Mbombo tsa Vapositili 19

ɄPaulo ilʉmbɨlɨla avaanu va kʉ Efeso

1ɄApoolo wʉ alɨ kʉ Kolinto, ʉPaulo aalʉtɨngʼiinie mu silʉnga isya nkyanya, kʉmbele, akatsikwika kʉ Efeso. Ʉnsɨkɨ alɨ palya, akaaganila na vakongi va Yɨɨsʉ vaninie. 2Akavavʉʉtsa akata, “Wʉ mumwɨdiike ʉYɨɨsʉ, ndeeti, mukamwʉpɨlye ʉMepo ʉMbalatse?” Vakaanda vakata, “Baako, nakʉ kʉpʉlɨka ʉkʉta kʉlɨ Mepo ʉMbalatse, natʉpʉliiki lʉsiku.” 3Akavavʉʉtsa ikange akata, “Lɨno, mwootsiiwe kʉ lwotso lʉki?” Vakaanda vakata, “Twootsiiwe ndʉwʉ ʉYohana ʉMwotsi aalagye.”

4Pwʉ ʉPaulo akavavʉʉla akata, “Ʉlwotso lwa Yohana lwale lwa kʉpela imbiivi. ɄYohana aavavʉʉlaga avaanu ʉkʉta vamwɨdɨke ʉvɨ alakonga kʉnsana kʉ mwene, ʉmwene ʉjwa vɨ Yɨɨsʉ.” 5Wʉ vapʉliike amamenyu ago, avaanu avo vakootsiwa mu litaawa lya Ntwa ʉYɨɨsʉ. 6Baaho ʉPaulo akavavɨɨkɨla isivoko, nʉ Mepo ʉMbalatse akaviikila, vakatengʉla ʉkʉtsova mu nzovele iimya, nʉ kʉpʉlɨsa ɨlimenyu lya Ngʉlʉve. 7Avaanu avo, vaale avagoosi ʉta kɨtsigo na vavɨlɨ (12).

8Kʉ myetsi gɨdatu, ʉPaulo iingilaga mu lisinagogi. Mu nsɨkɨ ʉgwa, aatsovaga nʉ kwandɨngʼana na vaanu kʉ maka pakʉta vɨɨdɨke ikulongwi tsa Lʉdeeva lwa Ngʉlʉve. 9Napeene, vaninie vakabeela ʉkwɨdɨka, vakatengʉla ʉkʉdʉkɨla imanyiiso tsa kulongwi tsa Nzɨla jya Ntwa ʉYɨɨsʉ pa pavʉlongolo pa lʉlʉndamano. Pwʉ ʉPaulo akavaleka, akavatoola avakongi va Yɨɨsʉ, akava itsova nʉ kwandɨngʼana navo isigono syoni mu nyumba jya kʉmanyiisihitsa ɨjyʉ jyale jya muunu ʉvɨ aatambʉlwagwa Tilani. 10ɄPaulo akagendelela ʉkʉvomba ewo kʉ myaka gɨvɨlɨ. Pwʉ avaanu vooni ʉwʉ vaataamaga mu kɨlʉnga kya Asiya, aVayahudi paninie na vatava Vayahudi, vakapʉlɨka ikulongwi tsa Ntwa ʉYɨɨsʉ.

Avaana va Sikewa vitowa nʉ muunu ʉnya mepo ɨmbiivi

11Ʉnsɨkɨ gʉʉgwa ʉgwa, ʉNgʉlʉve aavombaga isidego isivaha ʉkʉgendela mwa Paulo. 12Avaanu vaatoolaga nasi sitambala nɨ misabwa ɨgyaabaasiitse ʉmmana gwa Paulo. Valɨkʉhɨlɨka kʉ vatamu, na vatamu valɨkʉpona ʉvʉtamu wa veene, ikange imepo imbiivi tsilɨkʉhʉma mu veene.

13Vaalepwo aVayahudi vaninie ʉwʉ vaagendagendaga kʉnʉ na kʉnʉ, mu kʉswɨma imepo imbiivi mu vaanu. Valɨkʉgela ʉkʉvombela ɨlitaawa lya Ntwa ʉYɨɨsʉ pakʉta vaswɨme imepo imbiivi itso, valɨkʉta, “Mu litaawa lya Yɨɨsʉ ʉvɨ ʉPaulo ikʉndʉmbɨlɨla, ndikʉvavʉʉla ʉkʉta muhʉme mu muunu ʉjʉ!” 14Avange ʉwʉ vaavombaga ewo vaale vaana vadɨɨmi lekelakʉpamato (7) va muunu ʉvɨ aatambʉlwagwa Sikewa, mpamato mu vavaha va vateeketsi va Vayahudi. 15Lɨno ɨkɨgono kɨpamato ɨmepo ɨmbiivi jɨkaanda kʉ vaana avo jɨkata, “Ndɨmmanyile ʉYɨɨsʉ, ndɨmmanyile najyʉ Paulo, lɨno ʉnyie nyienye wʉ vaani?” 16Pwʉ ʉmuunu ʉvɨ aale nɨ mepo ɨmbiivi akavatsumbila avo, akavatola amaka. Akatengʉla ʉkʉvatova siitso, ʉkʉsikila ikʉvalematsa nʉ kʉpoka ɨmisabwa ɨgyʉ vaaswalile, vakava kɨmʼbwinda. Vakahʉma mu nyumba ɨjyo kʉnʉ vinyila.

17Ikulongwi itso tsikamanyikika siitso kʉ Vayahudi na kʉ vatava Vayahudi vooni ʉwʉ vaataamaga palya pa Efeso. Avaanu vooni lʉkaviibata ʉlʉdwado, valɨkʉginia ʉwɨɨmɨkiwa wa litaawa lya Ntwa ʉYɨɨsʉ. 18Avaanu vongosu ʉwʉ vaamwɨdiike ʉYɨɨsʉ vakalaata pavʉlongolo pa vaanu imbiivi tsa veene itsʉ vaavombile. 19Mu vaanu avo, vaalepwo vongosu ʉwʉ vaavombaga isidego sya vʉhavi. Vakaleeta isitabu sya veene isyʉ vaavombelaga isidego, vakanyianya mu mwoto pavʉlongolo pa vaanu vooni. Wʉ vavalile ʉntengo gwa sitabu isyo, vakavona sisikiitse ihela#19:19 Ihela Ʉvʉganulu wa limenyu hela lola kʉ lʉtʉngʉ lwa mamenyu amahenza agalɨ kʉ vʉmalɨlo wa kɨtabu ɨkɨ. avaelufu isitsigo sihaano (50,000) mu mbalɨlo jya ndalama tsa veene. 20Ewo wʉ tsyale ikulongwi tsa Ntwa ʉYɨɨsʉ, tsilɨkʉgendelela ʉkʉvaala, nʉ kwongelela ʉkʉva na maka mu vaanu.

Ɨholo ɨmbaha jihʉmɨla kʉ Efeso

21Wʉ gamalile ʉkʉlʉtɨngʼania ago gooni, ʉPaulo akasaaga ʉkʉlʉta kʉ Yelusalemu ʉkʉgendela kʉ Makedoniya, na kʉ Akaya. Akatsova akata, “Ʉnsɨkɨ ndɨpya ndɨsiike kʉ Yelusalemu, nditsigilwa ndɨkasike nakʉ kʉ Looma.” 22Pwʉ mu valya ʉwʉ vaantangaga ɨmbombo, akavasuungʼa avaanu vavɨlɨ, ʉTimoti nʉ Elasito, pakʉta valongole ʉkʉbɨha kʉ Makedoniya, ʉmwene akasigala kʉ mpandʉlʉ ʉgwa Asiya kʉ nsɨkɨ.

23Kʉ nsɨkɨ ʉgwa, pakahʉmɨla ɨholo ɨmbaha siitso apo pa Efeso ʉkʉkongana nɨ Nzɨla jya Ntwa ʉYɨɨsʉ. 24Ɨkɨsina kya holo kyale ʉmuunu mpamato ʉmponzi va sihwani sya kyʉma. Ʉmuunu ʉjwa aatambʉlwagwa vɨ Demetuliyo. Aapondaga isihwani isyahwananaga nɨ nyumba jya lingʉlʉve lya veene lya kɨdala ɨlɨ Alutemi. ɄDemetuliyo na vaponzivanine vaakavaga indalama nyongosu ʉkʉgendela ɨmbombo ɨjyo. 25Ɨkɨgono kɨpamato, ʉDemetuliyo akavalʉndamania avaponzivanine, paninie na vavombambombo avange ʉwʉ naveene vaavombaga ɨmbombo jɨɨjɨlya. Akavavʉʉla akata, “Mwe vagoosi ʉnyie, mulʉmanyile vʉnonu ʉkʉta twikava indalama nyongosu ʉkʉhʉma mu mbombo ɨjɨ. 26Lɨno mupʉliike nʉ kʉlola ʉwʉ ʉPaulo ihambʉla ʉlwɨdɨko lwa vaanu, ikʉvavʉʉla iita isihwani isyʉ avaanu vitetengʼania ni sivoko sya veene namingʉlʉve gya lweli. Imanyiiso tsa mwene tsivakwegile avaanu vongosu va pa Efeso apa, paninie na vaanu vongosu va mbasu tsyoni tsa Asiya. 27Lɨno, ndidwada ʉkʉta avaanu jʉvikʉjɨsʉʉla ɨmbombo jiitu, ikange jʉvisʉʉla najɨ nyumba jya ngʉlʉve viitu ʉndʉti ʉAlutemi. Jʉwisila ʉwɨɨmɨkiwa wa Alutemi, ʉngʉlʉve ʉndʉti, ʉvɨ vikɨsaja mu kɨlʉnga kyoni ɨkɨ ɨkya Asiya, na mu silʉnga isinge syoni.”

28Wʉ vapʉliike ago vakaviipa siitso. Vakatengʉla ʉkwoveela vakata, “ɄAlutemi va Vaefeso vɨ ndʉti!” 29Ʉvʉtsenge wooni wa Efeso vʉkava nɨ holo. Vakaviibata ʉGayo nʉ Alisitaliko, avaanu vavɨlɨ va kʉ Makedoniya, ʉwʉ vaagendaniaga paninie nʉ Paulo. Vakalʉta navo apoonu apeeleesu. 30ɄPaulo akanogwa ʉkʉta alʉte pa lʉlʉndamano lwa vaanu valya. Avakongivanine vakamʼbeetsa aleke ʉkʉlʉta. 31Naveene avanzagɨla avange vʉʉkʉ kʉ Asiya avaale vamanyaani va mwene, vakasuungʼa ɨkulongwi jya kʉnsiima ʉkʉta aleke ʉkʉlʉta palya.

32Pwʉ avaanu ʉwʉ vaalʉndamiine palya vakasambʉngʼana siitso, vakatengʉla ʉkwoveela, avange vaatsovaga ɨlɨ avange lɨlya. Vongosu navaakɨmanye ɨkyʉvalʉndamanie paninie. 33AVayahudi avange vakamwɨmya ʉAlekisanda pavʉlongolo pa vaanu avo, vakambʉʉla amamenyu ga kʉtsova. Pwʉ ʉAlekisanda akahʉʉsa ɨkɨvoko pakʉta avaanu vooni vanuunale, manya aanogwagwa ʉkʉvɨɨmɨla aVayahudi ʉkʉta nawʉ veene avavombile itso. 34Napeene, vaavye valʉmanyile ʉkʉta Nʼyahudi, vooni vakooveela paninie kʉ nsɨkɨ gwa tʉvalɨlo tʉvɨlɨ, vakata, “ɄAlutemi va Vaefeso vɨ ndʉti!”

35Kʉ vʉmalɨlo, ʉmbɨgi ʉmbaha va vʉtsenge ʉwa akavanuunatsa avaanu avo, akata, “Vagoosi ʉnyie va mu Efeso, nakʉli ʉvɨ nalʉmanyili ʉkʉta ʉvʉtsenge ʉvʉ wʉ vuloleela ɨnyumba jya Alutemi, ʉngʉlʉve ʉndʉti, paninie nɨ kɨhwani kya mwene ɨkyatʉmbwike ʉkʉhʉma kʉkyanya. 36Lɨno, ʉlwakʉva nakʉli ʉmuunu ʉvɨ iweesa ʉkʉbeela ikulongwi itsi, pwʉ ʉnyie munogye ʉkʉnuunala, muleke ʉkwangʉpa ʉkʉvomba ɨkɨveetsaga. 37Muvaleetile apa avaanu ava, nʉpwʉ jɨngave navahɨtsili kɨɨnu ɨkɨveetsaga mu nyumba jya ngʉlʉve viitu ʉnʼdala, pange kʉnʼdʉka ʉmwene. 38ɄDemetuliyo na vaponzivanine vangave valɨ nɨ limenyu lya kʉvʉʉtsania nʉ muunu ʉvaveetsaga, pavanogye vahɨlɨke ɨlimenyu ɨlyo pavʉlongolo pa vahɨgi va nongwa. 39Mungave mulɨ nɨ kulongwi ɨjyɨnge, muhɨlɨke pa lʉlʉndamano ʉlʉtavʉliilwe mu ndagɨlo tsiitu. 40Vʉle ʉmwʉ tʉvombye ɨleelo, jiweesa ʉkʉtwambʉtsa tʉhɨgwagwe pakʉta tʉvombile ɨholo pa vʉtsenge. Ɨngave jʉvɨkʉtʉhɨgaga kʉ holo ɨjɨ, tʉvʉla limenyu ɨlyʉ jʉtukwanda, ʉlwakʉva ɨholo ɨjɨ jya vʉvʉle.” 41Wʉ amalile ʉkʉvavʉʉla amamenyu ago, akata avaanu valekengʼane vavuje kʉ myavaavo.

Currently Selected:

Mbombo tsa Vapositili 19: zga

Highlight

Copy