Marko 13

Yesu kat̯aḅiri mambo yadzeyohendeka ngera za mwiso

Matayo 24:1-2; Luka 21:5-6

1Yesu epfoyawa na humuḍe *Hekaluni akwakuchiani, mumodza jwa hawa wanafund̯iwe kamwamba, “Mwaalimu, t̯ayowa namuna ya haya mawe ye Hekalu na mambakoye yaivyo mema na makuu!” 2Yesu kamwamba, “Gula haya mambako ni mema na ni makuu ḍugha, ela hachi nyakumwambiani, ntakukudzasaa iwe hat̯a modza dzuu ya iwe ḍingine!”

3Ḅaad̯aye Yesu ewa kakaa chihako Murima wa Mizeituni wiwoukiyowana ne Hekalu. Pet̯ero, Yakobo, Yohana na And̯erea wamwendea wakiwa wao heket̯u na wamuuza wamwamba, 4“Ḅwana, aya mambo uhwambiiyeyo yanahendeka ngera ga? Ni kihambwiizo ga kidzechoyanga kwamba haya haya mambo yamaawa hafufi kuhendeka?”

5D̯ubva Yesu kawamba, “Manyani muntu atsekudzamwaarya. 6Koro wenji wadzadzifwariza kudza kwa sari ḍyangu wakyamba, ‘Mimi ndimi huyu *Masiya.’ Nao wadzawaarya wantu wenji muno. 7Kudzajumuka viha hapfa na hapfaḍe. Vingine vidzajwanigwa hafufi nanywi, na vingine mudzavisikia maagu ḅasi. Ela namutsehuka, koro haya haya ni had̯i yahendeke, kenge si maana ya kwamba mwiso umaafika. 8Nsi zidzanuka kujwana na nsi zingine, na uhaju udzajwana na uhaju ungine. Kudzawa nzaa na mihehemo ya nsi kuntu garagara. Ela haya haya yonse ni dza ḍabvu t̯u ya tsungu wa kuvyaa.

9Ela manyani! Koro wantu wadzamugija na kumupfiika magasani, na mudzabigwa malucha *masunagogini. Na kwa dzambo ḍyangu, mudzasit̯akigwa usoni ya mahaju na wat̯awala wangine, nanywi mudzayavya ushuhuḍa dzuu yangu kwao. 10Na haya *Maagu Mema ni had̯i d̯ura yasumwiijwe hat̯a kwa wantu wa vyeet̯i vingine vyonse humu lumwenguni kaḅila mwiso ntaudzafika. 11Mudzepfogijwa na mukipfiikwa na nguvu magasani, wala namutsehangaika na mat̯aro kwamba mwendadziheheadze. Hiyo hiyo saa ikifika, nywinywi nenani kiḍechonse mudzechopfegwa kunena ni Muungu. Koro sinywi mudzeowa kunenani, ela adzeewa kunenani ni Ruhu Mudheru. 12Wantu wadzawaḍawanya wandugu zao wakayagwe, na wavyazi wadzawaḍawanya wana wao wakayagwe. Wana nao wadzawagarukia wavyazi wao na kuwaḍawanya wakayagwe. 13Na wantu wenji wadzamukeva kwa dzambo ḍyangu. Ela huyuḍe adzeit̯isa hat̯a mwiso, kadzapfonywa.

Kunangwa kwa Yerusalemi

Matayo 24:15-28; Luka 21:20-24

14Mudzaona kija cha unanzi wa kinyaya kisumama pfantu kisipfomala. (Wewe musomai, imuka maanaye!) Mudzepfokiona, hawaḍe weo ḍyimbo ḍya Yud̯aya nawad̯aramiye mirimani. 15Huyuḍe awee paani dzuu natsesuka anjie nyumbani akahwae kija kiḍechonse. 16Na wala muntu awee nkondeni natseuja nyumbani kwendahwaa kotiḍye. 17Hizo hizo ngera, wake weo waziho na weokwamusani wadzakunta d̯ina muno! 18Hat̯a yombani kwamba haya haya mambo yatsehendeka ngera ya sika. 19Koro kudzakudza ngera ya d̯ina nkuu muno isiyodzaonekana hangu kuumbwa kwa lumwengu, na wala ntakukwakudzaonekana d̯ina ingine nkuu dzeyohiyo. 20T̯ambere Ḅwana nkandezihendeza mfufi hizo hizo nsiku, ntakundeewa jwa kupfona. Ela kwa dzambo ḍya watsanwawe, hizo nsiku kazihendeza mfufi.

21Ndookomu hiyo hiyo ngera, yuḍejwonse adzeemwamba, ‘T̯ayowani, huyuno *Kirist̯o,’ ambu, ‘Huyuḍe hapfaḍe,’ manyani mutsemuhikiza. 22Koro kudzat̯upuka manabii wa nsuwe na wantu wadzeodzihana Kirist̯o. Wadzahenda mafara ya kumakisa na kuyanga vihambwiizo garagara, ili t̯ambere indewezekana waweze kuwaarya hawa watsanwa wa Muungu. 23D̯ubva nywinywi chimizani, haya haya mambo nimayamwambia d̯ura yasidzahendeka.”

Kudza yupfii kwa Mwana jwa Ad̯amu

Matayo 24:29-35; Luka 21:25-33

24Yesu kagija kunena kamba, “Ela hizi nsiku ze d̯ina nkuu zikisia,

Hiḍi dzuwa ḍinanjia kiza,

na hu mwezi unayatsa kuyangaa.

25Hizi nyoha zinagwa,

na hizi mbingu zonse zinanjia sukuso.

26Hapfo ndipfo wantu wonse wadzepfomuona mwana jwa Ad̯amu akidza na nguvu na marembo makuu mawinguni. 27Kadzawahuma malaikawe, nao wadzawat̯ut̯aisa watsanwa wakwe wonse kuyawa mpembe zonse za lumwengu.”

28Makisa Yesu kawasumwiiya inganyo kawamba, “Dziyongweezeni kuyawana na muhi wa mutini. Mwipfonauona uḅaa magomba manana, munakwamba ngera ya dzuwa imaafika. 29Dza vivyo, mudzepfoyaona haya mambo nimwambiiyeyo yamaḍabva kuhendeka, ḅasi ni mumanye kwamba Mwana jwa Ad̯amu kamaawa muḍyangoni. 30Hachi nyakumwambiani, hichi hichi kivyazi#13:30 Haya matsoro ya Kiyunani pia yanaweza kuwa na maana ya kyeet̯i. ntakinasia chonse kaḅila haya haya yonse nimwambiiyeyo ntayadzahendeka. 31Mbingu na nsi vinasia, ela vyuuwo vyangu ntavinasia meshi.”

32Yesu kagija kunena kamba, “Ela ntaku muntu yuḍejwonse aimanyiye hiyo hiyo nsiku wala saa. Hat̯a hawa malaika na huyu Mwana, nao pia ntawaidzi. Koro aimanyiye hiyo hiyo nsiku ni Baba jeje heket̯u.”

Wani matso

Matayo 24:36-44

33Yesu kawamba wanafund̯iwe, “Ndookomu nichokumwambiani ni kwamba, chimizani na muwe matso, koro ntamudzi kwamba hiyo hiyo ngera inakudza ari! 34Kudza kwa Mwana jwa Ad̯amu kunaweza kuinganywa na muntu anukiye nyumbani akinjia charoni. Ela asidzanuka, kamuḍama kula muhendakazijwe dzuu ye kazi eyonamala kuhenda na kamuamuru huyu mwamia muḍyango awe matso. 35Ndookomu nyakumwambiani mumire, koro ntamudzi kwamba ayu mwenye nyumba anagala saa ga. Ntamudzi kwamba anakudza kioro ambu siku kahi. Na wala ntamudzi kwamba anakudza bworu ya magura ambu nsi kucha. 36Adzepfokudza ḅwikira, manyani atsekudzamut̯onga mwakuyaani. 37Nichokumwambiani nywinywi ndicho nichokwambiani kula muntu, ya kwamba muwe matso.”

Currently Selected:

Marko 13: pkb

Highlight

Copy