Yohana 12

ɄMaliyamu ikʉmʼbaka amafuta ʉYɨɨsʉ

(Mataayo 26:6-13; Maliko 14:3-9; Luuka 7:36-50)

1Wʉ sisigye isigono ntanato (6) ʉkwingila mu kyaka kya Pasaka, ʉYɨɨsʉ akalʉta ikange kʉ Betaniya ʉkwʉ aataamaga ʉLazalo, ʉlya ʉvɨ ʉYɨɨsʉ aantsʉʉsiitse. 2Wʉ asiike ʉkʉ, avaanu va poonu palya vakansugila isya kwɨgoneka. ɄMalita vɨ aavavombelaga. ɄLazalo aale paninie na vahenza avaale pa meesa nʉ Yɨɨsʉ. 3Pwʉ ʉMaliyamu akatoola ɨtsupa jya mafuta ga kwɨbaka aginuungʼilila aga ndalama nyongosu, akamʼbaka ʉYɨɨsʉ mu silʉnde, akampulusa ni nzwɨlɨ tsa mwene. Ɨnyumba jyoni jɨkadɨga ʉlʉnuusi lwa mafuta ago.

4Lɨno ʉYuuda Isikalioti, ʉmmendami va Yɨɨsʉ, ikange mpamato mu vakongi va mwene akata, 5“Kɨki, amafuta ago nagagʉtsiiwi kʉ dinali ɨmileevʉlʉ gɨdatu (300),#12:5 Dinali Ʉvʉganulu wa limenyu ɨlɨ lola kʉ lʉtʉngʉ lwa mamenyu amahenza agalɨ kʉ vʉmalɨlo wa kɨtabu ɨkɨ. nʉ kʉvapa avagatsu indalama itso?” 6ɄYuuda naatsove ewo kʉ nongwa jya kʉvakolela ɨkɨsa avagatsu, apeene ʉlwakʉva aale ndyasi. Ʉmwene vɨ aaloleelaga ʉmpako gwa ndalama. Ʉkʉhʉmana nɨɨlyo kakongosu ʉmwene aahɨɨtsaga indalama itso itsʉ aaloleelaga. 7Pwʉ ʉYɨɨsʉ akamwanda ʉYuuda akata, “Indeke ʉnʼdala ʉjʉ, manya akagavɨɨkile vʉnonu amafuta ago ʉkʉsikila lɨno, ikʉgʉtetengʼania ʉmmana gwango kʉ kɨgono kya kʉgʉsɨɨla. 8Avagatsu mulɨ navo isigono syoni, apeene ʉnyie namukaave nʉʉne isigono syoni.”

Avalongotsi va Vayahudi vilamula ʉkʉmʼbuda ʉLazalo

9Avaanu vongosu mu Vayahudi vakapʉlɨka ʉkʉta ʉYɨɨsʉ pwale apoonu palya. Vakalʉta kukʉmbona ʉYɨɨsʉ paninie nʉ Lazalo, ʉvɨ ʉYɨɨsʉ aantsʉʉsiitse ʉkʉhʉma kʉ vaswe. 10Pwʉ avavaha va vateeketsi vakalamula vamʼbude ʉLazalo, 11manya ʉkʉtsʉʉsiwa kwa mwene, kwavapelye aVayahudi vongosu vavaleke avalongotsi va veene, vamwɨdɨke ʉYɨɨsʉ.

ɄYɨɨsʉ ikwʉpɨlɨlwa mu Yelusalemu ndʉ nkʉlʉdeeva

(Mataayo 21:1-11; Maliko 11:1-11; Luuka 19:28-40)

12Ɨlya kɨlaavo, ɨkɨpʉga ɨkɨvaha kya vaanu aviitsile kukwɨmba ɨkyaka kya Pasaka, vaapʉliike ʉkʉta ʉYɨɨsʉ alɨ mu nzɨla ikwitsa kʉ Yelusalemu. 13Pwʉ vakadeenya amasaasi ga mitende, vakalʉta kukʉmwʉpɨlɨla ʉYɨɨsʉ. Valɨkwoveela valɨkʉta,

“ɄNgʉlʉve aginiwaagwe!#12:13 ɄNgʉlʉve aginiwaagwe Mu nzovele jya Vayahudi vaateetsaga hosiana, kwʉ kʉta ʉtʉpoke.

Inʼgatalʉsu ʉvɨ ikwitsa mu litaawa lya Ntwa ʉNgʉlʉve!”#Zabuli 118:25-26

Inʼgatalʉsu ʉNkʉlʉdeeva va Vaisilahɨli.

14Pwʉ ʉYɨɨsʉ akajɨvona ɨpunda ɨjipikʉla, akɨtoga pakyanya pa jyene#12:14 Ɨkulongwi ɨjitsowa apa ɨjya Yɨɨsʉ ʉkwɨtoga ɨpunda, aavombile ndʉwʉ avakʉlʉdeeva, ʉnsɨkɨ gwa lʉnotsehetso, vaavombaga wʉ vigenda mu kʉvomba imbombo itsitava tsa ligoha. Lɨno ʉnsɨkɨ gwa ligoha avakʉlʉdeeva avo vɨɨtogaga ifalaasi. Apo ʉYɨɨsʉ ʉpwʉ ɨɨtogile pa punda wʉ ikwingila mu Yelusalemu, aavoniaga ʉkʉta iitsile kʉ lʉnotsehetso ndʉ nkʉlʉdeeva ʉnʼdeke. ndʉwʉ jɨvɨgilwe mu Vʉvɨge ʉVʉvalatse pa kʉntsova ʉmwene ʉkʉta,

15“Ʉnyie nyɨ vaanu va mu Sayuni#12:15 Sayuni Ɨlɨ litaawa ɨlɨnge lya Yelusalemu. muleke ʉkʉdwada!

Lola, ʉNkʉlʉdeeva viinyo ikwitsa,

atogile ɨpunda ɨjipikʉla!”#Yesaya 40:9; Sefaniya 3:16

16Ʉnsɨkɨ ʉgwa, avakongi va Yɨɨsʉ navaagamanye ago. Lɨno kʉmbele wʉ ʉNgʉlʉve amwingiitse ʉYɨɨsʉ mu wɨɨmɨkiwa wa mwene, vakakʉmbʉka ʉkʉta ago gaavɨgilwe pa kʉntsova ʉmwene, nʉ mwʉ vaambombye.

17Avaanu avaale paninie nʉ Yɨɨsʉ wʉ ikʉmwɨlanga ʉLazalo ʉkʉhʉma mu vʉguli nʉ kʉntsʉʉsa ʉkʉhʉma kʉ vaswe, valɨkwoleletsa ikulongwi itso. 18Ʉkʉkongana nɨɨlyo avaanu vongosu vakapʉlɨka ɨkulongwi jya kɨmanyilo ɨkyʉ ʉYɨɨsʉ aavombile, kyʉ kɨɨnu vaahʉmile kʉ Yelusalemu ʉkʉbɨha kukʉmwʉpɨlɨla. 19Lɨno aVafalisayo vakɨtsosanza vakata, “Mwilola? Natʉkaweese ʉkʉvomba ɨkɨveetsaga! Lola, avaanu vooni vikʉnkonga ʉmwene.”

ɄYɨɨsʉ itsova ʉkʉswa kwa mwene

20Vaalekwo avaanu avange avatava Vayahudi mu vaanu avaatogile kʉ Yelusalemu kukɨsaja pa kyaka kya Pasaka. 21Pwʉ avaanu avo vakalʉta kwa Filipo ʉvɨ aahʉmile kʉ Betisaida mu kɨlʉnga kya Galilaya, vakanʼdoova vakata, “Mwɨmɨkiwa, tudoova twagane nʉ Yɨɨsʉ.” 22ɄFilipo akalʉta akambʉʉla ʉAndeleya ikulongwi itso, pwʉ ʉFilipo nʉ Andeleya vakalʉta kwa Yɨɨsʉ kukʉmbʉʉla.

23Wʉ vambʉʉlile, ʉYɨɨsʉ akavaanda akata, “Lɨno ʉnsɨkɨ gʉlya gʉsiike ʉgwa wɨɨmɨkiwa wa Mwana va Muunu ʉkʉvoneka pavʉvalasu. 24Jɨlweli ndikʉvavʉʉla ndiita, ɨmbeju jɨngaleke ʉkʉsɨɨlwa mu mmanga, ndʉ muunu ʉvasue nʉ kʉsɨɨlwa, pakʉta jyandʉke nʉ kʉmela, jitsiga jyene ʉmwʉ jɨveelye. Apeene jɨngasɨɨlwe pwʉ jimela nʉ kʉhʉʉpa iseke nyongosu. 25Ʉmuunu ʉvaveetsaga ʉvɨ avʉganile ʉwʉʉmi wa mwene mu kɨlʉnga ʉmʉ, ʉjwa alawaambʉtsa. Apeene ʉmuunu ʉvaveetsaga ʉvɨ navʉganili ʉwʉʉmi wa mwene mu kɨlʉnga ʉmʉ, vɨ alavʉpoka nʉ kʉkava ʉwʉʉmi wa sikutsooni. 26Ʉmuunu ʉvaveetsaga ʉvɨ ikʉmbombela, panogye angʼongage, lola apaveetsaga palya ʉpwʉ ndiiva ʉne, pwʉ namwene iveetsaga apo. Ikange ʉmuunu ʉvaveetsaga ʉvɨ ikʉmbombela ʉne, ʉDaada alamwɨmɨka.

27“Lɨno ndɨtengwe ʉkʉsʉsʉvala siitso mu numbula jyango. Ndilemwa ndɨtsove ndɨte kɨki. Ndeeti ndɨte, ‘Gwe Daada, ndikʉkʉdoova ʉmmoke kʉ vʉkʉvɨlwa ʉvukʉnnyitsila?’ Baako, nandiweesi ʉkʉdoova ewo, manya nditsile mu kɨlʉnga ɨkɨ pakʉta ndɨvombe itsa vʉnogwe waako.#12:27 Ʉvʉganulu ʉvʉnge wa lʉkɨndɨ ʉlʉ wiita Lɨno ndɨtengwe ʉkʉsʉsʉvala siitso mu numbula jyango. Ndilemwa ndɨtsove ndɨte kɨki. Gwe Daada, ndikʉkʉdoova ʉmmoke kʉ vʉkʉvɨlwa ʉvukʉnnyitsila! Napeene, nandiweesi ʉkʉdoova ewo, manya nditsile mu kɨlʉnga ʉmʉ pakʉta ndɨvombe itsa vʉnogwe waako. 28Lɨno, gwe Daada Ngʉlʉve, vʉvonie ʉwɨɨmɨkiwa wa litaawa lyako!”

Pwʉ ʉNgʉlʉve akatsova ʉkʉhʉma kʉkyanya akata, “Gwe Mwana vango, ʉne ndɨvoniitse ʉwɨɨmɨkiwa wango, ikange ndigendelelaga ʉkʉvʉvonia.” 29Pwʉ ɨkɨpʉga kya vaanu ʉwʉ vaalepwo palya wʉ vapʉliike ɨlimenyu ʉkʉhʉma kʉkyanya, avange vakata, “Ɨsula jɨkulwime,” avange vakata, “Ʉnsuungʼwa va Ngʉlʉve alɨkʉtsova nʉ mwene.” 30Ʉmwene ʉYɨɨsʉ akavavʉʉla avaanu valya akata, “Ɨlimenyu ɨlyʉ mupʉliike nalɨkaave lya kʉnnanga ʉne, apeene lɨkaale lya kʉvatanga ʉnyie. 31Lɨno gʉsiike ʉnsɨkɨ gwa Ngʉlʉve gwa kʉvahɨga avaanu va kɨlʉnga ɨkɨ, ikange ʉnsɨkɨ gwa Ngʉlʉve gwa kʉnswɨma ʉSetano ʉvɨ vɨ ntavala va mu kɨlʉnga ɨkɨ. 32Ʉnsɨkɨ ndɨva ndɨhʉʉsiiwe, jʉndikʉvakwega vooni viitse kwane.” 33ɄYɨɨsʉ aatsovile ndavʉle, pa kʉvonia ʉmwʉ jiiswɨla pa kɨdamingʼanie.

34Pwʉ ɨkɨpʉga kya vaanu vakamwanda ʉYɨɨsʉ vakata, “Tʉpʉliike ʉkʉhʉma mu Vʉvɨge ʉVʉvalatse ʉkʉta, ʉMesiya alaava mwʉmi sikutsooni.#Zabuli 110:4 Pwʉ kɨki wiita wɨgane wa Ngʉlʉve ʉMwana va Muunu ahʉʉsiiwe, ʉMwana va Muunu ʉjwa vɨ veeni?” 35ɄYɨɨsʉ akavavʉʉla akata, “Ʉlʉmuli lʉlɨ paninie nʉʉnyie kʉ nsɨkɨ nsupi vʉvʉle ʉgʉsigye kʉvʉlongolo. Nʉʉnyie mulʉkongage ʉlʉmuli ʉlwa ʉnsɨkɨ ʉgʉ wʉ pwʉlʉle, pakʉta ɨngʼiisi jɨleke ʉkʉvalema, ʉlwakʉva ʉmuunu ʉvɨ igenda mu ngʼiisi nakʉmanyili ʉkwʉ ilʉta. 36Wʉ ʉlʉmuli ʉlwa lʉpitsiige pwʉlʉle, pwʉ vɨɨkagi ʉlʉhʉʉvɨlo lwinyo mu lʉmuli ʉlwa pakʉta muve vaana va lʉmuli.” ɄYɨɨsʉ wʉ atsovile ago, akakɨleka ɨkɨpʉga kɨlya, akaheganitsa, akʉʉva.

AVayahudi vongosu vibeela ʉkʉmwɨdɨka ʉYɨɨsʉ

37Nʉpwʉ jɨngave ʉYɨɨsʉ aavombile isimanyilo syongosu pavʉlongolo pa veene, aVayahudi vongosu navaamwɨdɨke. 38Ɨlɨ lyahʉmye ewo pakʉta gakwɨlanile amamenyu ʉgwʉ ʉnyamalago ʉYesaya aatsovile ʉpwʉ aatye,

“Gwe Ntwa, veeni ʉvɨ ɨdiike ikulongwi tsiitu?

Ikange, veeni ʉvɨ agaweene nʉ kʉgamanya amaka ga Ntwa?”#Yesaya 53:1

39Vaalemilwe ʉkwɨdɨka ʉlwakʉva ʉNgʉlʉve aatsovile kʉ nzɨla jya Yesaya ʉjwa ʉkʉta,

40“Avaboswitse amiiho ga veene nʉ kʉtsipela inumbula tsa veene tsikiliitale,

pakʉta amiiho ga veene galeke ʉkʉlola,

imbʉlʉkʉtʉ tsa veene tsileke ʉkʉpʉlɨka,

ikange inumbula tsa veene tsileke ʉkʉlʉmanya,

vagela vikwandʉka pakʉta ndɨvapoke.”#Yesaya 6:10

41ɄYesaya aatsovile ago ʉlwakʉva aavʉweene ʉwɨɨmɨkiwa wa Yɨɨsʉ nʉ kʉtsova ikulongwi tsa mwene.

42Paninie nɨɨlyo, vaalepwo nava valongotsi vongosu va Vayahudi ʉwʉ vaamwɨdiike ʉYɨɨsʉ. Lɨno avo navaatsovage pavʉvalasu ʉkʉta vamwɨdiike ʉkʉkongana nʉ kʉvadwada aVafalisayo ʉwʉ vaale vikʉvaswɨma mu masinagogi. 43Avalongotsi avo vaanogwagwa siitso ʉkwɨmɨkiwa na vaanu ʉkʉlʉtɨɨlɨla ʉkwɨmɨkiwa nʉ Ngʉlʉve.

Avaanu valahɨgwa kʉ mamenyu ʉgwʉ atsovile ʉYɨɨsʉ

44Pwʉ ʉYɨɨsʉ akapʉlɨsa akata, “Ʉmuunu ʉvɨ ikʉnnyɨdɨka ʉne, nikʉnnyɨdɨka ʉne ndɨ mwene, apeene ikʉmwɨdɨka nʉ vɨ ansuungʼile. 45Ikange ʉmuunu ʉvaveetsaga ʉvɨ ambwene ʉne, ambwene nʉ vɨ ansuungʼile. 46Ʉne nditsile mu kɨlʉnga ʉmʉ ndʉ lʉmuli, pakʉta ʉvaveetsaga ʉvɨ ikʉnnyɨdɨka aleke ʉkʉtsiga mu ngʼiisi.

47“Ʉmuunu ʉvaveetsaga ʉvɨ ipʉlɨka amamenyu gango, lɨno nikʉgakonga, nandikʉmmɨga, ʉlwakʉva nanditsili mu kɨlʉnga ʉmʉ kwihɨga avaanu, apeene nditsile kukʉvapoka. 48Vʉvʉle vʉle, ʉmuunu ʉvaveetsaga ʉvɨ ikʉmbeela ʉne paninie na mamenyu gango, amamenyu ʉgwʉ ndɨtsovile gwʉ geene galammɨga pa litsʉva lya vʉmalɨlo. 49Wʉ jɨlɨwo ʉlwakʉva ʉne nandɨtsovili itsi kʉ vʉtavʉlɨlwa wango jyʉne, apeene ʉDaada ʉvɨ ansuungʼile vɨ mwene andagye itsa kʉtsova, nʉ mwʉ ndɨtsovye. 50Ikange, ndɨlʉmanyile ʉkʉta ʉlʉlagɨlo lwa mwene ʉlwa, lukʉvapa avaanu ʉwʉʉmi wa sikutsooni. Pwʉ ʉne nditsova geene ʉgwʉ ʉDaada andagye ʉkʉtsova.”

Currently Selected:

Yohana 12: zga

Highlight

Copy