Ghjuanni 8

1è Ghjesù si ni andeti in a muntagna di l'Alivetu#8,1 Veda Mc 11,1 2è po à l'alba vulteti in u tempiu è u populu sanu ghjunsi ind'è eddu. Eddu posaia è i struvia. 3È i scribi è i Farusei li portani una donna chjappa in l'adulteriu è a mettini à mezu à a ghjenti, 4è dicini à Ghjesù: «o Maestru, issa donna hè stata chjappa nantu à u fattu di l'adulteriu. 5In a Legi Musè ci hà cumandatu di tumbà i donni simuli à pitrati#8,5 Veda Lv 20,10; Dt 22,22-24 è a nota.. Tù chì dici?» 6A li diciani par metta lu à u provu, par avè una accusa da fà li. Ma Ghjesù, calatu, scrivia in tarra cù u ditu. 7È com'eddi insistiani è li faciani dumandi, s'arrizzeti è li dissi: «quiddu di voi chì ùn hà piccatu micca, ch'eddu li lampi una petra u prima!» 8È turratu si à calà, scrivia in tarra. 9Intesu lu, eddi iscitini unu dopu à l'altru, cumincendu da i più anziani; Ghjesù fù lacatu solu, cù a donna quandì dà à mezu. 10Ghjesù s'arrizzeti è li dissi: «o donna, induva sò tutti? Ùn ti hà cundannatu nimu?» 11Edda dissi: «nimu, o Signori.» Ghjesù dissi: «ebbè, mancu eiu ti cundannu. Vai ti ni, è à parta si ni da avà, ùn piccà più!»]

Ghjesù, luci di u mondu

12Ghjesù parleti dinò à a ghjenti è dissi: «eiu socu a luci di u mondu#8,12 Paragunà cù Is 49,6; Mt 5,14; Ghjv 9,5.. À chì mi suveta ùn viaghja in u bughju, chì avarà a luci di a vita.» 13Tandu i Farusei li dissini: «tù tistimunieghji par tè stessu. A to tistimunianza ùn vali.» 14Ghjesù risposi è li dissi: «ancu s'e' tistimunieghju par mè stessu, a me tistimunianza si vali, chì, da induv'e' socu vinutu è induv'e' vocu, a socu. 15Voi ghjudicheti sicondu a carri, eiu ùn ghjudicheghju à nimu. 16È ancu s'e' ghjudichessi, u me ghjudiziu si vali, parchì ùn socu solu, ci socu eiu è ci hè u Babbu chì mi mandeti. 17Ancu in la Legi, a vostra, hè scritta chì a tistimunianza di dui omini si vali#8,17 Veda Dt 19,15; paragunà cù Dt 17,6; Nm 35,30.. 18Eiu socu tistimoniu di mè stessu, è u Babbu chì mi mandeti tistimunieghja par mè.» 19Tandu eddi dissini: «è induva saria po Babbitu?» Ghjesù risposi: «ùn cunnisciti nè à mè nè à Babbu; sì vo' mi cunniscissiti, cunnisciariati ancu à Babbu.» 20Issi paroli, Ghjesù i dissi in lu locu di u Tisoru quand'eddu insignaia in u tempiu; è nimu l'arristeti, chì ùn era ancu ghjunta a so ora.

Induv'e' vocu ùn ci pudeti vena

21È li dissi dinò: «eiu mi ni vocu, mi eti da circà, è eti da mora in u vostru piccatu; induv'e' vocu eiu, voi ùn ci pudeti vena.» 22Tandu i Ghjudei diciani: «si avarà da tumbà, par dì: induv'e' vocu eiu voi ùn ci pudeti vena?» 23È eddu li dicia: voi seti d'in ghjò, eiu socu d'in sù; «voi seti d'issu mondu, eiu ùn socu d'issu mondu. 24Hè cusì ch'e' vi aghju dittu: eti da mora in i vostri piccati; chì sì voi ùn criditi chì Eiu socu, eti da mora in i vostri piccati#8,24 Paragunà Es 3,14-15..» 25Tandu eddi li diciani: «quali sè tù?» Ghjesù li dissi: «è chì vi dicu da u principiu? 26À puntu di voi altri, aghju una mansa di cosi da dì è da ghjudicà, ma quiddu chì mi mandeti hè veru, è i cosi ch'e'aghju intesu da eddu, i dicu à u mondu.» 27Ùn capitini ch'eddu li parlaia di u Babbu. 28Tandu Ghjesù (li) dissi: «quand'ì vo' inalzareti u Fiddolu di l'Omu#8,28 Paragunà cù 3,14., tandu sapareti ch'Eiu socu, è ch'e' ùn facciu nudda da par mè, ma parlu com'eddu mi hà insignatu u me Babbu. 29È quiddu chì mi hà mandatu hè cù mecu; mancu mi hà lacatu solu, parchì eiu facciu sempri ciò chì piaci ad eddu.» 30À sentalu dì cusì, parechji criditini in eddu.

A virità vi farà libari

31È Ghjesù dicia à i Ghjudei chì cridiani in eddu: «sì vo' steti in la me parola, seti da veru i me discipuli. 32È sapareti a virità, è a virità vi farà libari.» 33È quiddi rispunditini: «semu a razza d'Abraamu#8,33 Paragunà cù Mt 3,9; Lc 3,8 è ùn semu mai stati schiavi di nimu! Comu hè chì tù dici: sareti libari?» 34Ghjesù li risposi: a vi dicu da veru, à chì faci u piccatu hè schiavu di u piccatu. 35Ma u schiavu ùn stà in a casa par sempri, u fiddolu, inveci, ci stà par sempri. 36Cusì s'eddu vi faci libari u Fiddolu, tandu sì, sareti libari. 37A socu chì vo' seti di a razza d'Abraamu; ma circheti à tumbà mi, parchì a me parola in voi ùn ci hà locu. 38Eiu dicu ciò ch'e' aghju vistu ind'è u Babbu, è voi feti ciò chì vo' eti intesu ind'è u vostru babbu.

U vostru babbu hè u Diavuli

39Quiddi rispunditini è li dissini: «u nostru babbu hè Abraamu»; Ghjesù li dici: «sì vo' fussiti fiddoli d'Abraamu, fariati l'opari d'Abraamu#8,39 Paragunà cù Eb 11,8-19.. 40Ma avà vuleti tumbà à mè, un omu chì vi hà dittu a virità intesa da Diu; quissa Abraamu po ùn la feci! 41Voi feti l'opari di u vostru babbu»; tandu li dissini: «noi ùn semu micca nati da a prustituzioni! Ùn emu cà un babbu, Diu.» 42Ghjesù li dissi: «sì Diu fussi u vostru babbu, mi tinariati caru, chì eiu socu sciutu è vinutu da Diu; mancu socu ghjuntu da par mè, chì mi hà mandatu eddu. 43Comu hè chì vo' ùn capiti u me discorsu? Hè par via chì vo' ùn pudeti senta a me parola. 44Seti fiddoli di u vostru babbu, u Diavuli, è vuleti fà ciò chì piaci à u vostru babbu; quiddu fù un assassinu da u principiu, è ùn hè firmatu in la virità, chì virità in eddu ùn ci ni hè. Quandu eddu dici u falsu, dici sicondu a so natura, chì hè falsu, è babbu di u falsu. 45Ma à mè, parch'e' dicu a virità, ùn mi criditi. 46Quali di voi pò metta à palesu un piccatu di meiu? S'e' dicu u veru, parchì ùn mi criditi? 47À chì hè di Diu senti i paroli di Diu; Voi ùn li sintiti, chì ùn seti di Diu.»

Nanzi chì Abraamu fussi, Eiu socu

48I Ghjudei rispunditini è li dissini: «ùn dimu bè, chì tù sè un Samaritanu è chì tù ai un dimoniu?» 49Ghjesù risposi: «eiu dimoniu ùn ni aghju, ma unoru u me Babbu, è voi mi cacceti l'onori. 50Eiu ùn cercu a me gloria; ci hè quiddu chì a cerca è chì ghjudicheghja. 51A vi dicu da veru, à chì tinarà a me parola, ùn vidarà a morti mai.» 52[Tandu] i Ghjudei li dissini: «avà po a sapemu chì tù ai un dimoniu. Sò morti Abraamu è i Prufeta, è tù dici: à chì tinarà a me parola, ùn pruvarà a morti mai! 53Sarè po più altu cà u nostru babbu Abraamu, chì morsi? È ancu i Prufeta morsini. Tù par quali ti piddi?» 54Ghjesù risposi: «s'e' mi glurificheghju da par mè, a me gloria ùn hè nudda. Quiddu chì mi glurificheghja hè u me Babbu; hè d'eddu chì vo' diti: hè u nostru Diu, 55è voi ùn lu cunnisciti, ma eiu u cunnoscu! È s'e' dicissi di ùn cunnoscia lu, sariu com'è voi, un falsu; ma u cunnoscu è tengu a so parola. 56Abraamu u vostru babbu si ralicrò d'avè da veda u me ghjornu, u visti è si ni ralicrò.» 57Tandu i Ghjudei li dissini: «ùn ai ancu cinquanta anni, è ai vistu à Abraamu?» 58Ghjesù li dissi: «a vi dicu da veru, nanzi chì Abraamu fussi, Eiu socu#8,58 Veda 1,1-3..» 59Tandu piddetini i petri par lampà di li. Ma Ghjesù si piatteti è isciti da u tempiu.

Currently Selected:

Ghjuanni 8: 4EvCors

Highlight

Copy