Yohane 11

Lazaro gbenɔ

1 # Luk 10.38-39 Nyumu ko hi Betania, Maria kɛ Marta a ma a mi. Nyumu nɛ ɔ, a tsɛɛ lɛ Lazaro. Be ko ɔ, Lazaro ba nu hiɔ. 2#Yoh 12.3 Lazaro nɛ ɔ, Maria nɛ ngɔ nu kɛ e he via kɛ pɔ Nyɔmtsɛ ɔ nane, nɛ e kɛ e yi bwɔmi tsu ɔ nyɛminyumu ji lɛ. 3Lɔ ɔ he ɔ, nyɛmiyi ɔmɛ kɛ sɛ mane Yesu ke, “Nyɔmtsɛ, o huɛ nɛ o suɔ lɛ ɔ ngɛ gboe.”

4Benɛ Yesu nu kaa Lazaro ngɛ gboe ɔ, e de ke, “Hiɔ nɛ ɔ be Lazaro gbee, se mohu a maa gu enɛ ɔ nɔ kɛ wo Mawu hɛ mi nyami; nɛ enɛ ɔ nɔuu a kɛ maa wo Mawu Bi ɔ hɛ mi nyami.”

5Yesu suɔ Marta kɛ e nyɛmiyo ɔ, kɛ Lazaro saminya. 6Se benɛ e nu Lazaro hiɔ he ɔ, e kpale ye ligbi enyɔ sɔuu ngɛ he nɛ e ngɛ ɔ. 7Kɛkɛ nɛ e de e kaseli ɔmɛ ke, “Nyɛ ha waa kpale wa se kɛ ho Yudea ya.”

8Kaseli ɔmɛ he nɔ ke, “Tsɔɔlɔ, pi lingmi pɛ nɛ Yuda bi ɔmɛ ka mo tɛ fiami, nɛ o yaa lejɛ ɔ ekohu?”

9Yesu he nɔ ke, “Anɛ pi ngmlɛfia nyɔngma kɛ enyɔ nɛ peeɔ ligbi kake? Ke nɔ ko nyɛɛ piani ɔ, e tɛ we si, mɛni he je ɔ, e naa je nɛ ɔ mi la a. 10Se ke nɔ ko nyɛɛ nyɔ mi ɔ, e tɛɔ si, ejakaa la be.” 11Yesu de kɛ gbe nya ke, “Wa huɛ Lazaro hwɔ mahe, se i yaa nɛ ma ya tsɛ̃ɛ̃ lɛ.”

12Kaseli ɔmɛ he nɔ ke, “Nyɔmtsɛ, ke mahe e ngɛ hwɔe ɔ, lɛɛ e maa hi ha lɛ.”

13Yesu ngɛ tsɔɔe kaa Lazaro gbo momo, se mɛɛ lɛɛ a susu kaa mahe nitsɛ nɛ e ke Lazaro ngɛ hwɔe. 14Lɔ ɔ he ɔ, Yesu de mɛ kpoo ke, “Lazaro gbo, 15se e ngɔ ye nya kaa i be lejɛ ɔ, bɔ nɛ pee nɛ nyɛ he ye. Nyɛ ha waa ya e ngɔ.”

16Toma nɛ a tsɛɛ lɛ Hayo hulɔ ɔ, de e nyɛmimɛ kaseli ɔmɛ ke, “Nyɛ ha wɔ hu waa kɛ Tsɔɔlɔ ɔ nɛ ya, nɛ waa kɛ lɛ ya gbo.”

Yesu ji si temi ɔ kɛ wami ɔ

17Benɛ Yesu ba su Betania a, e na kaa Lazaro ye ligbi eywiɛ momo ngɛ yɔkɔ ɔ mi. 18Betania kɛ Yerusalem a kpɛti kɛmi maa pee kaa si tomi enyɔ; 19lɔ ɔ he ɔ, Yuda bi babauu ba Marta kɛ Maria a ngɔ, konɛ a ba ye mɛ kɔmɔ ngɛ a nyɛminyumu ɔ gbenɔ ɔ he.

20Benɛ Marta nu kaa Yesu ma a, e je kpo nɛ e kɛ lɛ ya kpe, se Maria lɛɛ e hii si ngɛ we ɔ mi. 21Marta de Yesu ke, “Nyɔmtsɛ, kaa o ngɛ hiɛ ɔ jinɛ ye nyɛminyumu ɔ ko gbo we. 22Se amlɔ nɛ ɔ hu, i le kaa nɔ́ tsuaa nɔ́ he pɛɛ nɛ o ma kpa Mawu ɔ, e maa pee ha mo.”

23Yesu de lɛ ke, “O nyɛminyumu ɔ maa te si kɛ ba wami mi ekohu.”

24Marta he nɔ ke, “I le kaa nyagbe ligbi ɔ nɛ ni gbogboehi maa te si ɔ, e maa te si kɛ ba wami mi.” 25Yesu de lɛ ke, “Imi ji si temi ɔ, kɛ wami#11.25 “Kɛ wami ɔ” be ngmami ɔmɛ ekomɛ a mi. ɔ nɛ. Nɔ tsuaa nɔ nɛ heɔ mi yeɔ ɔ, ke e gbo tete po, e maa hi hɛ ngmengmle; 26nɛ nɔ tsuaa nɔ nɛ hɛ ngɛ, nɛ e heɔ mi yeɔ ɔ, e be gboe gblegbleegble. O heɔ enɛ ɔ yeɔ lo?”

27Marta he nɔ ke, “Ee Nyɔmtsɛ, i heɔ yeɔ kaa mo ji Kristo ɔ nɛ! Mo ji Mawu Bi ɔ nɛ ma je ɔ mi ɔ nɛ.”

Yesu fo ya

28Benɛ Marta de enɛ ɔ, e kpale e se kɛ ho nɛ e ya tsɛ e nyɛmiyo Maria zaa. E de lɛ ke, “Tsɔɔlɔ ɔ ba, nɛ e ngɛ o si bie.” 29Benɛ Maria nu enɛ ɔ, e te si pam, nɛ e je kpo esɔ, nɛ e kɛ Yesu ya kpe. 30Yesu na we nɛ e su kɔpe ɔ mi lolo; mohu ɔ, he nɛ Marta kɛ lɛ ya kpe ngɛ ɔ, lejɛ ɔ nɔuu nɛ e ngɛ kɛ mwɔɔ. 31Yuda bi ɔmɛ nɛ kɛ Maria ngɛ we ɔ mi, nɛ a ngɛ lɛ kɔmɔ yee ɔ na bɔ nɛ e te si nɛ e sá e he kɛ je kpo, nɛ a nyɛɛ e se. A susu kaa e yaa yɔkɔ ɔ he nɛ e ya fo ya ngɛ lejɛ ɔ.

32Maria ya su he nɛ Yesu ngɛ ɔ, nɛ amlɔ nɔuu nɛ e na Yesu ɔ, e kpla si ngɛ Yesu nane nya, nɛ e de lɛ ke, “Nyɔmtsɛ, kaa o ngɛ hiɛ ɔ jinɛ ye nyɛminyumu ɔ ko gbo we.”

33Yesu na kaa Maria ngɛ ya foe; nɛ jehanɛ ɔ, bɔ nɛ Yuda bi ɔmɛ nɛ piɛ Maria he ɔ hu ngɛ ya foe ɔ ha Yesu hao ngɛ mumi mi. 34E bi mɛ ke, “Jije nyɛ to lɛ ngɛ?”

A he nɔ ke, “Nyɔmtsɛ, ba nɛ o ba hyɛ.”

35Yesu fo ya. 36Kɛkɛ nɛ Yuda bi ɔmɛ de ke, “Hyɛ bɔ nɛ e suɔ lɛ ha!”

37Se ni komɛ de ke, “Pi lɛ nɛ e bli hɛ yuyuilɔ ɔ hɛngmɛ ɔ! Anɛ e ko nyɛ we nɛ e pee nɛ Lazaro kó gbo we lo?”

Yesu tle Lazaro si kɛ ba wami mi ekohu

38Yesu hao ngɛ mumi mi ekohu, nɛ e pue nɔ kɛ ho yɔkɔ ɔ he ya. Tɛ puɔ nɛ a ngɔ tɛ kɛ tsi nya ji yɔkɔ ɔ. 39Yesu fa mɛ ke, “Nyɛ je tɛ ɔ.”

Marta, nyumu ɔ nɛ gbo ɔ nyɛmiyo ɔ he nɔ ke, “Nyɔmtsɛ, be nɛ ɔ mi ɔ, nɔ ɔ puɛ, ejakaa ligbi eywiɛ sɔuu ji nɛ ɔ nɛ e gbo.”

40Yesu de lɛ ke, “Anɛ i de we mo ke, ke o he ye ɔ, o maa na Mawu hɛ mi nyami ɔ lo?” 41Jehanɛ a je tɛ ɔ; kɛkɛ nɛ Yesu wo e hɛ nɔ nɛ e hyɛ hiɔwe, nɛ e de ke, “Tsaatsɛ, i naa mo si kaa o buɔ mi tue. 42I le kaa o buɔ mi tue be tsuaa be; se i ngɛ enɛ ɔ dee ngɛ nihi nɛ pueɔ si nɛ ɔ a he, bɔ nɛ pee nɛ a he ye kaa mo nɛ o tsɔ mi.” 43Benɛ e de enɛ ɔ se ɔ, e tsɛ lɛ kɛ gbi wawɛɛ ke, “Lazaro lee-ee, jee kpo!” 44Kɛkɛ nɛ gbogboe ɔ je kpo. Bo nɛ a kɛ pu lɛ ɔ blaa e nine kɛ e nane, nɛ duku fi e hɛ mi. Yesu de mɛ ke, “Nyɛɛ pɛne lɛ nɛ nyɛ ha e ya.”

A so Yesu yi nɔ

(Mateo 26.1-5; Marko 14.1-2; Luka 22.1-2)

45Yuda bi ɔmɛ nɛ ba Maria ngɔ ɔ, a ti nihi babauu na nɔ nɛ Yesu pee ɔ, nɛ a he lɛ ye. 46Se a ti ni komɛ pue nɔ kɛ ho nɛ a ya sɛɛ níhi nɛ Yesu pee ɔ ha Farisi bi ɔmɛ. 47Lɔ ɔ he ɔ, osɔfo nikɔtɔma amɛ, kɛ Farisi bi ɔmɛ tsɛ kpe ngua a mi bi ɔmɛ kɛ kpe, nɛ a de ke, “Kɛ wa maa pee kɛɛ? Nyɛɛ hyɛ níhi tsuo nɛ nyumu nɛ ɔ ngɛ pee kɛ ngɛ okadi toe. 48Ke wa ngmɛ lɛ blɔ nɛ e ya nɔ ngɛ ní nɛ ɔmɛ pee ɔ, ma a tsuo ma he lɛ maa ye. Kɛkɛ ɔ, Roma bi ɔmɛ maa ba ba kpata wa sɔlemi we ɔ, kɛ wa ma a tsuo hɛ mi.”

49A ti nɔ kake nɛ a tsɛɛ lɛ Kayafa, nɛ ngɛ osɔfo nɔkɔtɔma pe kulaa yee jamɛ a jeha a de ke, “Nyɛ biɛ pɛ! 50Anɛ nyɛ li kaa ke nyɛ ha nɔ kake mohu gbo ngɛ ma a tsuo nane mi ɔ, e hi pe nɛ a ma kpata ma a tsuo hɛ mi lo?” 51Se anɔkuale mi ɔ, pi lɛ nitsɛ e yi mi nɛ e to kɛ de enɛ ɔ. Mohu ɔ, akɛnɛ lɛ nɛ ngɛ osɔfo nɔkɔtɔma pe kulaa yee jamɛ a jeha a nɛ e ngɛ gbae kaa Yesu ma gbo ngɛ Yuda bi ɔmɛ a nane mi. 52Pohu pi ma a nane mi kɛkɛ, se e ma bua Mawu bimɛ tsuo nɛ gbɛ fĩa hu a nya kɛ pee kake.

53Kɛ je jamɛ a ligbi ɔ kɛ yaa a, Yuda ma nimeli ɔmɛ so kaa a maa gbe Yesu. 54Lɔ ɔ he ɔ, Yesu nyɛɛ we ngɛ Yuda bi ɔmɛ a kpɛti nɛ a na lɛ paa hu. Se e je kɛ ho nga a nɔ ya, nɛ e kɛ e kaseli ɔmɛ ya hi ma ko nɛ a tsɛɛ Efraim ɔ.

55Jehanɛ ɔ, Hetsɔmi nyami be ɔ su ta; lɔ ɔ he ɔ, nihi babauu nɛ je ngmɔ si ɔ pue nɔ kɛ ho Yerusalem ya. Kusumi nɛ a peeɔ kɛ tsukɔɔ a he ɔ, a ya konɛ a ya pee loko nyami be ɔ nɛ su. 56Ni ɔmɛ bɔni Yesu hlami, lɔ ɔ he ɔ, benɛ a ya bua a he nya ngɛ sɔlemi we ɔ, a bi a he ke, “Anɛ e maa ba Hetsɔmi nyami ɔ, loo e be bae?” 57Osɔfo nikɔtɔma amɛ, kɛ Farisi bi ɔmɛ ya wo ma a si kaa nɔ tsuaa nɔ nɛ le he nɛ Yesu ngɛ ɔ, e ba wo a tue nɔ, konɛ a ya nu lɛ.

Currently Selected:

Yohane 11: Dangme

Highlight

Copy