meza za hawa wakoranya fwedha, na kavigisa-gisa hivi viti vya hawa weowakiguza ndiwa. 16Na nkakuruhusu yuḍejwonse atsukuye kiḍechonse cha kuguza na achiye nacho na humuḍe uani mwe *Hekalu. 17Makisa kawayongweeza wantu kawamba, “Vyoregwa kwamba, ‘Nyumba yangu inawa nyumba ya mayombo kwa wantu wa vyeet̯i vyonse.’ Ela nywinywi muihendeza mpango ya wadhara!”

18Hawa wakohani wakuu na waalimu wa *Sharia wepfosikia hivi vya Yesu ahendeyevyo, waḍabva kulacha njia ya kumuyaga. Ela wekimushooga kwa kwamba t̯ut̯a yonse ya wantu iwa itsakizwa ni haya mayongweezoye. 19Ipfofika mioro, Yesu na wanafund̯iwe wauyawa hu mudzi.

Yongweezo dzuu ya huḍe mutini unyuukiyeo

Matayo 21:20-22

20Chamukoche magurani, Yesu na wanafund̯iwe wepfowakichia wauona huḍe mutini unyuuka wonse mumpaka mizini. 21Pet̯ero kakumbuka hiviḍe vihendekeyevyo na kamwamba Yesu, “Ḅwana, uyowe huḍe mutini uuḍuwiyeo, unyuuka tswee!” 22Yesu kawambukuya kawamba, “Wani na faro kwa Muungu. 23Hachi nyakumwambiani, yuḍejwonse ahikiziyee kwamba aneneevyo vinahendeka, na akitsaawa na kajela iḍeyonse mojoni mwakwe, anaweza kuwamba hu murima huu, ‘Kuka wende ukagwe ḅaharini.’ Navyo vinahendeka ḍugha. 24Ndiyo maana nyakumwambiani kwamba, kiḍechonse mwichonayomba, hikizani kwamba mwisakukipfokea, nacho munakipata ḍugha. 25Na kula mwipfonasumama kuyomba, mukiwa na ngongea na yuḍejwonse, ni had̯i muyatsiyane, ili Baba jwenu jwa mbinguni nae amuyatsiye mazuka yenu.”#11:25 Matsoro yangine ya Kiyunani yana kiḍinku cha 26 chambiyecho: Ela mukitsawayatsia wenzenu, ḅasi hat̯a Baba jwenu jwa mbinguni nkawezi kumuyatsia mazuka yenu.

Yesu kauzwa dzuu ya mamulakaye

Matayo 21:23-27; Luka 20:1-8

27Yesu na wanafund̯iwe wenda Yerusalemi kawii. Na epfoakyenenda humuḍe Hekaluni, hawa wakohani wakuu, waalimu wa Sharia na wazee wangine wamwendea. 28Wamuuza wamwamba, “Aya mambo wiyokuhendani, kwakuyahendani na mamulaka ya ga? Ambu akupfiye wewe hayo hayo mamulaka ni ga?” 29Yesu kawambukuya kawamba, “Nami natsaka kumuuza swali. Mukinyambukuya nami namwambia kwamba haya haya mambo nyakuyahendani na mamulaka ya ga. 30Haya t̯anyambiani, amumpiye Yohana mamulaka ya kut̯opya wantu ni ga? Ni Muungu ambu ni wanaad̯amu? Nyambukuyani!”

31Hawaḍe wantu waḍabva kuḍaat̯iana wao na wao wakyamba, “Haya hwambedze? Hukyamba mamulaka ya Yohana ya kut̯opya wantu yayawa kwa Muungu, anahwamba, ‘Mani d̯ubva kut̯i ntamukumuhikiza?’ 32Na kawii hukyamba mamulaka ya Yohana ya kut̯opya wantu yayawa kwa wanaad̯amu, vinawadze?” Wekiwashooga hawa wantu, koro wonse wewa wahikiza kwamba Yohana ni *nabii. 33Ndookomu mwiso wamwambukuya Yesu wamwamba, “Ntahudzi!” Nae kawamba, “Wala nami simwambiye kwamba, haya haya mambo nyakuyahendani na mamulaka ya ga!”

Currently Selected:

Marko 11: pkb

Highlight

Copy