Sɛ́aŋ 13

Yə́sus yɛɛ́sóg ambaan á paaʼkan pə́ə́ŋ

1Kɛ́yɛ́ɛ pɔ́nɔ́ Páska na koany. Yə́sus yɛɛ́lɛŋɛn lɛ́ kɛnɛŋ kiə́ŋ kɛ́ kodɛ́ɛmɛn a nsí yɛ́ɛnɛ əguúlini a nó Sɛ kiə́ʼkiig. Nyɔ́lɛ́ yɛɛ́nyɔ́ŋɛn pɔɔd pə́ə́ŋ pá pálɛɛ́ a nsí, amáabonyɔ́ŋɛn súʼtə́ə́ a nisug. 2Páyɛ́ɛ agonɛ́ɛnɛ na paaʼkan pə́ə́ŋ, Omɔlɛɔ́g ayɛ́ɛ aáʼkodóɛyɛ Siudáa, mɔɔ́n o Simɔ́ɔŋ Ɛsɛʼkalɛyóod a ɔʼtɛ́m lɛ́ aamoólɛg. 3Yə́sus yɛɛ́lɛŋɛn nyɔ́lɛ́nyɔ́amɔɛ́d lɛ́ əyíím ádɛ́ɛmɛn a nó Táán, náa əə́ndəguúlinií kɔ. Yɛɛ́lɛŋɛn tɛn lɛ́ Táán ayáág muim a ɔmbɔg yə́ə́ŋ. 4Yɛɛ́dɛ́ɛ́mɛn a oʼkɔɔ wó ayɛ́ɛ kɔ agonɛ́ɛnɛ, omóliógíí ntaa yəəŋ, əə́siəd kɛsom kɛ́ sanjaʼ, əmə́súŋíí a nɛdáá. 5Yiísiə́d məní, amáág a táasaʼ, əə́bə́ə́ kosog ambaan á paaʼkan pə́ə́ŋ, əə́ŋiənə na kɛsom kɛ́ sanjaʼ yɛ́ əyə́súŋin. 6Ná əyííg a udi ó Simɔ́ɔŋ Píɛ, Simɔ́ɔŋ ayɛ́modɛánɛ ɔnɔ́ na nyɔ́lɛ́: «Wɛ áa Sə́dúk! Wɛ kɛsog ambaan á?» 7Yə́sus yiísə́ə́ ɔnɔ́ na nyɔ́lɛ́: «Nkə kɛ́ ndɛɛ́ agɛɛlɛ nɛ́gɔŋ, odɛɔ́gɔ ogoob, náa olɛ́ɛ́ kudíin woób a ngim.» 8Náa Simɔ́ɔŋ Píɛ ɔnɔ́: «Wɛ Sə́dúk! Wɔʼkɔ́ wɛ́sog mɛ ambaan á! Iyó!» Yə́sus yiísə́ə́ ɔnɔ́ na nyɔ́lɛ́: «Ntɛgoósɔgɛn ambaan, odɛɔ́gɔɔŋ yoom na mɛ.» 9Náa Simɔ́ɔŋ Píɛ ɔnɔ́ na nyɔ́lɛ́: «Sə́dúk, kɛ́maʼkɛɛn anɛ́ɛ́n náan, adɛ́njaŋ ambaan əgín yɛ́lɛ́ na yɛ́lɛ́, ɛ́sog tɛn ɔmbɔg na oʼto!» 10Yə́sus ayɛ́modɛánɛ ɔnɔ́: «Mɔɔd nyɔ́ aáʼkoonaá, kídíəguunə kə́mmú lɛ́ pámoyóonanɛ, ná kɛ́sánɛn əgín lɛ́ yáásog ambaan lɛ́ nyɔ́lɛ́ ungim alɛ ommoáŋáán. Pəŋi polɛ pamoáŋáán, náa adɛ́njaŋ agá pəŋi piim.» 11Kɛ́lɛ lɛ́ Yə́sus yɛɛ́lɛŋɛn ánɛ aa aámoólɛg, kólɛ́ aa yiísə́ə́ náan lɛ́: «Adɛ́njaŋ pəŋi piim aa polɛɛ́ pamoáŋáán.»

12Ná Yə́sus yɛɛ́mán koboósog ambaan, aáság kəə́yúlisi ntaa yəəŋ, amɛ́ɛn ələndin a oʼkɔɔ wə́ə́ŋ, náa ɔnɔ́: «Pomóób nkə kɛ́ɛnɛ kɛ́ mbɛ́ɛ́lɛ a? 13Polɛ agɛʼtɔ́ŋɔŋɔ poɔʼkɔ́ “Kɛlág”, poɔʼkɔ́ “Sə́dúk”, pugóódi kilumiʼ lɛ́ ndɛ fɔ́lɔ́b kɛlág, ndɛ Sə́dúk. 14Mɛ anɛ́ɛ́n nyɔ́ ndɛɛ́ Sə́dúk na kɛlág kɛáŋan, mbaʼkoboósog ambaan, pugóódi lɛ́ pósoganan tɛn ambaan pəŋi na pəŋi. 15Mbə́bulóódi wɔnɔ́ ná póɛlanɛɛ́. Ɛlɛ́an náan wɔnɔ́ ná mɛ mbɛ́ɛ́lɛ na pəŋi. 16A fɔ́lɔ́b ndabodɛ́anɛ lɛ́, uʼkudin ɔmbɔ́ úmmuʼ ɔdɛɔ́gɔ ogobáʼkanan sə́dúg wəəŋ. Mɔɔd wo oʼtom tɛn ɔmbɔ́ úmmuʼ ambáʼkánan nyɔ́ amámoodóm. 17Pəŋi pomaʼkolɛŋ náan poagɛɛn kɔŋɛʼ ná pomɛ́ɛ́lɛ kɛ́lɛ́. 18Ntɛɔ́gɔ əgusəə a pəŋi piim. Mbálɛŋ pá njííyid. Náa, nkə kɛ́ kíyə́dílə́ə́ a Kálaʼtaʼ ɛ Táán kígóódi lɛ́ kɛáyɛ́ɛlɛ. Kɛ́lɛ kɔ lɛ́: “Mɔɔd nyɔ́ tɛyɛ́ɛ agonɛ́ɛnɛ ondáŋ na nyɔ́lɛ́, nyɔ́lɛ́ aa ayɛ́nnɛ́ a ambaan yisí#13.18 Kɛ́lɛ náan a kálaʼtaʼ ɛ Pɛʼk 41.10 ” 19Mbáyaŋ abodɛ́anɛ nɛ́gɔŋ ná kɛbán kɛ́go kɛ́dɛ́njáyɛ́ɛlɛ, agɛɛlɛ lɛ́ ná kɛ́lɛ́ɛ́ kaáyɛ́lɛɛ́, puə́liʼtini lɛ́ “ndɛ nyɔ́ ndɛɛ́.” 20A fɔ́lɔ́b, ndabodɛ́anɛ lɛ́, nyɔ́ aálɛŋ kusiəd nyɔ́ mbádóm, mɛ áa aálɛŋ kisiəd. Nyɔ́ aálɛŋ tɛn kisiəd mɛ, aalɛŋ tɛn kusiəd nyɔ́ əyíím yɛ́ʼtom.»

Yə́sus ɔnɔ́ Siudáa alɛ́ɛ́ komoólɛg

(Maʼt 26.20-25; Mə́l 14.17-21; Lóʼk 22.21-23)

21Ná Yə́sus yɛɛ́sɔ́yɔ náan, ɔʼtɛ́m wə́ə́ŋ wɛ́ɛ́yɛ́b a kúfuʼ, aáság koʼkwaaŋɛ moááŋ, ɔnɔ́: «A fɔ́lɔ́b ndabodɛ́anɛ lɛ́ úmmuʼ áanɛ a ondáŋ wááŋan, aagɛndɛg.» 22Paaʼkan pə́ə́bə́ə́ kodɛ́ʼtɛganan pɔ́lɛ́ piim. Náa, pádɛʼkɛ́ɛ agolɛŋ ánɛ aa Yə́sus alɛɛ́ əgusəə. 23Ongaaʼkan nyummú a ondáŋ wɔ́ɔ́bɔn, sɔ́g nyɔ́ Yə́sus yɛɛ́nyɔ́ŋɛnɛn kɛ́fɔlɛ́, ayɛ́ɛ undəndínə́ə́n a ɛbá yə́ə́ŋ. 24Simɔ́ɔŋ Píɛ aáság kumuə́díbid na əngis lɛ́ ə́ŋíən na Yə́sus əə, ánɛ aa ɔnɔ́ aamoólɛg əə́? 25Ongaaʼkan nyóon yɛɛ́sɛ́lɛ́gɛ oʼto a oʼtóɛŋ ó Yə́sus, ɔnɔ́ na nyɔ́lɛ́ əə: «Sə́dúk, ánɛ aa aágoólɛg əə́?» 26Yə́sus əyúúlísi ɔnɔ́ na nyɔ́lɛ́: «Nyɔ́ ndə́ənyum kɛsom kɛ́ kɛlɛ́ɛd a masɔɔ agomoyɛ́ʼkɛn, taa nyɔ́lɛ́ ogo aa nyóon.» Aáság kusiəd kɛsom kɛ́ kɛlɛ́ɛd, əə́nyum a masɔɔ, amɛ́ʼkɛn na Siudáa, mɔɔ́n ó Simɔ́ɔŋ Ɛsɛʼkalɛyóod. 27Əgín tɛn ná Siudáa yiísiə́d kɛlɛ́ɛd, Sáʼtan yaáság komoosɔd. Yə́sus yiísə́ə́ ɔnɔ́ na nyɔ́lɛ́: «Ə́bísígíí kɛɛlɛ nkə kɛ́ ugódíí lɛ́ wɛ́ɛlɛ.» 28A pɔɔd piim pá páyɛ́ɛ kɔ áay agonɛ́ɛnɛ, ɔmbɔ́ úmmuʼ adɛʼkáagoob a igə aa ayɛ́modɛánɛ náan. 29Wɔnɔ́ ná Siudáa aa ayɛ́ɛ na igóó yɔ́ɔ́bɔn ɛ́ mɔɔnɛ́, pɔsɔ́g pə́mmú pááság kofɛg lɛ́ Yə́sus alɛ amodɛ́anɛ lɛ́ yɛ́ɛn agooŋɛnɛ nkə kɛ́ kíəgəə́yúunə a wɔɔ́n, oó lɛ́ álónɛ yoom, yɛ́ɛn agɛɛ́ʼkɛn na mɔsɔ́gasɔ́gá. 30Siudáa nyɔ́lɛ́ yiísiə́d kɛsom kɛ́ kɛlɛ́ɛd kɛ́ɛg, aáság koság kolon. Udúg óyɛ́ɛ wándɛ kɔ.

Táá kɛcɛm kɛ́ kawa aa kɛ́ɛnɛ

31Əgín ná Siudáa yɛɛ́lón, Yə́sus aáság kusəə ɔnɔ́: «Nɛ́gɔŋ yɛ́ɛnɛ nugəm nó Mɔɔ́n o mɔɔd nuóʼkoóloodi. Nyɔ́lɛ́ alɛ əguloodi tɛn tuə́ áa Táán alɛɛ́ na nugəm. 32Táán nyɔ́lɛ́nyɔ́amɔɛ́d alɛ́ɛ́ kuloodi wɔnɔ́ ná Mɔɔ́n alɛɛ́ na nugəm; kɛnɛŋ sɔɔŋ tɛn aa əə́ndəmugə́midií. 33Pɔɔ́n páam, kɛnɛŋ sɔɔŋ ntiə́giiʼkini kɛɛn na pəŋi kə́mmú. Polɛ́ɛ́ kinjuunə, náa, əgín wɔnɔ́ ná nyɛɛ́dɛánɛ na pɔɔ́n pá Yúdɛn, ndabodɛ́anɛ tɛn nɛ́gɔŋ na pəŋi lɛ́: Kɛnɔ kɛ́ ndɛɛ́ agɛɛn, pəŋi podɛɔ́gɔ págɛɛn kɔ. 34Táá kɛcɛm kɛ́ kɛwa aa kɛ́ɛnɛ: Pɔ́nyɔ́ŋanan pəŋi na pəŋi. Wɔnɔ́ ná mɛ njɛ́bonyɔ́ŋɛn, náan tɛn aa pəŋi pugódíí lɛ́ pɔ́nyɔ́ŋanan pəŋi na pəŋi. 35A nnyɔ́ŋánán yɛ́ poágɛɛn na yɛ́lɛ́ pəŋi na pəŋi aa pɔɔd pálɛ́ɛ́ kolɛŋɛɛ́ lɛ́ polɛ paaʼkan páam.»

Yə́sus ɔnɔ́ Píɛ alɛ́ɛ́ kumuúʼtəm

(Maʼt 26.31-35; Mə́l 14.27-31; Lóʼk 22.31-34)

36Náa Simɔ́ɔŋ Píɛ ɔnɔ́ na nyɔ́lɛ́: «Sə́dúk, ə́lə́ə́ áa olɛɛ́ agɛɛn ə́?» Yə́sus əyímuyúlísíni ɔnɔ́: «Kɛnɔ kɛ́ ndɛɛ́ agɛɛn, wɛ odɛɔ́gɔ uginjə́ən kɔ nɛ́gɔŋ, náa, olɛ́ɛ́ kudíin wiim a ngim.» 37Píɛ yiísə́ə́ ɔnɔ́ na nyɔ́lɛ́: «Sə́dúk, a igə aa mɛ ntɛɔ́gɔ uguguyə́nií nɛ́gɔŋ əə́? Áanɛ ná ndɛɛ́, ndɛ ongaábɔ́ŋɛ́náán nyóonɛ lɛ́ nyɛ́ʼkɛn ɔlaa wáam a kidíídí kɛáŋ!» 38Yə́sus əyímuyúlísíni ɔnɔ́ na nyɔ́lɛ́: «Píɛ, wɔʼkɔ́ olɛ ongaábɔ́ŋɛ́náán lɛ́ wɛ́ʼkɛn ɔlaa wááŋ a kidíídí kɛ́am a! A fɔ́lɔ́b ndagodɛ́anɛ lɛ́ kɛbaŋ kɛ́ nsɛɛ kíədíin kɛdaŋ naánɛ́ yɛ́ɛnɛ ná wəə́ʼkiʼtəm pɛnɛŋ pɛ́dáád wɔʼkɔ́ odɛndɛŋɛn.»

Currently Selected:

Sɛ́aŋ 13: yatDBL

Highlight

Copy