LÓʼKAS 5

Paaʼkan pá na oʼto na oʼto pá Yə́sus yiísíəd

(Maʼt 4.18-22; Mə́l 1.16-20; Sɛ́a 21.1-11)

1A wɔɔ́s wúmmú, Yə́sus yɛɛ́dɛ́lɛmɛn a ɛbá ɛ́ noom nó Kɛnɛsalɛ́ɛd. Pɔɔd páyɛ́ɛ kiʼtúú kilúd. Kɛnɔ síɛ́ɛ́d, əgiim agoob Tɔsɔm tó Táán. Páyɛ́ɛ agaányɛŋ a pogó. 2Yə́sus aáság kodála pɛʼkɔ́m pɛ́baan pɛ́ pɛ́yɛ́ɛ kɔ áay a ɛbá ɛ́ noom. Pɔɔd pá páyɛ́ɛ agɛɛlɛ nibuəd na pɛ́lɛ́ pádɛʼkɛ́ɛ kə́mmú kɔ a pɛ́lɛ́. Páyɛ́ɛ pándɛ a kɛdɛ́ɛ́, páasoga əmbúnjə́ yɔ́ɔ́bɔn. 3Aáság kobag a kɛʼkɔ́m kɔ kímuʼ. Kɛ́yɛ́ɛ kɛʼkɔ́m kɛ́ Simɔ́ɔŋ. Náa ɔnɔ́ na Simɔ́ɔŋ: «Mɛ́ɛn abag a kɛʼkɔ́m, tiə́súid sɔɔŋ na ɛbá.» Simɔ́ɔŋ aáság kiim abag, pə́mə́suídíí. Yə́sus aáság kuləndin kɔ agaaʼkananɛ Tɔsɔm tó Táán. 4Ná yɛɛ́mán kosɔyɔ, aáság kusəə ɔnɔ́ na Simɔ́ɔŋ: «Simɔ́ɔŋ, Tod na kɛʼkɔ́m a kɛnɔ kɛ́ kisum kɛ́lɛɛ́, pódagɛdɛ nibúnjə́ kɔ na pɔsɔ́sɔ́g pááŋ.» 5Náa Simɔ́ɔŋ ɔnɔ́ na nyɔ́lɛ́: «Kɛlág, tɛmánɛ́ɛ́ udúg ungim, ɔmbɔ́ isúúsú ímuʼ tiʼkuminin. Ooo! Ndaadagɛdɛ lɛ́ wɛ áa wɔʼkɔ́ ntagɛdɛ.» 6Pááság kɛɛn, páádagɛ́dɛ nibúnjə́. Ná pə́yəʼkəsúid, nɛ́lɛ sud na pusú, niə́bə́ə́ kogaʼkad. 7Pááság kodɔ́ŋɔn pɔsɔ́sɔ́g pɔ́ɔ́bɔn pá páyɛ́ɛ a kɛʼkɔ́m kímmú kɛ́ʼkáag, pɔ́nɔ́ na pɔ́lɛ́ píim əbugóomin kusúid nibúnjə́ nɛɔ́bɔn. Pááság kiim, pə́ə́yə́ə́gi pɛʼkɔ́m piim pɛ́baan na pusú síɛ́ɛ́d, wɔnɔ́ pínímin a məní. 8Ná Simɔ́ɔŋ yɛɛ́dála náan, aáság kɛɛn ədúm əndu a udi ó Yə́sus, ɔnɔ́ na nyɔ́lɛ́: «Sə́dúk, sɛ́gɔɔ ə́suídíí laálá na mɛ lɛ́ ndɛ ɔngɛɛlɛʼ kɔbɛ́!» 9Wɛɛ́y úyíbugúmin pɔ́lɛ́ piim pə́əliminə kwag kwag kwag, na Simɔ́ɔŋ kɛ́, na pɔsɔ́g pá páyɛ́ɛ na nyɔ́lɛ́, a ombod ó pusú wóow wó píígúmin. 10Ɔmbɔ́ tɛn pa Sɛ́ag pɔ́lɛ́ na móŋŋí Sɛ́aŋ, pɔɔ́n pá Səbədə́ə pá páyɛ́ɛ pɔsɔ́sɔ́g pá nibuəd pá Simɔ́ɔŋ, pɔ́yɔ́ɔ́ŋ tɛn wɛɛ́y. Náa Yə́sus ɔnɔ́ na Simɔ́ɔŋ: «Odɛʼtámmána! Əgəə́bə́ə naánɛ́ yɛ́ɛnɛ udiə́giiʼkini konɔ́bɛ moyɛ́g kə́mmú, wəəbə́ə́ agá kɛnnɔ́bɛnɛ pɔɔd.» 11Pááság kimbuúlini a ombáán na pɛʼkɔ́m, páálón a kɛdɛ́ɛ́, pə́ə́dí pə́mə́dí nkə kiim kɛ́ pígóodi əguyə́ən Yə́sus.

Yə́sus ayóómɛ mɔɔd nyummú nyɔ́ ayɛ́ɛ abany nkún

(Maʼt 8.1-14; Mə́l 1.40-45)

12Náan aa wɔnɔ́ ná Yə́sus ayɛ́ɛ wɔɔ́s wúmmú a pálɛ́ɛg yimmú. Mɔɔd nyummú nyɔ́ ayɛ́ɛ abany nkún aáság kiim alon. Ná yɛɛ́dála Yə́sus, əyímudə́ə́ŋə́nən a ambaan, udi wə́ə́ŋ a nsí, ɔnɔ́ na nyɔ́lɛ́: «Sə́dúk! Omaʼkɔnyɔ́ŋɛn, olɛ ogɛnjoómɛ, nkún yaam yɛ́ɛman.» 13Yə́sus aáság kudə́əmini ombɔg, amámodɔ́bɛd, náa ɔnɔ́ na nyɔ́lɛ́: «Ɛɛ́ɛ, mbányɔ́ŋɛn, nkún ɛ́man na wɛ áaá!» Əgín tɛn kɔ áay a kɛnɛŋ kɛ́ɛg, nkún yəəŋ yaáság koman. 14Náa Yə́sus ɔnɔ́ na nyɔ́lɛ́: «Odɛʼtɛánɛ na mɔɔd nkə kɛ́ kɛ́másánɛ́ɛ́. Tod agá ogoóloodi na payaaganɛʼ pɛfɔny, wɛ́ɛlɛ kɛfɔny kɛ́ Moyíis yiísə́ə́, əguloodi na ungim lɛ́ kobany koáŋ koáʼkoman#5.14 Kɛ́lɛ náan a kálaʼtaʼ ɛ Ləf 14.2-32 » 15Niiŋ nɛ́ Yə́sus nɛáság kaálam kɛnɔ kiim, lumuʼ, lumuʼ, lumuʼ, nɛ́agɛɛnanan. Pɔɔd piíŋ páyɛ́ɛ əgiimən agaágonya a piʼtúú, a piʼtúú, əgiim agoob tɔgɛ́ɛ́ tuə́ŋ, na agɛɛlɛ lɛ́ áboyóómɛ a mabámbany mɔ́ɔ́bɔn. 16Náa, Yə́sus nyɔ́lɛ́ ayɛ́ɛ agɛɛnan ələndən a pɛnɔ pɛ́ pifələ́ə́n, ɔɔ́gɔɔ́sɔ́gɔlɔn Táán kɔ.

Yə́sus ayóómɛ kɛgɔd kɛ́ mɔɔd

(Maʼt 9.1-8; Mə́l 2.1-12)

17Wɔɔ́s wúmmú wó Yə́sus ayɛ́ɛ agaaʼkananɛ pɔɔd, Pafalɛsɛyɛ́ɛŋ, na palɛŋ pɛcɛm páyɛ́ɛ kɔ. Pə́yíím pádɛ́ɛman a əʼkúu əngim yɛ́ a Kalilə́ə na a Siudə́ə, na a pálɛ́ɛg ɛ Yolósalɛm kɛ́. Toɛn tó Táán Sə́dúk túyólódíí na nyɔ́lɛ́, aágoómanɛ pabámbany. 18Pɔɔd pááság kiim pásɛŋ kɛgɔd a pɛʼkwág əgiim na kɛ́lɛ́. Páyɛ́ɛ əguunə ngə́ ɛgomosɔ́dɛ a yoog agɛɛlɛ lɛ́ pɛ́ɛn na nyɔ́lɛ́ a udi ó Yə́sus. 19Wɔnɔ́ ná kɛnɔ kɛ́yɛ́ɛ kɛgágáán na pɔɔd, pándɛŋ ə́lə́ə́ áa pásánɛ́ɛ́, pɛ́ɛ́bág a kɛbon kɛ́ noádɛʼ, páágadɛd kɛnɔ, pə́ə́suuli kɛgɔd kɛ́ɛg na pɛʼkwág piə́ŋ kɔ a kɛgaágadɛ kɛ́ pɔɔd a udi ó Yə́sus. 20Ná Yə́sus yɛɛ́dála kəə́liʼtiniʼ kó pɔɔd póob, aáság kusəə ɔnɔ́ na ombámbany nyóon: «Mbə́gulísin mabɛ́ mááŋ áaá.» 21Palɛŋ pɛcɛm na Pafalɛsɛyɛ́ɛŋ pə́ə́bə́ə́ kəə́ŋíənə, pɔ́nɔ́: «Mɔɔd igə aa nyóonɛ alɛɛ́ agofánan Táán ə́? Ánɛ wɛndɛ́ŋ áa alɛɛ́ ugulisin mɔɔd mabɛ́ ná kɛ́sánɛn əgín lɛ́ Táán nyɔ́lɛ́nyɔ́əsíŋ ə́?#5.21 alɛɛ́ agofánan Táán ə́?: Pódála tɛn náan a kálaʼtaʼ ɛ Ləf 24.16 …ná kɛ́sánɛn əgín lɛ́ Táán nyɔ́lɛ́nyɔ́əsíŋ ə́?: Kɛ́lɛ náan a kálaʼtaʼ ɛ Pɛʼk 103.3; Ɛsa 43.25 » 22Wɔnɔ́ ná Yə́sus yɛɛ́lɛ́ŋ mafɛgaʼ mɔ́ɔ́bɔn má páyɛ́ɛ na mɔ́lɛ́, aáság kubuŋíən ɔnɔ́: «A igə aa polɛɛ́ na mafɛgaʼ móom náan a ntɛ́m yaaŋan ə́? 23Na kodɛ́anɛ na mɔɔd lɛ́ “mbə́gulísin mabɛ́ mááŋ” na komodɛ́anɛ lɛ́ “tɛ́ɛ́mɛn, táŋána” kɛ́yaán áa kɛ́lɛɛ́ kɛfɛ́fɛ́n lɛ́ mɔɔd ə́səə əə́? 24Náa, ndanyɔ́ŋɛn nyɔʼkɔ́ pólɛŋ lɛ́ mɛ, Mɔɔ́n o mɔɔd, ndɛ na toɛn tóonɛ lɛ́ ndísin mɔɔd mabɛ́ a nsí yɛ́ɛnɛ.» Náa ɔnɔ́ na kɛgɔd kɛ́ɛg: «Mbágodɛánɛ! Tɛ́ɛ́mɛn aá, úsiəd pɛʼkwág pɛáŋ, wúúli a noádɛʼ noáŋ áaá!» 25Əgín kɔ áay a əngis á pɔɔd, kɛgɔd ŋwaád, kɛányáŋɛn pɛʼkwág pɛ́ ayɛ́mmɛŋɛnɛn a pɛ́lɛ́, kiə́siəd ngə́ yəəŋ əguúli a noádɛʼ nuə́ŋ. Ayɛ́ɛ agɛɛn, əə́giim ə́gə́midi Táán. 26Ungim ayɛ́ɛ əgəə́wúnəni kɛ́fɔlɛ́, páagɛɛ́ʼkɛn nugəm na Táán. Na wɛɛ́y ungim, pɔ́ɔsɔyɔ pɔ́nɔ́: «Tɛádála ndam ɛ pɛbán naánɛ́.»

Yə́sus yɛɛ́dɔ́ŋɔn Lə́fi

(Maʼt 9.9-13; Mə́l 2.13-17)

27A ngim yɛ́ɛy, Yə́sus aáság kolon. Alɛ anɛ́ɛ́n agosan a, aáság kodála ɔʼkɔ́mmanɛʼ mag nyummú, niiŋ lɛ́ Lə́fi. Yiíləndinin a oʼkɔɔ wə́ə́ŋ ó pigólí. Náa ɔnɔ́ na nyɔ́lɛ́: «Wɛ, mɛ́ɛn wínjə́ən.» 28Mɔɔd aáság koság kodɛ́ɛmɛn tɛn, əə́dí ə́mə́dí nkə kɛ́ ayɛ́ɛ agɛɛlɛ, əə́yə́ən Yə́sus.

29Ayɛ́ɛ́n na Yə́sus a noádɛʼ nuə́ŋ, aáság komoyáabɛn moom. Ayɛ́ɛ́lɛ kɛa kɛ́ wɔɔ́n, ɛ́fɔlɛ́ ɛ́ Pagɔ́mmanɛʼ mag na pɔɔd tɛn pə́mmú pɛ́ndɛ́ŋ páyɛ́ɛ agonɛ́ɛnɛ kɔ ondáŋ na pɔ́lɛ́. 30Palɛŋ pɛcɛm na Pafalɛsɛyɛ́ɛŋ pə́ə́bə́ə́ kəə́lúluu. Pííŋíən na paaʼkan pə́ə́ŋ pɔ́nɔ́ əə: «A igə aa polɛɛ́ agonɛ́ɛnɛ, poáŋo poloʼ ondáŋ na Pagɔ́mmanɛʼ mag, na pɔɔd tɛn pá ɔlaa wɔ́ɔ́bɔn ódɛɔ́gɔ ɔŋŋɛʼ a əngis á pɔɔd əə́?» 31Náa Yə́sus ɔnɔ́ na pɔ́lɛ́: «Pɔɔd pá pálɛɛ́ panasáŋ, fiɛ́d na mɔdɔdɔɔ, póʼkóodi njaan na uʼkóʼtonon. Pá páabany aa pálɛɛ́ na njaan na nyɔ́lɛ́. 32Mɛ, ntiimin a oʼto ó pá pálɛɛ́ afɛga lɛ́ pɔ́lɛ́ pálɛ sáád, ndóo. Mbíim a oʼto ó pá pámálɛ́ŋɛ́ɛ́ lɛ́ pɔ́lɛ́ pálɛ pɛɛlɛʼ mabɛ́ lɛ́ ná págasɛ ɔlaa wɔ́ɔ́bɔn.»

Nkə kɛ́ Yə́sus yiísə́ə́ a noá na ə́simə́

(Maʼt 9.14-15; Mə́l 2.18-20)

33Náa Pafalɛsɛyɛ́ɛŋ pɔ́nɔ́ na Yə́sus: «A igə aa kɛ́lɛɛ́ lɛ́ paaʼkan pá Sɛ́aŋ Ɔsɔgɛn pɔɔd na pə́ə́s kɛ́ pə́əgumən ə́simə́, pɔ́ɔgɔɔ́sɔ́gɔlɔn Táán, pááŋ pə́ʼkumin yɛ́lɛ́, əgín konɛ na koŋo ə́?» 34Yə́sus əyíbuyúlísíni ɔnɔ́ na pɔ́lɛ́: «Poafɛg lɛ́ polɛ págɛɛlɛ lɛ́ pɔɔd pá pɔ́ɔ́dɔ́ŋɔn a wɔɔ́n ó kodɔn pə́ləndin ombɔg a nɛdam, pánnɛ́, páŋŋó, sɔ́g wɔɔbɔn nyɔ́ aálad kodɔn kɔ áay na pɔ́lɛ́ á? Ndóo. 35Kɛbán kímuʼ, mədúg málɛ́ɛ́ kiim má sɔ́g wɔɔbɔn nyɔ́ aálad kodɔn adɛndɛ́ɛ́ kɛɛnɛɛ́ kə́mmú kɔ na pɔ́lɛ́. Áay anɛ́ɛ́n áa pɔ́lɛ́ tɛn pálɛ́ɛ́ kuguminií ə́simə́.»

Yoom yɛ́ ɛwa na ɛ́ kiʼtug

(Maʼt 9.16-17; Mə́l 2.21-22)

36Yə́sus əyíbusiə́din nkaʼtɛ́n yimmú yɛ́ɛnɛ, ɔnɔ́: «Mɔɔd ɔdɛɔ́gɔ ogosom kilə́ə́ kɛ́ kɛwa agolɔ́g kiwoo kɛ́ kiʼtug na kɛ́lɛ́. Amaʼkɛɛlɛ náan, aáyósag kɛ́ɛg káag kɛ́ kɛwa, kɛ́dɛálɛŋ kodɛ́ʼtɛganan na kɛ́ kiʼtug. 37Pádɛ́agɛɛga maloʼ má mawa a piʼtug pɛ́ pɛsɔɛ́ŋ, ná pɛ́aman kaáʼtad, maloʼ miim mə́ə́sugin a nsí, pɛsɔɛ́ŋ pɛlɔ́sɔ́ɔ́n. 38Ndóo, aádɛ́ɛ́ kɛɛga maloʼ má mawa a pɛsɔɛ́ŋ tɛn pɛ́ pɛwa! 39Mɔɔd nyɔ́ aáʼkoŋóó maloʼ má máʼkogónɛ́ɛ́, adɛányɔ́ŋɛn kə́mmú lɛ́ ná aáŋó má modom lɛ́ pálɛ əgusəə pɔ́nɔ́: “Yoom yɛ́ yə́ʼkəə́yísíí ɛ́lɛ ɛŋɛʼ agaáyɛn yɛ́ íligíí idom.” »

Currently Selected:

LÓʼKAS 5: yatDBL

Highlight

Copy