Sơnròp Gơlik Gơs 41
41
Jôsep yal jơnau gơtha mpau Pharaôn dê
1Tơnơ̆ mơ bàr nam, Pharaôn gŏ dô bơta mpau, khai ơm ntào di gah hiòng Nil. 2Do, poh nơm kơnrồ lơmă mơ niam guh bơh di hiòng Nil, mơ bol gơ sa ñhơt tòm ƀlàng. 3Mơ poh nơm kơnrồ ndai, rgai rgong, ò niam guh jat tơnơ̆ bơh hiòng Nil, mơ ntào rềp di ală kơnrồ lài di gah hiòng. 4Poh nơm kơnrồ rgai rgong sa loan poh nơm kơnrồ lơmă niam. Gen Pharaôn kah rngal.
5Gen khai bic wơl mơ gŏ bơta mpau dơ̆ bàr. Khai gŏ poh sơnyùr kòi să, niam lik bơh dô đòm bal. 6Mơ gơs poh sơnyùr kòi nsiap mơ neh ro tài bơh càl đah mattơngai lik khồm gơ, hòn jat kòi ne. 7Poh sơnyùr kòi nsiap loan poh sơnyùr kòi să niam. Gen Pharaôn kah rngal mơ git hơ̆ la dô bơta mpau.
8 #
Dan 2:2. Àng drim hìng, nùs tồr khai ò suk ơm gen khai hòi ală cau pơlìn#41:8 Jơnau do kung gơs gơtha la cau bơjơu, cau sền dà. mơ ală cau jak chài tòm lơgar Ejiptơ lòt tus hơ khai. Gen khai yal bơta mpau bol hơ̆ in iat, mơya ò gơs cau lơi rgơi yal tơlik jơnau gơtha ală bơta mpau hơ̆ bơtau in.
9Gen cau kwang at bồ yò ñô đơs mơ Pharaôn lah: “Tŭ do añ kah glài añ. 10Lài òr bơtau neh gơhào gơjrañ mơ jàm cau kwang at bồ lơh ƀañ mơ añ tòm hìu jàm cau kwang at bồ ling dê. 11Kung tòm mang hơ̆ bol hi gŏ dô bơta mpau, bơta mpau kòp nă dê gơs jơnau gơtha is gơ dê. 12Tềng hơ̆ gơs dô nă cau pơnu Hebrơ, cau dĭ cau kwang at bồ ling dê. Bol hi yal khai in bơta mpau hi dê, mơ khai yal loh jơnau gơtha mpau kòp nă hi in. 13Gen gơlik gơs ngan be jơnau khai neh yal. Bơtau ai añ in gơs gơnoar wơl, mơ yồng cau kwang ne.”
14Gen Pharaôn sồr cau lòt hòi Jôsep. Bol khai toh mo Jôsep bơh hìu jàm. Khai koah sơnò tềp khai dê mơ tòmgơl ồi ào,#41:14 Tòmgơl ồi ào kung gơs gơtha la bơsoh ồi ào. gen lòt tus mơ Pharaôn. 15Pharaôn đơs mơ Jôsep lah: “Añ neh gŏ dô bơta mpau.” 16Jôsep ho lah: “Hơ̆ ò di la bơh añ, mơya hơ̆ la bơh Yàng Tom Trồ ai kơnràñ in dô jơnau ho wơl hừh nùs.” 17Gen Pharaôn đơs mơ Jôsep lah: “Tòm bơta mpau añ jê, añ ơm ntào di gah hiòng Nil. 18Do, poh nơm kơnrồ lơmă niam guh bơh di hiòng mơ gơ sa ñhơt tòm ƀlàng. 19Lồc behơ̆, poh nơm kơnrồ ndai rgai rgong, ò niam guh bơh tơnơ̆, añ òhềt gơs tŭ lơi gŏ kơnrồ iơh behơ̆ tòm lơgar Ejiptơ. 20Poh nơm kơnrồ rgai rgong hơ̆ sa loan poh nơm kơnrồ lơmă niam lài hơ̆. 21Tơnơ̆ mơ tŭ gơ sa loan jơh tòm kơndul, gen kung be ò sa; bơh ală kơnrồ hơ̆ gam rgai iơh be òs. Gen añ kah rngal. 22Lồc behơ̆, añ gŏ bơta mpau tai, do, gơs poh sơnyùr kòi să niam lik bơh dô đòm bal. 23Mơ gơs poh sơnyùr kòi nsiap mơ neh ro tài bơh càl đah mattơngai lik khồm gơ, hòn jat kòi ne. 24Mơ poh sơnyùr kòi nsiap loan poh sơnyùr kòi să. Añ neh yal bơta mpau do ală cau bơjơu in, mơya ò gơs cau lơi rgơi yal jơnau gơtha gơ dê.”
25Jôsep đơs mơ Pharaôn lah: “Bàr bơta mpau kơnràñ neh gŏ hơ̆ gơs mìng dô gơtha lơm; Yàng Tom Trồ neh ai kơnràñ in git lài ală broă Yàng rơp lơh. 26Poh nơm kơnrồ lơmă hơ̆ la poh nam, poh sơnyùr kòi să hơ̆ kung la poh nam. Hơ̆ la mìng dô bơta mpau. 27Poh nơm kơnrồ rgai rgong guh bơh tơnơ̆ poh nơm kơnrồ lài hơ̆ la poh nam, mơ poh sơnyùr kòi nsiap mơ neh ro tài bơh càl đah mattơngai lik khồm gơ, hơ̆ la poh nam jơgloh rung. 28Hơ̆ la bơta añ neh đơs mơ kơnràñ: Yàng Tom Trồ neh ai kơnràñ in git ală broă Yàng rơp lơh. 29Do, tòm làm lơgar Ejiptơ, tòm poh nam rơp gơs phan ngui sa wil tơl lìu làc. 30Mơya tơnơ̆ mơ hơ̆ rơp gơs poh nam jơgloh rung mơ cau rơp hŭi bơta lìu làc hơ̆, mơ bơta jơgloh rung hơ̆ rơp lơh siơ̆u rƀah kơnjơ̆ ngan. 31Làng bol ò gŏ tai bơta wil tơl lìu làc hơ̆ tài bơh bơta jơgloh rung pơnjat gơ la dờng ngan. 32Dilah kơnràñ gŏ bơta mpau bàr dơ̆ hơ̆ la bơh Yàng Tom Trồ neh lơh nền bơta hơ̆ rau, gen Yàng rơp lơh gơlik gơs mhar mo. 33Tŭ do kơnràñ sac rwah tĕ dô nă cau jak chài mơ git kơrhia, ai khai in at bồ lơgar Ejiptơ. 34Kơnràñ kung bơtào gơs ală cau gơnoar sền gàr tòm lơgar, nàng bol khai in pơjum dô pơnah pram tòm ală phan sa hòn tòm poh nam wil tơl lìu làc hơ̆. 35Bol khai pơjum tơrgòm jơh phan sa tòm poh nam wil tơl lìu làc rơp tus, mơ pơjum tơrgòm kòi neh gơs tòm tiah gơnoar Pharaôn dê nàng gơs phan sa prap tềm tòm ală ƀòn, mơ ai bol khai in sền gàr gơ. 36Ală phan sa do pal prap tềm nàng sa tòm poh nam jơgloh rung rơp tus tòm lơgar Ejiptơ nàng lơgar do in klàs chơt bơh bơta jơgloh rung hơ̆.”
Jôsep gơs cau kwang at bồ lơgar Ejiptơ
37Ală jơnau do niam nùs Pharaôn mơ ală cau duh broă khai dê. 38Pharaôn đơs mơ ală cau duh broă khai dê lah: “Bol he jòi gŏ dô nă cau be cau do, gơs hwềng Yàng Tom Trồ dê sơl ơ?” 39Pharaôn đơs mơ Jôsep lah: “Bơh Yàng Tom Trồ neh sơnio#41:39 sơnio: Cil: sơnđah. mê in git ală broă do, gen ò gơs cau lơi jak chài mơ git kơrhia be mê tai. 40#Broă 7:10.Behơ̆ mê rơp at bồ hìu nhă añ jê, mơ jơh làng bol añ jê rơp jat jơnau mê dê. Añ rơp dờng rlau mơ mê mìng tòm sơbàn añ jê lơm.” 41Pharaôn đơs tai mơ Jôsep lah: “Sền tĕ, añ ai mê in gơs gơnoar làm jơh lơgar Ejiptơ.” 42#Dan 5:29.Pharaôn hồ sơmbiat bơh di tê khai dê mơ tơndò di tê Jôsep, mơ tơnsoh ào mơ bài che dơmài mơ tơnwan rơnjài màh di ngko khai. 43Gen cau bơtau ai khai in nggui tòm rơndeh tơnơ̆ mơ rơndeh cau bơtau, gơs cau lòt lài mơ driau lah: “Cùn gơltang tĕ!” Behơ̆, Pharaôn pồ bơtào Jôsep gơs gơnoar tòm làm jơh lơgar Ejiptơ. 44Pharaôn đơs mơ Jôsep lah: “Añ la Pharaôn, mơ dilah ò gơs mê gen ò gơs cau lơi tòm làm lơgar Ejiptơ rgơi pò tê mơ pò jơng hơđang ò.”
45Pharaôn ai sơnđan Jôsep la Japhenat Paneah#41:45 Japhenat Paneah: gơtha la “cau dong tă hala cau prap gàr bơta kis”. mơ ai khai in Asenat, kòn ùr Pôtiphera, cau gơnoar ơn phan duh khoai ƀòn Ôn dê, nàng khai in bau. Mơ Jôsep lòt còp làm tòm lơgar Ejiptơ. 46Jôsep neh tơl pe jơt nam tòm tŭ khai sơntòm duh broă Pharaôn bơtau Ejiptơ. Behơ̆, khai lik bơh Pharaôn mơ lòt còp làm tòm lơgar Ejiptơ.
47Tòm poh nam wil tơl lìu làc, ù tơnggơs oă, bềng lìu. 48Gen Jôsep pơjum tơrgòm jơh phan sa tòm poh nam hơ̆ tòm lơgar Ejiptơ mơ prap phan sa do tòm jơh ală ƀòn, tòm kòp ƀòn khai prap tềm phan sa ală sre gùt dar ƀòn hơ̆ dê. 49Behơ̆, Jôsep pơjum tơrgòm kòi oă ngan, be bràs dàlềng, tian gơs cau ò jai kòp tài bơh oă ir.
Jôsep tơnggơs Manase mơ Epraim
50Lài mơ tŭ tus di nam jơgloh rung, gen Asenat, kòn ùr Pôtiphera, cau gơnoar ơn phan duh khoai ƀòn Ôn dê, deh Jôsep in bàr nă kòn klau. 51Jôsep sơnđan kòn tơnhoa khai dê la Manase#41:51 Manase: Sơnđan do gơs sap đơs tòm toh be jơnau Hebrơ gơs gơtha la “lơh hŭi”. bơh khai đơs lah: “Yàng Tom Trồ neh lơh añ in hŭi bơta bòl glar, mơ jơh hìu nhă bèp añ jê.” 52Khai sơnđan kòn dơ̆ bàr la Epraim,#41:52 Epraim: Sơnđan do gơs sap đơs tòm toh be jơnau Hebrơ gơs gơtha la “cồng nha oă ngan”. bơh khai đơs lah: “Yàng Tom Trồ lơh añ in gơlik gơs pas sơm tòm lơgar añ kong bòl glar.”
Sơntòm bơta jơgloh rung
53Poh nam wil tơl lìu làc neh sir tòm lơgar Ejiptơ. 54#Broă 7:11.Gen sơntòm poh nam jơgloh rung, be jơnau Jôsep neh đơs bơh lài. Jơh ală lơgar ndai kung gơs bơta jơgloh lơm mơya làm lơgar Ejiptơ gơs phan sa. 55#Jang 2:5.Mơ tòm tŭ làm lơgar Ejiptơ gơs jơgloh gen làng bol dan phan sa mơ Pharaôn. Pharaôn đơs mơ làng bol lah: “Lòt tĕ tus mơ Jôsep, mơ lơh jat be jơnau khai sồr bol mê.” 56Tòm tŭ làm lơgar gơs jơgloh rung gen Jôsep pò ală đam kòi nàng tac làng bol Ejiptơ in; tòm lơgar sơlo jơgloh oă tai. 57Mơ làm jơh ală lơgar lòt tus hơ Ejiptơ nàng pơl kòi mơ Jôsep, tài bơh gơs bơta jơgloh rung ngan tòm làm dunnia.
Currently Selected:
Sơnròp Gơlik Gơs 41: KPM2018
Highlight
Share
Copy
Want to have your highlights saved across all your devices? Sign up or sign in
© 2018 United Bible Societies. All rights reserved.
