LÓʼKAS 4
4
Omɔlɛɔ́g ayásɔ́sɛ́nɛ́ɛ́ Yə́sus
(Maʼt 4.1-11; Mə́l 1.12-13)
1Yə́sus aáság kodɛ́ɛmɛn áay a Siuludɛ́ɛŋ agosan. Uŋun wó Ufúlúʼtú óyɛ́ɛ na nyɔ́lɛ́ síɛ́ɛ́d. Wááság komoyɛ́ɛlɛ lɛ́ yɛ́ɛn a kɛnɔ kɛ́ kifələ́ə́n. 2Ayɛ́ɛ́lɛ kɔ əʼtin á mədúg ábaan. Omɔlɛɔ́g ayɛ́ɛ amoásɔsɛna. A mədúg tɛn móom miim, adɛʼkɛ́ɛ anɛ́ɛnɛ, njaan yəə́bə́ə́ komoobany. 3Náa Omɔlɛɔ́g ɔnɔ́ na nyɔ́lɛ́: «Nga olɛ Mɔɔ́n o Táán, ɛɛlɛ lɛ́ aʼtáán yɛ́ɛy yáán moom mó konɛ, ónɛ yi.» 4Yə́sus əyímuyúlísíni ɔnɔ́ na nyɔ́lɛ́: «Kɛ́lɛ kidiídílə́ a Kálaʼtaʼ ɛ Táán lɛ́: “Ɔlaa ó mɔɔd ódɛɔ́gɔ əgín a moom mó konɛ#4.4 Kɛ́lɛ náan a kálaʼtaʼ ɛ Tɛʼt 8.3 ”.» 5Omɔlɛɔ́g aáság kɛɛn na nyɔ́lɛ́ a mɔɛn lóóŋ, əmə́mulóódi nsí ngim na əʼkúu əngim yá álɛɛ́ kɔ. 6Náa ɔnɔ́ na nyɔ́lɛ́: «Taa, Ndagoyɛ́ʼkɛn əʼkúu yɛ́ɛy əngim lɛ́ ólaamɛ, na tugúm tuim tó tólɛɛ́ kɔ. Nkə kɛ́ɛg kiim, páyɛ́nyɛɛ́ʼkɛn na mɛ. Ndɛ ogɛɛ́ʼkɛn tɛn na ungim nyɔ́ mbányɔ́ŋɛn. 7Wɛ, uməʼkiʼtúmin əndu agɛnyáadɛ, muim móagoob na wɛ.» 8Yə́sus aáság kumuyúlisini ɔnɔ́: «Kɛ́lɛ kidiídílə́ a Kálaʼtaʼ ɛ Táán lɛ́: “Əgín Sə́dúk Táán waaŋ nyɔ́lɛ́nyɔ́əsíŋ áa ónyádɛɛ́. Əgín nyɔ́lɛ́nyɔ́əsíŋ áa úmudúminií əndu agomonyáadɛ#4.8 Kɛ́lɛ náan a kálaʼtaʼ ɛ Tɛʼt 6.13 ” » 9Omɔlɛɔ́g aáság kɛɛn anɛ́ɛ́n na nyɔ́lɛ́ a Yolósalɛm. Ayɛ́ɛ́n əmudə́nigi a ɛnɔn ɛ́ Tɛ́mpɛl a mɔɛn, náa ɔnɔ́ na nyɔ́lɛ́: «Nga olɛ Mɔɔ́n o Táán, ə́lísíí a ɛnɔn yɛ́ɛnɛ, úcilib a nsí 10lɛ́, kɛ́lɛ tɛn kidiídílə́ a Kálaʼtaʼ ɛ Táán lɛ́: Táán alɛ́ɛ́ kodɛ́anɛ na məŋun mə́ə́ŋ má maʼtom lɛ́ mə́guúnuŋ. 11Na tɛn lɛ́: Mágonyáŋɛn kogonyáŋɛ́náán a ɔmbɔg yɔ́ɔ́bɔn agɛɛlɛ lɛ́ udimbúʼtən ɔmbɔ́ kubúʼtən a nɛdáán#4.11 Kusiəd a angɛŋ 10 əgiig a 11, Kɛ́lɛ náan a kálaʼtaʼ ɛ Pɛʼk 91.11-12 » 12Náa Yə́sus ɔnɔ́ na nyɔ́lɛ́: «Ɛɛ́ɛ, kɛ́lɛ náan! Náa áyóŋɛ́ɛ́ tɛn lɛ́ kɛ́lɛ kidiídílə́ kɔ lɛ́: “Odɛyásɔ́sɛ́nɛ́ɛ́ Sə́dúk Táán waaŋ#4.12 Kɛ́lɛ náan a kálaʼtaʼ ɛ Tɛʼt 6.16 ”.»
13Ná Omɔlɛɔ́g ayɛ́ɛ aáʼkoman kaásɔsɛn Yə́sus a mbod ngim, aáság kudi ə́mə́muudí, súʼtə́ə́ agɛɛn əgiig a kɛnɛŋ kɛ́ alɛ́ɛ́ kiiʼkini kɔɔ́ŋɛ́ɛ́ ngə́.
Yə́sus əyə́ʼtúmíí pigólí piə́ŋ a Kalilə́ə
(Maʼt 4.12-17; Mə́l 1.14-15)
14Yə́sus aáság kimbuúlini a Kalilə́ə. Uŋun wó Ufúlúʼtú óyɛ́ɛ na nyɔ́lɛ́ síɛ́ɛ́d. Niiŋ niə́ŋ náan lumuʼ, lumuʼ, a nigúu niim. 15Ayɛ́ɛ agaaʼkananɛ pɔɔd a puog poɔ́bɔn pó pɛɔ́sɔ́gɔ́lɔ́n. Ungim ayɛ́ɛ amoógany.
Pɔɔd pá a Násalɛd pííʼtə́m Yə́sus
(Maʼt 13.54-58; Mə́l 6.1-6)
16Yə́sus yɛɛ́dɛ́ɛ́mɛn, amɛ́ɛn a Násalɛd, kɛnɔ kɛ́ yɛɛ́yám. Wɔɔ́s ó kisúgiʼ wúmmú, əgín wɔnɔ́ ondoŋá wə́ə́ŋ, ayɛ́ɛ́n ɔsɔd a yoog ɛ pɛɔ́sɔ́gɔ́lɔ́n kɔ. Yɛɛ́dɛ́ɛ́mɛn agobana Kálaʼtaʼ ɛ Táán. 17Páyɛ́moyɛ́ʼkɛn lɛ́ ábana a kálaʼtaʼ yɛ Ɛsayíi, Ɔndɔɛgɛʼ pɛbán o Táán. Ná yiíbúən, aáság kudə́əŋ a kɛnɔ kɛ́ píídílə pɔ́nɔ́:
18«Uŋun ó Sə́dúk ólɛ na mɛ lɛ́
əyínyiiyid ɔnɔ́ nyɛ́ɛn alɔɛgɛnɛ pasɔ́gasɔ́gá Tɔsɔm Tólaŋ.
Ntɛ́anɛ na pá pálɛɛ́ pɛɔ́lɛ́ lɛ́ pááman a poɔ́lɛ́.
Na powongwóg lɛ́ woog wɔ́ɔ́bɔn wááman.
Ntɛ́anɛ na pɔsɔ́g pá pɔsɔ́g páboyánɛ́nɛ́ɛ́ pɛɔ́lɛ́ lɛ́ poɔ́lɛ́ poɔ́bɔn poáman.
19Ayɛ́ʼtóm tɛn lɛ́ nyíim alɔɛgɛ lɛ́ waag ó Sə́dúk kuloodi ɔʼtɛ́m wə́ə́ŋ ólaŋ wə́ndəgiig#4.19 Pódála tɛn náan a kálaʼtaʼ yɛ Ɛsa 61.1-2. Píísə́ə́ əgín wɔnɔ́ ná kíyə́dílə́ə́ kalaʼ a tɔgɛ́ɛ́ tó kɛlɛ́ɛg.»
20Yə́sus aáság kubuəg kálaʼtaʼ, amɛ́ʼkɛn na uʼkudin nyɔ́ a yoog ɛ pɛɔ́sɔ́gɔ́lɔ́n yɛ́ɛy, aáság kɛɛn ələndin a nsí. Pɔɔd piim pá páyɛ́ɛ kɔ a yoog ɛ pɛɔ́sɔ́gɔ́lɔ́n yɛ́ɛy pááság komodámɛn əngis. 21Náa əə́də́əmini tɔgɛ́ɛ́, ɔnɔ́: «Nkə kɛ́ɛnɛ kɛ́ mbáʼkobanaá, pomóób, kɛ́máás naánɛ́.» 22Ungim ayɛ́ɛ agogany Yə́sus, pə́əgəə́wúunəni na pisig pɛ́ tɔgɛ́ɛ́ pɛ́ɛb, pə́əgəə́ŋíənə pɔ́nɔ́ əə, adɛ́ mɔɔ́n ó Yósɛb aa alɛɛ́ náan əə́? 23Náa Yə́sus ɔnɔ́ na pɔ́lɛ́: «Mbálɛŋ lɛ́ puəgisiədin nkaʼtɛ́n yɛ́ɛnɛ yɛ́ ɛlɛɛ́ lɛ́: “Uʼkóʼtonon ayóómɛ́ɛ́ wɛɛ́nyɔ́amɔɛ́d yi!” Poagɛʼtɛ́anɛ tɛn poɔʼkɔ́: “Nkə kiim kɛ́ tɛyóób lɛ́ oyɛ́ɛ agɛɛlanɛ a Kaʼpɛlɛnáyum, ɛɛlɛ tɛn áanɛ a pálɛ́ɛg yaaŋ ɛ wɛɛ́nyɔ́amɔɛ́d yi”.» 24Ayɛ́ɛ́n na tɔgɛ́ɛ́ yuudi, ɔnɔ́: «Ɛɛ́ɛ, a fɔ́lɔ́b ndabodɛ́anɛ lɛ́ pɔ́dɛɔ́gɔɔ́sɔ́dɛ ɔndɔɛgɛʼ pɛbán o Táán ɔmbɔ́ úmmuʼ a nigúu niə́ŋ nɛ́ əmə́biə́níí a nɛ́lɛ́.
25A fɔ́lɔ́b tɛn, kɛ́lɛ lɛ́, pidí pɛ́ pagɛ́ɛd pɛ́yɛ́ɛ kɔ piíŋ a Ɛ́sɛlayɛl a kɛnɛŋ kɛ́ Ɛlɛ́as, ɔndɔɛgɛʼ pɛbán o Táán.
Ayɛ́ɛ́lɛ kɛloo a kɛnɛŋ kɛ́go kɛ́ɛg, pɛag pɛ́dáád na kɛsom,
məyíi mááság kudə́əŋ a nigúu kilúd#4.25 Kɛ́lɛ náan a kálaʼtaʼ ɛ 1Puʼk 17.1
26Táán adɛʼkáadom Ɛlɛ́as a nó pidí pɛ́ɛb ɔmbɔ́ kímuʼ,
ayɛ́moodóm agá a nó kidí kɛ́ ɔʼkɛ́ɛd kɛ́ kɛ́yɛ́ɛ a pálɛ́ɛg ɛ Sɛlɛ́bta,
a nigúu nɛ́ Sɛdɔ́ɔŋ#4.26 Kɛ́lɛ náan a kálaʼtaʼ ɛ 1Puʼk 17.8-16
27Pɔɔd tɛn pá páyɛ́ɛ abany nkún páyɛ́ɛ kɔ piíŋ a Ɛ́sɛlayɛl a kɛnɛŋ kɛ́ Əlisə́ə, ɔndɔɛgɛʼ pɛbán o Táán.
Adɛʼkáagoómɛ ɔmbɔ́ úmmu kɔ.
Əgín Naamáaŋ kibíəniʼ kɛ́ a Silíi aa Táán ayɛ́ɛ́lɛ lɛ́ Əlisə́ə yóómɛ#4.27 Kɛ́lɛ náan a kálaʼtaʼ ɛ 2Puʼk 5.1-14 »
28Ungim nyɔ́ ayɛ́ɛ kɔ áay a yoog ɛ pɛɔ́sɔ́gɔ́lɔ́n, ayóób ilúún kɛ́fɔlɛ́ na tɔgɛ́ɛ́ tóod. 29Pɔ́lɛ́ piim pááság kəə́wu, pə́ə́gumin Yə́sus agolon pálɛ́ɛg na nyɔ́lɛ́. Páyɛ́ɛ́n na nyɔ́lɛ́ a oʼkon a mɔɛn. Oʼkon wó pɛ́wáagɛn pálɛ́ɛg yɛ́ɛy kɔ. Páyɛ́ɛ anyɔ́ŋɛn lɛ́ ná pámɛ́ɛn əmudíʼkini kɔ́gɔ́ɔg, yɛ́ɛn ədə́əŋən. 30Ná páyɛ́ɛ́n əgiig kɔ́gɔ́ɔg a oʼkon a mɔɛn, Yə́sus aáság kosan a kɛgaágadɛ kɛɔ́bɔn agɛɛn páamodɛ́ʼtɛg agá.
Yə́sus ayóómɛ mɔɔd nyummú nyɔ́ ayɛ́ɛ na uŋun wó ɔmbɛ́
(Maʼt 7.28-29; Mə́l 1.21-28)
31Yə́sus yiísúú a Kaʼpɛlɛnáyum, pálɛ́ɛg yimmú yɛ́ a Kalilə́ə. Ayɛ́ɛ agaaʼkananɛ pɔɔd wɔɔ́s ó kisúgiʼ. 32Páyɛ́ɛ əgəə́wúunəni na nɛaʼkananɛʼ niə́ŋ lɛ́ ayɛ́ɛ agosɔyɔ əgín a nɛ́ mɔɔd nyɔ́ alɛɛ́ na nɛlaamɛʼ a ombɔg. 33Mɔɔd nyummú nyɔ́ uŋun wó ɔmbɛ́ óyɛ́ɛ əguyə́bi, ayɛ́ɛ kɔ a yoog ɛ pɛɔ́sɔ́gɔ́lɔ́n. Yiídóʼtin kiʼkíŋ, ɔnɔ́: 34«Wóóʼkó! Yə́sus, mɔɔ́n ó Násalɛd, kɛ́lɛ tuə́ ə́? Nkə aa wəə́guunə na pəsi ə́? Umíim lɛ́ úbiwíiyi ə? Mbálɛŋ ánɛ aa olɛɛ́. Olɛ Ufúlúʼtú nyɔ́ Táán əmíim ádom!» 35Yə́sus yɛɛ́sásɛ́dɛn uŋun wó ɔmbɛ́ wóow na nɛnyɛ́n, ɔnɔ́: «Pab yəə́b! Tí mɔɔd nyóon, wɛ́ɛn!» Wááság konyáŋɛn mɔɔd, ómámodɔɛ́d a nsí a udi ó pɔɔd piim, wáálón, ódɛmoyɛ́ɛ́lɛ kɔbɛ́. 36Ungim ayɛ́ɛ na wɛɛ́y. Páyɛ́ɛ əgəə́ŋíənə kɔ pɔ́lɛ́ na pɔ́lɛ́ pɔ́nɔ́: «Wóonɛ ombod oʼ! Nɛ́ɛnɛ nɛsɔyɔʼ óoʼ! Táá mɔɔd ɔɔ́sɔyɔ na toɛn tuim tó nɛlaamɛʼ taa! Amaʼkosásɛd, məŋun má mabɛ́ máamoyóbɛn, máság kolon!» 37Nugəm nó Yə́sus noáság kaálam a nigúu nɛ́ Kalilə́ə niim.
Yə́sus ayóómánɛ pabámbany piíŋ
(Maʼt 8.14-17; Mə́l 1.29-34)
38Ná Yə́sus yɛɛ́dɛ́ɛ́mɛn a yoog ɛ pɛɔ́sɔ́gɔ́lɔ́n, ayɛ́ɛ́n a nó Simɔ́ɔŋ. Ŋŋíin ɛ Simɔ́ɔŋ ayɛ́ɛ agoyáa na toɛn. Pááság komoyɔ́sɔ́gɔlɔn lɛ́ yɛ́ɛlɛ yoom. 39Aáság kɛɛn, aádam ónyoŋim a ɛbá yə́ə́ŋ, aásásɛd na toɛn lɛ́ nkó koyáa yɛ́ɛy ɛ́man. Ɔʼkɛ́ɛd cacalaʼ, əndigi ayáa kə́mmú, aáság koság kodɛ́ɛmɛn əgiim aboyáabɛn. 40Áanɛ a wɔɔ́s kosɛlɛm, piim pá páyɛ́ɛ na pabámbany pá páyɛ́ɛ na mbod ɛ mabámbany ngim, pə́yíímən na pɔ́lɛ́ kɛnɔ kɛ́ Yə́sus ayɛ́ɛ. Ayɛ́boyábɛ́gan pɔ́lɛ́ piim ombɔg, pómóóm. 41Məŋun má mabɛ́ máyɛ́ɛ agolónan tɛn a nkó ɛ pabámbany piíŋ, máagaányam, mɔ́nɔ́: «Wɛ, olɛ Mɔɔ́n o Táán!» Kɛbán kímuʼ, Yə́sus ayɛ́ɛ abosásan lɛ́ mábab yəə́b lɛ́ mɔ́lɛ́ mɛ́ɛ́lɛŋɛn lɛ́ nyɔ́lɛ́ alɛ Məsíi.
Yə́sus aádɛ́ɛ́mɛn a Kaʼpɛlɛnáyum
(Mə́l 1.35-39; Maʼt 4.23)
42Ná koany kóyááyɛ́nɛ, Yə́sus yɛɛ́lón pálɛ́ɛg agɛɛn a kɛnɔ kɛ́ kifələ́ə́n. Kiʼtúú kɛ́ pɔɔd kiə́bə́ə́ kiim kímuyúunə. Ná páyɛ́ɛ́n amoóboan, pádɛʼkɛ́ɛ anyɔ́ŋɛn lɛ́ ásan, pɔ́nɔ́ ɔ́lɔb na pɔ́lɛ́. 43Náa, ayɛ́bodɛánɛ ɔnɔ́ na pɔ́lɛ́: «Kíəguunə lɛ́ nyɛ́ɛn alɔɛgɛ Tɔsɔm Tólaŋ tó Nɛlaamɛʼ nɛ́ Táán a pabálɛ́ɛg pɛ́ndɛ́ŋ lɛ́ nkə kɛ́ Táán ayɛ́ʼtóm lɛ́ nyíim agɛɛlɛ aa kɛ́ɛg.» 44Aáság kəə́bə́ə́ kiim álɔɛgɛ Tɔsɔm a puog pó pɛɔ́sɔ́gɔ́lɔ́n pó a Siudə́ə.
Currently Selected:
LÓʼKAS 4: yatDBL
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators Inc, 2015
LÓʼKAS 4
4
Omɔlɛɔ́g ayásɔ́sɛ́nɛ́ɛ́ Yə́sus
(Maʼt 4.1-11; Mə́l 1.12-13)
1Yə́sus aáság kodɛ́ɛmɛn áay a Siuludɛ́ɛŋ agosan. Uŋun wó Ufúlúʼtú óyɛ́ɛ na nyɔ́lɛ́ síɛ́ɛ́d. Wááság komoyɛ́ɛlɛ lɛ́ yɛ́ɛn a kɛnɔ kɛ́ kifələ́ə́n. 2Ayɛ́ɛ́lɛ kɔ əʼtin á mədúg ábaan. Omɔlɛɔ́g ayɛ́ɛ amoásɔsɛna. A mədúg tɛn móom miim, adɛʼkɛ́ɛ anɛ́ɛnɛ, njaan yəə́bə́ə́ komoobany. 3Náa Omɔlɛɔ́g ɔnɔ́ na nyɔ́lɛ́: «Nga olɛ Mɔɔ́n o Táán, ɛɛlɛ lɛ́ aʼtáán yɛ́ɛy yáán moom mó konɛ, ónɛ yi.» 4Yə́sus əyímuyúlísíni ɔnɔ́ na nyɔ́lɛ́: «Kɛ́lɛ kidiídílə́ a Kálaʼtaʼ ɛ Táán lɛ́: “Ɔlaa ó mɔɔd ódɛɔ́gɔ əgín a moom mó konɛ#4.4 Kɛ́lɛ náan a kálaʼtaʼ ɛ Tɛʼt 8.3 ”.» 5Omɔlɛɔ́g aáság kɛɛn na nyɔ́lɛ́ a mɔɛn lóóŋ, əmə́mulóódi nsí ngim na əʼkúu əngim yá álɛɛ́ kɔ. 6Náa ɔnɔ́ na nyɔ́lɛ́: «Taa, Ndagoyɛ́ʼkɛn əʼkúu yɛ́ɛy əngim lɛ́ ólaamɛ, na tugúm tuim tó tólɛɛ́ kɔ. Nkə kɛ́ɛg kiim, páyɛ́nyɛɛ́ʼkɛn na mɛ. Ndɛ ogɛɛ́ʼkɛn tɛn na ungim nyɔ́ mbányɔ́ŋɛn. 7Wɛ, uməʼkiʼtúmin əndu agɛnyáadɛ, muim móagoob na wɛ.» 8Yə́sus aáság kumuyúlisini ɔnɔ́: «Kɛ́lɛ kidiídílə́ a Kálaʼtaʼ ɛ Táán lɛ́: “Əgín Sə́dúk Táán waaŋ nyɔ́lɛ́nyɔ́əsíŋ áa ónyádɛɛ́. Əgín nyɔ́lɛ́nyɔ́əsíŋ áa úmudúminií əndu agomonyáadɛ#4.8 Kɛ́lɛ náan a kálaʼtaʼ ɛ Tɛʼt 6.13 ” » 9Omɔlɛɔ́g aáság kɛɛn anɛ́ɛ́n na nyɔ́lɛ́ a Yolósalɛm. Ayɛ́ɛ́n əmudə́nigi a ɛnɔn ɛ́ Tɛ́mpɛl a mɔɛn, náa ɔnɔ́ na nyɔ́lɛ́: «Nga olɛ Mɔɔ́n o Táán, ə́lísíí a ɛnɔn yɛ́ɛnɛ, úcilib a nsí 10lɛ́, kɛ́lɛ tɛn kidiídílə́ a Kálaʼtaʼ ɛ Táán lɛ́: Táán alɛ́ɛ́ kodɛ́anɛ na məŋun mə́ə́ŋ má maʼtom lɛ́ mə́guúnuŋ. 11Na tɛn lɛ́: Mágonyáŋɛn kogonyáŋɛ́náán a ɔmbɔg yɔ́ɔ́bɔn agɛɛlɛ lɛ́ udimbúʼtən ɔmbɔ́ kubúʼtən a nɛdáán#4.11 Kusiəd a angɛŋ 10 əgiig a 11, Kɛ́lɛ náan a kálaʼtaʼ ɛ Pɛʼk 91.11-12 » 12Náa Yə́sus ɔnɔ́ na nyɔ́lɛ́: «Ɛɛ́ɛ, kɛ́lɛ náan! Náa áyóŋɛ́ɛ́ tɛn lɛ́ kɛ́lɛ kidiídílə́ kɔ lɛ́: “Odɛyásɔ́sɛ́nɛ́ɛ́ Sə́dúk Táán waaŋ#4.12 Kɛ́lɛ náan a kálaʼtaʼ ɛ Tɛʼt 6.16 ”.»
13Ná Omɔlɛɔ́g ayɛ́ɛ aáʼkoman kaásɔsɛn Yə́sus a mbod ngim, aáság kudi ə́mə́muudí, súʼtə́ə́ agɛɛn əgiig a kɛnɛŋ kɛ́ alɛ́ɛ́ kiiʼkini kɔɔ́ŋɛ́ɛ́ ngə́.
Yə́sus əyə́ʼtúmíí pigólí piə́ŋ a Kalilə́ə
(Maʼt 4.12-17; Mə́l 1.14-15)
14Yə́sus aáság kimbuúlini a Kalilə́ə. Uŋun wó Ufúlúʼtú óyɛ́ɛ na nyɔ́lɛ́ síɛ́ɛ́d. Niiŋ niə́ŋ náan lumuʼ, lumuʼ, a nigúu niim. 15Ayɛ́ɛ agaaʼkananɛ pɔɔd a puog poɔ́bɔn pó pɛɔ́sɔ́gɔ́lɔ́n. Ungim ayɛ́ɛ amoógany.
Pɔɔd pá a Násalɛd pííʼtə́m Yə́sus
(Maʼt 13.54-58; Mə́l 6.1-6)
16Yə́sus yɛɛ́dɛ́ɛ́mɛn, amɛ́ɛn a Násalɛd, kɛnɔ kɛ́ yɛɛ́yám. Wɔɔ́s ó kisúgiʼ wúmmú, əgín wɔnɔ́ ondoŋá wə́ə́ŋ, ayɛ́ɛ́n ɔsɔd a yoog ɛ pɛɔ́sɔ́gɔ́lɔ́n kɔ. Yɛɛ́dɛ́ɛ́mɛn agobana Kálaʼtaʼ ɛ Táán. 17Páyɛ́moyɛ́ʼkɛn lɛ́ ábana a kálaʼtaʼ yɛ Ɛsayíi, Ɔndɔɛgɛʼ pɛbán o Táán. Ná yiíbúən, aáság kudə́əŋ a kɛnɔ kɛ́ píídílə pɔ́nɔ́:
18«Uŋun ó Sə́dúk ólɛ na mɛ lɛ́
əyínyiiyid ɔnɔ́ nyɛ́ɛn alɔɛgɛnɛ pasɔ́gasɔ́gá Tɔsɔm Tólaŋ.
Ntɛ́anɛ na pá pálɛɛ́ pɛɔ́lɛ́ lɛ́ pááman a poɔ́lɛ́.
Na powongwóg lɛ́ woog wɔ́ɔ́bɔn wááman.
Ntɛ́anɛ na pɔsɔ́g pá pɔsɔ́g páboyánɛ́nɛ́ɛ́ pɛɔ́lɛ́ lɛ́ poɔ́lɛ́ poɔ́bɔn poáman.
19Ayɛ́ʼtóm tɛn lɛ́ nyíim alɔɛgɛ lɛ́ waag ó Sə́dúk kuloodi ɔʼtɛ́m wə́ə́ŋ ólaŋ wə́ndəgiig#4.19 Pódála tɛn náan a kálaʼtaʼ yɛ Ɛsa 61.1-2. Píísə́ə́ əgín wɔnɔ́ ná kíyə́dílə́ə́ kalaʼ a tɔgɛ́ɛ́ tó kɛlɛ́ɛg.»
20Yə́sus aáság kubuəg kálaʼtaʼ, amɛ́ʼkɛn na uʼkudin nyɔ́ a yoog ɛ pɛɔ́sɔ́gɔ́lɔ́n yɛ́ɛy, aáság kɛɛn ələndin a nsí. Pɔɔd piim pá páyɛ́ɛ kɔ a yoog ɛ pɛɔ́sɔ́gɔ́lɔ́n yɛ́ɛy pááság komodámɛn əngis. 21Náa əə́də́əmini tɔgɛ́ɛ́, ɔnɔ́: «Nkə kɛ́ɛnɛ kɛ́ mbáʼkobanaá, pomóób, kɛ́máás naánɛ́.» 22Ungim ayɛ́ɛ agogany Yə́sus, pə́əgəə́wúunəni na pisig pɛ́ tɔgɛ́ɛ́ pɛ́ɛb, pə́əgəə́ŋíənə pɔ́nɔ́ əə, adɛ́ mɔɔ́n ó Yósɛb aa alɛɛ́ náan əə́? 23Náa Yə́sus ɔnɔ́ na pɔ́lɛ́: «Mbálɛŋ lɛ́ puəgisiədin nkaʼtɛ́n yɛ́ɛnɛ yɛ́ ɛlɛɛ́ lɛ́: “Uʼkóʼtonon ayóómɛ́ɛ́ wɛɛ́nyɔ́amɔɛ́d yi!” Poagɛʼtɛ́anɛ tɛn poɔʼkɔ́: “Nkə kiim kɛ́ tɛyóób lɛ́ oyɛ́ɛ agɛɛlanɛ a Kaʼpɛlɛnáyum, ɛɛlɛ tɛn áanɛ a pálɛ́ɛg yaaŋ ɛ wɛɛ́nyɔ́amɔɛ́d yi”.» 24Ayɛ́ɛ́n na tɔgɛ́ɛ́ yuudi, ɔnɔ́: «Ɛɛ́ɛ, a fɔ́lɔ́b ndabodɛ́anɛ lɛ́ pɔ́dɛɔ́gɔɔ́sɔ́dɛ ɔndɔɛgɛʼ pɛbán o Táán ɔmbɔ́ úmmuʼ a nigúu niə́ŋ nɛ́ əmə́biə́níí a nɛ́lɛ́.
25A fɔ́lɔ́b tɛn, kɛ́lɛ lɛ́, pidí pɛ́ pagɛ́ɛd pɛ́yɛ́ɛ kɔ piíŋ a Ɛ́sɛlayɛl a kɛnɛŋ kɛ́ Ɛlɛ́as, ɔndɔɛgɛʼ pɛbán o Táán.
Ayɛ́ɛ́lɛ kɛloo a kɛnɛŋ kɛ́go kɛ́ɛg, pɛag pɛ́dáád na kɛsom,
məyíi mááság kudə́əŋ a nigúu kilúd#4.25 Kɛ́lɛ náan a kálaʼtaʼ ɛ 1Puʼk 17.1
26Táán adɛʼkáadom Ɛlɛ́as a nó pidí pɛ́ɛb ɔmbɔ́ kímuʼ,
ayɛ́moodóm agá a nó kidí kɛ́ ɔʼkɛ́ɛd kɛ́ kɛ́yɛ́ɛ a pálɛ́ɛg ɛ Sɛlɛ́bta,
a nigúu nɛ́ Sɛdɔ́ɔŋ#4.26 Kɛ́lɛ náan a kálaʼtaʼ ɛ 1Puʼk 17.8-16
27Pɔɔd tɛn pá páyɛ́ɛ abany nkún páyɛ́ɛ kɔ piíŋ a Ɛ́sɛlayɛl a kɛnɛŋ kɛ́ Əlisə́ə, ɔndɔɛgɛʼ pɛbán o Táán.
Adɛʼkáagoómɛ ɔmbɔ́ úmmu kɔ.
Əgín Naamáaŋ kibíəniʼ kɛ́ a Silíi aa Táán ayɛ́ɛ́lɛ lɛ́ Əlisə́ə yóómɛ#4.27 Kɛ́lɛ náan a kálaʼtaʼ ɛ 2Puʼk 5.1-14 »
28Ungim nyɔ́ ayɛ́ɛ kɔ áay a yoog ɛ pɛɔ́sɔ́gɔ́lɔ́n, ayóób ilúún kɛ́fɔlɛ́ na tɔgɛ́ɛ́ tóod. 29Pɔ́lɛ́ piim pááság kəə́wu, pə́ə́gumin Yə́sus agolon pálɛ́ɛg na nyɔ́lɛ́. Páyɛ́ɛ́n na nyɔ́lɛ́ a oʼkon a mɔɛn. Oʼkon wó pɛ́wáagɛn pálɛ́ɛg yɛ́ɛy kɔ. Páyɛ́ɛ anyɔ́ŋɛn lɛ́ ná pámɛ́ɛn əmudíʼkini kɔ́gɔ́ɔg, yɛ́ɛn ədə́əŋən. 30Ná páyɛ́ɛ́n əgiig kɔ́gɔ́ɔg a oʼkon a mɔɛn, Yə́sus aáság kosan a kɛgaágadɛ kɛɔ́bɔn agɛɛn páamodɛ́ʼtɛg agá.
Yə́sus ayóómɛ mɔɔd nyummú nyɔ́ ayɛ́ɛ na uŋun wó ɔmbɛ́
(Maʼt 7.28-29; Mə́l 1.21-28)
31Yə́sus yiísúú a Kaʼpɛlɛnáyum, pálɛ́ɛg yimmú yɛ́ a Kalilə́ə. Ayɛ́ɛ agaaʼkananɛ pɔɔd wɔɔ́s ó kisúgiʼ. 32Páyɛ́ɛ əgəə́wúunəni na nɛaʼkananɛʼ niə́ŋ lɛ́ ayɛ́ɛ agosɔyɔ əgín a nɛ́ mɔɔd nyɔ́ alɛɛ́ na nɛlaamɛʼ a ombɔg. 33Mɔɔd nyummú nyɔ́ uŋun wó ɔmbɛ́ óyɛ́ɛ əguyə́bi, ayɛ́ɛ kɔ a yoog ɛ pɛɔ́sɔ́gɔ́lɔ́n. Yiídóʼtin kiʼkíŋ, ɔnɔ́: 34«Wóóʼkó! Yə́sus, mɔɔ́n ó Násalɛd, kɛ́lɛ tuə́ ə́? Nkə aa wəə́guunə na pəsi ə́? Umíim lɛ́ úbiwíiyi ə? Mbálɛŋ ánɛ aa olɛɛ́. Olɛ Ufúlúʼtú nyɔ́ Táán əmíim ádom!» 35Yə́sus yɛɛ́sásɛ́dɛn uŋun wó ɔmbɛ́ wóow na nɛnyɛ́n, ɔnɔ́: «Pab yəə́b! Tí mɔɔd nyóon, wɛ́ɛn!» Wááság konyáŋɛn mɔɔd, ómámodɔɛ́d a nsí a udi ó pɔɔd piim, wáálón, ódɛmoyɛ́ɛ́lɛ kɔbɛ́. 36Ungim ayɛ́ɛ na wɛɛ́y. Páyɛ́ɛ əgəə́ŋíənə kɔ pɔ́lɛ́ na pɔ́lɛ́ pɔ́nɔ́: «Wóonɛ ombod oʼ! Nɛ́ɛnɛ nɛsɔyɔʼ óoʼ! Táá mɔɔd ɔɔ́sɔyɔ na toɛn tuim tó nɛlaamɛʼ taa! Amaʼkosásɛd, məŋun má mabɛ́ máamoyóbɛn, máság kolon!» 37Nugəm nó Yə́sus noáság kaálam a nigúu nɛ́ Kalilə́ə niim.
Yə́sus ayóómánɛ pabámbany piíŋ
(Maʼt 8.14-17; Mə́l 1.29-34)
38Ná Yə́sus yɛɛ́dɛ́ɛ́mɛn a yoog ɛ pɛɔ́sɔ́gɔ́lɔ́n, ayɛ́ɛ́n a nó Simɔ́ɔŋ. Ŋŋíin ɛ Simɔ́ɔŋ ayɛ́ɛ agoyáa na toɛn. Pááság komoyɔ́sɔ́gɔlɔn lɛ́ yɛ́ɛlɛ yoom. 39Aáság kɛɛn, aádam ónyoŋim a ɛbá yə́ə́ŋ, aásásɛd na toɛn lɛ́ nkó koyáa yɛ́ɛy ɛ́man. Ɔʼkɛ́ɛd cacalaʼ, əndigi ayáa kə́mmú, aáság koság kodɛ́ɛmɛn əgiim aboyáabɛn. 40Áanɛ a wɔɔ́s kosɛlɛm, piim pá páyɛ́ɛ na pabámbany pá páyɛ́ɛ na mbod ɛ mabámbany ngim, pə́yíímən na pɔ́lɛ́ kɛnɔ kɛ́ Yə́sus ayɛ́ɛ. Ayɛ́boyábɛ́gan pɔ́lɛ́ piim ombɔg, pómóóm. 41Məŋun má mabɛ́ máyɛ́ɛ agolónan tɛn a nkó ɛ pabámbany piíŋ, máagaányam, mɔ́nɔ́: «Wɛ, olɛ Mɔɔ́n o Táán!» Kɛbán kímuʼ, Yə́sus ayɛ́ɛ abosásan lɛ́ mábab yəə́b lɛ́ mɔ́lɛ́ mɛ́ɛ́lɛŋɛn lɛ́ nyɔ́lɛ́ alɛ Məsíi.
Yə́sus aádɛ́ɛ́mɛn a Kaʼpɛlɛnáyum
(Mə́l 1.35-39; Maʼt 4.23)
42Ná koany kóyááyɛ́nɛ, Yə́sus yɛɛ́lón pálɛ́ɛg agɛɛn a kɛnɔ kɛ́ kifələ́ə́n. Kiʼtúú kɛ́ pɔɔd kiə́bə́ə́ kiim kímuyúunə. Ná páyɛ́ɛ́n amoóboan, pádɛʼkɛ́ɛ anyɔ́ŋɛn lɛ́ ásan, pɔ́nɔ́ ɔ́lɔb na pɔ́lɛ́. 43Náa, ayɛ́bodɛánɛ ɔnɔ́ na pɔ́lɛ́: «Kíəguunə lɛ́ nyɛ́ɛn alɔɛgɛ Tɔsɔm Tólaŋ tó Nɛlaamɛʼ nɛ́ Táán a pabálɛ́ɛg pɛ́ndɛ́ŋ lɛ́ nkə kɛ́ Táán ayɛ́ʼtóm lɛ́ nyíim agɛɛlɛ aa kɛ́ɛg.» 44Aáság kəə́bə́ə́ kiim álɔɛgɛ Tɔsɔm a puog pó pɛɔ́sɔ́gɔ́lɔ́n pó a Siudə́ə.
Currently Selected:
:
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators Inc, 2015