Sɛ́aŋ 21

Yə́sus ayɛ́ɛ́n ogoóloodi na paaʼkan pə́ə́ŋ páʼtáan na pábaan

1A ngim yɛ́ɛy, Yə́sus ayɛ́ɛ́n ogoóloodi kə́mmú na paaʼkan pə́ə́ŋ a ɛbá ɛ́ noom nó Tɛbɛlɛyáad. Taa nkə kɛ́ kɛ́yásánɛ́ɛ́ kɔ aa kɛ́ɛnɛ. 2Na Simɔ́ɔŋ Píɛ, na Tómas nyɔ́ pɛnyɛʼtɛ́nɛ́n piə́ŋ pɛ́yɛ́ɛ lɛ́ mɔɔ́n ó nɛas, na Naʼtanayɛ́ɛl nyɔ́ a Kánaʼ a nigúu nɛ́ Kalilə́ə, na pɔɔ́n pá Səbədə́ə, na paaʼkan tɛn pə́mmú pá Yə́sus pábaan, páyɛ́ɛ ondáŋ. 3Náa Simɔ́ɔŋ Píɛ ɔnɔ́ na pɔ́lɛ́: «Mɛ, kóam kɛɛn nibúnjə́.» Pə́yɛ́modɛánɛ pɔ́nɔ́ na nyɔ́lɛ́: «Pəsi tɛn kuə́s kiim na wɛ.» Pááság kobag a kɛʼkɔ́m pámɛ́ɛn. Pɛ́ɛ́dágɛ́dɛ nibúnjə́ udúg wóow ungim, pə́ʼkumin yoom. 4Ná koany kóyɛ́ɛ kuə́ndəgiim agaáyɛnɛ, Yə́sus aáság kiim adɛ́lɛm kɔ áay a ɛbá ɛ́ noom. Kɛbán kímuʼ, paaʼkan pádɛʼkɛ́ɛ agolɛŋ lɛ́ nyɔ́lɛ́ aa adɛ́lɛ́mɛ́nɛ́ɛ́ náan. 5Náa Yə́sus ɔnɔ́ na pɔ́lɛ́:

«Pɔɔ́n páam tuə́! Puʼkóodi pusú ə́?» Pə́yímuyúlísíni pɔ́nɔ́: «Ndóo, óo!» 6Náa Yə́sus ɔnɔ́ pɔ́lɛ́: «Siə́dəən əmbúnjə́ yááŋan, pódagɛdɛ a ombɔg wááŋan ó nɛnom, puəgumin pusú.» Pááság kusiəd əmbúnjə́ páádagɛ́dɛ. Pádɛʼkɛ́ɛ kə́mmú na ngə́ igusúid yɛ́lɛ́ lɛ́ áyɛ́ɛ yándɛ sud, síɛ́ɛ́d na pusú. 7Ongaaʼkan nyɔ́ Yə́sus ayɛ́ɛ anyɔ́ŋɛn aáság kusəə ɔnɔ́ na Píɛ: «Píɛ, Sə́dúk áa alɛɛ́nɔ!»

Ná Simɔ́ɔŋ Píɛ ayóób náan lɛ́: «Sə́dúk áa alɛɛ́nɔ», aáság kəə́bisig kaáyáág kilə́ə́ kiə́ŋ lɛ́ oyóliógíí kɛ́lɛ́ agodagɛdɛ nibúnjə́. Aáság kaádagɛdɛ a məní cuuum, əə́bə́ə́ kɛɛn na məʼtum. 8Wɔnɔ́ ná ɛbá ɛ́dɛʼkɛ́lɛɛ́ laálá, ɛ́yɛ́ɛ yoom náanɛ wɔnɔ́ mɛ́ʼtaʼ əʼtin áʼtáan, paaʼkan pə́mmú póʼkáag pááság kudíin píim na kɛʼkɔ́m, pə́ədulə nibúnjə́ síɛ́ɛ́d na pusú. 9Ná písúú a kɛdɛ́ɛ́, pɛ́ɛ́bóan yug kɔ ɛgonyáán, pɛgan piə́ʼkudə́əŋ, pusú pólɛ kɔ, pɛlɛ́ɛd a ɛbá. 10Náa Yə́sus ɔnɔ́ na pɔ́lɛ́: «Puínjiimin áay na ngab ɛ pusú yɛ́ puə́gumin.» 11Simɔ́ɔŋ Píɛ aáság kiiʼkini kɛɛn abag a kɛʼkɔ́m, əə́dulid nibúnjə́ a kɛdɛ́ɛ́ na pusú kɔ síɛ́ɛ́d, pɛa pɛ́ piʼtóʼtólog pɛ́ pusú, əʼtin áʼtáan na ábaan, na pusú pówád na pódáád. Ɔmbɔ́ wɔnɔ́ ná nibúnjə́ níísiə́d pusú náan, nɛ́dɛʼkáawagɛg. 12Náa Yə́sus ɔnɔ́ na pɔ́lɛ́: «Mɛ́naan anɛ́ɛnɛ.» Ɔmbɔ́ ongaaʼkan úmmuʼ, adɛʼkáawɛ́ɛsɛ kumuŋíən lɛ́ əə: «Wɛ ɔmmɔɛ́d, olɛ ánɛ ə́?» Pɛ́ɛ́lɛŋɛn kɔŋɛʼ kɔŋɛʼ pɔ́lɛ́ piim lɛ́ Sə́dúk áa alɛɛ́nɔ. 13Aáság kaáyɛʼtɛnɛ, əə́siəd pɛlɛ́ɛd, amáboyáában, amáboyɛ́ʼkɛn tɛn pusú. 14Pɛnɛŋ pɛ́dáád pɛ́ Yə́sus oyólódíí na paaʼkan pə́ə́ŋ aa pɛ́ɛb, wɔnɔ́ ná yɛɛ́lón a kəəniʼ.

Oʼtom wó Yə́sus ayɛ́ʼkɛn na Píɛ

15Ná páyɛ́ɛ páʼkoman konɛ́ɛnɛ, aáság kodɔ́ŋɔn Simɔ́ɔŋ Píɛ, náa ɔnɔ́ na nyɔ́lɛ́: «Simɔ́ɔŋ, mɔɔ́n ɔ́ Sɛ́aŋ, olɛ agɛnnyɔ́ŋɛn agaáyɛn pɔsɔ́g póonɛ a?» Náa Simɔ́ɔŋ ɔnɔ́ na nyɔ́lɛ́: «Ɛɛ́ɛ Sə́dúk, waálɛŋ wɛɛ́nyɔ́amɔɛ́d lɛ́ ndɛ agoonyɔ́ŋɛn.» Náa Yə́sus ɔnɔ́ na nyɔ́lɛ́: «Ooo, tíin anɛ́ɛ́n únuŋ monyɛɛnyɛgɛʼ móam mó mudúg.» 16Yə́sus aáság kiiʼkini kuŋíən na Píɛ, a pɛnɛŋ pɛ́baan, ɔnɔ́ əə: «Simɔ́ɔŋ, mɔɔ́n ó Sɛ́aŋ. Olɛ agɛnyɔ́ŋɛn a?» Píɛ aáság kiiʼkini kusəə ɔnɔ́ na nyɔ́lɛ́: «Ɛɛ́ɛ Sə́dúk, waálɛŋ wɛɛ́nyɔ́amɔɛ́d lɛ́ ndɛ agoonyɔ́ŋɛn.» Náa Yə́sus ɔnɔ́ na nyɔ́lɛ́: «Ooo, tíin anɛ́ɛ́n únuŋ mudúg móam.» 17Ɔʼtɛ́m ó Píɛ wɛ́ɛ́yɛ́b ná Yə́sus əyíʼkíni kumuŋíən a pɛnɛŋ pɛ́dáád náan lɛ́ əə: «Simɔ́ɔŋ, mɔɔ́n ó Sɛ́aŋ. Olɛ agɛnyɔ́ŋɛn a?» Yiísə́ə́ ɔnɔ́ na Yə́sus: «Sə́dúk, wɛ waálɛŋ yoom yiim. Waálɛŋ lɛ́ ndɛ agoonyɔ́ŋɛn.» Náa Yə́sus ɔnɔ́ na nyɔ́lɛ́: «Tíin anɛ́ɛ́n únuŋ mudúg móam. 18A fɔ́lɔ́b ndagodɛ́anɛ lɛ́, kɛnɛŋ kɛ́ oyɛ́ɛ ugə́ligi ɔnyɔmmɔ́n, oyɛ́ɛ wəə́suŋ kandá wɛɛ́nyɔ́amɔɛ́d, waágɛɛn kɛnɔ kiim kɛ́ waányɔ́ŋɛn. Ná wəə́lun, olɛ́ɛ́ kodam agá ɔmbɔg lɛ́ mɔɔd wɛndɛ́ŋ ə́guusuŋ kandá. Pálɛ́ɛ́ kɛɛn na wɛ a kɛnɔ kɛ́ odɛányɔ́ŋɛnɛɛ́.» 19A tɔgɛ́ɛ́ tóod, Yə́sus ayɛ́ɛ anyɔ́ŋɛn kuloodi ombod ó kugu wó Píɛ alɛ́ɛ́ kugúú, agɛɛ́ʼkɛn nugəm na Táán. Ná ayɛ́ɛ aáʼkoman kosɔyɔ náan, aáság kusəə ɔnɔ́ na Píɛ: «Mɛ́ɛn wínjə́ən.»

20Pə́ə́bə́ə́ kɛɛn. Náa Píɛ əyə́búʼkíníí ngim, yɛɛ́dála ongaaʼkan nyɔ́ Yə́sus ayɛ́ɛ anyɔ́ŋɛn əə́giim ə́buyə́ən. Nyɔ́lɛ́ ogo aa ná páyɛ́ɛ agonɛ́ɛnɛ, yɛɛ́sɛ́lɛ́gɛ oʼto a oʼtóɛŋ ó Yə́sus, ɔnɔ́ na nyɔ́lɛ́ əə: «Sə́dúk, ánɛ aa aágoólɛg əə́?» 21Ná Píɛ ayɛ́moodála, yiíŋíən ɔnɔ́ na Yə́sus əə: «Sə́dúk! Sɔ́g nyóonɛ oʼ, kiə́ŋ ə́ə, kɛ́agɛɛn tuə́ ə́?» 22Náa Yə́sus ɔnɔ́ na nyɔ́lɛ́: «Mbaʼkɔnyɔ́ŋɛn lɛ́ álaa súʼtə́ə́ a kɛnɛŋ kɛ́ ndɛ́ɛ́ kimbuúlinií, kɛáŋ kɔ lɛ́ nkə ə́? Wɛ, mɛ́ɛn agá wínjə́ən.» 23A tɔgɛ́ɛ́ tóod aa ungim a ondáŋ ó pəə́liʼtiniʼ yiígúmin lɛ́, ongaaʼkan nyóon adɛndɛ́ɛ́ kugu. Kɔmɔɛ́d lɛ́ adɛ́njaŋ náan aa Yə́sus yiísə́ə́ na Píɛ. Yiísə́ə́ lɛ́: «Ɔmbɔ́ nnyɔ́ŋɛn lɛ́ álaa agɛɛn əgiig əgín a kɛnɛŋ kɛ́ ndɛ́ɛ́ kimbuúlini əə, kɛáŋ kɔ lɛ́ nkə ə́?»

Koon oʼto kó tɔgɛ́ɛ́

24Ongaaʼkan ogo nyóon aa alɛɛ́ na mbaasɔ́ yɛ́ɛnɛ; nyɔ́lɛ́ aa yiídílə pɛbán pɛ́ɛnɛ. Tɛálɛŋ lɛ́ mbaasɔ́ yəəŋ ɛlɛ ɛ fɔ́lɔ́b.

25Ɛ́fɔlɛ́ ɛ́ pɛbán pímmú pɛ́lɛ kɔ pɛ́ Yə́sus ayɛ́ɛ́lɛ. Píídilən piim, kudəənə kímuʼ kímuʼ, ndaafɛg lɛ́ ɔmbɔ́ nsí yɛ́ɛnɛ ngim ɛdɛʼkɛ́ɛ agaáʼkɛ konyáŋɛn pagálaʼtaʼ piim pá pámɛ́ɛ ədilə pɛ́lɛ́ kɔ.

Currently Selected:

Sɛ́aŋ 21: yatDBL

Highlight

Copy