Marko 15

Yesu kapfiikwa kwa Pilato

Matayo 27:1-2, 11-14; Luka 23:1-5; Yohana 18:28-38

1Ipfofika chamukoche magurani t̯u, gasa yonse ya Kiyahud̯i, hangu wakohani wakuu pfamodza na wazee wa gasa na waalimu wa *Sharia, wakaa chihako ili waone kwamba wahendedze. Hapfo wamufunga-funga Yesu na wamupfiika kwa Pilato. 2Wepfomupfiika, Pilato kamuuza Yesu kamwamba, “Wewe ndiwe ayu Haju jwa Wayahud̯i?” Yesu kamwambukuya kamwamba, “Kuvinena wewe mwenye!”

3Hawa wakohani wakuu wamusit̯aki Yesu na mambo menji na menji. 4Pilato kamuuza Yesu kawii kamwamba, “Nkukwakwambukuya chuuwo hat̯a? Aya mambo yonse weyokukusit̯akini nayo nkukwakuyasikiani hat̯a?” 5Ela Yesu nkakwambukuya chuuwo hat̯a kimodza. Ndookomu Pilato kamaka muno.

Yesu kahukumigwa kufwa

Matayo 27:15-26; Luka 23:13-25; Yohana 18:39-19:16

6Pilato ewa kabarat̯a kwamba kula jila ya *Pasaka, anafunguya mufungwa mumodza atsanijwee ni hawa wantu na akamuyatsa huru. 7Kwiwa muntu mumodza eyeakihanwa Baraba. Jeje na wenziwe wangine wewa wafungwa gerenzani kwa dzambo ḍya kujumuya fuḍyo na kuyaga wantu. 8Hi t̯ut̯a ya wantu imwendea Pilato na imwamba awahendeye hiviḍe abarat̯iyevyo kuwahendea. 9Pilato kawauza kawamba, “Munatsaka nimumufungwiiye ayu Haju jwa Wayahud̯i?” 10Pilato ewa kanena hivi koro ewa kahambuya kwamba hawa wakohani wakuu wekimusit̯aki Yesu kwa kwamba wekimuonea wivu.

11Ela hawa wakohani wakuu waingiza nsunziirya hi t̯ut̯a ili wamuyombe Pilato kwamba amufunguye Baraba ḅad̯ala ya Yesu. 12Pilato kawauza kawii kawamba, “Mani ayu Yesu mwiyenamuhana Haju jwa Wayahud̯i, munatsaka nimuhendedze?” 13Na wonse waholoka wamba, “Mupfatsike!” 14Ela Pilato kawauza kawamba, “Kwa dzambo ga? Munatsaka nimupfatsike, munamba kahenda tsowa ga?” Ela wao wongeza kuḅaa madzwi wakyamba, “Napfatsikwe! Napfatsikwe!”

15Ndookomu kwa kwamba Pilato ekitsaka kuitsakiza hi t̯ut̯a ya wantu, kamuwafungwiiya Baraba kuyawa gerenzani. Kisa kaamuru kwamba Yesu abigwe na lucha. Na epfobigwa akisa, kamuyavya akapfatsikwe.

Hawa asikari wamubaladhaiya Yesu

Matayo 27:27-31; Yohana 19:2-3

16Makisa hawa asikari wamuhwaa Yesu wenda nae uani kwe nyumba ya huyu liwali kwikokuwa hi nkambi yao, na wahanana kit̯aro kizima. 17Wamuvwika lot̯a ḍya ranji ya zambarau, kisa waelekanya kiyemba cha miwa na wakimuvwika kitswani. 18Wakisa waḍabva kumukedhya na baladha wakimwamba, “Kwa naghea, Haju jwa Wayahud̯i?” 19Kisa wamubiga nkaka za kitswa na kumukamia mahe, na wamuvunzia nkuhi kwa kumubaladhaiya. 20Wepfomubaladhaiya hat̯a wakifuruma, waḍimuvuya hiḍi lot̯a ḍya ranji ya zambarau na wazimuvwika hizi nguoze. Makisa wanuka nae kwenda wakamupfatsike.

Kupfatsikwa kwa Yesu

Matayo 27:32-44; Luka 23:26-43; Yohana 19:17-27

21Wepfowakyenda wakamupfatsike, wat̯ongana na muntu mumodza jwa Ukirene eyeakihanwa Simioni. Ewa ni babajwe Alekizanda na Rufasi. Ewa kayawa makondeni, na hawa asikari wepfomuona, wamusharut̯isa autsukuye hu muhi wa mpatsa wa Yesu. 22Wenda na Yesu mumpaka pfantu pfepfopfakihanwa Goligata, yani, “Pfantu pfa pfaa ḍya Kitswa.” 23Wamumpa mvinyo itsanganyijweyo na manemane, ela kadziza kuinwa. 24Wamupfatsika Yesu muhini mwa mpatsa, makisa wazigawana hizi nguoze kwa kuzibigia kura.

25Wamupfatsika Yesu muhini mwa mpatsa saa ntahu za magura. 26Wahwaa kiḅao chorejwecho haya masit̯aki yakwe na wakibiga hapfaḍe muhini mwa mpatsa, dzuu ye kitswache. Hichi kiḅao chamba, “Haju Jwa Wayahud̯i.” 27Na pia hawa asikari wapfatsika wevi#15:27 Na pia hichi hichi chuuwo kwa Kiyunani kinaweza kuwa na maana ya mabaud̯a. wawii pfamodza na Yesu. Mumodza wamupfatsika mukono kuyume wa Yesu, na yungine wamupfatsika mukono tsonso.#15:27 Matsoro yangine ya Kiyunani yana kiḍinku cha 28 chambiyecho: Na hapfo ndipfo hiviḍe vyorejwevyo matsoroni vikit̯imia. Koro haya matsoro yamba, “Kawekwa kit̯aro kimodza na wanabvise.”

29Wantu weowakichia na hafufi wekimwambia vyuuwo vya kinyaya na kusukusa vitswa vyao wakyamba, “Dzaambia nkukwamba unaweza kuikomoa ai *Hekalu na uimbake na nsiku ntahu? 30Mani nkwadzipfonya usuke na apfo muhini mwa mpatsa!”

31Hawa wakohani wakuu na waalimu wa Sharia nao pia wamubaladhaiya Yesu wakyambana, “Kapfonya wangine ela nkawezi kudzipfonya mwenye! 32At̯i ekidzihana *Kirist̯o, Haju jwa Waisiraeli. Mani nkaasuka na apfa muhini mwa mpatsa hi saasambi ili hupate kumuhikiza!” Hat̯a hawaḍe wapfatsikijweo pfamodza nae nao pia wamubaladhaiya.

Kufwa kwa Yesu

Matayo 27:45-56; Luka 23:44-49; Yohana 19:28-30

33Ipfofika saa ntandahu za musikahi, nsi yonse ifungiiya kiza cha go mumpaka saa kenda. 34Na ipfofika saa kenda, Yesu kaḅaa idzwi kuu kamba, “Eloi, Eloi, lama sabakitani?” Yani, “Muungu jwangu, Muungu jwangu, kut̯i kuniyatsa?”

35Wantu wangine weosumama hapfaḍe hafufi wepfosikia hivi vya Yesu aneneevyo wamba, “T̯asikiani! Kakumuhanani *nabii Eliya.” 36Mumodza jwao kad̯arama haraka kenda kahwaa yavuyavu kaḍilingila na muhi. Makisa kaḍit̯opya kwa mvinyo ibushaiyeyo na kaḍimugijia Yesu ili anwe na kamba, “Nahuyowe kwamba Eliya anakudza anamususya na apfa muhini mwa mpatsa ambu hat̯a!” 37Makisa Yesu kaḅaa idzwi kuu kawii kisa kahuna nsoho.

38Pfapfo, huju yukangadzi jufungijwejo humuḍe Hekaluni juḅaika na kahi, hangu dzuu mumpaka nsii. 39Huyu mukuu jwa asikari eyesumama hapfaḍe usoni ya Yesu, epfoona namuna ya Yesu ahuniyevyo nsoho kamba, “Hachi huyu ewa ni Mwana jwa Muungu ḍugha!”

40Kwiwa na wake weowakichimiza na jwa kuye. Wangine wao wewa ni Maria Magid̯alena, Maria mamajwe aḍe Yakobo muḍoḍo na Yusufu,#15:40 Hapfa na 15:47 haya matsoro ya Kiyunani yanakwamba Yose. pfamodza na Salome. 41Hawa ni wake weowakimuuḅa Yesu na kumuhumikia epfokuwa ḍyimbo ḍya Galilaya. Kwiwa na wake wangine wenji wendeyeo Yerusalemi pfamodza nae.

Kuzikwa kwa Yesu

Matayo 27:57-61; Luka 23:50-56; Yohana 19:38-42

42Iwa imaafika mioro, nsiku ya maelekanyo ya kuindiiya *Sabato. 43D̯ubva kwiwa muntu mumodza jwa kuyawa mudzi wa Arimataya eyeakihanwa Yusufu. Ewa muzee jwa gasa ya Kiyahud̯i eyeakihilwa muno. Jeje mwenye ekiindiya kudza kwa Uhaju wa Muungu. D̯ubva ḅila oga, Yusufu kamwendea Pilato na kamuyomba aupfegwe hu mwii wa Yesu. 44Pilato kamaka epfosikia kwamba Yesu ewa kamaafwa. D̯ubva kamuhana huyu mura jwa hawa asikari na kamuuza kwamba Yesu ewa kamaafwa ḍugha ambu hat̯a. 45Huyu mura kamuhakikishia kwamba Yesu ewa kamaafwa. Ndookomu Pilato kamumpa ruhusa Yusufu kwenda akauhwae hu mwii wa Yesu. 46Yusufu kaguya sand̯a na kenda kaususya hu mwii wa Yesu na hapfaḍe muhini mwa mpatsa na kaulinga-linga ne sand̯a. Kisa kenda kaungiza kwa mbeera it̯ukurijweyo mwambani, na kaperuya-peruya iwe kuu kaufinikiza hu muḍyango we mbeera. 47Maria Magid̯alena na Maria mamajwe Yusufu wewa wapfaona hapfaḍe pfa Yesu azikijwepfo.

Currently Selected:

Marko 15: pkb

Highlight

Copy