Mattaayo 16
16
Farissaayo ichoow Sadukaayo girmohoo walah lakaabti maranta
(Marko 8:11-13, Luuka 12:54-56)
1Farissaayotoo ichoow Sadukaayotoo Yeesso itimiy usu angey gelin ꞌdoontaa. ꞌDeerka wohoo goobi Waakh kayimiyye miigti Waakh tuso daahte.
2Yeesso wihi us ilaabe, “Chirra il gelebnowo, sereye la guꞌduuꞌdantahe, ‘Saahta hir ma ꞌdeyo,’ tadeehiin. 3Chirdeer la, chirri sereye guꞌduuꞌdantahe toro il sooankubsame, ‘Hiri hafari buure khabo a sooꞌdeya,’ tadeehiin! Atin serey a yeytaane, wihi ꞌdeeka sooyateeh kaabattaan. Iꞌdaasenyi saggi weyꞌda il ijiro a yeytaane toro la walah atin kaabattaan mele. 4ꞌDooꞌdi iꞌdeenye uskeel lehe waakkhassi addan wahti on wohoo miigti Waakh tuso yowta. Iꞌdaasenyi wihi goorat Waakh Yoona ka enenyet tuse on menye, walah addane lasiicho mele.” Yeesso ꞌdeerka icho katabe irte.
Yeesso abattitiis wihi Farissaayo ichoow Sadukaayo ꞌdooꞌd abisso katootoocha
(Marko 8:14-21)
5Inkoo abatti beyti Gaalilaaya aficheki ꞌdiri imaahte ka, saggi iche makaate idabte kasse. 6Yeesso la wihi us iyidah, “Yeedad Farissaayo ichoow yeedad Sadukaayo ki iꞌdi booddati makaate fuurissee yuubsada.”
7Icho la iskaleehawwoocheene wihi icho yidaaheen, “Jeenteti inno makaate isookhaatanne iꞌdaas iessa.”
8Yeesso la wihi iche kahawwoosso a garta, wihi us worsate, “Enenna iꞌdaaru marah on ikakhuuftaanee, a iꞌdoh goytiin ka makaatewaayyo ikayeyyeeddaan? 9Atin uliba walah ma abanna? Atin makaate chanti an mejeli alif chane kagoolliche ma kasooꞌhessaan a? Atin la enjel geeddoh bubbuuhto soolaabteen? 10Makaate teebati an mejeli elif affare kagoolliche la? Enjel geeddoh buuhto soolaabteen? 11A iꞌdoh saggi an wori golol atin ikaleeyyeedin iabanna? Iꞌdaasenyi isyaakhicha yeedad Farissaayo ichoow yeedad Sadukaayo ki iꞌdi booddati makaate fuurissee yuubsada.” 12ꞌDeerka abatti saggi us wori booddataas ikaayyeedine iꞌdaasenyi us wihi Farissaayo ichoow Sadukaayo ꞌdooꞌd abchaan yuubsada iessi abatte.
Waakh Beetero eti Yeesso yahe ibabbakkaahicha
(Marko 8:27-30, Luuka 9:18-21)
13Chirri Yeesso ili ilkerengeetti Kaaysareya Fiiliffi yimiy ka, wihi us abattitiis worsate, “ꞌDooꞌd Ínam Aadam a ayyo essa?”
14Wihi icho ilaabeen, “Gaasoo ati a Yoohanahi Enenyet Baattissiyo iche essa, gaasoo a Eliiya essa, gaasoo laka a Yeeremiya ommos ꞌdooꞌdi goorat Waákh íyeyyeedo a kichekoo iche essa.”
15“Iꞌdaasenyi atin la? An a ayyo tadeehiin?” worsate.
16Siimonhi Beetero layadeeh wihi us ilaabe, “At a Ki Lasubhe, a Weeli Waakkhi jirtuu tuumman jiro.”
17Yeesso wihi us ilaabe, “Siimon inam Yoohana, ati Waakh a kimaale. Iꞌdi tahe runtaas at cheekte ti weeli enenyet katimiy menye, iꞌdaasenyi Aabbaheeyki serey jiro iche kisoobabbakkaahiche. 18Wihi an kiadeeh la at a Beetero,#16:18 Beetero. Magaha a daddaab. iꞌdi minki daddaab sartiis lakadisuu, daddaabta sarcheeda urureey tuumman kadisa. Miigti omooteet la ma kahataatto. 19Fureyyohi dakhi goobi Waakh a kisiicha. Walahbaaw at harra ka hiddo, Waakh laka goobiis ka a hide. Wihi at harrata ka furto la, Waakh laka goobi Waakh ka a fure.”
20Yeesso ꞌdeerka abattitiis tootooche, uus iche saggi us Ki Lasubhe iyahe etoo kalday laka icheekine.
Yeesso sinati lakawaaricho ichoow omoottiis cheeka
(Marko 8:31-9:1, Luuka 9:22-27)
21Uuꞌ maalinkaas, Yeesso abattitiis saggi Waakh igooche us ilkerengeetti weene Yeerusaleeme iirti, ewweenki Yaꞌhuud ichoow kuhaaniyyohi wewween ichoow tagaammeti amurre dahanohicho ka sinati buure liituso, liiyagiise, ibeenki seyyahnaatteet ka omoot liikasookahcho ibabbakkaahiche.
22Beetero la Yeesso ꞌdol geeche leejaakhe, “Waakh meesseen bujiiy! Kamur waha koloo kalday laka ma kiyateehiin,” iyidah.
23Yeesso la urgiye wihi us Beetero iyidah, “Seytaankaane fooleey buj! At a daakki itarraantarricho, at wahanyeyyohi Waakh menye, iꞌdaasenyi wahanyeyyohi weeli enenyete kamalatta.”
24Yeesso ꞌdeerka wihi us abattitiis iyidah, “Chiꞌ etoo isooraahin ꞌdoono, awtiis a ꞌdiiꞌdo toro la massalaabatiis barbar a sookorsati a isooraaho. 25Eti tuummane jirotiis ribin ꞌdoono, jiroti rummaat a waaya. Iꞌdaasenyi eti tuummane jirotiis ani iwaayo, jirotiisti rummaat a ꞌhela. 26Etoo maanta, a chirri us wohoo ꞌhele, chirri us wihi harrata tuumman ꞌhele, jiroti awtiissa Waakh siiche la waaye? Ommos weeli enenyet maanta mehe diibin yabuuꞌde jirotiis kadooricha? 27Iꞌdi tahe Ínam Aadam dowwanoha ka herti Waakh khabaayi anto Aabbahiissa leeyamiite, ꞌdee ebba wihi us yeele ka sina ommos kalaꞌd laguta. 28Rume atin icheeka, gaasiinkoo maanta inta kijiro, omoot ma argo geeddi icho Ínam Aadamhi dakhiis khabaayi yamiit iargin.”
Currently Selected:
Mattaayo 16: rel
Highlight
Share
Copy
Want to have your highlights saved across all your devices? Sign up or sign in
© 2018, Wycliffe Bible Translators, Inc. All rights reserved.
