Sɛ́aŋ 11

Sɔ́sɔ́g ɛ Yə́sus yimmú niiŋ lɛ́ Lasáal yiígú

1A Pɛʼtaníi, mɔɔd nyummú niiŋ lɛ́ Lasáal yiídə́əŋ kobany. Ayɛ́ɛ alaa kɔ a nigúu nɛ́ɛn na pomóŋŋí pə́ə́ŋ pá pagɛ́ɛd lɛ́ na Malɛ́a, na Mááʼtaʼ. 2Malɛ́a ogo nyóon aa yiísúmə́nən Yə́sus lamɛ́ndaʼ a ambaan, əə́ŋiənə na tuyə́ən tuə́ŋ. Móŋŋí wəəŋ aa nyóon alɛɛ́ Lasáal nyɔ́ alɛɛ́ abany.

3Pa Malɛ́a pɔ́lɛ́ ná Mááʼtaʼ pááság kodom mɔɔd lɛ́ yɛ́ɛn adɛ́anɛ na Yə́sus lɛ́ sɔ́g wəəŋ wo ɔʼtɛ́m alɛ abany. 4Pááság kɛɛn, pámámodɛánɛ. Ná ayóób tɔsɔm tóod náan, yiísə́ə́ agá ɔnɔ́: «Lasáal ədiə́gu kobany kóog. Kólɛ agá lɛ́ ná kúloodi nugəm nó Táán nó nólɛɛ́ nugóón. A kólɛ́ aa pálɛ́ɛ́ kugə́midií Mɔɔ́n o Táán.» 5Yə́sus yɛɛ́nyɔ́ŋɛnɛn pa Malɛ́a pɔ́lɛ́ ná móŋŋí Mááʼtaʼ kɛ́fɔlɛ́, na móŋŋí wɔɔbɔn Lasáal kɛ́. 6Náa, ɔmbɔ́ ná ayóób náan lɛ́ Lasáal alɛ abany, əyíʼkíni kɛɛlɛ mədúg mábaan kɔ áay kɛnɔ kɛ́ ayɛ́ɛ. 7A ngim yɛ́ɛy anɛ́ɛ́n áa yɛɛ́dɛánɛ na paaʼkan pə́ə́ŋ ɔnɔ́: «Tɛ́mɛ́naan, tiúliniən a Siudə́ə.»

8Paaʼkan pə́yímuŋíən pɔ́nɔ́ na nyóon əə: «Kɛlág, kídímbúlim wɔnɔ́ ná a Siudə́ə, Yúdɛn ɛyɛ́ɛ yaándagodóan na aʼtáán lɛ́ págoyóon. Náa wɔʼkɔ́ tiúlini kɔ ɔ?» 9Ayɛ́bodɛánɛ ɔnɔ́ na pɔ́lɛ́: «Wɔɔ́s ólɛ áwaʼ yówád na ɛ́baan, ngɔ́ɔ́? Mɔɔd nyɔ́ alɛɛ́ adáŋana na wɔɔ́s a oʼto, ədiə́gəə́búʼtən a ngə́ lɛ́ alɛ adɛ́ʼtɛg kisəə kɛ́ kɛ́lɛɛ́ agonom a nsí yɛ́ɛnɛ. 10Náa, nyɔ́ alɛɛ́ adáŋana na udúg, əəgiim ə́búmbub kubúmbúbə́ə́n lɛ́ kɛmoámoáŋ kɛ́dɛɔ́gɔ na nyɔ́lɛ́.» 11Ná ayɛ́ɛ aáʼkoman kosɔyɔ náan, aáság kiiʼkini kodɛ́anɛ na paaʼkan pə́ə́ŋ ɔnɔ́: «Sɔ́g wəəs Lasáal əə́ndəənim ɛnɔ. Náa mɛ kóam kɛɛn kɔ, mmuyóndigi.» 12Pə́yímuyúlísíni pɔ́nɔ́ na nyɔ́lɛ́: «Sə́dúk, kɛ́maʼkɛɛn lɛ́ alɛ a ɛnɔ, áay lɛ́ ɔgɔɔy.» 13Pɔ́lɛ́ páyɛ́ɛ agofɛg lɛ́ ɛnɔ yɛ́ ɛnɔ aa Yə́sus ayɛ́ɛ əgusəə. Kɔmɔɛ́d lɛ́ kugu aa nyɔ́lɛ́ ayɛ́ɛ agobodɛ́anɛ lɛ́ Lasáal əə́ʼkugu. 14Aáság kolɛŋ anɛ́ɛ́n kobomoáŋɛnɛ, ɔnɔ́: «Ndɛ agobodɛ́anɛ lɛ́ Lasáal əə́ʼkugu. 15Ndɛ na tɔnyɔ́g a kidíídí kɛáŋan náan wɔnɔ́ ná ntɛʼkɛ́lɛɛ́ kɔ. Kɛ́agɛɛlɛ lɛ́ póag oʼto na mɛ. Tɛ́mɛ́naan anɛ́ɛ́n, tíɛn.» 16Náa Tómas nyɔ́ páyɛ́ɛ agodɔ́ŋɔn lɛ́ «mɔɔ́n ó nɛas» ɔnɔ́ na pɔsɔ́g paaʼkan: «Tiɛ́naan kɔ, tíɛn əgu ondáŋ na Kɛlág kiə́s!»

17A kɛɛn əgiig a Pɛʼtaníi, Yə́sus yɛɛ́bóan lɛ́ pə́ʼkuni Lasáal, aándɛ a kəəniʼ mədúg mə́niʼ.

18Wɔnɔ́ ná Pɛʼtaníi ɛdɛʼkɛ́lɛɛ́ laálá na Yolósalɛm, ɛyɛ́ɛ yoom wɔnɔ́ kɛ́lomɛ́ʼtaʼ ɛ́dáád, 19Yúdɛn iyíímən kɔ ngíŋ. Pə́yíímən əgiim osoyidi pa Malɛ́a pɔ́lɛ́ na Mááʼtaʼ kugu kó móŋŋí wɔɔbɔn.

20Ná Mááʼtaʼ ayóób lɛ́ Yə́sus aándɛ áay, ayɛ́ɛ́n əgəə́bun na nyɔ́lɛ́ a ngə́, Malɛ́a nyɔ́lɛ́ ɔmɔ́ɔlɔb a noádɛʼ. 21Mááʼtaʼ əə́bə́ə́ kosɔyɔ na Yə́sus, ɔnɔ́: «Sə́dúk, wɛ áanɛ, móŋŋí waam adɛʼkɛ́ɛ əgu. 22Náa, ɔmbɔ́ kɔ náan, kɛbán kɛ́dɛɔ́gɔ. Mbálɛŋ lɛ́ áay ná olɛɛ́, ɔmbɔ́ nkə aa wəə́ŋíən na Táán, aagoyɛ́ʼkɛn.» 23Yə́sus yiísə́ə́ ɔnɔ́ na Mááʼtaʼ: «Mááʼtaʼ! Woómóŋŋí aagoóndɛg.» 24Náa Mááʼtaʼ ɔnɔ́ na nyɔ́lɛ́: «Ɛɛ́ɛ, mbálɛŋ náan. Mbálɛŋ lɛ́ alɛ́ɛ́ koóndɛg a nɛman nɛ́ nsí ná pɛlóŋ pɛ́lɛ́ɛ́ koóndɛgan#11.24 Kɛ́lɛ náan a kálaʼtaʼ ɛ Tan 12.2 » 25Yə́sus yiísə́ə́ ɔnɔ́ na nyɔ́lɛ́: «Mɛ áa ndɛɛ́ kolon a kəəniʼ kó pɛlóŋ, mɛ áa ndɛɛ́ ɔlaa. Nyɔ́ amáág oʼto na mɛ, ɔmbɔ́ əə́gú, agɛɛn na ɔlaa. 26Nyɔ́ alɛɛ́ tɛn a ɔlaa, amaʼkaag oʼto na mɛ adɛndɛ́ɛ́ kugu. Umə́líʼtíníí náan a, Mááʼtaʼ?» 27Náa Mááʼtaʼ ɔnɔ́: «Ɛɛ́ɛ óo, Sə́dúk! Mbə́líʼtíníí. Mbə́líʼtíníí lɛ́ olɛ Məsíi, olɛ Mɔɔ́n o Táán, olɛ nyɔ́ ogódíí lɛ́ yíim a nsí.»

Yə́sus yɛɛ́lɛ́ɛ́

28Ná Mááʼtaʼ yiísə́ə́ náan, aáság kɛɛn ɔ́dɔ́ŋɔn móŋŋí agosɔyɔ na nyɔ́lɛ́ a ɛdɔɔgɛ, ɔnɔ́: «Kɛlág aándɛ kɔ. Alɛ agoodɔ́ŋɔn.» 29Əgín tɛn ná Malɛ́a ayóób náan, aáság koság kodɛ́ɛmɛn agɛɛn kɛnɔ kɛ́ alɛɛ́. 30Yə́sus ayɛ́ɛ adɛ́sɔd kɔmɔɛ́d kɔ a nigúu, yiíligi əgín kɔ́gɔ́ɔg kɛnɔ kɛ́ Mááʼtaʼ əyíím əgəə́bun na nyɔ́lɛ́. 31Ná Yúdɛn yɛ́ ɛyɛ́ɛ kɔ a yoog na Malɛ́a, pə́əmuúwiiyəni ɔʼtɛ́m páyɛ́moodála aádɛ́ɛmɛn agolon na ɔʼtɛ́d, pɛ́ɛ́fɛ́g lɛ́ alɛ agɛɛn agá a kəəniʼ lɛ́ yɛ́ɛn alɛɛ. Pə́yə́wúú pɔ́lɛ́ piim əgumuyə́ən. 32Ná Malɛ́a ayɛ́ɛ́n əgiig kɛnɔ kɛ́ Yə́sus ayɛ́ɛ, əgín tɛn ná ayɛ́moodála aáság kɛɛn əmudə́əŋənən a ambaan, ɔnɔ́ na nyɔ́lɛ́: «Sə́dúk! Wɛ kɔ, móŋŋí waam adɛʼkɛ́ɛ əgu.» 33Ná Yə́sus yɛɛ́dála Malɛ́a aálɛɛ, na Yúdɛn tɛn yɛ́ iyíím ímuyə́ən, ayóób ɔʼtɛ́m kogany wó óyɛ́mosán oʼto. Nsiŋ yəəŋ yɛɛ́cágɛ́lɛd. 34Náa ɔnɔ́ na pɔ́lɛ́: «Ə́lə́ə́ áa puyímuúní ə́?» Pááság kusəə pɔ́nɔ́ na nyɔ́lɛ́: «Mɛ́ɛn óo Sə́dúk! Mɛ́ɛn adála.» 35Yə́sus aáság kudə́əŋ na ɔndɛɛ. 36Yúdɛn yəə́bə́ə́ kosɔyɔ yɔ́nɔ́: «Táláan wɔnɔ́ ná ayɛ́monyɔ́ŋɛnɛn!» 37Pə́mmú páyɛ́ɛ əgusəə pɔ́nɔ́: «Ayɛ́ɛ́lɛ áanɛ lɛ́ mɔɔd o woog yíiʼkini kodɛ́ʼtɛganan. Tuə́ áa adɛʼkɛ́ɛ ogɛɛlɛɛ́ lɛ́ Lasáal ədiʼkú ə́?»

38Ɔʼtɛ́m ó Yə́sus úyíʼkíni kogany kə́mmú kɛ́fɔlɛ́, aáság kɛɛn kɛnɔ kɛ́ kəəniʼ káyɛ́ɛ. Kəəniʼ kágo kóog káyɛ́ɛ kɛbaŋ a nɛdáán. Píígúb unuʼ na kɛa kɛ́ kɛdám kɛ́ nɛdáán#11.38 A Palɛstíin a kɛnɛŋ kɛ́ Yə́sus, páyɛ́ɛ pədímilə pəgəəniʼ wɔnɔ́ pɛbaŋ a kɛnɔ kɛ́ kɛ́lɛɛ́ wɔnɔ́ kɛwáaŋ, páság kolɔg unuʼ ó kəəniʼ na kiʼtóg kɛ́ nɛdáán, nimíímíliʼ, ɛbá yímmú ɛbaʼpam. Kɛ́lɛ náan a kálaʼtaʼ yɛ Maʼt 27.60; Mə́l 15.46; Lóʼk 24.2 39Yə́sus aáság kusəə lɛ́ pə́muúliogini nɛdáán nɛ́ɛn. Náa Mááʼtaʼ, móŋŋí o kɛlóŋ Lasáal ɔnɔ́ na nyɔ́lɛ́: «Sə́dúk, mədúg mə́niʼ a móonɛ wɔnɔ́ ná aándɛɛ́ a kəəniʼ, nɛ́gɔŋ əə́ndəənug.» 40Yə́sus ayɛ́modɛánɛ ɔnɔ́ na nyɔ́lɛ́: «Ntɛgodɛ́anɛnɛ lɛ́ omaʼkaag oʼto na Táán, olɛ́ɛ́ kodála nɛgóón niə́ŋ ə́?» 41Pááság kuliogi nɛdáán. Yə́sus yɛɛ́bágɛ əngis a mɔɛn ɔgɔɔ́sɔ́gɔlɔn, ɔnɔ́: «Paabá, mbə́gusóyídi wɔnɔ́ ná omóób pɛɔ́sɔ́gɔ́lɔ́n pɛ́am. 42Mɛ mbálɛŋ lɛ́ olɛ agoóbɛla pɛɔ́sɔ́gɔ́lɔ́n pɛ́am pɛnɛŋ piim. Náa, ndɛ agosɔyɔ náan a oʼto ó pɔɔd póonɛ pá pɛ́njaágóʼkɛ́nɛ́nɛ́ɛ́ agɛɛlɛ lɛ́ pə́ə́liʼtini lɛ́ wɛ áa uyíím wɛ́ʼtom.» 43Ná yɛɛ́mán kosɔyɔ náan, aáság kosásɛd, nɛŋo a mɔɛn, ɔnɔ́: «Lasáal, mɛ́ɛn ólon!» 44Kɛlóŋ kɛáság kiim kɛ́lon, ɔmbɔg na ambaan aʼkódágódá na pɛsom pɛ́ pilə́ə́, udi usúʼkínə́ə́n na kɛsom kɛ́ ombɔ́m. Náa Yə́sus ɔnɔ́: «Ímuyóndínəən, púmuudi yɛ́ɛn!»

Pɔ́yɔ́dɔ́ɔ́gɛ́ɛ́ lɛ́ páagoon Yə́sus

(Maʼt 26.1-5; Mə́l 14.1-2; Lóʼk 22.1-2)

45Ná ɛ́fɔlɛ́ ɛ́ Yúdɛn yɛ́ íyíím osoyidəni Malɛ́a kugu yɛ́ɛ́dála nkə kɛ́ Yə́sus ayɛ́ɛ́lɛ, páyáág oʼto na nyɔ́lɛ́. 46Náa, ngab yimmú a ondáŋ wɔ́ɔ́bɔn ɛyɛ́ɛ́n aboan Pafalɛsɛyɛ́ɛŋ agobodɛ́ananɛ nkə kiim kɛ́ Yə́sus ayɛ́ɛ́lɛ. 47Puʼkúm pó payaaganɛʼ pɛfɔny na Pafalɛsɛyɛ́ɛŋ pááság kaágɔnyɛd anɛ́ɛ́n a ɛgɔny yɔ́ɔ́bɔn yɛ́ ɛgóón, pɔ́nɔ́: «Tuə́ áa tɛándagɛɛlɛɛ́ ə́? Mɔɔd nyóonɛ alɛ agɛɛlɛ mangán miíŋ. 48Timəʼkumuudi lɛ́ yɛ́ɛnanan əgín náan, ungim agaag oʼto na nyɔ́lɛ́, pɔɔ́n pá Ɔlɔ́ma pá pálɛɛ́ agɛbɛɛ́laamɛ pə́əsiəd kɛbán kɛ́ɛg a ɔmbɔg yɔ́ɔ́bɔn, pə́əgiim əbugə Tɛ́mpɛl yəəs, páaman kuwíiyi tɛn nigúu niə́s!» 49Náa mɔɔd nyummú a ondáŋ wɔ́ɔ́bɔn, niiŋ lɛ́ Kayíif, Ɔnjaaganɛʼ pɛfɔny nyɔ́ Oʼkóʼkóón nyɔ́ a waag wóow əə́səə ɔnɔ́: «Podɛɔ́gɔ agoob yoom na yoom! 50Podɛɔ́gɔ agoob lɛ́ kɛ́lɛ a kɔŋɛʼ kuə́s lɛ́ mɔɔd úmmuʼ ə́gu a kidíídí kɛ́ ungim, agɛɛlɛ lɛ́ nigúu kilúd nídingwú ə́?» 51Tɔgɛ́ɛ́ tóod tó Kayíif yɛɛ́sɔ́yɔ náan tódɛʼkɛ́ɛ tɔgɛ́ɛ́ tó nyɔ́lɛ́nyɔ́amɔɛ́d ayáyɛ́ɛ́ŋɛ́nɛ́ɛ́, ndóo. Wɔnɔ́ ná nyɔ́lɛ́ aa ayɛ́ɛ Ɔnjaaganɛʼ pɛfɔny nyɔ́ oʼkóʼkóón a waag wóow, Táán aa ayɛ́moyɛ́ɛ́lɛ lɛ́ áyaŋ alɔɛgɛ náan lɛ́ Yə́sus alɛ́ɛ́ kugu a kɔŋɛʼ kó Yúdɛn. 52Náa, kugu kó Yə́sus kódɛʼkɛ́ɛ əgín a kɔŋɛʼ kó Yúdɛn yɛ́lɛ́yɛ́əsíŋ, ndóo. Kóyɛ́ɛ lɛ́ ná ágómmɛ a kɛfɔg kímuʼ, pɔɔ́n pá Táán piim pá páfálɛ́mɛ́nɛ́ɛ́ a nsí yɛ́ɛnɛ. 53Əgəə́bə́ə a wɔɔ́s wóow aa palaamɛʼ pá Yúdɛn píígúmin lɛ́ páagoon Yə́sus. 54Kólɛ́ aa Yə́sus əyə́gílíí kiim ófíoŋ a nigúu, Yúdɛn yaámodɛ́ʼtɛg. Əyə́suídíí a Ɛfɛlayíim#11.54 Kɛnɔ kɛ́ɛg kɛ́ pɔ́ɔdɔ́ŋɔn lɛ́ Ɛfɛlayíim kɛ́yɛ́ɛ yoom wɔnɔ́ kɛ́lomɛ́ʼtaʼ niʼtin agodɛ́ɛmɛn a Yolósalɛm agobag kobágáán, waádádɛman yɛ́ a noá nó wɔɔ́s ólɛɛ́ əgiim ódɛ́ɛman., pálɛ́ɛg yímmú, ndúmiʼ na kɛnɔ kɛ́ kifələ́ə́n. Ayɛ́ɛ́n ələndin kɔ́gɔ́ɔg na paaʼkan pə́ə́ŋ.

55Wɔɔ́n ó Páska ɛ Yúdɛn óyɛ́ɛ wándɛ ndúmiʼ. Ná wɔɔ́n óyɛ́ɛ wándɛ lɛ́ ólɛ na koany, ɛ́fɔlɛ́ ɛ́ pɔɔd íyíím ɛ́dɛ́ɛman a pɛnɔ pɛ́ a mobá agɛɛnan a Yolósalɛm agɛɛlɛ lɛ́ ná wɔɔ́n wóow údíin wiim əgiig, pə́ʼkəə́fúŋi. 56Páyɛ́ɛ əguunə ə́lə́ə́ áa Yə́sus alɛɛ́. Páyɛ́ɛ əgəə́ŋíənə kɔ pɔ́lɛ́ na pɔ́lɛ́ ná páyɛ́ɛ a Tɛ́mpɛl pɔ́nɔ́ ə: «A nɛáŋan əə, əəgiim a wɔɔ́n wóonɛ óm, ədiə́giim əə́?» 57Puʼkúm pó payaaganɛʼ pɛfɔny na Pafalɛsɛyɛ́ɛŋ pááság kusəə lɛ́, mɔɔd nyɔ́ aálɛŋ kɛnɔ kɛ́ alɛɛ́, yíim abodɛ́anɛ, ná pɛ́ɛn əmuúgumin.

Currently Selected:

Sɛ́aŋ 11: yatDBL

Highlight

Copy