Sɛ́aŋ 17

Yə́sus ɔyɔ́sɔ́gɔ́lɔ́nɛ́ɛ́ Táán a kidíídí kɛ́ paaʼkan pə́ə́ŋ

1Ná Yə́sus ayɛ́ɛ aáʼkoman kosɔyɔ náan, aáság kobágɛ əngis a mɔɛn ɔgɔɔ́sɔ́gɔlɔn Táán, ɔnɔ́: «Paabá taa, kɛnɛŋ anɛ́ɛ́n aa kɛ́ɛnɛ kiə́ʼkiigií. Íʼkə́mídi, mɛ Mɔɔ́n waaŋ ná mɛ tɛn nkuugə́midi wɛ. 2Oyɛ́nyɛɛ́ʼkɛn toɛn tó kolaamɛ pɔɔd piim lɛ́ ná nyɛ́ʼkɛn ɔlaa ó pɛnɛŋ piim na ungim nyɔ́ uyícum. 3Taa, ɔlaa ogo ó pɛnɛŋ piim aa wóonɛ ólɛɛ́ lɛ́ págoólɛŋ wɛ, nyɔ́ olɛɛ́ wɛɛ́nyɔ́əsíŋ Táán ɛ fɔ́lɔ́b, páyɛndɛŋ tɛn mɛ Yə́sus Kilíʼtus nyɔ́ uyíím wɛ́ʼtom. 4Paabá, mɛ njígugə́mídi a nsí, mbə́yibə́nən pigólí pɛ́ oyɛ́nyɛɛ́ʼkɛn lɛ́ nyɛ́ɛlɛ. 5Wɛ ɛ́nyɛɛ́ʼkɛn anɛ́ɛ́n kə́mmú nɛ́gɔŋ nugəm nó nyiígóodi kɔ́gɔ́ɔg kalaʼ a ɛbá yááŋ ná oyɛ́ɛ odɛ́njɛ́ɛlɛ nsí.

6«Njɛ́ɛ́lɛ lɛ́ pɔɔd pá uyííyid a nsí omáyɛnyɛɛ́ʼkɛn, págoólɛŋ. Páyɛ́ɛ agoob na wɛ, náa oyɛ́nyɛɛ́ʼkɛn. Pɔ́lɛ́ páyóóbɛ́n tɔgɛ́ɛ́ toáŋ. 7Páʼkolɛŋ nɛ́gɔŋ lɛ́ nkə kiim kɛ́ oyɛ́nyɛɛ́ʼkɛn, əgín káag ná olɛɛ́ aa kíyíím kɛ́dɛ́ɛmɛn, 8lɛ́ nkə kɛ́ mɛ njɛ́bodɛánɛ kɛ́lɛ nkə kɛ́ wɛ wiísə́ə́ lɛ́ mpodɛ́anɛ. Píísiə́d tólɛ́, páʼkolɛŋ fɔ́lɔ́b fɔ́lɔ́b lɛ́ na wɛ áa ndɛɛ́ əgiim ndon fɔ́lɔ́b, pə́mə́yəə́liʼtini tɛn lɛ́ wɛ áa uyíím wɛ́ʼtom. 9A kidíídí kɛɔ́bɔn aa ndɛɛ́ ɔgɔɔ́sɔ́gɔlɔn. Ntɛɔ́gɔ ɔgɔɔ́sɔ́gɔlɔn a kidíídí kɛ́ mɔɔd ungim nyɔ́ a nsí ndóo, ndɛ ɔgɔɔ́sɔ́gɔlɔn əgín a kidíídí kɛ́ pɔsɔ́g pá oyɛ́nyɛɛ́ʼkɛn, lɛ́ pálɛ agoob na wɛ! 10Yiim yɛ́ nkódíí ɛ́lɛ yááŋ, wɔnɔ́ ná yiim yɛ́ wɛ tɛn ugódíí ɛ́lɛɛ́ yáam. Náan, pɔɔd pá oyɛ́nyɛɛ́ʼkɛn páadála nugəm nóam a pɔ́lɛ́. 11Əgəə́bə́ə naánɛ́ yɛ́ɛnɛ, ntiligi kə́mmú a nsí. Mɛ nbə́ndəgiim káag ná olɛɛ́. Náa, pɔ́lɛ́ pə́ndədíin pɔ́lɔb a yɛ́lɛ́. Wɛ nyɔ́ olɛɛ́ ufúlúʼtú, íbuúnúŋ Paabá! Íbuúnúŋ a toɛn tó a niiŋ nɛáŋ, niiŋ nɛ́ oyɛ́nyɛɛ́ʼkɛn, ná pɛ́ɛn úmmuʼ wɔnɔ́ ná pəsi na wɛ tɛlɛɛ́ úmmuʼ. 12Ná njɛ́ɛ na pɔ́lɛ́, njɛ́ɛ əbuúnuŋ a toɛn tó a niiŋ nɛáŋ, niiŋ nɛ́ oyɛ́nyɛɛ́ʼkɛn. Njíbuúnúŋ, ɔmbɔ́ úmmuʼ ənnímin, ná kɛ́sánɛn əgín lɛ́ nyɔ́ ayɛ́ɛ lɛ́ əənim agɛɛlɛ lɛ́ nkə kɛ́ kíyə́dílə́ə́ a Kálaʼtaʼ ɛ Táán, kɛ́as fɔ́lɔ́b#17.12 Kɛ́lɛ náan a kálaʼtaʼ ɛ Pɛʼk 41.10; Sɛ́aŋ 13.18 13Nɛ́gɔŋ yɛ́ɛnɛ, mɛ mbə́ndəgiim káag ná olɛɛ́. Ndɛ agosɔyɔ tɔgɛ́ɛ́ tóonɛ ná nkə́ligi áanɛ a nsí agɛɛlɛ lɛ́ tɔnyɔ́g tó tólɛɛ́ na mɛ síɛ́ɛ́d, tóɛn tɛn síɛ́ɛ́d na pɔ́lɛ́. 14Mbáboyɛ́ʼkɛn tɔgɛ́ɛ́ toáŋ, pɔɔd pá a nsí pámáaboóbɛnɛn lɛ́ pɔ́dɛɔ́gɔ pɔɔd pá páagoob na nsí, wɔnɔ́ ná mɛ tɛn ntɛɔ́gɔ agoóbɛ́ɛ́ na nsí. 15Ntɛɔ́gɔ agooyɔ́sɔ́gɔlɔn lɛ́ úbuúliogi a nsí, ndóo. Náa, nyɔʼkɔ́ úbuúnuŋ agɛɛlɛ lɛ́ Ɔmbɛ́ adɛyɛ́boyɛ́ɛ́lɛ yoom. 16Pɔ́lɛ́ pɔ́dɛɔ́gɔ pɔɔd pá páagoob na nsí, wɔnɔ́ ná mɛ tɛn ntɛɔ́gɔ agoóbɛ́ɛ́ na nsí. 17Ɛɛlɛ lɛ́ pɛ́ɛn kúfuʼ kúfuʼ pááŋ a fɔ́lɔ́b. Tɔgɛ́ɛ́ toáŋ tólɛ fɔ́lɔ́b. 18Wɔnɔ́ ná wɛ oyɛ́ʼtóm a nsí yɛ́ɛnɛ, mɛ mbáboodóm tɛn pɔ́lɛ́. 19Ndɛ agaáyɛ́ʼkɛn mɛɛ́nyɔ́amɔɛ́d ungim na wɛ a oʼto wɔ́ɔ́bɔn agɛɛlɛ lɛ́ pɔ́lɛ́ tɛn póóbanan fɔ́lɔ́b fɔ́lɔ́b na wɛ.

20«Ntɛɔ́gɔ agooyɔ́sɔ́gɔlɔn əgín a kidíídí kɛɔ́bɔn kɛ́ pɔ́lɛ́bə́əsíŋ, ndóo. Ndɛ agooyɔ́sɔ́gɔlɔn tɛn a kidíídí kɛ́ pá pálɛ́ɛ́ kaágɛ́ɛ́ oʼto na mɛ ná pálɛ́ɛ́ koóbɛ́ɛ́ nkə kɛ́ pɔsɔ́g póonɛ pálɛ́ɛ́ koboólɔɛgɛnɛɛ́. 21Paabá, ndɛ agooyɔ́sɔ́gɔlɔn lɛ́ pɔ́lɛ́ piim pɛ́ɛn úmmuʼ wɔnɔ́ ná wɛ olɛɛ́ na mɛ, mɛ na wɛ. Pɛ́ɛn úmmuʼ a pəsi, agɛɛlɛ lɛ́ pɔɔd pá a nsí pə́ə́liʼtini lɛ́ wɛ áa uyíím wɛ́ʼtom. 22Nugəm nó oyɛ́nyɛɛ́ʼkɛn mɛ, mbáboyɛ́ʼkɛn tɛn pɔ́lɛ́ agɛɛlɛ lɛ́ pɛ́ɛn úmmuʼ wɔnɔ́ ná pəsi na wɛ tɛlɛɛ́ úmmuʼ. 23Áay lɛ́, mɛ nyɛ́ɛn a pɔ́lɛ́ wɔnɔ́ na wɛ olɛɛ́ a mɛ ná nɛálad nɛɔ́bɔn nɛ́ɛn fɔ́lɔ́b, pɔɔd pá a nsí pálɛŋ tɛn lɛ́ wɛ áa uyíím wɛ́ʼtom. Páalɛŋ tɛn lɛ́ olɛ agobonyɔ́ŋɛn wɔnɔ́ ná olɛɛ́ agɛnyɔ́ŋɛn mɛ. 24Paabá, oyɛ́nyɛɛ́ʼkɛn pɔ́lɛ́; ndɛ anyɔ́ŋɛn lɛ́ pɔ́lɛ́ tɛn pɛ́ɛn kɛnɔ kɛ́ mɛ ndɛ́ɛ́ kɛɛnɛɛ́, ná pámaʼkanɛ wɔnɔ́ ná ndɛɛ́ na nugəm, nugəm nó oyɛ́nyɛɛ́ʼkɛn lɛ́ oyɛ́nyɔ́ŋɛn əgín kɔ́gɔ́ɔg kalaʼ ná odɛ́njɛ́ɛlɛ nsí. 25Paabá, wɛ nyɔ́ olɛɛ́ sáád, pɔɔd pá a nsí yɛ́ɛnɛ pádɛʼkɛ́ɛ agoólɛŋ, náa mɛ mbágoólɛ́ŋ, paaʼkan páam póonɛ páálɛŋ lɛ́ wɛ áa omɛ́ʼtóm. 26Njɛ́ɛ́lɛ lɛ́ pɔ́lɛ́ págoólɛŋ. Ndəgiiʼkini kɛɛlɛ náan ná pɔ́lɛ́ tɛn pɛ́ɛn na nnyɔ́ŋánán wɔnɔ́ ná wɛ oyɛ́nnyɔ́ŋɛn mɛ. Mɛɛ́nyɔ́amɔɛ́d njɛɛn tɛn a pɔ́lɛ́.»

Currently Selected:

Sɛ́aŋ 17: yatDBL

Highlight

Copy