Luuka 21

Sadakhati aranti muunkhee bihisse

(Marko 12:41-44)

1Chirra Yeesso minki Waakhe buure ka serey yeyo, ꞌdooꞌdi kamurreenye sadakhaticho saanduukhi chilimme lakalugꞌdo kichibo arge. 2Toro la makhaabassoo muunkheenye miskiinenye chilim lamma meel kaluguꞌdde arge. 3Ulla wihi us yidah, “Rume atin icheeka, muunkhota miskiine iche ꞌdooꞌdi addan ꞌdirihiis wihi buure meel kaluguꞌdde. 4ꞌDooꞌda tuumman kamurroonkicho ka sadakhatoore bahche, iꞌdaasenyi iche, miskiinkiche ka wihi iche kanoossahe tuummane bihisse.”

Yeesso saggi minki Waakhe buure liisuujaacho cheeka

(Mattaayo 24:1-2, Marko 13:1-2)

5Abattitiis gaasoo minki Waakhe buurenye woriis kahawwoossa. Daddaabohi hahhaaggane lakadise ichoow wihi noole ꞌdooꞌd Waakh ibahche minkaas lakeeykode woricho kaayyeedeen. Iꞌdaasenyi Yeesso wihi us yidah, 6“Waha atin inta ka agartaan la, berri daddaabtoo kaldaye ti addan fuusso lakatabo ma jirto, icho tuumman a lasookhuba.”

Sina ichoow ogoossi enenyet labakkicho

(Mattaayo 24:3-14, Marko 13:3-13)

7Icho la wihi icho worsateen, “Eti ween, wahanyeyyoha maantoh yateehiin? Mehe yateehe ꞌdee saggi waha dowwanoha ka isooyateehiin tusa?”

8Wihi us ilaabe, “Yuubsada, uus atin leekkeysan. A mehe ꞌdooꞌdi ittaawenye ani iskaayyeelo yamiite, ‘Ani a Ki Lasubhe,’ essi toro ‘Ibeen a soodowwaate,’ essi a agartaan. Icho araahina. 9Maanti atin yaafohi isdiho ichoow ꞌdooꞌdi il baabiicho daagteen anahina. Wahanyeyyohane koloo yateehe, iꞌdaasenyi ibeenki yomboot chirraas on ma yateeh.”

10Yeesso toro wihi us icho iyidah, “Sirgaalle a isdihta, karnato laka isdihaan. 11Ilassoo ka harra weyti sesseehta, ilassoo ka laka nabhayye ichoow sugeerreti ittaawe tamiit. Wahanyeyyohi buurenye enenyet kanahcho ichoow wahanyeyyohi miigti Waakh tuso serey ka a soobahaan.

12“Iꞌdaasenyi geeddi waha tuumman iitaahan a atin khabtaane, sina atin omhichaan. Minassi weysiite Yaꞌhuud ka atin lahukkuma toro jeelayyo atin lageecha. Karnatte ichoow gaafanayyo atin liigeecha, waha tuumman la a jeenteti atin abattiteey itahiin. 13Waha ka la garti Wori Haaggan iche tateehiin. 14Iꞌdaasenyi uurassiin goyaka goocha, orey on saggi atin isikaayyeeddaan ka awaꞌdwaaꞌdina. 15A mehe an yeedi atin tadeehiin ichoow khara a atin siicha, ꞌdee chiiytiin tuumman goyaka koo atin tirrimin yabuuꞌd mele ommos et runti atin cheekteen ꞌdiiꞌdo mele. 16ꞌDooꞌdi atin dele ichoow walaalinyetiin ichoow goobiin ichoow aalassiin laka ꞌdube atin goochaane, gaasiinkoo laka yagiisiin. 17Enenyet tuumman a atin ꞌdiiꞌda jeenteti atin abattiteey itahiin u. 18Iꞌdaasenyi tintiintoo kaldaye matahe baabaato laka ma jirto. 19Inkoo atin garrahsatteen ka jiroti rummaat ꞌhessaan.”

Yeesso saggi ilkerengeetti weene Yeerusaleem liibaabiicho orey on cheeka

(Mattaayo 24:15-21, Marko 13:14-19)

20“Chirri atin ilkerengeetti weene Yeerusaleeme iskare marisse agarteen la, saggi ilkerengeettaas inkoo dow liibaabiicho a abattaan. 21ꞌDeerka ꞌdooꞌdi ili Yaꞌhuudiya fiddiyo tuumman halal a ifirdo, ꞌdooꞌdi ilkerengeetti ween goya kajiro a baho, ꞌdooꞌdi ilkerengeetti ween khariche kajiro la uus ilkerengeet goya gelin. 22Iꞌdi tahe wahaas a ibeenneti Waakh enenyet jeenteti uskeeli us yeeluu sina tuso, wihi goorat Chiirnaanneti Waakh kachiiran labuuhicho. 23Ibeennetaas sinati deyyehoti nuugsatti ichoow ti huleesenye nyaamitto iubaaꞌdan sugto enenna a buure. Wihi sussuujenye buurenye soobaha, holi Waakh la ꞌdooꞌda isoobaha. 24ꞌDooꞌd gaasoo birlabbe lakabakkicha, gaasoo laka lakhabta harra tuumman liibooliya. Ilkerengeetti weene Yeerusaleem la ꞌdooꞌdi Waakh igaran yabta, uskulaacha ichoowka ibeenneti ꞌdooꞌdi Waakh igaran labuuhicha.

Wihi maanti Ínam Aadam soonokhti yateeh

(Mattaayo 24:29-31, Marko 13:24-27)

25“Orrah ichoow yeyyah ichoow yiyyihimo ba wihi ittaawenye saggi ibeenki ꞌdaꞌddaboot iyitah tuso kasoobahaan. Harra ka, ꞌdooꞌdi harra tuumman bicchehi yeedo ichoow irti biccheete kanaha. 26ꞌDooꞌd la wihi harrata isoosohti icho roorro ka sugaan ka a suuha. A mehe miigti saraat a lakorkokicha. 27Geeddaakka Ínam Aadam usuhi miris goyaka yamiite, miig ichoow antohi buure khabo argaan. 28Maanti wahanyeyyoha yateehiin tolossada, matahenyetiin kahcha, iꞌdi tahe ibeenki Waakh ribnaanki ꞌdaꞌddaboot atin ribo a soodowwaatee.”

Wihi geeyi fiig inno abcho

(Mattaayo 24:32-35, Marko 13:28-31)

29ꞌDooꞌd mammahta ibahche, “Bal geeyi fiig ichoow geeyohi addan yeya. 30Maanti icho seeb bahcheen, a isiagartaane, saggi ꞌdaato isoodowwaatte a garattaan. 31Saggaas on u maanti atin wahanyeyyoha ibeenki ꞌdaꞌddaboot tuso agarteen, saggi dakhi Waakh isoodowwaate a garattaan.

32“Rume atin icheeka, ꞌdooꞌdi iꞌdee ma tuumo ichoowka wahanyeyyoha tuumman yateehiin. 33Sereyta daayan ichoow harra a kutaane, iꞌdaasenyi yeedasseey jirtuu tuumman ma kutaan.

Ibeenki yomboot doglaane enenyet soogela

34“Weyti isyuubsada uus meleefu ichoow wahanyeyyohi sussuujenye ꞌdooꞌdi meleefee yeelo ichoow waꞌdwaaꞌdi jirota uurassiin miigoonne ꞌdee ibeenkaas iꞌdi angey u doglaan atin geline. 35Iꞌdi tahe ibeenkaas ꞌdooꞌdi harra tuumman maalinkoo kalday on isleearga. 36Kol dakkhan isyaakhicha. Weesda la ꞌdee Waakh waha tuummane dowwanoha ka sooyateeh a atin kakhaduudicho, miigti atin Ínam Aadam ortiis katolossattaan a atin siicho.”

37Yeesso maalim dakkhan minki Waakhe buure ka ꞌdooꞌd wori Waakh abche, geleb dakkhan la irte Hali Geeyohi Oolif barye. 38Chirdeer tuumman la ꞌdooꞌd minki Waakhe buurenye irta, wihi Yeesso essi dagansata.

Currently Selected:

Luuka 21: rel

Highlight

Copy