LUCAS 19

Jesúz no Saqueu

1Bydzihñ Jesúz Jericó no güdedy gahc me glaꞌy ciuda. 2Uga nu to mpyquie ni le Saqueu; leeme nac xjefy meññ-rguquix mpuezd no ṟicü leeme. 3Ganâbladzy me güieꞌ me Jesúz lehdy gzaclo me dxu lee, per di raḻu leeme porni xtahl meññ ziaad no Jesúz, no porni ndop me zegahc. 4Ni ptzohdy me, güdedy-güxuunn me no bictzib me to lo yag-duug ñaz-ru tedy Jesúz lehdy güieꞌ me lee. 5Hor-bydzihñ Jesúz lgar-wé, bwieꞌ dziib me lo yahg, ra leeme:

―Saqueu, biahtiꞌ ngueeḻy gahc, porni xiryuꞌy‑e gydzihñaꞌ dzêrieꞌ.

6“Yo” ne Saqueu, biat-güxuunn me lo yahg, gaxihly me ziyno me Jesúz xiryuꞌ me. 7Ru bwieꞌ gyre meññ dxie Jesúz leññ xiryuꞌ Saqueu, guzlo galesyno yâmeu, ne yâme: “¡Lâ güieꞌ xnahc‑e dxie Jesúz leññ xiryuꞌ to meññ-guîlquie!” 8Were guzli Saqueu, ra me Jesúz:

―Lii ni rtzoo mdad, gdedyaꞌ glaꞌy gyre ni rapaꞌ ycaꞌ meññ-nehx rahp ni tedydzé. No bâḻ güluquixaꞌ dxuhch ma xtahl de ni nzahby me la, naa guidzguiataꞌ leeu, ctzon leeu tahp cuib.

9Were ra Jesúz leeme no zrieñ meññ-dxieno me lee:

―Niwé rdee diidz glohg ngâstoo, ba bylaa meññ-nu leññ yu-rieꞌ de lo guîlnadz ni ziaad. Porni mpyquie-rieꞌ, de lo gahc xfamily Braṉ‑e ziaad me. 10Naa, Mpyquie-Pshahl Dioz Lee, zidyobyaꞌ meññ ni rahc cuent ba bynihty par guislaan leeyâme de lo guîlnadz ni ziaad.

Ejempl xchieñ tzii medy-guiib

(Mt. 25:14-30)

11Lóhgni gayieññ meññ ganii Jesúz mod-wé, guzlo günino me leeyâme ndaagü lo diidz sto, porni ba bydziñgahsh me Jerusaléṉ, no porni nlâdzyx meññ nwieꞌ gahc yâme gyre mod-rtzoo Dioz mdad. 12Ra me leeyâme:

―Byruu to mpyquie de lahd gahc xfamily meññ-rahc ni rnii, za to guiedzy modni ziht, ziycaꞌ xguehtzy me lehdy dze-guibyguiat me gac me ṟeiy xguiedzy me. 13Antzy ni tza me we naꞌ, pshalcaꞌ me tzii xmós me par bdee me to gá medy-guiib ni modni rsahc, cuaꞌ yâme par ctzono yâmeu dziiñ xtâ glo guibyguiat me.

14’Per mpyquie-rieꞌ naꞌ, néladzy meññ-xguiedzy me leeme, no por lee we, hor-ba za me, pshahl gahc yâme zrieñ meññ zigyne mod-rieꞌ: “Nehx riuꞌdadzy noꞌ gac mpyquie-rieꞌ dṟeiy noꞌ.” 15Nîcze di ñuꞌladzy yâme, per guhc me ṟeiy. No luxu, gubyguiat gahc me xguiedzy me. Hor-ba bydzihñ me we naꞌ, pshalcaꞌ me to por to mos-bdee me medy lee, par gann me bla ptzoo cad to medy-guiib gan. 16Mpyquie-bydzihñ nier lee, ra me: “Señor, xmedyiꞌ ni bdeedyiꞌ naa ptzoou gan stzii cuib.” 17Ra me lee: “Mos ptzooy no mos-tziaawy lii; sca-ze ptzooy dziiñ mos no doozy ni bdedyaꞌ lii la, zdedyaꞌ lii tzii guiedzy par ctzooy mdad lee.” 18Bydzihñ sto me, ra leeme: “Señor, xmedyiꞌ ni bdeedyiꞌ naa ptzoou gan zgaay cuib.” 19Ra me lee zegahc: “Zdedyaꞌ lii gaay guiedzy par ctzooy mdad lee.” 20Per sto me bydzihñ, ra leeme: “Señor, xmedyiꞌ zidnon mdid-bdee gahquiꞌ naa. Gülutziawyaꞌ leeu leññ to bay. 21Bydziehbyaꞌ ntzonon dziiñ leeu, porni nannaꞌ rahpiꞌ to guîlmbañ-nahdy, rcaꞌy ni nehx gülahqyiꞌ, no rchuꞌy ni zrieñ dxu bdziib.” 22Were ra me lee: “Mos-dirquihñ lii. Mod-rnihzyiꞌ, rzacloꞌn dxu lii. Bâḻ nanniꞌ nahdy dguîlmbahñaꞌ, xtâ rcan ni nehx gülaqyaꞌ no rchun ru zrieñ dxu bdziib, 23¿bia nacu, pue, di nguꞌy dmedyaꞌ lo bancü, lehdy dze-nibyguiataꞌ diryuꞌn, ba ndeedyiꞌu naa no ni ba ptzoou gan?” 24Luxu, ra me meññ-zu yahc uga: “Lâ gboo medy-wé leeme, no lâ gdeeu ycaꞌ mpyquie-ptzoo leeu tzii cuib.” 25Were ra yâme leeme: “Señor, ¡per leeme ba rahp me stzii diaa cuibu!” 26Ra ṟeiy leeyâme: “Gapyaꞌ laꞌd, dxu rahp, scaꞌ mazy; per dxu nehx rahp, xtâ doozy ni rahp me zruuw leeme. 27No gyre meññ-rdziadzyno naa ni nehx biuꞌladzy ñahcaꞌ ṟeiy la, lâ guidno leeyâme neꞌ. Lâ igaꞌdy leeyâme ñaz-dloꞌn.”

Bydzihñ Jesúz Jerusaléṉ

(Mt. 21:1-11; Mr. 11:1-11; Jn. 12:12-19)

28Bylux günii Jesúz niwé, byruu me, za me Jerusaléṉ. 29No hor-bydzihñ me gahsh de chohp guiedzy ni le Betfagé no Betania, coo to dahñ ni le Oliv, ugaty ba pshahl me chohp de lo tzipychop xmeññ me, 30ra me lee:

―Lâ tza guiedzy-yaañ ni dxie ru tedy ziaꞌr nó, no hor-gydzihñ laꞌd, güieꞌ laꞌd nliiby to burr-yaañ ni ndruhty ziaꞌ dgueññ cuib lee. Lâ cshac leemaꞌ, no guidno laꞌd leemaꞌ. 31No bâḻ gyruu dxuhch ga laꞌd: “¿Bia nacu gashac laꞌd leemaꞌ?”, lâ ga leeme: “Señor‑e yquihñ leemaꞌ.”

32Were za chohp xmeññ me no bydzial yâme leemaꞌ, no guhcu mod-ra Jesúz leeyâme. 33Hor-gashac yâme leemaꞌ we naꞌ, byruu xbixwaan maꞌ, ra leeyâme:

―¿Bia nacu gashac laꞌd dburraꞌ?

34Ra yâme leeme:

―Porni Señor‑e yquihñ leemaꞌ.

35Were güiyno yâme leemaꞌ ru ziaad Jesúz, pshob shab yâme chehsh maꞌ, no luxu bdziib yâme Jesúz leemaꞌ. 36No guzlo gahc meññ gatzihly shab yâme lo ñahz ru tedy Jesúz. 37Hor-gadzihñ yâme gahsh gá ru riaht ñahz chehsh dañ-Oliv, gyre xmeññ me ni náḻ guzlo gaquee yâme riedz, porni modni gaxihly yâme, no gaguguia yâme Dioz por gyre xroꞌ cos ni gawieꞌ yâme gatzoo Jesúz, 38ne yâme:

―¡Nu laꞌy ṟeiy ni ziaad porni Dioz pshahl leeme! ¡Nu gybaa dzie tziaawy, no riuguia Dioz ni dziib guia!

39Lahd gahc yâme we naꞌ, ziaad chohp tzonn meññ-nac yahc fariseu, ra yâme Jesúz:

―Muextr, güdeḻy meññ ni ziaad gaquee yahc riedz.

40Ra Jesúz leeyâme:

―Gapyaꞌ laꞌd, bâḻ meññ-rieꞌ yahc guiandzie, guie yahc ni dxie neꞌ squee riedz.

41Hor-bydzihñ Jesúz gahsh gá de Jerusaléṉ, guzlo biin me por meññ-nu yahc uga, 42no ne me:

―¡Bâḻ ndee laꞌd cuent, nîcze dzêrieꞌ, bia nla xguiedzy laꞌd la, nruqueꞌ laꞌd mos‑e! Per laꞌd ba nehx zdee laꞌd cuent, porni ngannu par laꞌd. 43Zdzihñ dzé guiaad meññ ni néladzy laꞌd lee, cu-glawy yâme xguiedzy laꞌd no ctzoo csahc yâme laꞌd. 44Zgaꞌdy yâme laꞌd no zniꞌdy yâme xguiedzy laꞌd, no nehx ssaꞌn yâme ni to guie ni dziib chehsh saꞌ sinn di ctzily yâme leeu. Zahc gyre niwé, porni dze-biaḻaꞌ lahd laꞌd, nehx bdee laꞌd cuent bâḻ Dioz‑e biahd ru nut.

Güloo Jesúz meññ-dxie gatoꞌ yahc ruꞌ idoró

(Mt. 21:12-17; Mr. 11:15-19; Jn. 2:13-22)

45Ru ba bydzihñ yâme Jerusaléṉ, güyuꞌ Jesúz leññ idoró, no guzlo güloo me meññ ni gatoꞌ no meññ ni gazii, 46no ra me:

―Ganii lo Guehtzy ru queꞌ xtiidz Dioz neu: “Diryuꞌn, par gynino meññ naa we nacu”;#19:46 Is. 56:7 per laꞌd gatzoo laꞌdu beeiy to ru riungaꞌdzy meññ-gübaan.

47No gyre dzé galuu me meññ ruꞌ idoró; per xjefy yahc bahl, no gahc muextr ni ruuḻ yahc xleiy Moiséz, no zrieñ meññ-rahc ni rnii yahc lahd meññ-guiedzy, gayo yâme bia mód ctzoo yâme lehdy igaꞌdy yâme leeme. 48Per nehx rdzial yâme xnahc ctzoo yâme, porni gyre meññ zu yahc gaquee ihqy ni ganii me.

Currently Selected:

LUCAS 19: zpg

Highlight

Copy