Sɛ́aŋ 15

Yə́sus ɔnɔ́ nyɔ́lɛ́ aa alɛɛ́ fíinyə#15.0 Fíinyə ɛlɛ kiɛd kɛ́ kíəguum modámádám mó pɔ́ɔdɔ́ŋɔn lɛ́ mɔlɛsɛ́ɛŋ. Na manyáa má modámádám móom aa ándɛ páanam maloʼ má mobógógó. ɛ fɔ́lɔ́b

1Náa Yə́sus ɔnɔ́ Kə́mmú: «Ndɛ fíinyə ɛ fɔ́lɔ́b#15.1 Pódála tɛn náan a kálaʼtaʼ yɛ Ɛsa 5.14 Sɛ waam aa alɛɛ́ əgusóboni yɛ́lɛ́. 2Ntab ngim yɛ́ ɛlɛɛ́ ndadáán na mɛ náa ɛdɛɔ́gɔ əguúmíí, aasóma yɛ́lɛ́. Yɛ́ ɛlɛɛ́ əguum, aawáanɛ lɛ́ ná ɛ́lɛŋ kuum agolaŋ náan. 3Pəŋi, a tɔgɛ́ɛ́ tó mbábodɛánɛ, poándɛ pamoáŋáán wɔnɔ́ ntab yɛ́ ngwánɛán. 4Lɔbɔ́ɔn paladáán na mɛ, wɔnɔ́ ná mɛ ndɛɛ́ ondadáán na pəŋi. Wɔnɔ́ ná ɔʼtab wó ódɛɔ́gɔ ondadáán na nidíŋ ódɛɔ́gɔ úguúmíí modámádám, náan tɛn aa pəŋi podɛɔ́gɔ pə́guum ɛdámádám ná podiɛnɛn paladáán na mɛ. 5Ndɛ nidíŋ, pəŋi ntab. Nyɔ́ aágɛɛn ondadáán na mɛ, mɛ na nyɔ́lɛ́, nyóon alɛ́ɛ́ kuum modámádám ilubənən lɛ́ əgín na mɛ áa polɛɛ́ págɛɛn na toɛn tó kɛɛlɛ yoom. 6Nyɔ́ adɛndɛ́ɛ́ kɛɛnɛɛ́ ondadáán na mɛ, pálɛ́ɛ́ komoodo a táán wɔnɔ́ ɔʼtab wó páásóm, ná ógos. Ntab yɛ́ yaáʼkogósɛ́ɛ́, pálɛ́ɛ́ kobáda yɛ́lɛ́, páadagɛdɛ a yug ɛ́ság kogɔ́lɔ. 7Puməʼkəə́gumənən na mɛ, púubuə́gumənən na tɔgɛ́ɛ́ tóam, nkə kiim kɛ́ puə́ŋíən, poɔgɔɔŋ kɛ́lɛ́. 8Nkə kɛ́ kɛ́agɛɛ́ʼkɛn nugəm na Sɛ waam kɛ́lɛ lɛ́ púúm modámádám kɛ́fɔlɛ́. Náan aa puóloodi lɛ́ polɛ paaʼkan páam. 9Ndɛ agobonyɔ́ŋɛn pəŋi wɔnɔ́ ná Paabá alɛɛ́ agɛnyɔ́ŋɛn mɛ. Lɔbɔ́ɔn paladáán na nnyɔ́ŋánán yaam. 10Pəŋi pomaʼkɛɛ́ngɛg pɛcɛm pɛ́am, mɛ ndagɛɛn yuudi na nnyɔ́ŋánán na pəŋi, wɔnɔ́ ná mɛ njɛ́ngɛg tɛn pɛcɛm pɛ́ Sɛ waam, nyɔ́lɛ́ alɛ agɛɛn yuudi na nnyɔ́ŋánán na mɛ.

11«Ndɛ agobodɛ́anɛ náan agɛɛlɛ lɛ́ póɛn na tɔnyɔ́g wɔnɔ́ ná mɛ ndɛɛ́ na tólɛ́. Tɔnyɔ́g toáŋan tóyám agaáyɛn náan. 12Taa kɛcɛm kɛ́am aa kɛ́ɛnɛ: Pɔ́nyɔ́ŋanan wɔnɔ́ ná mɛ ndɛɛ́ agobonyɔ́ŋɛn pəŋi. 13Nnyɔ́ŋánán yɛndɛ́ŋ ɛdɛɔ́gɔ yɛ́ ɛmááyɛn yɛ́ɛnɛ lɛ́ úlióŋi oʼto wááŋ a kidíídí kɛ́ pɔsɔ́sɔ́g pááŋ. 14Polɛ pɔsɔ́sɔ́g páam ná pomɛ́ɛ́lɛ nkə kɛ́ ndɛɛ́ agobodɛ́anɛ. 15Ntiə́giiʼkini kobodɔ́ŋɔn kə́mmú lɛ́ pəgudin, lɛ́ uʼkudin ɔdɛɔ́gɔ agolɛŋ nkə kɛ́ sə́dúg wəəŋ alɛɛ́ agɛɛlɛ. Ndaboodɔ́ŋɔn lɛ́ pɔsɔ́sɔ́g páam lɛ́ nkə kiim kɛ́ njóób na Sɛ waam, mbɛ́ɛ́lɛ lɛ́ pəŋi pólɛŋ kɛ́lɛ́. 16Adɛ́njaŋ pəŋi aa pumínyiiyid, mɛ áa njíbuyííyid pəŋi, mbáság koboyɛ́ʼkɛn toɛn lɛ́ púúm modámádám. Púúm modámádám mó múəʼtə́ə. Áay, nkə kiim kɛ́ polɛ́ɛ́ kuŋíənií na Sɛ waam a niiŋ nɛ́am, alɛ́ɛ́ koboyɛ́ʼkɛn. 17Nkə kɛ́ ndɛɛ́ agoboyɛ́ʼkɛn wɔnɔ́ kɛcɛm aa kɛ́ɛnɛ kɛ́lɛɛ́ lɛ́: Pɔ́nyɔ́ŋanan pəŋi na pəŋi.»

Pɔɔd pá a nsí yɛ́ɛnɛ pálɛ na ɛbɛnɛn na Yə́sus na paaʼkan pə́ə́ŋ

18Yə́sus əyíʼkíni kusəə ɔnɔ́ na pɔ́lɛ́: «Pɔɔd pá a nsí yɛ́ɛnɛ pámaʼkɛɛn na ɛbɛnɛn na pəŋi, áyɔ́ŋɛ́an lɛ́ na mɛ áa ɛbɛnɛn yɛ́ɛy íyə́bə́ə́líí. 19Pəŋi, poyɛ́ɛnɛn lɛ́ polɛ pɔɔd pá a nsí yɛ́ɛnɛ, ná pálɛ agobonyɔ́ŋɛn lɛ́ ná polɛ wɔnɔ́ pɔ́lɛ́. Náa pəŋi, podɛɔ́gɔ pɔɔd pá a nsí yɛ́ɛnɛ lɛ́ njíbuyííyid, mbáság kubudə́nigi ndɛ́ŋ. Pundigi wɔnɔ́ pɔ́lɛ́, kólɛ́ aa pálɛɛ́ agoboóbɛnɛn. 20Áyɔ́ŋɛ́an nkə kɛ́ njɛ́bodɛánɛ, nyɔʼkɔ́: “Uʼkudin ɔmbɔ́ úmmuʼ ɔdɛɔ́gɔ ogobáʼkanan sə́dúg wəəŋ.” Pɔɔd pámaʼkɛcɔʼkɔnɛ mɛ, pálɛ́ɛ́ koboócɔʼkɔnɛ tɛn pəŋi. Nga pámóóbɛn tɔgɛ́ɛ́ tóam, pálɛ́ɛ́ koóbɛn tɛn toáŋan. 21Kɛbán kímuʼ, pálɛ́ɛ́ koboyɛ́ɛlɛ nkə kɛ́ɛg kiim a kidíídí kɛ́am lɛ́, pándɛŋɛn nyɔ́ əmíim yɛ́ʼtom. 22Ntɛ́ʼkíimin, ntɛ́bosɔ́yɔn tɛn ná póʼkóodi nsɔ́ɔ́. Náa nɛ́gɔŋ, pɔ́dɛɔ́gɔ na uʼkus wúmmú ó kaánɔna. 23Nyɔ́ alɛɛ́ agɛmbɛnɛn mɛ, alɛ agobɛnɛn tɛn Sɛ waam. 24Pɛbán pɛ́ɛnɛ pɛ́ wɛndɛ́ŋ adɛ́njaŋ kɛɛlɛɛ́, mɛ ntɛ́ʼkɛ́ɛlɛnɛ pɛ́lɛ́ a kɛgaágadɛ kɛɔ́bɔn, ná póʼkóodi nsɔ́ɔ́ a mabɛ́ mɔ́ɔ́bɔn má páagɛɛlanɛ. Náa nɛ́gɔŋ, pɔ́lɛ́ padáláán kɔmɔɛ́d pɛbán pɛ́ɛb, pálɛ əgín áa agɛɛn yuudi na kɛbɛɛ́bɛnɛn, pəsi na Sɛ waam. 25Kɛ́lɛ náan agɛɛlɛ lɛ́ nkə kɛ́ kíyə́dílə́ə́ a Kálaʼtaʼ ɛ pɛcɛm kɛ́as. Kíyə́dílə́ə́ kɔ lɛ́: “Páyɛ́mbɛnɛ́n náan, fiɛ́d na ɛgom#15.25 Kɛ́lɛ náan a kálaʼtaʼ ɛ Pɛʼk 35.19; 69.5 ”

26«Nyɔ́ ogódíí lɛ́ áboyáamɛnɛn alɛ́ɛ́ kiim. Ogo aa nyóon alɛɛ́ Uŋun ó pasáád wó wə́əgiim ódɛ́ɛmɛn a nó Paabá. Ndɛ́ɛ́ kobodómɛn wólɛ́ a niiŋ nɛ́ Sɛ waam. Wólɛ́wóamɔɛ́d ólɛ́ɛ́ kɛʼtɛ́lɛmɛn mbaasɔ́. 27Pəŋi, polɛ́ɛ́ kɛʼtɛ́lɛmɛn tɛn yɛ́lɛ́ lɛ́ poyɛ́ɛ ondáŋ na mɛ əgín kɔ a niə́bə́ə.»

Currently Selected:

Sɛ́aŋ 15: yatDBL

Highlight

Copy