Chɔ᷄ŋ 10
10
Pɛ̄ɛ̄kōo̍ a̍ wānā ma̍ndāā lāsāa̍ o̍kɔ̄ɔ̄
1Mi̍ Chi̍i̍sū di̍mī āā, “Mī di̍mu̍l nya̍ tōnya̍a̍ wa̍la̍ŋ, wāna̍ mɛ̍i̍ pɛ̍ dīo̍o̍ le̍ lūɛ̄īyɔ̄ɔ̍ o̍ fo̍ndāŋ māndāā lāsāa̍, ndu̍yɛ̍, mbō kēēku̍ nāa̍ che᷅le̍ŋ pɛ̍, wānā ko̍ŋ, vīīnɔ̄ɔ̍ o̍ cho̍ ni̍. 2Wāna̍ ke̍e̍kū ho̍ō o̍ dīo̍o̍ mbō lūɛ̄ī yo̍, ndu̍ cho̍ wāna̍ cho̍ sāa̍ māndāa̍ wo̍ ni̍. 3Ndu̍yɛ̍, kūmbūllo̍ wāna̍ ma̍ndā di̍o̍o̍ wo̍ ō kūmbūl ndu̍ dīo̍o̍ ni̍. Wāna̍ cho̍ sāa̍ māndāa̍ wo̍, sāa̍ ndūa̍a̍ sīnā di̍ōm ndɔ̄ɔ̍. Vēēlōo̍ nda̍ dīōla̍ŋ ā pīlɛ̍ŋ pi̍lɛ̍ŋnda̍, mbō fūla̍ a̍ nda̍. 4Tē ō sōli̍ a̍ ndūa̍a̍ pɛ̍ kpo̍u̍, ō si᷄m nda̍ lāchī, ndu̍yɛ̍, mā tōl ndu̍ kɔ̄ɔ̄lī. Fo̍ndōle̍, ā sīnā di̍ōm ndɔ̄ɔ̍. 5Ā tu᷅l wa̍nā che᷅le̍ŋ kɔ̄ɔ̄lī le̍. Nyāānɔ᷄ŋndo̍ nda̍ nyāānūŋ ndu̍ ni̍, kāni̍ fo̍ndōle̍, ā si̍nā di̍ōm wānā ko̍ŋ te̍.”
6Tāle̍ Chi̍i̍sū di̍mu̍l nda̍ wo̍, ndu̍ cho̍ ho̍ō ni̍. Kɛ̍, ā sīna̍ nyɛ᷅ kpe̍e̍kpe̍i̍ o̍ wa̍ nda̍ chɔ̄mndo̍ wo̍ le̍.
Chi̍i̍su̍ cho̍ wāna̍ cha̍ā sa̍a̍ māndā wo̍ ni̍
7O̍ ko̍ŋ, mi̍ Chi̍i̍sū di̍mī vɛ̄lɛ̄ āā, “Mī di̍mu̍l nya̍ tōnya̍a̍ wa̍la̍ŋ, ya̍ I̍ cho̍ māchūāā mɛ̄ɛ̍ dīō sāa̍ kēēkū wo̍ chō nu̍a̍ā yɛ̍. 8Wānāa̍ hi᷅ŋ pāāndū ya̍ tāse̍ wa̍ kpo̍u̍, vīīya̍ nda̍ chō ni̍. Kɛ̍, sāa̍ ā ye᷄ŋ nda̍ lānī le̍. 9Ya̍ I̍ cho̍ māchūāā māā dīo̍o̍. Ndu̍yɛ̍, wānā o̍ wāna̍ ke̍e̍ku̍ o̍ ya̍ ni̍ŋ pɛ̍, ō sɔ̄la̍ pīōŋɔ̄ɔ̍. O̍ ko̍ŋ kɔ̍ɔ̍lī, ō nɔ̄lā mbō lūɛ̄ī mbō fūla̍, mbō sāālu̍ŋ nyɛ̍ dīāā o̍ nɔ̍ le̍ sɔ̄lāa̍ wo̍. 10Vīīnɔ̄ɔ̍ ndu̍ ndu̍, le̍ chīīmbūūwo̍ a̍ dīyɔ̄ɔ̍ a̍ tɛ̄ɛ̄mbūūwo̍ ko̍ni̍ o̍ hu᷅ŋ ni̍. Kɛ̍, ya̍ ya̍ I̍ hi᷅ŋ māhūnāā le̍ mī wāŋnda̍ sɔ̄la̍ yōōmū kpe̍e̍kpe̍i̍yo̍, ndu̍yɛ̍, mā sɔ̄la̍ nyɛ̄ o̍ nyɛ̍ nda̍ nɔ̄ le̍ sɔ̄lāa̍ le̍ wāa̍ yōōmū kpe̍e̍kpe̍i̍.
11“Ya̍ cho̍ wānā ma̍ndāā lāsāa̍ o̍ dɔ̍ū kɔ̄llo̍ kpo̍u̍ o̍ sāa̍ ndūa̍a̍ lo̍ wo̍ ni̍. Wānā ma̍ndāā lāsāa̍ o̍ dɔ̍ū kɔ̄llo̍ kpo̍u̍ o̍ sāa̍ ndūa̍a̍ lo̍ wo̍, ndu̍ cho̍ ō chɛ̄lāā le̍ wūo̍o̍ le̍ sāa̍, hāli̍ kpe̍ŋ ā yɔ̄nu᷄ŋ nyɛ̍ le̍. 12Wāna̍ nda̍ chūā ho̍ō le̍ sāa̍ wāa̍ lēhɔ̄l lo̍, ndu̍ ndu̍ cho̍ wa̍nā ma̍ndāā lāsāā le̍. Ndu̍yɛ̍, ō cho̍ ndu̍ le̍ nɔ̍ sāa̍ le̍. Tē wānā wa̍ā le̍ndo̍o̍ ō chē vīsī bīyāa̍ pɛ̍, nyāānɔ᷄ŋndo̍ o̍ nya̍a̍nūŋ ni̍ mbō mɛ̄i̍ sāa̍ lo̍ŋ. O̍ ko̍ŋ, mī vīsī bīyāa̍ de᷄l ō pīlɛ̍ chōo̍ mbō pūūsi̍a̍a̍ vɛ̄lɛ̄ ā tūāā. 13Le̍ sa̍bū o̍ nya̍a̍nūŋ ndo̍ cho̍ ni̍ māā chūa̍a̍ ko̍ni̍ nda̍ chu̍a̍ ndu̍ le̍ wāa̍ sāa̍ lēhɔ̄l ni̍. Le̍ he̍ī, ō būūla̍ŋ a̍ nda̍ le̍. 14-15Ya̍ cho̍ wānā ma̍ndāā lāsāa̍ o̍ dɔ̍ū kɔ̄llo̍ o̍ sāa̍ ndūa̍a̍ lo̍ wo̍ ni̍. Mɛ̄ɛ̍ Fi̍nyā nūu̍ sīnā ya̍, ndu̍yɛ̍, mi̍ si̍nā Fi̍nyā nūu̍ yɛ̍, le̍nde̍ ko̍ni̍ ya̍ I̍ si̍nā sa̍a̍ nīa̍a̍, ndu̍yɛ̍, mi̍ nda̍ si̍nā ya̍ ni̍. Ndu̍yɛ̍, I̍ cho̍ ō chɛ̄lāā mī vi᷅ hāli̍ kpe̍ŋ māā ā yɔ̄nu᷄ŋ nyɛ̍ le̍. 16I̍ nɔ̍ sāā che᷅le̍ŋ a̍ cho̍ o̍ ku̍ndāa̍ ho̍ō chōo̍ le̍ wa̍. Nda̍ bɛ̍ɛ̍, I̍ nɔ̍ mī hi᷅ŋ a̍ nda̍. Ā chō ya̍ dīōm tūēīyɔ̄ɔ̄. Ndu̍yɛ̍, ā chō sīmnɔ᷄ŋ ku̍ndāa̍ ō pīlɛ̍ mī wānā māndāa̍ ō pīlɛ̍ mānda̍ nda̍.
17“Fi̍nyā nūu̍ kāāla̍ ya̍, kāni̍ fo̍ndōle̍, le̍ mɛ̄ɛ̍ ya̍ I̍ chɛ̍l le̍ mī I̍ vi᷅ mī mi̍i̍ŋgu̍ vɛ̄lɛ̄ yōōmū yɛ̍. 18Wānā o̍ wānā nɔ̍lā mbō dīī ya̍ le̍, mɛ̄ɛ̍ mī ya̍ pi̍la̍ I̍ chɛ̍l mālāŋ wānā di̍ī ya̍. Ya̍ pi̍la̍ chɛ᷅l ni̍ mā dīī ya̍. I̍ nɔ̍ di̍ mī chɛ̍l mā dīī ya̍. Ndu̍yɛ̍, I̍ nɔ̍ di̍ mī mi̍ŋgi̍ ya̍ pi̍la̍ yōōmū. Nyɛ̄ Fi̍nyā nūu̍ dīmu̍l la̍ māā ya̍ I̍ to̍sa̍ wo̍, ndu̍ cho̍ ko̍ŋ ni̍.”
19Mi̍ dīōmndā Chi̍i̍sū di̍mi̍ la̍ŋ nda̍ŋ lā tōsā mi̍ pīɔ̄ūwa᷅ŋndo̍ dēl vɛ̄lɛ̄ wāŋnda̍ tɛ̄ɛ̄ŋ. 20Mi̍ wāŋnda̍ ta̍u̍ a̍ lo᷅ o̍ ko̍ŋ ma̍ dīmī āā, “Nyi̍nā wɔ̄ɔ̍ŋndo̍ chō ndu̍ kɔ̄ɔ̄lī. Le̍ he̍ī, ō hīŋa᷄ŋ le̍bo̍l o̍ cho̍ nu̍a̍ā ni̍. Lā ya᷅ŋ ndu̍ lānī le̍.”
21Kɛ̍, mi̍ wāŋnda̍ ā pīli̍a̍a̍ dīmī āā, “Wāna̍ nyi̍nā wɔ̄ɔ̍ŋndo̍ chō kɔ̄ɔ̄lī wo̍, ō su̍ū nu̍a̍ā le̍. Mī nyi̍nā wɔ̄ɔ̍ŋndo̍ ndu̍ to̍sa̍ mī wānāā sūmɛ̍i̍ya̍ chē?”
Wāŋnda̍ kɛ̄ɛ̍ Chi̍i̍sū
22Mi̍ bōōndi̍i̍ nda̍ bīī bɔ᷅ŋa᷅ŋndo̍ Chūlu̍sɛ̄lɛ̄m chi̍e̍e̍ ve̍ ī fūūlūū. Bōōndi̍i̍ ke̍ŋ nda̍ a̍a̍ lo̍o̍nūŋ a̍ pāa̍le̍ nda̍ a̍a̍ ma̍l chīɛ̍i̍ Mɛ̄lɛ̄ka̍a̍ ndu̍ Mɛ̍lɛ̄ka̍ o̍ bā ve̍ ni̍. Ndu̍yɛ̍, a̍ te̍le̍ŋ wɔ̄ɔ̄lē pɔ̄mbɔ̄le̍ŋ. 23A̍ bōōndi̍i̍ ke̍ŋ, Chi̍i̍sū wa̍ bālɔ̄ɔ̍ o̍ chīɛ̍i̍ Mɛ̄lɛ̄ka̍a̍ ni᷄ŋ o̍ fo̍ndāŋ nda̍ vēēlū āā, Tōŋgo̍ Sɔ̍lɔ̍mɔ̄ŋndo̍ wo̍. 24O̍ ko̍ŋ, mi̍ Chu̍ūwa̍ ā pūm ā hūŋ ma̍ chūūŋgi̍āŋ na̍a̍ o̍ wa̍ wa̍ ma̍ bālū ndu̍ si̍lɔ̍. Ma̍ dīmūl ndu̍ āā, “Mɛ̍i̍ na̍a̍ kūɛ̍i̍ yɛ̄īyo̍. Tē nu᷄m cho̍ Ki̍li̍tī wāna̍ Mɛ̄lɛ̄ka̍ chu̍a̍ būŋgɛ̄i̍ māā ō chō vīōmɔ̄ɔ̄ le̍ wāŋnda̍ pīŋīo̍o̍ wo̍ ni̍, mɛ̄ɛ̍ di̍mu̍l na̍a̍ kpe̍nde̍ke̍le̍.”
25Mi̍ Chi̍i̍sū mu̍lī āā, “I̍ di̍mu̍l nya̍. Kɛ̍, lā lāāla̍ŋ a̍ ya̍ le̍. Wa̍lta̍ ya̍ I̍ to̍sa̍ o̍ kpāāya̍ fi̍nyā nūu̍ ni᷄ŋ nda̍ŋ lā chō se̍īle̍ŋ le̍ ya̍. 26Kɛ̍, lā lāāla̍ŋ a̍ ya̍ le̍. Kāni̍ fo̍ndōle̍, lā cho̍ sa̍a̍ nī le̍. 27Sāa̍ nīa̍a̍ nda̍ nda̍, dīōmndo̍ nda̍ tūɛ̄ī ya̍ ni̍. I̍ si̍nā nda̍. Ndu̍yɛ̍, tōlɔ̄ɔ̍ nda̍ tūāl la̍ kɔ̄ɔ̄lī ni̍. 28O̍ ko̍ŋ kɔ̍ɔ̍lī, yōōmū kpe̍e̍kpe̍i̍ nɔ̍ la̍mɛ̍ɛ̍lu̍ le̍ wo̍, ndu̍ ya̍ I̍ ke᷅ nda̍ ni̍. Le̍ fɛ̍ɛ̍ŋ a̍ fɛ̍ɛ̍ŋ ā vi᷅ le̍. Ndu̍yɛ̍, wānā o̍ wāna̍ nɔ̍lā mbō pūu̍ nda̍ ya̍ o̍ bā le̍. 29Fi̍nyā nūu̍ o̍ ke̍ ya̍ nda̍ wo̍, ndu̍ hi̍o̍ū a̍ nyɛ̄ o̍ nyɛ̄ fe̍e̍. Ndu̍yɛ̍, wānā o̍ wānā nɔ̍lā mbō pūu̍ nda̍ Fi̍nyā nūu̍ o̍ bā le̍. 30Ya̍ ni̍, Fi̍nyā nūu̍ ni̍, nyɔ̄ɔ̍ ō pīlɛ̍ kpe̍ na̍a̍ ŋ̄ chō ni̍.”
31O̍ ko̍ŋ kɔ̍ɔ̍lī, mi̍ wāŋnda̍ ha̍ā ā chɔ̄ɔ̄vīāā pōūta̍ŋ le̍ mā vīī vi̍i̍ ndu̍. 32Mi̍ Chi̍i̍sū di̍mūl nda̍ āā, “I̍ to̍sa̍ wa̍lta̍ kɛ̍ndɛ̄lā ka̍ ka̍ lā Fi̍nyā nūu̍ ō chɔ᷄m ya̍ la̍ŋ, mi̍ lā chā. Wa̍lta̍ ya̍ I̍ to̍sa̍ la̍ŋ ki̍nɛ̍i̍ la̍ŋ, le̍ o̍ kūɛ̍ɛ̍nɛ̍ nya̍ hɛ̄na̍ŋ yɛ̍ mī lā vīī vīi̍ ya̍ a̍ pōūta̍ŋ?”
33Mi̍ Chu̍ūwa̍ mūlī āā, “Ō cho̍ le̍ wa̍lta̍ kɛ̍ndɛ̄ le̍ na̍a̍ ŋ̄ chō nu̍m vīī le̍. Nūm wāna̍ chi̍o̍o̍, tē a̍ di̍mi̍ pɛ̍ māā Mɛ̄lɛ̄ka̍ ŋ̄ chō ni̍, mɛ̄ɛ̍ dīōla̍ Mɛ̄lɛ̄ka̍la̍ŋ ŋ̄ chō la̍ŋ tɛ̍ɛ̍mbūūwo̍ ni̍. Le̍la̍ŋ, na̍a̍ ŋ̄ hɛ̄na̍ŋ ni̍ mī ŋ̄ vi̍i̍ vi̍i̍ nu̍m a̍ pōūta̍ŋ mā vī.”
34Mi̍ Chi̍i̍sū di̍mī āā, “Kɛ̍, ī chō ī pōōnyīāā o̍ yāu̍ nya̍ lāsāwāa̍ ni᷄ŋ māā mi̍ Mɛ̄lɛ̄ka̍ vēēlu̍ wāŋnda̍ mɛ̄lɛ̄ka̍la̍ŋ. 35Ndu̍yɛ̍, ŋ̄ sīnā māā nyɛ̄ Yāu̍ Mɛ̄lɛ̄ka̍a̍ dīmi̍ wo̍ chō tōnya̍ le̍ fɛ̍ɛ̍ŋ a̍ fɛ̍ɛ̍ŋ. Nāa̍ Mɛ̄lɛ̄ka̍ vēēlu̍ wɔ̄ wānāā o̍ wa̍ dīōmnda̍ŋ nda᷅ŋ sūɛ̍i̍ nāa̍ nda̍ chūā wa̍ mɛ̄lɛ̄ka̍la̍ŋ, 36ya̍ yɛ̍? Ya̍ Mɛ̄lɛ̄ka̍ chu̍a̍ māā wāna̍ cho̍ ō yɔ̄ŋga᷄ŋ le̍ ndu̍ mbo̍ vīām ya̍ o̍ chi̍e̍ēŋndo̍ ni᷄ŋ ndo̍, vɛ᷅ tē I̍ di̍mi̍ pɛ̍, a̍a̍, ‘Po̍ Mɛ̄lɛ̄ka̍a̍ ya̍ I̍ cho̍ ni̍,’ lā dīmi̍ māā I̍ tɛ̍ɛ̍mbu̍u̍ dīōla̍ Mɛ̄lɛ̄ka̍la̍ŋ? 37Tē ō wa̍ pɛ̍ mī I̍ to̍sa̍ wa̍lta̍ Fi̍nyā nūu̍ le̍, mɛ̄ɛ̍ lā la̍a̍la᷄ŋ a̍ ya̍ le̍. 38Kɛ̍ ndu̍yɛ̍, tē wa̍lta̍ Fi̍nyā nūu̍ ya̍ I̍ cho̍ tōsāa̍ ni̍, mi̍ chē bɛ̍ɛ̍ lā lāāla̍ŋ a̍ ya̍ le̍ ni̍, kɛ̍, ō wa̍ bɛ̍ɛ̍ le̍ wa̍lta̍ la̍ŋ lā lāāla̍ŋ. O̍ ko̍ŋ, lā chō sīnā wa̍la̍ŋ māā ya̍ ni̍, Fi̍nyā nūu̍ ni̍, māā nyɔ̄ɔ̍ ō pīlɛ̍ na̍a̍ ŋ̄ chō ni̍.”
39O̍ ko̍ŋ kɔ̍ɔ̍lī, ma̍ kīndī vɛ̄lɛ̄ le̍ ndu̍ bīyɔ̄ɔ̍. Kɛ̍, mbo̍ hīālu᷄ŋ nda̍.
40Mi̍ Chi̍i̍sū lo᷅ o̍ ko̍ŋ mbo̍ mīīŋgū Chɔ̍ɔ̍dāŋ le̍e̍lōo̍ o̍ fo̍ndāŋ Chɔ᷄ŋ ndu̍ o̍o̍ nɔ̍ wāŋnda̍ pūlɔ̄ɔ̍ Mɛ̄lɛ̄ka̍a̍ wo̍. Mbo̍ wānu᷄ŋ lo̍ŋ. 41Mi̍ wāŋnda̍ ta̍u̍ a̍ hu᷅ŋ nāa̍ ndu̍ chu̍a̍ lo̍ŋ. Mi̍ wāŋnda̍ ha̍ā wā dīmu̍la᷅ŋndo̍ āā, “Chɔ᷄ŋ, ndu̍ to̍sa̍ wa̍lta̍ kɔ̄ndɔ̄fi̍li̍ le̍. Kɛ̍ ndu̍yɛ̍, nyɛ̄ o̍ nyɛ̄ o̍ di̍mi̍ a̍ pōo̍ ho̍ō o̍kɔ̄ɔ̄, tōnya̍ o̍ di̍mi̍ ni̍.” 42Mi̍ wāŋnda̍ ta̍u̍ lo̍ŋ a̍ du̍a̍ū tīīnda᷄ŋndo̍ o̍ Chi̍i̍sū ni̍ŋ.
Currently Selected:
Chɔ᷄ŋ 10: YM
Highlight
Share
Copy
Want to have your highlights saved across all your devices? Sign up or sign in
Kisi Bible © Bible Society in Liberia, 2015.
