LÓʼKAS 22

Puʼkúm póyáyóóbánánɛ́ɛ́ lɛ́ póon Yə́sus

(Maʼt 26.1-5,14-16; Mə́l 14.1-2,10-11)

1Wɔɔ́n ó Páska, wɔɔ́n wó Yúdɛn ɛyɛ́ɛ ɛnɛ́alɛla pɛlɛ́ɛd pɛ́ páánám pádɛág toan tó kunudi umbúb óyɛ́ɛ wándɛ ndúmiʼ#22.1 Kɛ́lɛ náan a kálaʼtaʼ yɛ Ɔsa 12.1-27 2Puʼkúm pó payaaganɛʼ pɛfɔny na palɛŋ pɛcɛm páyɛ́ɛ əguunə tuə́ áa pɛ́ɛlɛɛ́ agoon Yə́sus. Náa, páyɛ́ɛ agodammana nigúu.

Siudáa amáyóóbánánɛ́ɛ́ na puʼkúm

(Maʼt 26.14-16; Mə́l 14.10-11)

3Sáʼtan yɛɛ́sɔ́d a ɔʼtɛ́m ó Siudáa nyɔ́ pɔ́ɔdɔ́ŋɔn lɛ́ Ɛsɛʼkalɛyóod, ongaaʼkan o Yə́sus nyummú nyɔ́ a paaʼkan pə́ə́ŋ pá pówád na pábaan 4aáság kɛɛn aboan puʼkúm pó payaaganɛʼ pɛfɔny na puʼkúm pó pasɔ́njaa pá páyɛ́ɛ əgunuŋilə Tɛ́mpɛl, agaáganan na pɔ́lɛ́ wɔnɔ́ ná aágɛɛlɛ agoboólɛgɛn Yə́sus. 5Pɛ́ɛ́nyɔ́ga kɛ́fɔlɛ́, pááság kusəə lɛ́ páamoyɛ́ʼkɛn mɔɔnɛ́. 6Siudáa əyə́líʼtíníí, əə́bə́ə́ kuunə tuə́ áa aágɛɛlɛ agoboólɛgɛn Yə́sus pɔɔd pándɛŋ.

Yə́sus yɛɛ́dóm paaʼkan pə́ə́ŋ lɛ́ pɛ́ɛn anam moom mó wɔɔ́n ó Páska

(Maʼt 26.17-19; Mə́l 14.12-21)

7Wɔɔ́s ó wɔɔ́n wó Yúdɛn ɛyɛ́ɛ ɛnɛ́alɛla pɛlɛ́ɛd pɛ́ páánám pádɛág toan tó kunudi umbúb wááság kiim əgiig. Wɔɔ́s tɛn ogo wóow aa páyɛ́ɛ pasɛga pɔɔ́n pá todóm a kɛfɔny kɛ́ páanɛ a wɔɔ́n ó Páska. 8Yə́sus yiídə́ə́míni pa Píɛ pɔ́lɛ́ na Sɛ́aŋ, amáboodóm, ɔnɔ́ na pɔ́lɛ́: «Pəŋi todáan, póɛn abɛnámɛn wɔɔ́n, tɛ́nɛ.» 9Pə́yímuŋíən pɔ́nɔ́ na nyɔ́lɛ́ əə: «Sə́dúk, ə́lə́ə́ áa tíɛn anámɛ́ɛ́ wólɛ́ ə́#22.9 Kɛ́lɛ náan a kálaʼtaʼ yɛ Ɔsa 12.3-9 ?» 10Əyíbuyúlísíni ɔnɔ́ na pɔ́lɛ́: «Todáan áay a pálɛ́ɛg. A niɛn əgiig nɛáŋan, puəgəə́bun na mɔɔd onnyáŋɛ́náán ungwə́ŋ ó məní a oʼto, púmuyə́ən. Yoog yɛ́ ɔɔ́sɔd a yɛ́lɛ́, pəŋi tɛn pósɔd kɔ. 11Pódɛ́anɛ na mɔɔd o noádɛʼ poɔʼkɔ́ Sə́dúk ɔnɔ́ əə: “Ə́lə́ə́ áa nɛsom nɛ́ yoog nɛ́ ndáanɛ wɔɔ́n ó Páska wóonɛ na paaʼkan páam nɛ́lɛɛ́ ə́?” 12Əəbuúloodi kɛnɔ, kɛdám kɛ́ kɛsom kɛ́ yoog kɔ a noádɛʼ nuə́ŋ a mɔɛn. Kɛmɔɛ́d kɛándɛ kisóbíniə́n. Kɔ aa poábɛnámɛn wɔɔ́n.» 13Páyɛ́ɛ́n, pááboan pɛbán piim əgín wɔnɔ́ ná ayɛ́bodɛánɛ, páánám wɔɔ́n ó Páska.

Moom mó konɛ mó Uŋun

(Maʼt 26.26-29; Mə́l 14.22-25; 1Kɔ 11.23-26)

14Ná kɛnɛŋ kɛ́ konɛ́ɛnɛ kíyííg, Yə́sus əə́ləndin agonɛ́ɛnɛ na pɔɔ́n pə́ə́ŋ pá maʼtom. 15Ɔnɔ́ na pɔ́lɛ́: «Ɔʼtɛ́m wáam óyɛ́ɛ əgín lɛ́ ná tɛánɛ́ wɔɔ́n ó Páska wóonɛ náanɛ ondáŋ na pəŋi agɛɛlɛ lɛ́ ntíin nnɛ ntɔ́b. 16Ndabodɛ́anɛ lɛ́, ntɛndɛ́ɛ́ konɛ wólɛ́ kə́mmú, súʼtə́ə́ əgín ná nkə kɛ́ wɔɔ́n wóow ólɛɛ́ əgusəə, kɛáʼkaáyɛ́ɛlɛ a Nɛlaamɛʼ nɛ́ Táán.» 17Aáság kudə́əmini kilən kɛ́ maloʼ, amɛ́ʼkɛn pisoyidiʼ na Táán, ɔnɔ́: «Ííí ə́ən, púsiəd kilən kɛ́ maloʼ kɛ́ɛnɛ pósásananɛ pəŋi piim, póŋo 18lɛ́, ndabodɛ́anɛ lɛ́ Əgəə́bə́ə nɛ́gɔŋ, ntiə́giiʼkini koŋo maloʼ kə́mmú agɛɛn əgiig əgín ná aláa Nɛlaamɛʼ nɛ́ Táán nɛándɛ kɔ.»

19Yiídə́ə́míni pɛlɛ́ɛd, amɛ́ʼkɛn pisoyidiʼ na Táán, aábɛ́ŋa, amáboyɛ́ʼkɛn, ɔnɔ́: «Taa, nkó yaam aa yɛ́ɛy mbáálɛ́gɛ́ɛ́ a kidíídí kɛáŋan. Púdíin poɛlanɛ náan agɛnjaáyɔ́ɔ́ŋanɛ.» 20Ná pɛ́ɛ́mán konɛ́ɛnɛ, yiísiə́d tɛn kilən kɛ́ maloʼ, amɛ́ɛ́lɛ yoom ímuʼ na kɛ́lɛ́, ɔnɔ́: «Kɛ́ɛnɛ kɛ́lɛ kilən kɛ́ maŋɔ́ máam. Mɔ́lɛ́ aa málɛɛ́ kisuŋ kɛ́ kíoloodi nɛsɔ́g nɛ́ nɛwa nɛ́ Táán áálad na pɔɔd. Ndɛ́ɛ́ kusub mɔ́lɛ́ a kidíídí kɛáŋan#22.20 Pódála niɛŋ 20 nɛ́ɛnɛ a kálaʼtaʼ yɛ Ɔsa 24.8; Siə 31.31-34

21«Kɛbán kímuʼ, ogo nyɔ́ aágɛndɛg, tɛlɛ əgəə́nə́əyəni kɔ áanɛ kilən kímuʼ na nyɔ́lɛ́#22.21 Pódála tɛn náan a kálaʼtaʼ yɛ Pɛʼk 41.10 ! 22Kɛ́lɛ fɔ́lɔ́b lɛ́ mɛ Mɔɔ́n o mɔɔd ndəəgu əgín wɔnɔ́ ná Táán yɛɛ́fɛ́g. Náa, maan kɛ́fɔlɛ́ na nyɔ́ kugu kóam kóamoógom!» 23Paaʼkan pə́ə́bə́ə́ kəə́ŋíənə kɔ pɔ́lɛ́ na pɔ́lɛ́ pɔ́nɔ́ əə, ánɛ aa a ondáŋ wɔ́ɔ́bɔn aa alɛɛ́ ogɛɛlɛ náan əə́?

Yə́sus amáágánan paaʼkan pə́ə́ŋ mbaŋ

(Maʼt 18.1, 20.25-28; Mə́l 9.34, 10.42-45)

24Paaʼkan páyɛ́ɛ asáŋa agolɛŋ ánɛ a ondáŋ wɔ́ɔ́bɔn aa pálɛɛ́ pə́gusiəd wɔnɔ́ nyɔ́ amáábɛ́gɛn pɔsɔ́g ombɔg a oʼto! 25Náa Yə́sus ɔnɔ́ na pɔ́lɛ́: «Puʼkúm pó a mɔnɔŋ pólɛ əgíʼtən pɔɔd pá páalaamɛ, páanyóŋɛnɛla lɛ́ páboógany. 26Náa, kíʼkóodi lɛ́ kíɛn náan yoom ímuʼ na pəŋi. Kíɛn a pəŋi lɛ́ nyɔ́ alɛɛ́ oʼkóʼkóón a ondáŋ wááŋan, ogóódi lɛ́ yə́siəd wɔnɔ́ ɛyaa ɛ́ moóngaa. Nyɔ́ alɛɛ́ ɔndaamɛʼ yɛ́ɛn inə́mbí ɛ́ pɔsɔ́g. 27A pɔɔd póonɛ pá pálɛɛ́ pábaan lɛ́ na nyɔ́ alɛɛ́ undəndínə́ə́n a tɛ́bɛlɛʼ agonɛ́ɛnɛ, na sɔ́g nyɔ́ amámodɛ́gɛn tɛ́bɛlɛʼ əə, oyaán áa a pɔ́lɛ́ póob alɛɛ́ mɔɔd nyɔ́ oʼkóʼkóón agaáyɛn sɔ́g ə́? Adɛ́ nyɔ́ alɛɛ́ undəndínə́ə́n a tɛ́bɛlɛʼ a? Náa a mɛ, ndɛ a kɛgaágadɛ kɛáŋan wɔnɔ́ inə́mbí.»

(Maʼt 19.28)

28«Pəŋi, poɛ́nóʼtan ondáŋ na mɛ, ntɔ́b yɛ njɔ́ɔ́ŋ. 29Wɔnɔ́ na Mbáa yiísiə́d kɛsom kiə́ŋ kɛ́ Nɛlaamɛʼ agɛnyɛɛ́ʼkɛn na mɛ, mɛ tɛn mbáboyɛ́ʼkɛn pəŋi. 30Polɛ́ɛ́ konɛ́ɛnɛ, póoŋo ondáŋ na mɛ a Nɛlaamɛʼ nɛ́am. Polɛ́ɛ́ kuləndən tɛn a mɔʼkɔɔ má puʼkúm agoyɔmɛ əʼkúu a Ɛ́sɛlayɛl yówád na ábaan.»

Yə́sus ɔnɔ́ Píɛ alɛ́ɛ́ kumuúʼtəm

31Yə́sus aáság kusəə ɔnɔ́: «Simɔ́ɔŋ, Simɔ́ɔŋ wɛ! Taa, Sáʼtan əə́ŋíən toɛn na Táán lɛ́ nyɔ́lɛ́ áboófɛm wɔnɔ́ ná ándɛ páafɛm ngəŋ a maʼtɛ́ngɛ́lɛ́, agobalɛn pifuŋ ndɛ́ŋ na ngəŋ mmɔɛ́d. 32Kɛbán kímuʼ mɛ, mbɔ́sɔ́gɔ́lɔ́nɛ́ɛ́ a kidíídí kɛáŋ lɛ́ ná udindiógi oʼto na mɛ. Ná wəə́gimbuúlini anɛ́ɛ́n ná ndɛɛ́, kónɛ pomóŋŋí pááŋ agɛɛlɛ lɛ́ pɔ́lɛ́ págon tɛn.» 33Náa Píɛ ɔnɔ́ na nyɔ́lɛ́: «Sə́dúk, kɛ́yɛɛn kɛ́ kosɔd a yoog yɛ njaan, ɔmbɔ́ lɛ́ kɛ́ kugu, ndɛ ongaábɔ́ŋɛ́náán a pɛ́ɛb piim.» 34Yə́sus əyímuyúlísíni ɔnɔ́ na nyɔ́lɛ́: «Ndagodɛ́anɛ na wɛ Píɛ lɛ́ əgín naánɛ́ yɛ́ɛnɛ, kɛbaŋ kɛ́ nsɛɛ kíədíin kɛdaŋ ná wəə́ʼkiʼtəm pɛnɛŋ pɛ́dáád lɛ́ odɛndɛŋɛn.»

Ábóŋɛ́nɛ́an anɛ́ɛ́n nɛ́gɔŋ pɛdá

35Náa Yə́sus ɔnɔ́ na pɔ́lɛ́: «Kɛnɛŋ kɛ́ njɛ́boodóm, mbáyɛbodɛánɛ lɛ́ poándagɛɛn podɛnjábóŋɛ́náá lɛ́ na paʼpóósa pááŋan, na pɛbalɛ́, na pa palábá, poɛ́ʼtáŋ yoom na yoom kɔ́gɔ́ɔg ɔ?» Náa pɔ́nɔ́ na nyɔ́lɛ́: «Ndóo, tɛdɛʼkáaʼtaŋ yoom na yoom.» 36Náa ɔnɔ́: «A nɛ́gɔŋ yɛ́ɛnɛ anɛ́ɛ́n, wɛ nyɔ́ olɛɛ́ na póósa, úsiəd. Nyɔ́ alɛɛ́ na kɛbalɛ́, ə́əsiəd. Wɛ nyɔ́ uʼkódií ɛyafág ɛ́ pɛdá, lɛg kilə́ə́ kɛáŋ kɛ́ niŋiʼ ówɛɛn yɛ́lɛ́ 37lɛ́ ndabodɛ́anɛ nyɔʼkɔ́, nkə kɛ́ɛnɛ kɛ́ kíyə́dílə́ə́ a Kálaʼtaʼ, kígóódi lɛ́ kɛáyɛ́ɛlɛ a nkó yaam. Kíyə́dílə́ə́ lɛ́: “Páyɛ́moyáág a ɔmban ó poónanan#22.37 Kɛ́lɛ náan a kálaʼtaʼ yɛ Ɛsa 53.12 ” Nkə kɛ́ kɛ́agɛʼtɛ́ʼtɛg kígóódi lɛ́ kɛáyɛ́ɛlɛ.» 38Náa paaʼkan pɔ́nɔ́ na nyɔ́lɛ́: «Táá mobag mó pɛdá aa móonɛ móbaan Sə́dúk.» Əyíbuyúlísíni ɔnɔ́ na pɔ́lɛ́: «Móom móbaan muə́dúú.»

Yə́sus ayɛ́ɛ́n ɔgɔɔ́sɔ́gɔlɔn a oʼkon ó Pa olíifə a mɔɛn

(Maʼt 26.36-41; Mə́l 14.32-38)

39Yə́sus yɛɛ́lón pálɛ́ɛg, aáság kobag a oʼkon ó malɛ́m má pa olifiyə́ə, əgín wɔnɔ́ ná ayɛ́ɛ yɛɛlanɛ. Paaʼkan pə́ə́ŋ pááság kumuyə́ən kɔ́gɔ́ɔg. 40Ná páyɛ́ɛ́n əgiig kɔ a oʼkon a mɔɛn, ayɛ́bodɛánɛ ɔnɔ́ na pɔ́lɛ́: «Poɔ́sɔ́gɔlɔn Táán agɛɛlɛ lɛ́ pudiʼtə́əŋ a pɛásɔ́sɛ́n.» 41Nyɔ́lɛ́ aáság kəə́súid na pɔ́lɛ́ laálá sɔɔŋ əgiig náanɛ wɔnɔ́ ná mɔɔd alɛɛ́ ogodagɛdɛ nɛdáán níyiig. Yiídúm əndu a nsí, əə́bə́ə́ kɔɔ́sɔ́gɔlɔn Táán, ɔnɔ́: 42«Əə́əy, Paabá, omaʼkɔnyɔ́ŋɛn, ɛɛlɛ lɛ́ ntɔ́b yɛ́ɛnɛ yɛ́nyaágɛɛŋɛ. Náa, adɛ́njaŋ a nɛnyɔ́ŋɛn nɛ́am, ndóo nɛáŋ áa nɛáyɛ́lɛɛ́.» 43Uŋun ó maʼtom wúmmú a mɔɛn wááság komolónɛn anɛ́ɛ́n əgiim amoyɛ́ʼkɛn toɛn a nkó. 44Wɛɛ́y óyɛ́ɛ wə́ʼkugumin Yə́sus na toɛn. Ayɛ́ɛ əgiiʼkini kɔɔ́sɔ́gɔlɔn Táán kə́mmú na toɛn. Kɛɔsɛn kɛ́ kɛ́yɛ́ɛ amoolon, kɛ́yɛ́ɛ wɔnɔ́ pinyə́ngə́ə́ pɛ́ maŋɔ́ aa píədə́bə a nsí. 45Ná ayɛ́ɛ ɔɔ́ʼkɔɔ́sɔ́gɔlɔn náan, aáság kodɛ́ɛmɛn əguúlini ná paaʼkan pə́ə́ŋ pálɛɛ́. Ayɛ́bobóan pándɛ a ɛnɔ tɔ́g na ɔʼtɛ́m kogany wó páyɛ́ɛ na wólɛ́. 46Aáság kubuyóndigi. Náa ɔnɔ́ na pɔ́lɛ́: «Tuə́ ə́ən áa polɛɛ́ əgunim ɛnɔ? Tɛ́mɛ́naan, poɔ́sɔ́gɔlɔn Táán agɛɛlɛ lɛ́ pudiʼtə́əŋ a pɛásɔ́sɛ́n!»

Pə́míim əgumin Yə́sus

(Maʼt 26.47-55; Mə́l 14.43-49; Sɛ́a 18.3-11)

47Yə́sus alɛ kɔ na tɔgɛ́ɛ́ a unuʼ ə, kiʼtúú kɛ́ pɔɔd foáy. Siudáa, ongaaʼkan wəəŋ nyummú nyɔ́ a ondáŋ ó pá pówád na pábaan áa əyíím ə́busúidə. Ná əyíím əgiig, ayɛ́ɛ́n a ɛbá ɛ́ Yə́sus əgumuyə́súʼkənən. 48Yə́sus ayɛ́modɛánɛ ɔnɔ́ na nyɔ́lɛ́: «Siudáa, a ninjəə́súʼkənən nɛ́ɛn náan aa olɛɛ́ agɛndɛg mɛ Mɔɔ́n o mɔɔd ɔ?» 49Ná pɔsɔ́g pá páyɛ́ɛ ondáŋ na Yə́sus pɛ́ɛ́dála nkə kɛ́ɛg kɛ́ kɛ́yɛ́ɛ kɛándagaásan, pááság kumuŋíən pɔ́nɔ́ na nyɔ́lɛ́ əə: «Sə́dúk, tɛ́lónanɛ moyafág muə́s mó pɛdá agonɔɛyɛ a?» 50Sɔ́g nyummú a ondáŋ wɔ́ɔ́bɔn aáság kusooyin ɛbag yə́ə́ŋ ɛ́ pɛdá a kɛbágáá soád, ɔnɔ́ na uʼkudin wo ɔnjaaganɛʼ pɛfɔny nyɔ́ oʼkóʼkóón ə́siəd a oʼtóɛŋ wó ombɔg ó nɛnom, foáb. Oʼtóɛŋ kwə́s. 51Náa, Yə́sus yiísə́ə́ ɔnɔ́: «Ndóo, íbudíən pɛ́ɛlɛ tɛn ɔmbɔ́ kɛ́ɛnɛ.» Aáság kodɔ́bɛd oʼtóɛŋ ó mɔɔd nyóon, wándɛ kə́mmú ɔŋŋɛʼ. 52Náa ɔnɔ́ na puʼkúm pó payaaganɛʼ pɛfɔny na puʼkúm pó pasɔ́njaa pá a Tɛ́mpɛl, na ponnom pó a nigúu pá pə́yíím əmuúgumin: «Puígóodi lɛ́ púim poáboŋɛn lɛ́ na mobag mó pɛdá, na mufun əgiim əgiʼkumin wɔnɔ́ ndɛ agá ungiíbən ə? 53Adɛ́ mɔɔ́s miim njɛ́ɛ na pəŋi a Tɛ́mpɛl a? A igə aa pudiʼkə́əgunəə́ kiʼkumin áay? Náa, nɛ́gɔŋ yɛ́ɛnɛ, kɛnɛŋ kɛáŋan aa kiə́ʼkiigií, kɛnɛŋ kɛ́ toɛn tó a mbin.»

Píɛ yiíʼtə́m Yə́sus

(Maʼt 26.57-58,69-75; Mə́l 14.53-54,66-72; Sɛ́a 18.12-18,25-27)

54Pasɔ́njaa píígúmin Yə́sus, pámɛ́ɛn na nyɔ́lɛ́ a nó Ɔnjaaganɛʼ pɛfɔny nyɔ́ oʼkóʼkóón. Píɛ ayɛ́ɛ əgiim ə́buyə́njən laálá a ngim. 55Pɔɔd pɛ́ɛ́góny kɛa kɛ́ yug a oʼtómódáán, pááság kəə́yii kɔ. Píɛ ayɛ́ɛ́n əgəə́bulid kɔ na pɔ́lɛ́. 56Moóngaa ɔʼkɛ́ɛd nyummú, uʼkudin, aáság komoodála undəndínə́ə́n kɔ a ɛbá ɛ́ yug, aálɛŋ kumuúsəsəŋəni, náa ɔnɔ́: «Mɔɔd nyóonɛ ayɛ́ɛ tɛn a ondáŋ wə́ə́ŋ.» 57Píɛ ayácɛ́mɛ́ɛ́, ɔnɔ́: «Ndóo, ntɛmoólɛŋɛn ó!» 58Ɛyaa ɛ́ kɛnɛŋ a ngim yɛ́ɛy, mɔɔd tɛn nyummú ayɛ́modɛ́ʼtɛg, náa ɔnɔ́: «Wɛ tɛn, olɛ a ondáŋ wɔ́ɔ́bɔn.» Náa, Píɛ əyímuyúlísíni ɔnɔ́: «Ndóo óo, ntɛɔ́gɔ a ondáŋ wóow.» 59Yoom wɔnɔ́ áwaʼ mmuʼ a ngim yɛ́ɛy, mɔɔd tɛn nyummú aáság kubis ɔnɔ́: «A fɔ́lɔ́b, mɔɔd nyóonɛ ayɛ́ɛ a ondáŋ wə́ə́ŋ. Ɔmmɔɛ́d alɛ mɔɔd o Kalilə́ə.» 60Náa Píɛ ɔnɔ́: «Mɛ, ntɛálɛŋ nkə kɛ́ɛg kɛ́ olɛɛ́ anyɔ́ŋɛn kusəə.» Alɛ kɔ na tɔgɛ́ɛ́ náan a unuʼ ə, kɛbaŋ kɛ́ nsɛɛ kɔʼkɔ́lɛ́ɔʼkɔɔ. 61Sə́dúk aáság komoyágasɛnɛ, əmə́mubísin əngis. Píɛ aáság kaáyɔ́ɔ́ŋɛ tɔgɛ́ɛ́ tó Sə́dúk ayɛ́modɛánɛ, ɔnɔ́: «Naánɛ́ yɛ́ɛnɛ, kɛbaŋ kɛ́ nsɛɛ kíədíin kɛdaŋ, ná wɛ wəə́ʼkusəə pɛnɛŋ pɛ́laŋ pɛ́dáád lɛ́ odɛndɛŋɛn.» 62Aáság kolon. Yɛɛ́lɛ́ɛ́ kɔŋɛʼ kɔŋɛʼ.

Pálɛ agodóga Yə́sus, páamobáam

(Maʼt 26.67-68; Mə́l 14.65)

63Pɔɔd pá páyɛ́ɛ ənuŋ Yə́sus páyɛ́ɛ agomoónyɛɛŋanɛ, páamobáam. 64Pə́yímuugúb udi na kilə́ə́. Ayɛ́ɛ pámaʼkomoogo, pɔ́nɔ́ na nyóon, «Aanɛn ánɛ aa amágoogó!» 65Páyɛ́ɛ əgumuúsugənən pɛdog tɛn pímmú kɛ́fɔlɛ́ a nkó.

Pámɛ́ɛn na Yə́sus a yoog ɛ pɛyɔm yɛ́ nkóʼkóón

(Maʼt 26.59,63-65; Mə́l 14.55,61-64)

66Ná koany kóyááyɛ́nɛ, ponnom pó nigúu nɛ́ Yúdɛn, na puʼkúm pó payaaganɛʼ pɛfɔny, na palɛŋ pɛcɛm páyágɔ́nyɛ́dɛ́ɛ́, pááság kusəə lɛ́ pə́buyíimin na Yə́sus a ɛgɔny yɔ́ɔ́bɔn yɛ́ ɛgóón. 67Kɔ́gɔ́ɔg, pə́ə́bə́ə́ kumuŋíənə pɛbán, pɔ́nɔ́: «Ɛ́bɛdɛánɛ áŋ, olɛ Məsíi ə?» Əyíbuyúlísíni ɔnɔ́: «Ɔmbɔ́ mpodɛ́anɛ lɛ́ ndɛ Məsíi, pudiə́gəə́liʼtini. 68Mbəʼkubuŋíən tɛn kɛ́sɔn, pudiə́ginyəə́yúlisini. 69Náa, Əgəə́bə́ə nɛ́gɔŋ, mɛ Mɔɔ́n o mɔɔd ndɛ́ɛ́ kuləndin a ombɔg ó nɛnom ó Táán o toɛn tuim#22.69 Kɛ́lɛ náan a kálaʼtaʼ ɛ Pɛʼk 110.1 » 70Pɔ́lɛ́ piim pááság kaag nɛŋo, pɔ́nɔ́: «Ɛɛ́ɛ, olɛ anyóon Mɔɔ́n o Táán yi!» Náa ɔnɔ́ na pɔ́lɛ́: «Ɛɛ́ɛ, kɛ́lɛ náan. Kɛ́ aa kɛ́ɛg pəŋibáamɔɛ́d puə́səə.» 71Náa pə́əgəə́bə́ə́ kosɔyɔ kɔ na pɔ́lɛ́báamɔɛ́d, pɔ́nɔ́: «Pɔɔd pá mbaasɔ́ pá igə pə́mmú aa tiə́guunə? Pəsibáamɔɛ́d tɛáʼkoob wɔnɔ́ ná əə́ʼkibiyúlisinií!»

Currently Selected:

LÓʼKAS 22: yatDBL

Highlight

Copy