Yoohana 3

Yeesso ichoow Nikodeemo ibeen isleehawwoochaan

1Etoo Farissaayeenye Nikodeemo layadeehe Jaldaabti Weene Yaꞌhuud kichokoowe a jire. 2Ulla ibeen Yeesso iyimiyye wihi us iyidah, “Eti ween, saggi at etoo Waakh sooergate enenyet walah abcho itahe a garanna. A mehe wahanyeyyohi miigti Waakh tuso at yeesso, et addane yeelo mele, eti Waakh leejiro on menye.”

3Yeesso la wihi us ilaabe, “Rume kisoocheeka, et dakhi Waakh argo mele sammata koli lammaatteet liidelin.”

4Nikodeemo la wihi us worsate, “Saggoh eti ween toro liidela? Rumanka koli lammaatteet uur abartiis ma inokhti ma dessi!” 5Yeesso wihi us ilaabe, “Rume atin icheeka, et dakhi Waakh gelo mele, sammata bicche ichoow Rubeyti Munyee ka liidelin. 6Weeli enenyet sartiis aabbahiis ichoow abartiissa kaꞌhela, toro la rubeyti weeli enenyet, Rubeyti Munyeenye jiro kaꞌhessa. 7Yeedeeyki an, ‘Atin toro koli lammaatteet a atin laaddelo,’ idah akagirmeysan. 8Hafar anki us ꞌdoono isohta. Yeenaanki us yeedo la ladaaga, iꞌdaasenyi et inti us kayimiy ichoow inti us isohti garti mele. Eti Rubeyti Munyee jiroti husub siisse laka a iꞌdaas on.”

9Nikodeemo la wihi us worsate, “Waha saggoh iyateehiin?”

10Yeesso la wihi us ilaabe, “At a etoo ꞌdooꞌdi Issiraayel Yeedi Waakh abcho, toro la wahanyeyyoha ma abanna? 11Rume kisoocheeka, wihi nah garanni a atin isoocheekna, wihi nah indo kaagarre laka a atin isoocheekna. Iꞌdaasenyi, atin wihi nah atin idowno ma rummeysattaan. 12An wahanyeyyohi harratane atin isoocheeke atin la ma rummeysattaan. Sag ꞌdeerka atin wahanyeyyohi goobi Waakh miinsane an atin idowo irummeysattaan mele gon. 13Ínam Aadamhi goobi Waakh kasookhubte on menye, et addane injire goobi Waakh ikore mele. 14Saggi goorat Muusa hidaad ka toof iokkhichuu, saggaase Ínam Aadam laka liiokhicha,#3:14 Ekkees 21:9. 15ꞌdee eti tuummane ani irummeeste, jiroti jirtuu imassan ꞌhela.”

16Iꞌdi tahe Waakh weeli enenyet tuumman weyti ꞌdoone, ꞌdeerka weeliiski kalday soodiibe, ꞌdee eti tuummane Weeli Waakh rummeeste ma yamuute, iꞌdaasenyi jiroti jirtuu imassan ꞌhela. 17A mehe Waakh Weeliis weeli enenyete us hukkumo ma isooergin. Iꞌdaasenyi a sooerge, ꞌdee weeliis ka weeli enenyet tuumman uskeeliis kariba. 18Eti tuummane Weeli Waakh rummeeste ma lahukkumo. Iꞌdaasenyi eti tuummane irummeysan orey on lahukkume, a mehe Weeli Waakhe keleye ma rummeysan.

19“Wihi Waakh gooche kallaayo. Runti Waakhe iꞌdi banayeete harra a soogesse, iꞌdaasenyi enenyet banayhi Waakh menye, mugꞌdi on ꞌdoona. A mehe wihi icho yeelaan a wihi uskeel kaldach on. 20Eti tuummane suujoon yeelo, banayhi runti Waakh a ꞌdiiꞌda, toro la banay goya ma soogelo. Iꞌdi tahe usuhi uskeeli us yeelo laargo ma ꞌdoono. 21Iꞌdaasenyi eti tuummane wihi rummaat yeelo banay goya soogela, ꞌdee banay la saggi wihi us yeele wihi Waakh ꞌdoono iyahiin tusaan.”

Yoohanahi Enenyet Baattissiyo eti Yeesso yahe cheeka

22ꞌDaꞌddaboka, Yeesso abattitiis khabaayi boroofenhi Yaꞌhuudiya ankiiskoo irte, geeddoor leefiddiye, toro la enenyet laka baattissiye. 23Yoohana laka iloo Aynoone layadeehe ilkerengeetti Saalim haggee, iche ꞌdooꞌd kabaattissiya. Iꞌdi tahe bicchehi buurenye intaas kajira. ꞌDooꞌd la geeddi nool usu iirta, ulla baattissiya. 24Waha la a geeddi Yoohana jeela liigelin.

25Abatti Yoohanatoo ichoow etoo Yaꞌhuude ba yeedoo daawti saggi isliidikho biꞌdir islabahcho miinsan isleeiriireen. 26Yoohana iyimaateene, wihi icho iyidaaheen, “Eti weenoow, eti goorat hawti Yoordane ꞌdusso ꞌdirihiche ka kileejire, at woriis kayeyyeedde kalla. Yey, enenyet tuumman la usu iirta, ulla baattissiya.”

27Yoohana waha ka wihi us ilaabe, “Wihi Waakh soomure on menye, walah eti iꞌdee kayateeh mele. 28Atin tuumman a cheektaane, wihi goorat an idah a mehe ya, ‘An Ki Lasubhe mee, iꞌdaasenyi a eti Waakh ortiis sooerge.’ 29Mindischo ka, eti min disti iche iname makhaabassiis tahe. Aali eti min disti la, chirra us hooyi eti min disti daago, iche hamaada. Annaka jeentetaase weyti ihamaada. 30Usu gon magah ꞌdiriheey ꞌhela, anna magah waaya.”

Eti goobi Waakh kayamiit weyti weenyahe

31“Weeli Waakhe goobi Waakhe saraat kayamiit, usu ꞌdooꞌd tuumman kaween. Ani a ki harratane, wihi harratane kayeyyeeda. Ki goobi Waakh kayamiit la, usú ꞌdooꞌd tuumman kaween. 32Us wihi us arge ichoow wihi us daage ꞌdooꞌd icheeka, iꞌdaasenyi et wihi us cheeke rummeesti mele. 33Chiꞌ etoo yeediis kakhuufe, etaas saggi wihi Waakh yidah rum iyahiin, iche tusa. 34A mehe eti Waakh sooerge farniinki Waakhe kaayyeeda. Iꞌdi tahe Waakh etaas Rubeytiisti Munyee iche buuh ka rubeytiis goya gessa. 35Aabbaheen weeliis a ꞌdoona, walah tuumman la dahantiissa gesse. 36Eti tuummane Weeli Waakh rummeeste, jiroti jirtuu imassan a khaba. Iꞌdaasenyi eti tuummane Weeli Waakh ꞌdiiꞌdo jiro ma khabo. A mehe holi Waakh usu a fuula.”

Currently Selected:

Yoohana 3: rel

Highlight

Copy