Lukà 13
13
E jè be woa ɖɔ̀lì èdɛ̃
1Gà ŋua mèa, àmè ɖewo va, gblɔ̃ àlekè Pilatò wù Galileatɔ ɖewo, wàlɛbɛ kè wo le savɔa, na Yesù. 2Yesù ɖo e ŋuti na wo be: “Mì susu be Galileatɔ kèawo nyi èvuɛ̃wɔ̀tɔwo wu Galileatɔ kpɔ̀tɛawo keŋu, ye ŋuti wo kpe èfũ nènea ɖoa? 3Kpao! Mù le gblɔ̃ na mì be, ne mì mu ɖɔ̀lì èdɛ̃ òa, mìa kpata mì la crɔ̃ nènea ke. 4Àlo, àmè woènyi ŋuawo, kèwo ji Siloa be èmɔjikpɔxɔ̀ mù jè, be wùawo ye nyi èvuɛ̃wɔ̀tɔwo wu àmè kèwo keŋu lè Yèruzàlɛm be èdùa mèa? 5Kpao! Mù le to na mì be, ne mì mu ɖɔ̀lì èdɛ̃ òa, mìa kpata mì la crɔ̃ nènea ke.”
Lododo so vòti màsɛ̃kua ŋuti
6Yesù do èlo kèa na wo be: “Àmè ɖe do vòti ɖo yebe vɛ̃-gble mè. E va ji èkusɛ̃sɛ̃ lè àtia ji be yèa gbã, vɔ̀ mu kpɔ ɖekpe ò. 7Eye e gblɔ̃ na vɛ̃gblèjikpɔtɔa be: 'Kpɔɖa, èpè ètɔ̃ sɔ̃ŋu ye nyi ekèa, mù va le ji èkusɛ̃sɛ̃ lè àti kèa ji, vɔ̀a nyè mu kpɔ ɖekpe kpɔ ò. Sò è pu ànyi. Nukɛ ŋuti be la nɔ gũ ànyigbãa ɖo ò?' 8Vɔ̀ vɛ̃gblèjikpɔtɔa ɖo e ŋuti na ɛ̀ be: 'Àpetɔ, na bèa nɔ̀ ànyi lè èpè kèa cã mè kpɔ. Mù la ɖè èdo pòxla ɛ̀, mù la do kɔkɔli gɔ̃mè na ɛ̀. 9Ne èpèa trɔ eye bè sɛ̃ èkua, eŋuã e nyɔ; vɔ̀ ne mu nyi nène òa, wò teŋu na woa sò è fàa.'”
Yesù dà èdɔ̀ na nyɔ̃nù ɖe lè jɛ̃gbɔ̃zã gbè
10Yesù le fiɔ ènu lè bɔ̀bɔ̀pe ɖe lè jɛ̃gbɔ̃zã gbè. 11Nyɔ̃nù ɖe kè gbɔ̃gbɔ̃ vuɛ̃ do èdɔ̀, èpè woènyi sɔ̃ŋu, eye be xa gòbà, eye mu teŋu jɔ̀nà klua òa, lè funua. 12Ekè Yesù kpɔ ɛ̀a, e yɔ ɛ̀ va ye ɖokoe gbɔ, gblɔ̃ na ɛ̀ be: “Nyɔ̃nù, wò vò lè èdɔ̀lele wɔ̀a si!” 13E dà àlɔ̀ ɖo nyɔ̃nùa ji. Troloa, nyɔ̃nùa jɔ̀, eye e tɔ gogo nana Mawu. 14Vɔ̀a, bɔ̀bɔ̀pea be ègaa, do àdɔ̀mèze, ɖo Yesù dà èdɔ̀ na àmè lè jɛ̃gbɔ̃zã gbè. E gblɔ̃ na àmèha a be: “Ŋùkèkè àdɛ̃ sɔ̃ŋu ye lè, ne àmè bèa wɔ̀ èdɔ. Mì va ne woa dà èdɔ̀ na mì lè ŋùkèkè ŋuawo ji, vɔ̀a mu gbà nyi lè jɛ̃gbɔ̃zã gbè ò.” 15Vɔ̀a Tɔhonɔ̀ ɖo e ŋuti na ɛ̀ be: “Àyèmènuwɔ̀tɔwo! Mìa dòmètɔ kɛ ye mu ɖènà èkà yebe ènyì àlo èsɔ-àkɛtɛ lè ènuɖùpe, kplɔ̀nà ɛ̀ yìnà ne bèa nù èsì lè jɛ̃gbɔ̃zã gbè ò? 16Eye nyɔ̃nù kèa, kè nyi Abràham be jìjimèvia, Satana bla ɛ̀, èpè woènyi sɔ̃ŋu ye nyi ekè. Mu jè be woa tu ì èkà lè jɛ̃gbɔ̃zã gbè òa?” 17Yesù be ènyà kèawo na be èŋù kpɛ̃ àmè kèwo kpata sitè ɖo e ŋutia. Vɔ̀a, àmèha a kpata kpɔ jìjɔɛ so ŋùdãdɔ kèwo keŋu be wɔ̀awo ŋuti.
Lododo so àti be èku ŋuti
(Màt 13.31-32; Mrk 4.30-32)
18Yesù gblɔ̃ be: “Nukɛ ye Mawu be fìɔdua ɖì ò? Nukɛ ye mù la sɔ ɛ̀ sɔ̀ kudo ò? 19E lè sìgbè lokòku, kè àmè ɖe do ɖo yebe àbɔ mè nène. E mìɔ̃, sĩ, va trɔ zũ àti, eye xèviwo va wɔ̀ àtɔ̃ ɖo yebe àlɔ̀zɛ̃wo mè.”
Lododo so mawɛhuãnu ŋuti
(Màt 13.33)
20Yesù gbà gblɔ̃ be: “Nukɛ ye mù la sɔ Mawu be fìɔdua sɔ̀ kudo ò? 21E lè sìgbè *mawɛhuãnu kè nyɔ̃nù ɖe sɔ do èwɔ jijenu ètɔ̃ mè, kaka mawɛa keŋu-keŋu hũaa nène.”
Èmɔ kè nu hùea
(Màt 7.13-14; 21.23)
22Yesù le to èdù kudo kɔpewo mè, le fiɔ ènu, eye e tùtà Yèruzàlɛm. 23Àmè ɖe biɔ ɛ̀ be: “Àpetɔ, nyàwo be nyi be àmè vi ɖe kpò ye la gãa?” Yesù ɖo e ŋuti na ɛ̀ be: 24“Mì drɛ̃ àvũ ne mìa to àgbo kè xixaa nu, ɖo e mè; ɖo mù le to na mì be, àmè sùgbɔ la ji be yèwoa ɖo e mè, gãke wo mu la teŋu ì ò.”
25“Đo ne àxuetɔa va sitè, eye be tu èhɔ̃a, mì la ci e godo, la nɔ pò èhɔ̃a, la nɔ gblɔ̃ be: 'Àpetɔ hũ èhɔ̃a na mi.' Vɔ̀, e la ɖo e ŋuti na mì be: 'Nyè mu jèsi fikè mì so ò.' 26Eŋuã mì la gblɔ̃ na ɛ̀ be: 'Mi ɖù, eye mi nù kudo wò e! Wò fiɔ ènu lè miabe èdùgbowo nu e!' 27Vɔ̀a, e la ɖo e ŋuti na mì be: 'Nyè mu jèsi fikè mì so ò. Àɖìkunuwɔ̀tɔwo, mì bu lè gbɔ nyè!' 28Ne mì kpɔ Abràham, Izàk ku Yakɔb, kudo Mawu be gblɔ̃ɖɛtɔwo keŋu lè Mawu be fìɔdua mè, vɔ̀ wo sɔ mìawo ya dãŋùgbe ɖo e godoa, eŋuã mì la fã àvi, la ɖù àɖuklui. 29Àmèwo, la so èwèzɛ̃pe ku èwèɖoxɔ̀pe, àvego kudo àpùgo la va nɔ̀ ànyi lè àzã-nuɖùpe, lè Mawu be fìɔdua mè. 30Kpɔɖa, àmè ŋùgbesi ɖewo lè, kèwo la va nyi ŋùkɔ̀gbetɔwo, eye ŋùkɔ̀gbetɔ ɖewo lè, kèwo la va trɔ zũ ŋùgbesiwo.”
Yesù be lɔ̃lɔ̃ na Yèruzàlɛmtɔwo
(Màt 23.37-39)
31Gà ŋua mè tututua, Farizì ɖewo va gblɔ̃ na Yesù be: “To ne wòa jo lè fikèa, ɖo Herod lè ji be yèa wù wò.” 32Yesù gblɔ̃ na wo be: “Mì yì to na wɛ̀tɛ̀klɛ̀ ŋua be: 'Mù le nyà gbɔ̃gbɔ̃ vuɛ̃wo, le dà èdɔ̀ na àmèwo, egbè kudo èsɔ̀, eye lè ŋùkèkè ètɔ̃gɔ̃a gbèa mù la wu èdɔ nyèa nu.' 33Vɔ̀a, mù ɖo la zɔ̃ èmɔ egbè ku èsɔ̀, kudo nyìsɔ̀, ɖo mu jè be Mawu be gblɔ̃ɖɛtɔ ne ku lè tèpe bu wu Yèruzàlɛm ò.”
34“Yèruzàlɛmtɔwo, Oò, Yèruzàlɛmtɔwo! Mì, àmè kèwo wùnà Mawu be gblɔ̃ɖɛtɔwo, dànà èkpe sɔ wùnà àmè kèwo Mawu dɔ̃ ɖoɖa mìa. Zè nenè ye mù jro, la bɔ̀ mì ɖo gbɔ nyè, sìgbè àlekè kòklo-nɔ bɔ̀nà èviawo ɖo yebe àwàwo gɔ̃mèa nène, vɔ̀ mì mu jro ò? 35Kpɔɖa, wo la hũ gble mìabe àxuea ɖɛ. Mù le to na mì, mì mu gbà la kpɔ mù ò, kaka va sɛ̃ gà kè mè mì la gblɔ̃ be: 'Wo tusì na àmè kè gbãnà lè Tɔhonɔ̀ be nyikɔ mèa.'”
Currently Selected:
Lukà 13: GEN
Highlight
Share
Copy
Want to have your highlights saved across all your devices? Sign up or sign in
Mina Bible © Bible Society of Togo, 2014.
