Mattaayo 19
19
Yeesso wori mindischoti seley labaho ꞌdooꞌd abcha
(Marko 10:1-12)
1Inkoo Yeesso yeedaas massiche ka, boroofenhi Gaalilaaya kakahe, anki beri ili Yaꞌhuude hawti Yoordane ꞌdusso ꞌdirihiise irte. 2Ururoo buure la raahe, ulla intaas ka ꞌdooꞌdi khakkhannan samaache.
3Farissaayotoo la timiy, Yeesso angey gelin ꞌdoontaa. Wihi iche worsatte, “Eti makhaabassiis walahbaaw us ꞌdoono ka tuum riho ichoow amurreteen a israahaan?”
4Yeesso wihi us ilaabe, “Atin saggi uumaccho ka Waakkhi walah tuumman soouume ‘labo ichoow deyyeho isoouume’ ma soomin a?#19:4 Uumaccho 1:27 ichoow 5:2. 5Wihi chiiran, ‘Jeentetuu mejel aabbahiis ichoow abartiis a kataba, usu ichoow makhaabassiis la wohoo kalday yateehiine, lammacho ba sartoo kalday yateehiin.’#19:5 Uumaccho 2:24. 6ꞌDeerka kola et lamma menye, a sartoo kalday. Maantaka wihi Waakh isikeene uus weeli enenyet seley bihin.”
7Iche la wihi iche worsatte, “A iꞌdoh Muusa amurreti us inno siiche ka, ‘Eti makhaabassiis tuum riho khadaabi saggi us iriho tuso a siicho,’ iyidah?”#19:7 Deewutoronomi 24:1.
8Yeesso wihi us ilaabe, “Jeenteti matahmiigtiinna Muusa amuri atin oboorrihiin tuum karihtaan atin isiiche. Iꞌdaasenyi uumaccho ka iꞌda ma eheynan. 9Wihi an atin icheeko, eti tuummane makhaabassiis tuum rihe makhaabassoo addan diste, chiꞌiche mejeloo addan leeuꞌdurte on menye, makhaabalaas uskeeli us makhaabassi tiis ieheynan leeurꞌdo, iche gele.”
10Abatti wihi iche Yeesso itidah, “Chirri makhaabal jeenteti makhaabassiis etoo addan ileeuꞌdurto kalday on seley ibahaan, eti min idisan gon deefa.”
11Yeesso wihi us ilaabe, “Eti Waakh gargaaro on menye, enenyet tuumman mee yeeda raaho. 12Iꞌdi tahe ꞌdooꞌdoo usuhi sangꞌeenye ladele, gaasoo laka enenyete sangꞌa kayeele, gaasoo laka wihi icho minan kadisawwaayaan, a jeenteti icho dakhi goobi Waakh igelaane icho wihi Waakh ꞌdoono iyeelaan. Eti yeeda khaannaan yabuuꞌd a khaatti.”
Yeesso nyaakhuti rurrucchul iweesta
(Marko 10:13-16, Luuka 18:15-17)
13ꞌDeerka nyaakhuti rurrucchul Yeesso liikeene, ꞌdee ulla dahano korcha iweesta. Iꞌdaasenyi abatti ꞌdooꞌdi nyaakhut sookhaate leejaakhte.
14Yeesso la wihi us abatti iyidah, “Nyaakhuti rurrucchul ajeyinna ꞌdiicha ani a iyimaatee, a mehe dakhi goobi Waakh a ki ꞌdooꞌdi iꞌdee.” 15Inkoo us dahanohiis korche iweeste ka, intaas katabe.
Eti nugule kamure ichoow dakhi Waakh
(Marko 10:17-21, Luuka 18:18-30)
16Etoo Yeesso iyimiyye wihi us worsate, “Eti ween mehe haaggane yeela ꞌdee jiroti jirtuu imassan ꞌhela?”
17Yeesso wihi us ilaabe, “A iꞌdoh wihi haaggan iworsatta? Waakh kalday on haaggan. Chirri at jiro ꞌhelin ꞌdoonto, amurreti Waakh raah.”
18Ulla, “Amurretoh?” worsate.
Yeesso wihi us ilaabe, “ ‘Weeli enenyet dubunuunu iigaasan, makhaabali kaah ieheynan ommos makhaabassi taah ieheynan aleeurꞌdin, hatto iiran, garti beenaat ayeedin, 19aabbahaah ichoow abartaah inkaanyit, ollokkaah geeddi at isꞌdoonto ꞌdoon.’ ”
20Et la wihi us yidah, “Wahaas tuumman koo an iraahin mala. Mehe uliba ikaankhan?”
21Yeesso wihi us ilaabe, “Chaꞌat tuum jiroti el ikhabin jirin ꞌdoonto, nyaame, wihi at khabto tuumman ororiche, chilimme miskiin siiche, ꞌdee kamurroonki goobi Waakh ꞌhele, ꞌdee kaale isooraah.”
22Etaas nugul chuꞌus waha daage ka, usuhi fool ribowe nokhte, a mehe hoolahi buurenye khabe.
23Yeesso ꞌdeerka wihi us abattitiis iyidah, “Rume atin icheeka, weyti ꞌhooltahe chiꞌ eti kamure dakhi goobi Waakh gelo. 24Toro wihi an atin iadeeh, naffi gaale issi irbi kakhaduutti weyti ꞌhooltahe. Eheet a, ꞌhoossi eti kamurenye dakhi Waakh gelo iche weyti kutta.”
25Chirri abatti waha daagte ka, weyti girmeysatte, “Ayyo ꞌdeerka lariba?” worsatte.
26Yeesso icho yeye, wihi us iyidah, “Weeli enenyet ka waha a wihi koloo kalday laka iitaahan. Iꞌdaasenyi Waakh ka walah tuumman a geeddi icho yateehiin.”
27Beetero wihi us ilaabe, “Nah weheenyo tuumman a kasootabne ꞌdee ati kiraahna. Waakh berri mehe nah siicha?”
28Yeesso la wihi us icho iyidah, “Rume atin icheeka, maanti Waakh walah tuumman husubnaacho, Ínam Aadam kombortiisti antoote ababto koorronti, atinhi isooraahteen laka komborohi antoote tomon ichoow lammeenye koorrommattaane, yaafoheenki Issiraayele tomon ichoow lammee anattaan. 29Eti tuummane minan ommos walaalinyetiis ommos albehi leedesse ommos aabbahiis ommos abartiis ommos nyaakhutiis ommos gosiis jeenteti us abattiteey iyahuu kasootabe la, kol kude wahaas us kasootabe ꞌdirihiis ꞌhela, toro la jiroti jirtuu imassan laka a ꞌhela. 30Iꞌdaasenyi ꞌdooꞌdi ittaawenye oraate ki ꞌduboot yateehe, ki ꞌduboot la ki oraat yateeh.”
Currently Selected:
Mattaayo 19: rel
Highlight
Share
Copy
Want to have your highlights saved across all your devices? Sign up or sign in
© 2018, Wycliffe Bible Translators, Inc. All rights reserved.
