Maliko 3

ɄYɨɨsʉ ikʉmponia ʉmuunu ʉvɨ asugujwike ɨkɨvoko

(Mataayo 12:9-14; Luuka 6:6-11)

1ɄYɨɨsʉ akiingila ikange mu lisinagogi. Mu nʼgati ʉmwa, aalemwo ʉmuunu mpamato ʉvɨ ɨkɨvoko kya mwene kyasugujwike. 2Avaanu vaninie avaale valʉgʉ va Yɨɨsʉ naveene vaale mu nyumba ɨjyo. Avaanu avo valɨkʉndola ndikʉmponia ʉmuunu ʉlya pa kɨgono ɨkya Sabato, pakʉva vaalondaga ɨnzɨla ɨjya kʉmmɨlɨka pa vʉhɨgi. 3ɄYɨɨsʉ akambʉʉla ʉmuunu ʉvɨ aasugujwike ɨkɨvoko akata, “Ɨma apa pagati pa vaanu.” 4Pwʉ ʉYɨɨsʉ akavavʉʉtsa akata, “Ndeeti tʉtavʉliilwe nʉ lʉlagɨlo lwa Ngʉlʉve lwa pa litsʉva lya Sabato ʉkʉvomba inonu evo ʉkʉvomba imbiivi? Ʉkʉpoka ʉwʉʉmi evo ʉkwongometsa?” Aveene vakatsiga mye. 5ɄYɨɨsʉ wʉ ivona navikwʉpɨlɨla ʉwajɨlweli ʉwʉ itsova, akavalola siitso kʉ lʉviipo nʉ kʉsʉsʉvala mu numbula jya mwene ʉkʉkongana na matingo ga veene. Pwʉ akambʉʉla ʉvɨ asugujwike ɨkɨvoko, akata, “Golosa ɨkɨvoko kyako.” Namwene akagolosa, ɨkɨvoko kya mwene kɨkapona. 6Lola, aVafalisayo avo vakahʉma panzi vakatengʉla ngʼaningʼaani ʉkwɨtsosanza nɨ kɨpʉga kya Helode,#3:6 Kɨpʉga kya Helode kyale wʉ Vayahudi avanya maka kɨsilikali. Ava vaamanyiine siitso nʉ ntwa ʉHelode ʉmwɨmɨɨlɨtsi va kɨlʉnga kya kʉ Galilaya ɨkyale paasi pa vʉtwa wa Valooma. AVafalisayo nɨ kɨpʉga kya Helode vaasʉʉliine siitso. Itsa kʉdega, avaanu ava vakɨɨdɨngʼana vave kɨɨnu kɨpamato pa kʉvomba ɨmbombo jya kʉmʼbuda ʉYɨɨsʉ. valɨkʉlonda ɨnzɨla ɨjya kʉmʼbudila ʉYɨɨsʉ.

Ʉlʉlʉndamano ʉlʉvaha lwa vaanu lukʉnkonga ʉYɨɨsʉ

7ɄYɨɨsʉ na vakongi va mwene vakɨgava vakabɨha kʉ nyanza, ʉlʉlʉndamano ʉlʉvaha lwa vaanu lʉlɨkʉmwitsila. Avaanu avo vaahʉmile kʉ Galilaya, kʉ Yuuda, 8kʉ Yelusalemu, kʉ Idumaya, kʉ mwambo ɨjya Yolodani na mu mbasu itsa kʉ Tilo na kʉ Sidoni. Vaamwitsilaga ʉYɨɨsʉ pakʉva vaapʉliike imbombo itso itsyavombaga.

9Kʉmbele, ʉYɨɨsʉ akavavʉʉla avakongi va mwene ʉkʉta vahegeletse ʉwaato vʉve pawiipi, pakʉta ʉlʉlʉndamano lwa vaanu lʉngave jʉlukʉmʼbanyilitsa pwʉ jiingile ʉmwa. 10Aavavʉʉlile ewo pakʉva aavaponiitse avaanu vongosu. Lɨno, avaanu avaapiitsiga nʉ vʉkʉvɨlwa vakava vikulugana pa kʉlonda ʉkʉmwabaasa naveene vapone. 11Naveene avaale ni mepo imbiivi wʉ vikʉmbona ʉYɨɨsʉ vakɨlahɨɨla pavʉlongolo pa mwene, nʉ kʉlɨla vakata, “Ʉve veeve Mwana va Ngʉlʉve!” 12Ʉmwene ʉYɨɨsʉ akavabeetsa valeke ʉkʉvavʉʉla avaanu avange ʉkʉta ʉmwene vɨ veeni!

ɄYɨɨsʉ ihala avapositili kɨtsigo na vavɨlɨ

(Mataayo 10:1-4; Luuka 6:12-16)

13ɄYɨɨsʉ akatoga kʉ kɨdugala, akavɨɨlanga avakongi ʉwʉ aavanogilwe ʉmwene, naveene vakamwitsila. 14Pwʉ akahala kɨtsigo na vavɨlɨ (12), akavapa ɨlitaawa vapositili.#3:14 Vapositili Ɨlɨ litaawa lya Kɨyunaani. Ʉvʉganulu wa lyene kwʉ kʉta avaanu ʉwʉ vasuungʼilwe. Akavavɨɨka vave paninie nave, avasuungʼage kulʉmbɨlɨla, 15ikange vave na maka ga kʉhetsa imepo imbiivi. 16Avapositili ʉwʉ aavahalile vaale wʉ ava: ʉSimoni (ʉvɨ ʉYɨɨsʉ aampye ɨlitaawa ɨlɨ Petulo), 17ʉYakobo nʉ nnunaave ʉYohana, avaale vaana va Zebedayo (akavapa ɨlitaawa ɨlɨ Bonege, kwʉ kʉta vaana vanya nzasi), 18ʉAndeleya, ʉFilipo, ʉBatulumayo, ʉMataayo, ʉTomasi, ʉYakobo ʉva Alufayo, ʉTadeo, ʉSimoni ʉNkanaani#3:18 ɄSimoni ʉNkanaani ɄSimoni ʉjʉ aale na mataawa gavɨlɨ, lipamato vɨ Simoni Nkanaani, ɨlɨnge vɨ Simoni Nʼzelote (Mataayo 10:4; Luuka 6:15). Amataawa aga gavɨlɨ Nkanaani na Nʼzelote kwʉ kʉta ʉmuunu ʉnya vʉsʉʉkwa wa kʉva nʉ vʉvopolwa mu kɨlʉnga kya mwene ʉkʉhʉma kʉ Valooma. 19nʉ Yuuda Isikalioti, ʉvɨ ʉmwene kʉmbele aammendiime ʉYɨɨsʉ.

ɄYɨɨsʉ nʉ mbaha va mepo imbiivi

(Mataayo 12:22-32; Luuka 11:14-23; 12:10)

20ɄYɨɨsʉ wʉ ikile ʉkʉhʉma kʉ kɨdugala na vakongi va mwene, vakiingila mu nyumba. Ʉlʉlʉndamano ʉlʉvaha ʉlwa vaanu lʉkalʉndamana ikange, pwʉ ʉYɨɨsʉ na vakongi va mwene vakalemwa ʉkʉva nagʉ nsɨkɨ gwa kʉlya ɨkyakʉlya. 21Ʉvanyina na vanunaave va Yɨɨsʉ vakapʉlɨka ɨkulongwi ɨjyo. Vakahega valɨkʉbɨha kukʉntoola, manya vaatye, “Ʉjʉ agʉlwike!”

22Naveene avamanyisi va ndagɨlo avaahʉmile kʉ Yelusalemu vakata, “ɄYɨɨsʉ alɨ nʉ Belizebuli,#3:22 Belizebuli Ɨlɨ litaawa lya Setano, ʉmbaha va mepo imbiivi tsyoni. ʉmbaha va mepo imbiivi.” Kange valɨkʉta, “Kʉ maka ga mbaha ʉjwa va mepo imbiivi, iswɨma imepo imbiivi.” 23Pwʉ ʉYɨɨsʉ akavɨɨlanga, akavavʉʉla kʉ sihwananitso akata, “Ndeeti, ʉSetano alɨ na maka ga kʉhʉmya ʉsetano ʉjyʉnge? 24Vʉngave ʉvʉtwa vʉpalangʼiine sipʉga sipʉga nʉ kʉbɨɨgana, ʉvʉtwa ʉwa vutengejʉka. 25Vʉvʉle vʉle, avaanu va nyumba mamato vangapalangʼane vaveene, ɨnyumba ɨjyo jitengejʉka. 26ɄSetano namwene angɨpalangʼanie jyʉmwene,#3:26 ɄSetano namwene angɨpalangʼanie jyʉmwene Apa kwʉ kʉta ʉSetano ihʉmya imepo imbiivi mu vaanu. itengejʉka, ʉvʉmalɨlo wa mwene wiiva vʉsiike.

27“Ʉwajɨlweli wʉ ʉvʉ, nakʉli ʉmuunu ʉviweesa ʉkwingila mu nyumba jya muunu ʉnya maka pakʉta apoke isiinu sya mwene, kɨtsila kʉtala ankʉnge taasi. Lɨno angave ankʉngile ʉmuunu ʉnya maka ʉlya, iweesa ʉkʉpoka isyʉ silɨ mu nyumba jya mwene.

28“Tsa jɨlweli ndikʉvavʉʉla ʉkʉta, ʉNgʉlʉve alavasyɨkɨla avaanu imbiivi tsa veene tsyoni paninie na madʉsi gooni. 29Lɨno, ʉvʉsyɨkɨlo navʉkʉli kʉ muunu ʉvɨ angave ikʉnʼdʉka ʉMepo ʉMbalatse, ʉmuunu ʉjʉ iveetsaga nʉ vʉtulanongwa wa sikutsooni.” 30ɄYɨɨsʉ akatsova ewo ʉlwakʉva avamanyisi va ndagɨlo avo vaateetsaga alɨ nɨ mepo ɨmbiivi.

Avalʉkololwe va jɨlweli va Yɨɨsʉ

(Mataayo 12:46-50; Luuka 8:19-21)

31Ʉvanyina va Yɨɨsʉ paninie na vanunaave vakasika, vakɨɨma panzi pa nyumba ʉmwʉ aale, vakasuungʼa ɨkulongwi ʉkʉta ahʉme kʉnzi kʉ veene. 32Mu nyumba mulya vaalemwo avaanu vongosu avaataamile vikʉmpʉlɨhɨtsa ʉYɨɨsʉ, vakambʉʉla vakata, “Lola, ʉvanyina vaave paninie na vanunaavo valɨ panzi, vikʉkʉlonda.” 33ɄYɨɨsʉ akavaanda akata, “Ʉjyʉva vango na vanuuna vango wʉ vaani?” 34Akavalola valya avaantsʉngʉtye imbasu tsyoni akata, “Ʉjyʉva vango na vanuuna vango wʉ ava. 35Lola, ʉmuunu ʉvaveetsaga ʉvɨ ivomba itsinogye pamiiho ga Ngʉlʉve ʉjwa vɨ nnuna vango, vɨ mmaatsa vango, ikange vɨ jyʉva vango.”

Currently Selected:

Maliko 3: zga

Highlight

Copy