Luuka 14

ɄYɨɨsʉ ikʉmponia ʉntamu pa kɨgono kya Sabato

1Ɨkɨgono kɨpamato kya Sabato, ʉYɨɨsʉ aalʉtile kwilya ɨkyakʉlya kʉ nyumba jya muunu mpamato ʉvaale nninie va valongotsi va Vafalisayo. Ʉnsɨkɨ wʉ alɨ ʉmwa, aVafalisayo na vange vakava vikʉntendeela valole ɨkyʉ jiivomba pa kɨgono kya Sabato.

2Pavʉlongolo pa Yɨɨsʉ, aalepwo ʉmuunu mpamato, ʉvɨ aale nʉ vʉtamu wa kʉsimba ʉmmana. 3Pwʉ ʉYɨɨsʉ akavavʉʉtsa aVafalisayo na vamanyisi va ndagɨlo akata, “Ndeeti, indagɨlo tsiitu tsikʉtʉtavʉla ʉkʉponia avaanu pa kɨgono kya Sabato?” 4Aveene vakatsiga mye. ɄYɨɨsʉ akamwibata ʉntamu ʉlya, akamponia, akantavʉla alʉtage.

5Pwʉ ʉYɨɨsʉ akavavʉʉtsa akata, “Vɨ veeni pagati paanyie ʉvɨ, ʉmwana va mwene evo ɨsenga jya mwene jɨngagwɨle mu kɨsima ɨkɨgono kya Sabato, paapalya nakahʉmye?” 6Avaanu valya, vakava vadumukiilwe ɨlya kʉtsova.

Ʉlwɨjiso nʉ wiipa

7ɄYɨɨsʉ akavavona avahenza ʉwʉ vɨɨlangilwe pa lʉhekelo wʉ vikɨhalɨla isitaamilo isya vɨɨmɨkiwa. Pwʉ akavavʉʉla ɨkɨhwananitso, akata, 8“Wʉ ʉmuunu akwɨlangile ʉbɨhe kʉ vʉtegʉlanie, ʉleke ʉkʉsikila pa sitaamilo isya vɨɨmɨkiwa. Ʉleke ʉkʉvomba ewo ʉlwakʉva, ipange ɨlangilwe ʉmwɨmɨkiwa ʉjyʉnge ʉkʉkʉlʉtɨɨlɨla ʉve. 9Pwʉ angiitse ʉvɨ avɨɨlangile ʉnyie nyɨ vooni, ikʉkʉvʉʉla iita, ‘Indekele ʉjʉ ʉpwʉ ʉtaamile.’ Apo, jʉwivona soni siitso, wʉ wihega ʉkʉbɨha kʉ sitaamilo sya vaanu avibedwa.

10“Apeene, ʉngɨlangwe, ʉsikilage pa sitaamilo sya vaanu avibedwa, pakʉta apya ikwitsa ʉvɨ akwɨlangile, akʉvʉʉle ate, ‘Gwe mmanyaani vango, wiitse ʉtaame apa pa wɨɨmɨkiwa.’ Apo pwʉ jʉvuvonekaga ʉwɨɨmɨkiwa waako, pamiiho ga vɨɨlangwa vooni, 11manya ʉmuunu ʉvaveetsaga ʉvɨ ikɨjɨmɨka, ʉNgʉlʉve alamwisa. Nʉ muunu ʉvɨ ikɨjisa, ʉNgʉlʉve alamwɨmɨka.”

12Pwʉ ʉYɨɨsʉ akambʉʉla ʉvɨ aamwɨlangile akata, “Wʉ vukʉvanotsehetsa avaanu ʉlʉhekelo lwa pamuunyi evo kʉmihe, ʉleke ʉkʉvɨɨlanga avamanyaani vaako, evo avalʉkololwo, evo avaanu va kɨkolo kyako, evo avambʉtsengelanile vaako avamosu, vagela naveene vikʉkwɨlanga kʉ nongwa jya kʉkʉtavʉla ɨlyʉ ʉkavavombye. 13Apeene, wʉ ʉtetengʼiinie ʉlʉhekelo, ʉvɨɨlangage avagatsu, avalema, avasugujwike isilʉnde na vabosu. 14Apo pwʉ wiiva ʉlɨ nʼgatalʉsu, ʉlwakʉva avo valɨ vʉvʉle ɨkɨɨnu kya kʉkʉtavʉla. ɄNgʉlʉve vɨ mwene alakʉhomba, alaava itsʉʉsa avagolosu.”

Kwʉ baako ʉkʉbeda ɨnyɨlango jya Ngʉlʉve

(Mataayo 22:1-10)

15Wʉ valɨ pa lʉhekelo, ʉmmenza mpamato wʉ apʉliike amamenyu ga Yɨɨsʉ, akambʉʉla akata, “Inʼgatalʉsu ʉmuunu ʉvaveetsaga ʉvɨ alaalya isiinu sya pa lʉhekelo mu Lʉdeeva lwa Ngʉlʉve!” 16ɄYɨɨsʉ akamwanda mu kɨhwananitso akata, “Aalepwo ʉmuunu mpamato ʉvɨ aanotsiitse ɨkyakʉlya kya pa lʉhekelo ʉlʉvaha, akavɨɨlanga avaanu vongosu. 17Ʉnsɨkɨ gwa lʉhekelo wʉ gʉsiike, akansuungʼa ʉmbanda va mwene kʉ vaanu ʉwʉ aavapye ɨnyɨlango, pakʉta avavʉʉle ate, ‘Mwitsage! Lɨno, isiinu syoni sinotsiiwe!’

18“Pwʉ vooni, mpamato mpamato ʉwʉ vɨɨlangilwe, vakabeela ʉkʉlʉta. Ʉntatsi akata, ‘Ndɨgʉlile ɨkɨlɨmɨla, pannogye ndɨlʉte kwilola. Ʉnsyɨkɨle, nandɨkiitse.’ 19Ʉva vɨɨlɨ akata, ‘Ndɨgʉlile isenga kɨtsigo (10) tsa kʉlɨmɨla, ndilʉta kukʉtsigela. Ʉnsyɨkɨle, nandɨkiitse.’ 20Namwene ʉva daatu akata, ‘Ndɨtegwe ʉnʼdala lɨlɨno, pwʉ lɨno jilemanika kwane ʉkwitsa.’

21“Ʉmbanda ʉlya akakilivuka, akampangɨla tsyoni ʉntwa va mwene. Pwʉ ʉntwa ʉlya akaviipa, akambʉʉla ʉmbanda va mwene akata, ‘Lʉtaga ngʼaningʼaani kʉ nsevo na kʉ nzɨla itsinge mu vʉtsenge ʉvʉ, ʉkiitse navo apa avagatsu, avalema, avabosu na vasugujwike isilʉnde.’

22“Kʉmbele, ʉmbanda ʉlya akakilivuka, akambʉʉla akata, ‘Ntwa, ʉgwʉ ʉkandagye ndɨvombile. Nalɨ lɨno, ʉvʉtaamo vʉpitsiige pwʉvʉle.’

23“Ʉntwa akambʉʉla akata, ‘Lɨno! Bɨhaga kʉnzi kʉ vʉtsenge, kʉ misevo na kʉ nzɨla itsʉ tsilotsa kʉ matsumbe amadebe, na kʉ silɨmɨla, ʉkavasiime avaanu viitse viingile mu nyumba jyango, ʉkʉsikila ʉpwʉ vidɨga. 24Pwʉ ndikʉvavʉʉla ʉnyie ʉkʉta, mu vaanu avo ʉwʉ ndɨkavɨɨlangile pa vʉtengʉlɨlo, nʉ mpamato nakaalye isiinu sya pa lʉhekelo isyʉ ndɨnotsiitse ʉne!’ ”

Ʉvʉtalamu wa kʉva nkongi va Yɨɨsʉ

(Mataayo 10:37-38)

25ɄYɨɨsʉ aagendaga paninie nɨ kɨpʉga ɨkɨvaha kya vaanu. Akavakilivukila, akavavʉʉla akata, 26“Ʉmuunu ʉvaveetsaga ʉvɨ inogwa ʉkʉva nkongi vango, pannogye ʉmwene ʉkʉngana ʉne ʉkʉlʉtɨɨlɨla ʉlʉgano lwa mwene kwa dadaaje, kwa vanyina, kʉ nʼdala va mwene, kʉ vaana va mwene, kʉ valʉkololwe, na kʉ vahaatsave. Ikange pannogye ʉkʉngana ʉne ʉkʉlʉtɨɨlɨla ʉkʉvʉgana ʉwʉʉmi wa mwene. 27Ʉmuunu ʉvɨ nikɨtwɨka ɨkɨdamingʼanie kya mwene nʉ kʉngʼonga, nakaweese ʉkʉva nkongi vango.

28“Ndɨganule vʉnonu. Angave mpamato viinyo inogwa ʉkʉtsenga ɨnyumba jya lʉtogo, jiivomba kɨki pa vʉtengʉlɨlo? Pa vʉtengʉlɨlo jiitala ʉkʉsaaga isiinu syoni isyʉ silondiwa ʉkʉtsengela. Pwʉ jiikɨlola ndalɨ ni ndalama tsa kʉkwɨla ʉkʉmala ʉkʉtsenga. 29Kɨtsila kʉvomba ewo, iweesa ʉkʉtsenga ʉwaalo, pwʉ ilemwa ʉkʉmala ʉkʉtsenga ɨnyumba ɨjyo. Pwʉ avalʉtanzɨla vooni wʉ vikʉjɨvona vikʉmʼbedaga, 30viteetsaga, ‘Ʉmuunu ʉjʉ aatengwe ʉkʉtsenga, napeene alemilwe ʉkʉmala!’

31“Ndɨtsove ɨkɨhwananitso ɨkɨnge. Tʉte avakʉlʉdeeva vavɨlɨ vikɨsaavʉla ʉkʉlwa ɨligoha. Ʉntatsi alɨ na vasikali avaelufu kɨtsigo (10,000), ʉva vɨɨlɨ alɨ na vasikali avaelufu isitsigo sivɨlɨ (20,000). Ʉntatsi nakalʉte kupalamula ɨligoha kɨtsila kʉtaama paasi nʉ kʉsaaga ʉkʉta iweesa ʉkʉlwa nʉ va vɨɨlɨ ʉlya nʉ kʉndema. 32Angavone ʉkʉta jiilemwa, jiisuungʼa ngʼaningʼaani avatangɨli va mwene, valʉte kʉ nkʉlʉdeeva ʉva vɨɨlɨ ʉlya wʉ apitsiige kʉvʉtale, pakʉta vasajane.

33“Wʉ jɨlɨwo nakʉ kwanyie. Nakʉli nʉ mpamato mwanyie ʉvɨ anogye ʉkʉva nkongi vango, angave nasilekili syoni isyʉ alɨ nasyo.

Avakongi va Yɨɨsʉ vaveetsage ndʉ mwinyo

(Mataayo 5:13; Maliko 9:50)

34“Ʉmwinyo kɨɨnu kɨnonu. Lɨno gʉngave gʉnangiike, vuvomba kɨki pa kʉgʉkilivulila ʉlʉnogo lwa gwene? 35Ʉmwinyo ʉgʉlɨ ndʉʉgwa, gʉtsila mbombo nakʉ kʉ mmanga, nakʉ kʉva nyanzo jya ngʼakala.#14:35 Gʉtsila mbombo nakʉ kʉ mmanga, nakʉ kʉva nyanzo jya ngʼakala Kʉ Vayahudi paninie nʉ kʉhata ʉmwinyo mu siinu, vaalahaga ʉmwinyo mu mmanga wʉ vinogwa ʉkʉvoleletsa isilɨmɨla. Kange vaahanzaaga ʉmwinyo ni ngʼakala ʉkʉta tsivole tsive mbolela jya kʉvyalɨla isiinu. Ʉmwinyo ʉgwa gwiva gwa kʉtaagwa kʉnzi. Ʉvɨ ipʉlɨka, vɨ apʉlɨkage nʉ kʉtsingahɨtsa itso!”

Currently Selected:

Luuka 14: zga

Highlight

Copy