LÓʼKAS 11

Nkə kɛ́ Yə́sus ayáʼkánánɛ na paaʼkan pə́ə́ŋ a noá na pɛɔ́sɔ́gɔ́lɔ́n

(Maʼt 6.9-13)

1Yə́sus ayɛ́ɛ wɔɔ́s wúmmú a pɛɔ́sɔ́gɔ́lɔ́n kɛnɔ. Ná ayɛ́ɛ aáʼkoman kɔɔ́sɔ́gɔlɔn, mɔɔ́n wəəŋ ogaaʼkan nyummú aáság kusəə ɔnɔ́ na nyɔ́lɛ́: «Sə́dúk, ɛ́bɛyáʼkánánɛ kɛɛlɛ pɛɔ́sɔ́gɔ́lɔ́n wɔnɔ́ ná Sɛ́aŋ Ɔsɔgɛn pɔɔd ayáʼkánánɛ paaʼkan pə́ə́ŋ.» 2Náa Yə́sus ɔnɔ́ na pɔ́lɛ́: «Poɔ́ndɔgɔɔ́sɔ́gɔlɔn, púsəə poɔʼkɔ́:

“Paabá,

ɛɛlɛ lɛ́ ungim álɛŋ ánɛ aa olɛɛ́,

Nɛlaamɛʼ nɛáŋ níim,

3Ɛ́bɛyɛ́ʼkɛn ɛ́nɛ́ wɔɔ́s, moom mó konɛ mó moásɛʼtan na pəsi.

4Íbilísin a mabɛ́ mə́ə́s

lɛ́ pəsibáamɔɛ́d tɛn tɛlɛɛ́ əgulisin ungim nyɔ́ alɛɛ́ agɛbɛyɛ́ɛlɛ pəsi kɔbɛ́.

Udiyíbiidí lɛ́ tídə́əŋ a pɛásɔ́sɛ́n”.»

Nkaʼtɛ́n ɛ mɔɔd nyɔ́ ayɛ́ɛ ɔgɔʼtɔn a udíyoog ó sɔ́sɔ́g wəəŋ, ɔʼtɔm

5Yə́sus əyíʼkíni kusəə ɔnɔ́ na pɔ́lɛ́: «Tísələə́n lɛ́: Nyummú a ondáŋ wááŋan alɛ na sɔ́sɔ́g wəəŋ, áság kɛɛn amoóboan na ɔʼtɛ́m wó udúg, ɔnɔ́ na nyɔ́lɛ́: “Sɔ́g waam, ɛ́fáŋɛ́ pɛlɛ́ɛd ɔmbɔ́ pɛ́dáád 6lɛ́ sɔ́g waam nyummú aáʼkɛndónɛn, alɛ agɛɛn ongɛn, ntigóodi yoom yɛ́ ndɛɛ́ ogomoyɛ́ʼkɛn lɛ́ ánɛ.” 7Sɔ́sɔ́g wəəŋ nyóon əməʼkiim ə́muyúúlisini kɔ́gɔ́ɔg a yoog kusuu a kaadɛ, ɔnɔ́: “Odɛyɛ́ndɛ́san, mbə́ʼkəə́buəg. Tɛáʼkɛ́mmɛŋɛn lɛ́ na mɛ pɔɔ́n na mɛɛ́nyɔ́amɔɛ́d. Ntɛɔ́gɔ ugiiʼkini kodɛ́ɛmɛn əgiim ogooyɛ́ʼkɛn pɛlɛ́ɛd.” 8A fɔ́lɔ́b, ndabodɛ́anɛ anɛ́ɛ́n lɛ́ ɔmbɔ́ adɛʼkɛ́ɛ anyɔ́ŋɛn kodɛ́ɛmɛn a oʼto wóonɛ lɛ́ sɔ́sɔ́g wəəŋ áa alɛɛ́nɔ lɛ́ yíim ámoyɛ́ʼkɛn nkə kɛ́ alɛɛ́ anyɔ́ŋɛn, aadɛ́ɛmɛn a oʼto wóonɛ lɛ́ sɔ́g wəəŋ nyóon ɔdɛɔ́gɔ agodɔm kogɔʼtɔn a táán.»

Nyɔ́ ɔɔ́gɔɔŋɔn, páamoyɛ́ʼkɛn

(Maʼt 7.7-11)

9«Ɛɛ́ɛ, ndabodɛ́anɛ nyɔʼkɔ́: Ɔɔŋɔ́nɔɔn, páaboyɛ́ʼkɛn. Uunə́ən, poɔgɔɔŋ. Kɔdɛ́daan a udíyoog, pə́əbuúbuən. 10Kɛ́lɛ lɛ́, nyɔ́ ɔɔ́gɔɔŋɔn, páamoyɛ́ʼkɛn. Nyɔ́ əə́guunə, ɔɔgɔɔŋ. Nyɔ́ ɔɔ́gɔdɛd a udíyoog, pə́əmuúbuən. 11#11.11 A pagálaʼtaʼ pə́mmú pá kalaʼ pá píídílə na ombɔg, niə́bə́ə́ nɛ́ niɛŋ nɛ́ɛnɛ nɛ́lɛ lɛ́: «Wɛ oyaán áa a ondáŋ wááŋan olɛɛ́ ogɛɛlɛ lɛ́ mɔɔ́n waaŋ amaʼkogoyɔ́ɔŋɔn yoom ɛ́ konɛ, óomoyɛ́ʼkɛn agá nɛdáán ə́?» Wɛ sɛ a mɔɔ́n oyaán áa olɛɛ́ ogɛɛlɛ lɛ́ mɔɔ́n waaŋ amaʼkogoyɔ́ɔŋɔn ɛyɛ́g, óomoyɛ́ʼkɛn agá uʼkud ə́? 12Ɔmbɔ́ lɛ́ amaʼkomoyɔ́ɔŋɔn nɛbom, áamoyɛ́ʼkɛn agá ɛgɔ́sɔ́ɔ́? 13Kɛ́maʼkɛɛn náan lɛ́ pəŋi pá polɛɛ́ lɛ́ polɛ pɛbɛ́ pɛ́ pɔɔd podɛɔ́gɔ agaáʼkɛ kɛɛ́ʼkɛn yoom yɛ́ ɛ́lɛɛ́ ɛbɛ́ na pɔɔ́n pááŋan, pɛnɛŋ pɛ́sɛ́g anɛ́ɛ́n na Sɛ waaŋan nyɔ́ alɛɛ́ a mɔɛn ə́? Nyɔ́lɛ́ alɛ ogolɔb lɛ́ adɛágɛɛ́ʼkɛn Uŋun wó Ufúlúʼtú na pá páamoyɔ́ɔŋɔn ɔ?»

Yə́sus alɛ uʼkudin o Pə́lə́səbul oóm

(Maʼt 9.32-34, 12.22-30; Mə́l 3.22-27)

14Wɔɔ́s wúmmú, Yə́sus ayɛ́ɛ agoŋɛŋ uŋun wó ɔmbɛ́ wó óyáánɛ mɔɔd nyummú mummug. Ná uŋun wó ɔmbɛ́ wóow wɛ́ɛ́lón, mɔɔd əə́bə́ə́ kosɔyɔ. Pɔɔd píígə́g kugə́gə́ə́n. 15Náa, pɔsɔ́g pə́mmú pə́ə́bə́ə́ kosɔyɔ pɔ́nɔ́: «Pə́lə́səbul, nkúm ɛ məŋun má mabɛ́ aa ɛmoyɛ́ʼkɛ́nɛ́nɛ́ɛ́ toɛn tóod tó alɛɛ́ agoŋɛ́ŋŋaŋ məŋun má mabɛ́ na tólɛ́.» 16Pɔsɔ́g pə́mmú tɛn páyɛ́modámɛn umbiŋ. Náan aa pə́yímuŋíən pɔ́nɔ́ na nyɔ́lɛ́: «Ɛɛlɛ kɛálɛ́ʼkán kɛ́ kíəbiíloodi lɛ́ Táán áa əyíím ágoodom.»

17Náa, nyɔ́lɛ́ yɛɛ́lɛŋɛn mafɛgaʼ má páyɛ́ɛ na mɔ́lɛ́ a ɔʼtɛ́m. Náa ɔnɔ́ na pɔ́lɛ́: «Nigúu niim nɛ́ pɔɔd páagaánɔɛyɛ pɛdá pɔ́lɛ́ na pɔ́lɛ́, nɛ́lɛ nigúu nɛ́ níəwu, toádɛʼ toɔ́bɔn túəbumbug a pogó pó pɔsɔ́g, a pogó pó pɔsɔ́g. 18Wɔnɔ́ ná poɔʼkɔ́ a toɛn tó Pə́lə́səbul aa ndɛɛ́ agoŋɛ́ŋŋaŋ məŋun má mabɛ́ ə́, tuə́ áa nɛlaamɛʼ nɛ́ Sáʼtan nɛ́lɛɛ́ nɛ́gɛɛn yuudi ná Sáʼtan alɛ agaánɔɛyɛ pɛdá nyɔ́lɛ́nyɔ́amɔɛ́d ə́? 19Kɛ́maʼkɛɛn anɛ́ɛ́n náan lɛ́ a toɛn tó Pə́lə́səbul aa ndɛɛ́ agoŋɛ́ŋŋaŋ məŋun má mabɛ́, pááŋan pɔɔd oóoʼ, a tó ánɛ aa pɔ́lɛ́ pálɛɛ́ agoŋɛ́ŋŋaŋ mɔ́lɛ́ ə́? A niɛlɛ nɛɔ́bɔn nɛ́ɛn, póóloodi pɔ́lɛ́báamɔɛ́d anyóon lɛ́ polɛ na nsɔ́ɔ́. 20A fɔ́lɔ́b, a toɛn tó Táán áa mɛ ndɛɛ́ agoŋɛ́ŋŋaŋ məŋun má mabɛ́. Pólɛŋ anyóon lɛ́ Nɛlaamɛʼ nɛ́ Táán niə́ʼkiim əgiig ná polɛɛ́. 21Kɛnɛŋ kɛ́ mɔɔd o toɛn alɛɛ́ na muduə́m muə́ŋ, náa əə́ləndin əgunuŋ noádɛʼ nuə́ŋ, yoom yə́ə́ŋ ɔmbɔ́ ímuʼ ɛ́dɛ́afabɛlɛd. 22Kɛbán kímuʼ, sɔ́g nyɔ́ alɛɛ́ na toɛn a komoyááyɛn əməʼkiim alon áság komoónyɔŋ, aamoóbɔgɔ muduə́m muə́ŋ muim mó ayáágɛn oʼto a mólɛ́, áság koman kaaba yiim yɛ́ ɛ́yɛ́ɛ agoob na nyɔ́lɛ́. 23Nyɔ́ ɔdɛɔ́gɔ na mɛ, alɛ nyɔ́ alɛɛ́ agɛnnɔɛyɛ. Nyɔ́ ɔdɛɔ́gɔ əgiʼkóminií kodáaŋɛ, alɛ agofámɛ kofámɛán.

Ná məŋun má mabɛ́ mə́əgiim mə́dii

(Maʼt 12.43-45)

24«Kɛnɛŋ kɛ́ uŋun wó ɔmbɛ́ wáálón a nkó ɛ mɔɔd, wə́bə́ə́ kiim úyə́yəə a pɛnɔ pɛ́ pifələ́ə́n, wə́əguunə kɛnɔ kɛ́ wáagɛɛn ələndin. Ódɛɔ́ŋɛn ná úsəə kɔ na wólɛ́wóamɔɛ́d wɔnɔ́: “Ndəguúlini a yoog yaam, kɛnɔ kɛ́ njɛ́ɛ.” 25Ná wə́əgimbuúlini, wóaboan yoog ɛlɛ iyó, pámóóla, páálɛŋ kusóboni. 26Ná wɛ́ɛn anɛ́ɛ́n anyama məŋun mɛ́ndɛ́ŋ máʼtáan na mábaan má mə́míʼkíni kɔyɛb a komoyááyɛn nyɔ́lɛ́, píimənən, pɔ́dɔsɛm a oʼkɔɔ wɔ́ɔ́bɔn. A komananɛ, oʼtɛ́lɛm ó mɔɔd nyóon wə́əgiiʼkini kɔyɛb agaáyɛn wɔnɔ́ ná ayɛ́ɛ kalaʼ.»

Kɔŋɛʼ kó fɔ́lɔ́b

27Yə́sus aaman kosɔyɔ náan a, ɔʼkɛ́ɛd nyummú kɔ áay a kiʼtúú aáság kudə́əmini tɔgɛ́ɛ́ ɔnɔ́ na nyɔ́lɛ́: «Kɔŋɛʼ igə na ɔʼkɛ́ɛd nyɔ́ ayɛ́gonyáŋɛn a kaadɛ kə́ə́ŋ, amáyɛgoŋɛ́ʼkɛ.» 28Náa, nyɔ́lɛ́ əyímuyúlísíni ɔnɔ́: «Kɔŋɛʼ agá na pá pálɛɛ́ agoob tɔgɛ́ɛ́ tó Táán, páagɛɛlɛ nkə kɛ́ kɛ́lɛɛ́ kɔ!»

Pííŋíən na Yə́sus lɛ́ yɛ́ɛlɛ ongán

(Maʼt 12.38-42)

29Wɔnɔ́ ná piʼtúú pɛ́ pɔɔd pɛ́yɛ́ɛ əgiim əgəə́yiilə, Yə́sus əə́bə́ə́ kosɔyɔ na pɔ́lɛ́, ɔnɔ́: «Pəŋi ɔsɛg wóonɛ ó nɛ́gɔŋ wó poyɛ́bɛ́nɛ́ɛ́, puəgiŋíən lɛ́ nyɛ́ɛlɛ kɛálɛ́ʼkán. Ndóo, pudiə́giim agɛɛn na kɛálɛ́ʼkán kɛ́ndɛ́ŋ ná kɛ́sánɛn əgín kɛ́ɛg kɛ́ kɛ́yáyɛ́lɛ́ɛ́ na Sɛonáas. 30Kɛ́lɛ lɛ́, yoom ímuʼ wɔnɔ́ nkə kɛ́ kɛ́yásánɛ́ɛ́ na Sɛonáas kɛ́yɛ́ɛ kɛálɛ́ʼkán a pɔɔd pá a Niníif, náan aa nkə kɛ́ kɛ́lɛ́ɛ́ kaásan na mɛ Mɔɔ́n o mɔɔd, kɛ́lɛ́ɛ́ kɛɛn tɛn kɛálɛ́ʼkán a ɔsɛg wóonɛ ó nɛ́gɔŋ. 31A wɔɔ́s ó pɛyɔm, ɔʼkɛ́ɛd nyummú, nkúm yɛ́ a nigúu nɛ́ kusuu ɛlɛ́ɛ́ kodɛ́lɛm a udi wó ɔsɛg wóonɛ ó nɛ́gɔŋ. Ɛlɛ́ɛ́ koboyɛ́ʼkɛn nsɔ́ɔ́ lɛ́ yɛ́lɛ́ iyíím ɛ́dɛ́ɛmɛn laálá kɔ́gɔ́ɔg a əʼkúu yɛ́ a nɛsom nɛ́ nsí nímmú əgiim agoob tɔgɛ́ɛ́ tó nsiŋ tó Salomɔ́ɔŋ#11.31 Kɛ́lɛ náan a kálaʼtaʼ ɛ 1Puʼk 10.1-10 Lɛŋáan lɛ́ nyɔ́ amááyɛn Salomɔ́ɔŋ alɛ áanɛ! 32A wɔɔ́s ó pɛyɔm, pɔɔd pá a Niníif pálɛ́ɛ́ kodɛ́lɛm a udi wó ɔsɛg wóonɛ ó nɛ́gɔŋ, páyɛ́boyɛ́ʼkɛn nsɔ́ɔ́ lɛ́ ná pɔ́lɛ́ páyóób nkə kɛ́ Sɛonáas ayɛ́bolɔɛ́gɛ́nɛ, pɛ́ɛ́gásɛ ɔlaa wɔ́ɔ́bɔn#11.32 Kɛ́lɛ náan a kálaʼtaʼ yɛ Sɛo 3.5, 8, 10 Lɛŋáan lɛ́ nyɔ́ amááyɛn Sɛonáas alɛ áanɛ!»

Pɔ́dɛɔ́gɔɔsɛg kisəə

(Maʼt 5.15; Mə́l 4.21, 6.22-23; Lóʼk 8.16)

33«Mɔɔd ədiə́guug ɛláam lɛ́ ə́súʼkin na kɛlongá, ndóo. Aagɛɛdɛg agá yɛ́lɛ́ a mɔɛn lɛ́ ungim nyɔ́ ɔɔ́sɔd a yoog, ádɛ́ʼtɛganan. 34Niis nɛ́lɛ ɛláam a nkó yaaŋ. Náa, kɛnɛŋ kɛ́ əngis yááŋ álɛɛ́ aŋŋɛʼ, nkó yaaŋ tɛn ngim ɛlɛ a kɛmoámoáŋ. Náa, kɛnɛŋ kɛ́ əngis yááŋ yándabányɛ́ɛ́, nkó yaaŋ tɛn ngim ɛlɛ a mbin. 35Ásóngɛ́ɛ́ anɛ́ɛ́n a ɔʼtɛ́m wááŋ a kaadɛ agodála nga kisəə kɛ́ kɛ́lɛɛ́ na wɛ kɛ́dɛɔ́gɔ mbin. 36Nkó yaaŋ ngim ɛmaʼkɛɛn lɛ́ ɛlɛ a kɛmoámoáŋ, ɛdiɛn na mbin a ɛyaa ɛ́ kɛnɔ yímmú, yaagɛɛn a kɛmoámoáŋ yɛ́lɛ́ ngim wɔnɔ́ a kɛnɛŋ kɛ́ ɛláam ɛ́lɛɛ́ agolɛŋ konom.»

Yə́sus yiísə́ə́ lɛ́ Pafalɛsɛyɛ́ɛŋ na palɛŋ pɛcɛm pálɛ na nsɔ́ɔ́

(Maʼt 23.4,6-7,13,25-27,29-31,34-36)

37Ná Yə́sus ayɛ́ɛ aáʼkoman kosɔyɔ, mɔɔ́n ó Falɛsɛyɛ́ɛŋ nyummú aáság komoodɔ́ŋɔn lɛ́ pɛ́ɛn anɛ́ɛnɛ a noádɛʼ nuə́ŋ. Pááság kɛɛn, əə́ləndin agonɛ́ɛnɛ. 38Mɔɔ́n ó Falɛsɛyɛ́ɛŋ nyóon əyə́wúnə́níí kɛ́fɔlɛ́ ná yɛɛ́dála lɛ́ Yə́sus əə́də́ə́ŋə́nən moom konɛ adɛásɔ́gáá agaásɔgɛn wɔnɔ́ ná pisiə́g pɛɔ́bɔn pɛ́lɛɛ́ əgusəə.

39Náa Sə́dúk ɔnɔ́ na nyɔ́lɛ́: «Pəŋi Pafalɛsɛyɛ́ɛŋ, táláan wɔnɔ́ ná polɛɛ́ taa: Polɛ agosoga pilən pɛáŋan na pəʼkúmbəʼ pááŋan. Pálɛ káanɛ a táán púyúŋ púyúŋ, kɔmɔɛ́d lɛ́ ntɛ́m yaaŋan a kaadɛ ɛlɛ na mafɛgaʼ má wiib síɛ́ɛ́d, na pɛbán pɛ́ pɛbɛ́ síɛ́ɛ́d. 40Piyəg wɔnɔ́ pəŋi! Adɛ́ Táán nyɔ́ ayɛ́ɛ́lɛ nkə kɛ́ kɛ́lɛɛ́ a táán áa ayɛ́ɛ́lɛ tɛn nkə kɛ́ kɛ́lɛɛ́ a kaadɛ a? 41Ɛ́ʼkɛ́naan agá nkə kɛ́ kɛ́lɛɛ́ a pilən pɛáŋan na pəʼkúmbəʼ pááŋan a kaadɛ na mɔsɔ́gasɔ́gá, áay moom moáŋan muim móagɛɛn mufúŋiə́n.

42«Maan na pəŋi Pafalɛsɛyɛ́ɛŋ! Polɛ agɛɛ́ʼkɛn Táán kɛowád kɛ́ a muyənjə́g mó moom wɔnɔ́ pisənduŋ, pondóŋ ndíg na pɛnyaá piim pɛ́ pɛ́lɛɛ́ agolog a malɛ́m mááŋan#11.42 Kɛ́lɛ náan a kálaʼtaʼ ɛ Ləf 27.30; Tɛʼt 14.22 Puʼkóodi kɛnɛŋ na pɛbán pɛ́ pɛ́lɛɛ́ sáád, podiɛn na nnyɔ́ŋánán na Táán. Kɔmɔɛ́d lɛ́ nkə kɛ́ puígóodi lɛ́ póɛlɛ aa kɛ́ɛg, poágɛɛlɛ tɛn pɛ́ʼkáanɛ.

43«Maan na pəŋi Pafalɛsɛyɛ́ɛŋ! Puəguunə kuləndən əgín a mɔʼkɔɔ má yuudi a puog pó pɛɔ́sɔ́gɔ́lɔ́n, poányóŋɛnɛla lɛ́ pə́buúsoyidəni na nnyáádɛ́ ngim a pɛdom. 44Maan na pəŋi! Polɛ wɔnɔ́ pəgəəniʼ pá pádɛálɛʼkananɛɛ́, náa pálɛɛ́ agodáŋana kɔ a mɔɛn pádɛálɛ́ŋɛ́ɛ́!»

45Náa ɔndɛŋ pɛcɛm úmmuʼ a pá páyɛ́ɛ kɔ ɔnɔ́ na Yə́sus əə: «Kɛlág, a nisəə nɛáŋ nɛ́ɛn, pəsi aa woábɛɛdóga tɛn náan oóm!» 46Yə́sus əyímuyúlísíni ɔnɔ́ na nyɔ́lɛ́: «Maan na pəŋi tɛn palɛŋ pɛcɛm! Polɛ agobonan agá pɔsɔ́g pɛnó pɛ́ pɛnasáŋ lɛ́ pányáŋɛn, pəŋibáamɔɛ́d pudiə́gəə́liʼtini kodɔ́bɛd konyáŋɛn pɛ́lɛ́ ɔmbɔ́ sɔɔŋ na ɛnoónó. 47Maan na pəŋi! Polɛ amaaŋan pisig pɛ́ pəgəəniʼ pá palɔɛgɛʼ pɛbán pá Táán, kɔmɔɛ́d lɛ́ pasɛʼkóón pááŋan aa páyɛ́boyóóna. 48Polɛ əguloodi aa nyóon lɛ́ polɛ unuʼ úmmuʼ na pɔ́lɛ́ a nkə kɛ́ páyɛ́ɛ́lɛ lɛ́ pɔ́lɛ́ páagoóna palɔɛgɛʼ pɛbán pá Táán, pəŋi poámaaŋan pəgəəniʼ pɔ́ɔ́bɔn! 49Kólɛ́ aa Táán yiísə́ə́ a nsiŋ yəəŋ, ɔnɔ́: “Ndɛ́ɛ́ kiim mpodómɛn lɛ́ na palɔɛgɛʼ pɛbán, na pɔɔ́n pá maʼtom. Pálɛ́ɛ́ koóna ngab yimmú, pə́əyəʼkəni pə́mmú.” 50Kólɛ́ aa maŋɔ́ má palɔɛgɛʼ pɛbán pá Táán pá páyóóna málɛ́ɛ́ kəə́ŋíənií na ɔsɛg wóonɛ ó nɛ́gɔŋ, Əgəə́bə́ə a pɔsɔ́g pá páyóóna əgín kɔ a nɛsaŋ nɛ́ nsí. 51Ɛɛ́ɛ, ndabodɛ́anɛ lɛ́, Əgəə́bə́ə a maŋɔ́ má Ábɛl, agɛɛn əgiig a maŋɔ́ má Saʼkalɛ́as nyɔ́ páyóón a kɛgaágadɛ kɛ́ɛg lɛ́ kibóŋ kɛ́ pɛfɔny áanɛ, uʼkóó ó Táán kága#11.51 Kɛ́lɛ náan a kálaʼtaʼ yɛ Siɛ 4.8; 2Kni 24.20-22 , pálɛ́ɛ́ kuŋíən mɔ́lɛ́ na ɔsɛg wóonɛ ó nɛ́gɔŋ. 52Maan na pəŋi palɛŋ pɛcɛm! Puísiə́d ilibəʼ yɛ́ yə́əbuən ngə́ ɛ kolɛŋ, pəŋibáamɔɛ́d posɔ́d kɔ, podɛáʼkɛ́nɛ tɛn lɛ́ pá pálɛɛ́ anyɔ́ŋɛn kosɔd kɔ, pɔ́sɔd.»

53Ná Yə́sus ayɛ́ɛ aáʼkolon a noádɛʼ nóon, palɛŋ pɛcɛm na Pafalɛsɛyɛ́ɛŋ pə́ə́bə́ə́ koob ilúún na nyɔ́lɛ́ na toɛn, pə́əmuŋíənə paʼkɛ́sɔn piíŋ a ɛ́fɔlɛ́ ɛ́ pɛbán ngim. 54Páyɛ́ɛ agomodáman mbiŋ lɛ́ ná álónɛ nɔgɛ́ɛ́ nó nobɛ́ a unuʼ wə́ə́ŋ.

Currently Selected:

LÓʼKAS 11: yatDBL

Highlight

Copy