Luuka 24

Yeesso rubeye isoonokhatta omoot ka sookaha

(Mattaayo 28:1-10, Marko 16:1-8, Yoohana 20:1-10)

1Baryoti ibeenki oraate teebataas ka, deyyeho uyuuggeti iche haaggisse khaatte goꞌddi Yeesso lakahawwaale iratte. 2Daddaabti goꞌd afiche lagesse ichehi laꞌdembeleeliye ꞌheleen. 3Iꞌdaasenyi chiꞌicho goꞌd goya geleen ka, sar Yeessohi Kamure goya kawaayeen. 4Waha ka ngꞌaayaani chirraas on et lamma darfohi iꞌdi ankhad u ababo khabto garabicho tolossateen. 5Deyyeho nahtim ka foolassicho ka il yeyte. Iꞌdaasenyi reeri kootte lammee wihi us iyidah, “A iꞌdoh eti jiro ꞌdooꞌdi tuume goya ikayowattaan? 6Inta ma kijiro, omoot a kasookahe. Wihi goorat maanti us Gaalilaaya kajiro us atin iidah kasooꞌhela. 7‘Wihi massan Ínam Aadam dahanohi ꞌdooꞌdi uskeel lehe lagessa, massalaaba lakakaaha, ibeenki seyyahnaatteet ka omoot lakasookahcha.’ ” 8Deyyeho ꞌdeerka yeediis kasooꞌhesse.

9Inkoo icho goꞌd kasoonokhteen ka, waha tuumman abattiti tomon ichoow koowe ichoow ꞌdooꞌdi addan tuumman ba icheekte. 10Deyyehoti waha ergaano icheekte la a Maariyati ilkerengeetti Magdaala ichoow Yoowana ichoow Maariyati abar Yaakoobee ichoow deyyehoti addane leejirte. 11Iꞌdaasenyi abatti deyyeho rummeysawwaayte, a mehe icho ka yeedi liidowo a wihi ilmarhaatteet on. 12Iꞌdaasenyi Beetero kahe anki goꞌddi Yeesso lakahawwaale inyaame. Goꞌd kagulguubsate, goya yeye, darfohi goorat Yeesso lakaayyuube kalday hawwaal goya kaarge. Ulla usuhi wihi yitah kagirmeesti irte.

Yeesso ergaanoti lammee isoobaha

(Marko 16:12-13)

13Maalinkaas goya abatti Yeessotoo lammee ilkerengeetti weene Yeerusaleem kabahte, ilkerengeettoo rucchule Emaawus layadeehe geeddi kiilomitta tomon ichoow koow jirto, iche isohatta. 14Geedda icho ꞌdulaaan, wori wihi yitahye kahawwoochaan. 15Geedda icho hawwoochaan, Yeesso rubeytiis garabicho gele, leesohte. 16Iꞌdaasenyi Waakh icho indo a hide, eti us yahe ma kasin.

17Yeesso wihi us icho worsate, “Atin geedda atin ꞌdussaan mehe kahawwoossaan?”

Icho la tolossateene fool ribowe. 18Kichokoo Kiiliyooba layadeeh wihi us worsate, “Ati kaldaye marteenye ilkerengeetti weene Yeerusaleem ka wihi ibeenneta kutte yitah igaran?”

19Wihi us worsate “Mehe yitah?”

Wihi icho ilaabeen, “Wihi Yeessohi Naasaret layeele. Us eti Waákh íyeyyeedo eheet. Yeediis ichoow wahanyeyyohi us Waakh ichoow enenyet tuumman ortiis ka yeele miige khabeen. 20Kuhaaniyyohi wewween ichoow ewweenkeen ba dahanohi ꞌdooꞌdi omoot igoocho gesseene, icho la usu massalaaba kakaaheen. 21Iꞌdaasenyi nah usuhi ꞌdooꞌdi Issiraayel dowwanoha ka soofuro khajjeelle. Wihi addan la, uus waha tuumman yitaaheen, waha toolla a ibeenki seyyahnaatteet. 22Deyyehotoo nah leejirto la maanta nah eyngꞌassaasse, kootte baryo on inti goorat eta lakahawwaale iratte. 23Iꞌdaasenyi hawwaassi marahe sare goya ikajirin iirteen. Yimaateene saggi icho herti Waakh iargeen nah isoocheekeen. Herta la saggi eta ijiro nah isoocheekte. 24Chirraakka wahalheenyokoo hawwaal irteene icho laka wihi kootte deyyeho tidah on argeene, iꞌdaasenyi eti goorat yumuy ma argin.”

25Yeesso la wihi us iyidah, “Atin eenna a ꞌdalamme, toro eenna kakhuufnaanki atin wihi tuummane ꞌdooꞌdi goorat Waákh íyeyyeedo cheeke kakhuuftaan ka uurassiin a gaꞌdaale! 26Wihi massane ꞌdooꞌdaas Waákh íyeyyeedo cheeke, Ki Lasubhe sinayyoha tuummane ꞌhela ꞌdee inti weyti us kaababo irta menya?” 27Yeesso la wihi goorat usu miinsane Chiirnaanneti Waakh goya kachiiran ibabbakkaahiche. Uus buuggag Muusa lakasookhabti ichoowka buuggassi ꞌdooꞌdi Waákh íyeyyeedo chiireen tuumman icheeke.

28Chirri icho goobi kootte icho isohtaan sooeleeleen ka, Yeesso etoo orey isohti iskayeele. 29Iꞌdaasenyi soojeycheene wihi icho iyidaaheen, “Kaale a isleebariino orrahe kola a dihtee.” Ulla ꞌdeerka irte icho leefiddiye.

30Chirra us komborti ballaaddane lakagolossati ka meessiis koorronte ka, makaate khaate Waakh kalaꞌd ilaabe, jejjebche, icho gisin sookhabte. 31Chirraakka reera indo lafure saggi eta Yeesso iyahe abteen. Toro chirraas on argiwwaayeen. 32Wihi icho isworsateen, “Eta chirri kootte us jit ka inno leeyyeedo us Chiirnaanneti Waakh wihi kachiiran us inno isoobabbakkaahicho, rubeyoheen atte ka iꞌdi wohoo ꞌdab kabolkho menya?”

33Chirraas on kaheene, anki ilkerengeetti weene Yeerusaleem inokhteen. Intaas ka abattiti tomon ichoow koowe ichoow ꞌdooꞌdi addane icho leejiro kulme ꞌheleene, 34wihi icho iyidaaheen, “Kamur rumanka omoot ka a sookahe! Ulla Siimon a isoobahe!” 35ꞌDooꞌdi kootte lammee laka wihi kootte geeddi icho jit kaꞌdulaan yitah cheeke. Toro la saggi icho chirri Yeesso makaate jebche eti u yahe iabteen ꞌdooꞌd icheekeen.

Yeesso abattitiis isoobaha

(Mattaayo 28:16-20, Marko 16:14-18, Yoohana 20:19-23, Hilassi Ergaano 1:6-8)

36Geeddi ꞌdooꞌda kootte lammee ꞌdooꞌdi addan wor siicho, Kamur goycho tolossate, wihi us iyidah, “Nebeytiin ma furatti.”

37Icho dakkhamba naheen kol icho meleyka argeene koogyihiine. 38Ulla wihi us iyidah, “A iꞌdoh mal atin igele? A iꞌdoh geeyoha dakkhane atin ikamalin idowattaan? 39Bal dahanoheey ichoow luhloheey yeya, a ani rubeytaaya. Iꞌdaara ꞌdee mujjum eti an ahe kasa. Meleyka jid ichoow lafo ma khabto, saggi atin ani iagarteene an ikhabuu.”

40Inkoo us waha yidah ka, dahanohiis ichoow luhlohiis tuse. 41Jeenteti icho ihamaadaane toro igirmeestaan u, icho uliba saggi waha Yeesso iyahe ma rummeysanne, ulla wihi us worsate, “Wohoo golole a khabtaan?” 42Icho la bahaggoo lakarche idiibeen. 43Ulla khaate orcho ka yuhum.

44Ulla wihi us iyidah, “Waha dakkhan a wihi maanti goorat an atin leejiro an atin icheeke, wihi tuummane ani imiinsane Chiirnaanneti Amurre ichoow ti ꞌdooꞌdi Waákh íyeyyeedo ichoow ti buuggi Sabuur lakachiire a labuuhicha.”

45Ulla ꞌdeerka malicho fure ꞌdee wihi Chiirnaanneti Waakh goya kachiiran a abteen. 46Ulla wihi us iyidah, “Wihi chiiran a waha. Ki Lasubhe sina loomhicha, ibeenki seyyahnaatteet ka omoot kasookaha. 47Ilkerengeetti weene Yeerusaleeme lakasookhabta, antohiis ka wori uskeeli lakasoonokhti ichoow uskeeli Waakh enenyet ikakuto miinsan ꞌdooꞌdi harra tuumman liicheeka. 48Atin a garti wahanyeyyoha. 49Ani wihi goorat Aabbaheey atin iayyiche a atin isooerga. Iꞌdaasenyi koloo ilkerengeet goya akabahina ichoowka miigti serey katamiit a atin ogoogto.”

Yeesso goobi Waakh lageecha

(Marko 16:19-20, Hilassi Ergaano 1:9-11)

50Chirri us abatti khaate ilkerengeetti Beꞌdaaniya idowwaache ka, dahanohiis serey iooge, abatti iweeste. 51Abatti iweestaayi, abatti katabe goobi Waakh liikorche. 52Icho la usu wahteene, ichohi hamaadi buure khabo ilkerengeetti weene Yeerusaleem inokhteen. 53Kol dakkhan minki Waakhe buure fiddiyeene, Waakh saaꞌdeen.

Currently Selected:

Luuka 24: rel

Highlight

Copy