Ni Tsumi 4

Petro kɛ Yohane ngɛ kpe ngua a hɛ mi

1Petro kɛ Yohane ngɛ munyu ɔ tue kɛ ngɛ ma a tsɔɔe kɛ mwɔɔ, kɛkɛ nɛ osɔfo komɛ, sɔlemi we ɔ asafoatsɛ ɔ, kɛ Saduki bi komɛ ba pue a nɔ ngɛ lejɛ ɔ. 2A mi mi fu wawɛɛ, ejakaa bɔfo enyɔ ɔmɛ ngɛ ma a ní tsɔɔe ke Yesu te si kɛ je gbeje, nɛ lɔ ɔ maa nɔ mi kaa gbogboehi maa te si kɛ ba wami mi. 3Enɛ ɔ he je ɔ, a nu Petro kɛ Yohane; nɛ a ya wo mɛ tsu kɛ yaa su be nɛ je maa na, ejakaa jamɛ a be ɔ du bu. 4Se nihi nɛ ba bu sɛ gbi ɔ tue ɔ, a ti nihi babauu nɛ maa su akpe enuɔ he ye.

5E nɔ jena a, Yuda bi ɔmɛ a hɛ mi nyɛɛli ɔmɛ, kɛ ma nimeli ɔmɛ, kɛ mlaa tsɔɔli ɔmɛ ba bua a he nya ngɛ Yerusalem. 6Hana, osɔfo nɔkɔtɔma pe kulaa a, Kayafa, Yohane, Aleksandro, kɛ nihi abɔ nɛ je osɔfo nɔkɔtɔma pe kulaa a weku ɔ mi ba kpe ɔ. 7A ha bɔfo ɔmɛ ba da a hɛ mi, nɛ a bi mɛ ke, “Kɛ nyɛ pee kɛɛ nɛ nyɛ tsa glɔtsɛ ɔ? Mɛnɔ he wami nya, aloo mɛnɔ biɛ mi nyɛ tsu nɔ́ nɛ ɔ?”

8Kɛkɛ nɛ Petro nɛ Mumi Klɔuklɔu hyi lɛ tɔ ɔ de mɛ ke, “Nyɛ Israel ma hɛ mi nyɛɛli, kɛ ma nimeli, 9ke a kɛ wɔ ngɛ munyu yee mwɔnɛ ligbi nɛ ɔ ngɛ kpakpa nɛ a pee kikɛmɛ a glɔtsɛ nɛ ɔ he, kaa kɛ a pee kɛ tsa lɛ kɛɛ ɔ, 10lɔ ɔ lɛɛ nɔ́ nɛ sa nɛ nyɛ tsuo nyɛɛ le, nɛ Israel ma kpekpemi ɔ tsuo hu nɛ na nɛ a le ji nɛ ɔ nɛ. Nɔmlɔ nɛ a tsa lɛ nɛ daa si ngɛ nyɛ hɛ mi nɛ ɔ, Yesu Kristo, Nazaret no ɔ he wami nya nɛ a tsa lɛ. Nyɛɛ lɛɛ nyɛ sɛu Yesu ɔ, se Mawu tle lɛ si kɛ je gbeje. 11#La 118.22 Yesu nɛ ɔ nɔuu he ngmami ɔ deɔ ngɛ ke,

‘Tɛ ɔ nɛ nyɛ tsu fiali ɔmɛ nyɛ sake fɔ he ɔ

plɛ kɔ nya tɛ.’

12Lɛ nɔ kake too pɛ lɛ ma nyɛ ma he nimli a yi wami. E se ɔ, nɔ ko nɔ ko be je ɔ mi nɛ Mawu ha lɛ kikɛmɛ a he wami nɛ ma nyɛ he wa yi wami.”

13Benɛ kpe ngua a mi bi ɔmɛ na kã nɛ Petro kɛ Yohane pee, nɛ a ná le hu kaa nimli gu kɛkɛ ji mɛ, se pi womi mi leli ɔ, a he mi po. A kɔ se kaa a kɛ Yesu hi si. 14A nɛ́ nɔ́ nɛ a ma de, ejakaa nɔmlɔ nɛ a tsa lɛ ɔ kɛ Petro, kɛ Yohane daa si ngɛ lejɛ ɔ. 15Lɔ ɔ he ɔ, a de mɛ ke a je kpo ngɛ tsu ɔ mi he nɛ a kpe ngɛ ɔ. Kɛkɛ nɛ a ya da, nɛ a bi a he ke, “Kɛ wa maa pee nimli nɛ ɔmɛ kɛɛ? 16Nyakpɛ nɔ́ nguaa nɛ Mawu tsu kɛ gu nimli nɛ ɔmɛ a nɔ ɔ, nihi tsuo ngɛ Yerusalem nu he; nɛ wa be nyɛe ma de ke e be mi. 17Se kɛ̃ ɔ, bɔ nɛ pee nɛ munyu ɔ ko gbɛ fĩa fuu ko hu ngɛ ma a mi he je ɔ, nyɛ ha waa bɔ mɛ kɔkɔ ke a ko ngɔ Yesu biɛ kɛ tsɔɔ ní hu.”

18Lɔ ɔ he ɔ, a tsɛ mɛ kɛ ba, nɛ a fia a tue mi wawɛɛ ke a ko wo Yesu biɛ ta, nɛ a ko ngɔ Yesu biɛ kɛ tsɔɔ ní kulaa hu. 19Se Petro kɛ Yohane he nɔ nɛ a de mɛ ke, “Ke e da blɔ ngɛ Mawu hɛ mi kaa a bu nyɛ mohu tue pe Mawu ɔ, nyɛɛ kojo. 20Ejakaa wɔɔ lɛɛ, níhi nɛ wa na, kɛ níhi nɛ wa nu ɔ, wa be nyɛe ma ma wa nya ngɔ to nɔ kaa ja wa de.” 21Kɛkɛ nɛ kpe ɔ bɔ mɛ kɔkɔ wawɛɛ pe kekle ɔ po, nɛ a ngmɛɛ a he. A nɛ́ bɔ nɛ a maa pee nɛ a maa gbla a tue; ejakaa ni ɔmɛ tsuo ngɛ Mawu hɛ mi nyami woe ngɛ nɔ́ nɛ a pee ɔ he. 22Nɔmlɔ nɛ a gu kikɛmɛ a nyakpɛ blɔ nɔ kɛ tsa lɛ ɔ ye pe jeha nyingmi eywiɛ.

Asafo ɔ kpa pɛɛ kɛ bi he wami womi

23Benɛ a ngmɛɛ Petro kɛ Yohane he nɔuu nɛ a ba nyɛmimɛ ɔmɛ a ngɔ ɔ, a ba sɛɛ níhi tsuo nɛ osɔfo nikɔtɔma amɛ, kɛ ma nimeli ɔmɛ de mɛ ɔ ha mɛ. 24#Mose II, 20.11; Neh 9.6; La 146.6 Benɛ nyɛmimɛ ɔmɛ nu ɔ, a kɛ juɛmi kake fa kue ha Mawu ke, “Mo Nyɔmtsɛ nɛ o bɔ hiɔwe kɛ zugba, kɛ wo, kɛ níhi tsuo nɛ ngɛ a mi. 25#La 2.1-2 O ha nɛ Mumi Klɔuklɔu ɔ wo wa nɛ̃ David, o tsɔlɔ ɔ he wami, nɛ e tu munyu ke,

‘Mɛni he je ma je li ɔmɛ ngɛ hoo pee,

nɛ a ngɛ nihi a yi nɔ soe yaka gu?

26Zugba a nɔ matsɛmɛ ɔmɛ, kɛ ganɔ ɔmɛ

ba bua a he nya;

nɛ a te si ngɔ wo e nyɔmtsɛ ɔ kɛ nɔ nɛ a pɔ lɛ nu ɔ.’

27 # Mat 27.1-2; Mar 15.1; Luk 23.1, 7-11; Yoh 18.28-29 Niinɛ, Herode, Pontio Pilato, ma je li ɔmɛ, kɛ Israel ma amɛ hu ba bua a he nya ngɛ ma nɛ ɔ mi ngɔ wo Yesu, o tsɔlɔ klɔuklɔu nɛ o pɔ lɛ nu ɔ he. 28A ba bua a he nya, konɛ a pee níhi tsuo ngɛ o he wami nya kaa bɔ nɛ o to ngɔ fɔ si kaa a pee ɔ. 29Jehanɛ hu Nyɔmtsɛ, hyɛ wa he gbeye nɛ a ngɛ woe ɔ, nɛ o wo wɔ, o sɔmɔli ɔmɛ kã nɛ waa jaje o munyu ɔ. 30Je o he wami kpo, nɛ o ha a tsa nihi, nɛ a ngɔ Yesu, o tsɔlɔ klɔuklɔu ɔ biɛ kɛ pee okadihi, kɛ nyakpɛ níhi.”

31Benɛ a sɔle kikɛ ɔ, he nɛ a bua ngɛ ɔ mimiɛ, nɛ Mumi Klɔuklɔu ɔ ba mɛ tsuo a nɔ saminya, nɛ a ngɔ kã kɛ jaje Mawu munyu ɔ.

Nihi nɛ he ye ɔ pee a níhi tsuo kake

32 # Nits 2.44-45 Nihi babauu nɛ he Yesu ye ɔ tsuo hɛɛ juɛmi kake, kɛ mumi kake. Nɛ a ti nɔ ko nɔ ko tsɛ we e níhi nɛ e ngɛ ɔ mi eko ke lɛ nitsɛ e nɔ́, se mohu, nɔ́ nɛ nɔ ko ngɛ ɔ peeɔ ma tsuo nɔ́. 33He wami kpetekpleenyɛ lɛ bɔfo ɔmɛ kɛ ye Nyɔmtsɛ Yesu si temi ɔ he odase, nɛ Mawu dloo mɛ babauu. 34Nɔ ko nɔ ko be a kpɛti nɛ nɔ́ ko he hia lɛ, ejakaa nihi nɛ ngɛ we, loo zugba a juaa, nɛ a kɛ sika a baa. 35A kɛ ba haa bɔfo ɔmɛ, nɛ a dlaa kɛ haa nɔ tsuaa nɔ kaa bɔ nɛ he hia lɛ.

36-37Bɔ nɛ ba loko Yosef ya jua e zugba nɛ e ngɔ sika a ba ha bɔfo ɔmɛ ji nɛ ɔ nɛ. Yosef nɛ ɔ, Levi no ji lɛ; a fɔ lɛ ngɛ Kipro. Biɛ nɛ bɔfo ɔmɛ kɛ tsɛɔ lɛ ji Barnaba. E sisi ji nɔmlɔ nɛ woɔ nɔ he wami.

Currently Selected:

Ni Tsumi 4: Dangme

Highlight

Copy