Genesis 23
23
Tsi' mʌñʌ lum cha'an mi' muc Sara
1-2Che' wucp'ejlix i wucc'al (127) i jabilel Sara tsa' chʌmi ya' ti Quiriat Arba, jiñʌch Hebrón ya' ti' lumal Canaán. Abraham tsa' tili i yuc'tan Sara. Ch'ijiyem i pusic'al. 3Abraham tsa' wa'le ti' t'ejl jini ch'ujlelʌl. Tsi' sube i yalobilob Het: 4Tilemon ti yambʌ lum. Ti majan jach woliyon ti chumtʌl ti a lumal. Ma'anic c cha'an lum cha'an mucoñibʌl. Chombeñon lum ba' mi mejlel c muc quijñam tsa' bʌ chʌmi, che'en Abraham. 5I yalobilob Het tsi' subeyob Abraham: 6C yum, ubiñon lojon. Dios tsi' yotsayet ti yumʌl tic lumal lojon. Mucu a wijñam ti c'ax uts'at bʌ mucoñibʌl c cha'an lojon. Ma'anic majch mi caj i tiq'uet mi tsa' c'ʌñʌ mucoñibʌl cha'an ma' muc a wijñam, che'ob. 7Abraham tsi' c'uchchoco i bʌ ti' tojlel i yumob jini lum, jiñobʌch i yalobilob Het. 8Abraham tsi' pejcayob: Mi woli la' ña'tan ti la' pusic'al uts'at mic muc quijñam, yom mi la' jac'beñon. Yom mi la' c'ajtiben Efrón (i yalobil Zohar) 9cha'an mi' yʌq'ueñon jini ch'en am bʌ ti Macpela, ya' ba' jaxʌl i jamil. Mic toje' ti ts'ʌcʌl ti la' tojlel cha'an mi cochel ti' yum jini mucoñibʌl, che'en Abraham. 10Ya'ix buchul Efrón ti' tojlel i yalobilob Het. Efrón jini heteo tsi' jac'ʌ Abraham ti' tojlel i pi'ʌlob yic'ot pejtel jini woli bʌ i yochelob ti' ti' i tejclum Het. Tsi' yʌlʌ: 11C yum, ubiñon. Jini jamil a cha'añʌch. Mi cʌq'ueñet jini jamil yic'ot jini ch'en am bʌ ti yojlil. Ti' tojlel jini winicob x'ixicob c pi'ʌlob mi cʌq'ueñet cha'an ma' muc jini chʌmen bʌ a cha'an, che'en. 12Abraham tsi' c'uchchoco i bʌ ti' tojlel jini ya' bʌ chumulob. 13Tsi' pejca Efrón ya' ti' tojlel pejtel winicob x'ixicob. Abraham tsi' yʌlʌ: Mi a wom, poj ubiñon. Woli cʌq'ueñet i tojol jini jamil. Ch'ʌmʌ tij c'ʌb. Mi caj c muc quijñam ya'i, che'en. 14-15Efrón tsi' sube Abraham: C yum, ubiñon. ¿Chuqui i ye'tel c cha'an jumpejt lum anquese uxp'ejl mil peso i tojol? Mucu jini ch'ujlelʌl a cha'an, che'en. 16Abraham tsi' jac'be Efrón. Tsi' p'isbe Efrón jini plata ti p'isonib. Ts'ʌcʌl tsi' yʌq'ue i tojol che' bajche' tsi' yʌlʌ Efrón ti' tojlel winicob x'ixicob ti Het, uxp'ejl mil peso.
17-18Jini jamil i cha'an Efrón, ya' ti Macpela ti' tojel Mamre, tsa' chombenti Abraham yic'ot jini ch'en yic'ot te'el am bʌ ti jamil ti' petol. Tsi' mʌñʌ Abraham ti' tojlel heteojob, ti' tojlel pejtelel mu' bʌ i yochelob ti tejclum. Che'i tsa' ochi Abraham ti' yum jini lum. 19-20Che' jini Abraham tsi' mucu Sara i yijñam ya'i. Tsa' cʌle ti' wenta Abraham jini jamil yic'ot ch'en am bʌ ti' yojlil jini jamil tsa' bʌ i chombeyob jini heteojob. I cha'añʌch Abraham cha'an mujquibʌl.
Currently Selected:
Genesis 23: CTU77
Highlight
Share
Copy
Want to have your highlights saved across all your devices? Sign up or sign in
Chol de Tumbalá Bible © Bible Society of Mexico, 1977. Active Translation in Process
