Luuka 19
19
Yeesso goobi etoo kooddi goocho Sakkaayo layadeeh irta
1Yeesso ilkerengeetti Yeeriko eleele, dah kagooche. 2Etoo Sakkaayo layadeeh laka intaas a kijira. Ulla ꞌdooꞌdi kooddi goocho iweenyahe, toro la kamure eheet. 3Ulla usuhi Yeesso argo ꞌdoona. Iꞌdaasenyi sag us Yeesso iargo mele iꞌdi tahe us weyti konkoommanyahe, urur la weyti buur eheneet. 4ꞌDeerka ꞌdooꞌd ortiis nyaame, geeyoo deer kore, Yeesso argin ꞌdoonaa. Yeesso la intaase leeyamiit.
5Chirri Yeesso geey isoodowwaate ka, serey yeye wihi us yidah, “Sakkaayo, toolla kofche sooyeg. Iꞌdi tahe wihi massan, an maalinka minkaahha fiddiya.” 6Sakkaayo la chirraakka dowwa geey kasooyage, Yeesso hamaad ka khaate goobiis ka martiiste.
7ꞌDooꞌd dakkhan la chirri us waha arge ka, nyunnyuwe wihi us yidah, “Eta goobi eti uskeel lehe irta.”
8Iꞌdaasenyi Sakkaayo tolossate wihi us Kamur iyidah, “Kamur, yey! Wihi an khabo tuumman seleye goocha nyuusicho miskiin siicha. Chirri goorat an etoo ekkeesde wohoo kakhaate la, wihi goorat an kakhaate kol affartichooda ilaaba.”
9Yeesso la wihi us Sakkaayo ilaabe, “Gooba maalinka Waakh a ribe. Iꞌdi tahe eta laka rumanka a hiiy Aburaaham. 10A mehe Ínam Aadam a yimiyye ꞌdooꞌdi baabe yowta, riba.”
Mammahti ilbooyyeti tomone
(Mattaayo 25:14-30)
11Geeddi ꞌdooꞌd waha dagansati, Yeesso toro orey isohte, mammahtoo ꞌdooꞌd icheeke. A mehe us kola ilkerengeetti weene Yeerusaleem a isoodowwaate. ꞌDooꞌd la kol dakhi Waakh dowwanoha ka yamiite koogyahe. 12Wihi us yidah, “Etoo gooboo magah khabo iloo fogaate irte, ꞌdee antohi us ilaas kadakhti ꞌhela toro soonokhta. 13ꞌDeerka bowꞌdayyohiiskoo tomone wahe, hiinaan tomon chilimme#19:13 Geeddi Yeesso harrata kijire ka, hiinaankoo chilimme a gunnaanki eti orrah kudoo hil haaggiche laguto. dahan gesse. Hiinaan ba chilim kudoo ꞌdahabe kijira. Wihi us iyidah, ‘Ebba hiinaankiis a kabacchaarti ichoowka a soonokhdi.’
14“Iꞌdaasenyi ꞌdooꞌdi ilaas weyti eta ꞌdiiꞌde. Inkoo us irte ka ꞌdooꞌdoo ergeene, ‘Eta usuhi karnateenyo lakayeelo ma ꞌdoonno’ yidaaheen.
15“Iꞌdaasenyi karnat lakayeele, saahka soonokhte. Maanti us yimiy ka bowꞌdayyohiis wahe. Ulla wihi icho hiinaanneti us idiibe kaꞌheleen, iche aban ꞌdoona.
16“Ki oraat yimiyye wihi us yidah, ‘Eti ween, hiinaanki at isiisse, hiinaan tomon addane dele.’
17“Kamuriis la wihi us ilaabe, ‘At weyti haaggisse! At rumanka a bowꞌdati haaggan! At wihi rucchule dahan lakigesse ka laka a lakakhuufa gone, ilkerengeet tomone anatta.’
18“Ki lammaatteet laka yimiyye wihi us yidah, ‘Eti ween hiinaanki at isiisse, hiinaan chan addane dele.’
19“Kamuriis wihi us ilaabe, ‘At a haaggisse gone ilkerengeet chane anatta.’
20“Bowꞌdatoo addan la timiyye wihi iche tidah, ‘Eti ween hiinaanki at isoodiibte kalla. An a khaate dafartoo kahide dagche. 21An weyti kaaroora, a mehe at a eti weyti uur daayan. Ati wihi wahaah ieheynane khaatatta, gosi at ikhutin ka la golol yowatta.’
22“Kamuriche wihi us ilaabe, ‘At a bowꞌdati suuje, an yeedaahha on kaahukkuma! At saggi an uur idaayanahe an wihi weheey ieheynan ikhaaddi toro gosi an ikhutin ka gurnaan iyowdi a garatta menya? 23A iꞌdoh ꞌdeerka hiinaankeey baangi igelinne ꞌdee maanti an soonokhde ichehi desse isookhaatin?’
24“ꞌDooꞌdi intaas toollo wihi us iyidah, ‘Hiinaankiis kakhaata, ilbooyi hiinaan tomon khabo siicha.’
25“ꞌDooꞌd la wihi us yidah, ‘Eti ween, us hiinaan tomone orey laka khaba!’
26“Ulla wihi us ilaabe, ‘Wihi an atin icheeko, eti tuummane wihi dahan lagesse mujjum woywoye a liikakhaya, iꞌdaasenyi eti wihi dahan lagesse mujjum iwoywoyin, wihi us khabo laka a lakakhaata. 27Iꞌdaasenyi chiiyteeyti goorat anihi karnat liikayeelo ꞌdiiꞌddo tuumman sookhaata orteey ka bakkicha.’ ”
Yeesso ilkerengeetti weene Yeerusaleem hamaad ka gela
(Mattaayo 21:1-11, Marko 11:1-11, Yoohana 12:12-19)
28Inkoo Yeesso waha yidah ka orey isohte ilkerengeetti weene Yeerusaleem ikore. 29Chirra us ilkerengeetti Beꞌdifaage ichoow ti Beꞌdaaniya Hali Geeyohi Oolif haggee sooeleele ka, Yeesso abattitiistoo lammee orey ierge, wihi us iyidah, 30“Ilkerengeetti ortiin kijirto irda, uus atin gessaan la inkuraarruhoo injire liirarine hidan a ꞌhessaan. Soofura inta keena. 31Chirri etoo ‘A iꞌdoh inkuraarru ifurtaan,’ atin worsate la, ‘Kamure ꞌdoona,’ idaha.”
32Abattiti kootte leergate iratte, saggi kootte us iidah on iꞌhesse. 33Geedda icho inkuraarru furaan, ꞌdooꞌdi inkuraarru leh, “Inkuraarruhaas atin furtaan a iꞌdoh?” worsate.
34Wihi icho ilaabeen, “Kamure ꞌdoona.”
35Inkuraarru Yeesso ikeeneene, kabuuꞌddeticho kagaadeene Yeesso korcheen. 36Geedda us sohti, kabuuꞌddeticho jit kagolgeen.
37Chirri us inti jit Hali Geeyohi Oolif kakhubti sooeleele ka, ururi buurenye abattitiis kajirto hooyi buure ka ichoow hamaadi buure ka Waakh saaꞌde. Wihi ittaawenye weeli enenyet yeelin iubaaꞌdane icho argeen ka Waakh saaꞌdeen.
38“Waakh karnati magahi Kamur kayamiit a imaale!#19:38 Sabuur 118:26.
Goobi Waakh nebey a lakakaala, Waakkheenki inti weyti saraat kijiro a lakoolicho.”
39Farissaayotoo urur goya kajirte wihi iche Yeesso itidah, “Eti ween, abattitaah leejaakh!” 40Wihi us ilaabe, “Wihi an atin icheeko, chirri icho gammadicheen, dagahe a riirta.”
Yeesso ilkerengeetti weene Yeerusaleem inaha
41Chirri us ilkerengeetti weene Yeerusaleem isoodowwaate ilkerengeet arge ka, kooye, 42wihi us yidah, “ꞌDooꞌdi ilkerengeetti weene Yeerusaleem, incheenka kootte maalinka jiti nebey lakaꞌhelo a abattaan. Iꞌdaasenyi toolla a atin lakadagche! 43Ibeenne a tamiit ti chiiytiin ilkerengeettiin khaarisso. Chiiytiin harra chalagta ꞌdee saggoo iche atin idihto ꞌhossa. Iche la ꞌdollo tuummane atin kayaakhissa. 44Chiiye la atin ichoow nyaakhutiin dakkhamba a atin bakkissa, toro la dagahti ilkerengeet kamarsan tuumman jejjebissa. Daakkoo kaldaye meessiis fuulo laka ma katabto. Iꞌdi tahe atin maanti Waakh ribnaan atin yimiy ma kasin!”
Yeesso ꞌdooꞌdi minki Waakhe buure goya kabacchaarti riha
(Mattaayo 21:12-17, Marko 11:15-19)
45Yeesso ꞌdeerka uranti minki Waakhe buure gele, ꞌdooꞌdi walah ororicho rihnaan sookhabte. 46Wihi us icho iyidah, “Wihi chiiran, ‘Minkeey minki weysiite yateeh,’#19:46 Isaaya 56:7. iꞌdaasenyi, ‘inti ꞌdooꞌdi hatto leh kadagti,’ iche kayeesseen.”#19:46 Yeeremiya 7:11.
47Yeesso kol dakkhan minki Waakhe buure ka ꞌdooꞌde ayti Waakh abcha. Iꞌdaasenyi kuhaaniyyohi wewween ichoow tagaammeti amurre ichoow weynaane ba usu ogoos ꞌdoonta. 48Iꞌdaasenyi sag icho iyagiisin mele. Iꞌdi tahe ꞌdooꞌd tuumman weyti yeed Yeesso nabah isude. Et usuhi aytoo kaldaye Yeesso yidah laka kanyaanto ꞌdoono mele.
Currently Selected:
Luuka 19: rel
Highlight
Share
Copy
Want to have your highlights saved across all your devices? Sign up or sign in
© 2018, Wycliffe Bible Translators, Inc. All rights reserved.
