Juan 1

Diospa Simi Nisqan runaman tukun

1Qallariypeqa Simi Nisqa sutiyoj karqapuni.

Chay Simi Nisqaqa Dioswan kasharqa,

chay Simi Nisqataj Diospuni karqa.

2Paymin qallariypi Dioswan karqa.

3Diostaj tukuy imata paynejta ruwarqa,

ruwasqa kajmantataj mana paywanqa mana imapis ruwasqachu karqa.#Col 1.15-17; Heb 1.2.

4Simi Nisqa sutiyojtaj tukuy ima ruwasqa kajman kawsayta qorqa,

chay kawsaynintaj k'anchay jina runakunaman Diosmanta sut'ita rikuchin.

5Chay k'anchaytaj laqhapi lliphipin,

laqhataj k'anchayta mana jayk'ajpis wañuchiyta atenqachu.

6Dios uj runata kachamorqa, sutintaj Juan karqa. 7Payqa chay k'anchaymanta runakunaman willananpaj testigo jina jamorqa, paypa nisqannejta tukuy runakuna chay k'anchayta jap'ikunankupaj.#Mt 3.1-12; Mc 1.1-8; Lc 3.1-9,15-17. 8Mana Juanchu chay k'anchay karqa, manachayqa pay k'anchaymanta willanallanpaj kachamusqa karqa. 9Cheqa k'anchayrí tukuy runaman k'anchananpaj kay pachaman jamusharqa.

10Simi Nisqa sutiyojqa paypa ruwasqan kay pachaman jamorqa. Chaywanpis runakunaqa pay pichus kasqanta mana rejserqankuchu. 11Payqa llajta masinkunaman jamorqa, paykunatajrí payta qhesacharqanku. 12Aswanpis tukuy pikunachus paypi atinikuspa mana qhesacharqankuchu,#1.12 Diospi atinikuy: Runa tukuy sonqo Diospa nisqanmanta jap'ikun. Dios nin Churin Jesucristonejta pichus tukuy sonqo payman kutirikojkunata qhespichinanta. Maypachachus runa tukuy sonqo Diospi atinikun, chaypacha wiñay kawsayta jap'in. Jn 3.14-16; 6.40; 11.25-26; 20.31. chaykunaman pay atiyta qorqa Diospa wawankuna ruwasqa kanankupaj. 13Paykunataj Diospa wawankuna kanku mana qharej yumasqanraykuchu, nitaj runa munasqanraykuchu, nillataj pi qharej munayninmantachu, manachayqa Dios munasqanrayku.

14Chay Simi Nisqaqa runaman tukorqa, jinataj noqayku ukhupi tiyakorqa. Chantá noqayku jatun kayninpa lliphipiyninta rikorqayku,#1.14 Jatun kayninpa lliphipiynin: Chay niyta munan Diosqa ayllunta qhespichinanpaj sinch'ita llank'asqanta. 1 R 8.10-11; Is 6.3; 58.8; 60.1; Jn 2.11; 17.5. chaytaj Tata Diospa uj k'ata Churin jatun kayninpa lliphipiynin karqa. Paypitaj munakuywan, chantá cheqa kajwan ima may jinapuni karqa.

15Paymanta jatunmanta parlaspa, Bautizaj Juan nerqa: Kaymá qhepayta chay jamojqa. Chaywanpis payqa noqamanta aswan kurajmin, imaraykuchus manaraj noqa kashajtiy, pay karqañapuni, nispa.#Jn 1.30.

16Simi Nisqa sutiyojpa may chhika k'acha kayninwan Diosqa kutin kutinta may jinata saminchawanchej. 17Diosqa kamachisqankunata Moisesnejta qorqa. Chaywanpis Diospa mana tukukuyniyoj munakuyninta, cheqa kaynintawan Jesucristonejta qowanchej. 18Mana pipis Diosta jayk'ajpis rikorqachu. Chaywanpis uj k'ata Churin, pichus Diosmin, pitajchus Tata Dioswan ujchasqa kawsan, paymin Tata Diosta rejsichiwanchej.

Bautizaj Juanqa Jesucristomanta willan

(Mt 3.11-12; Mc 1.7-8; Lc 3.15-17)

19Chaypacha Jerusalenmanta judiokunaj kurajninkukuna kacharqanku sacerdotekunata, chantá levitakunata ima Juanta tapunankupaj: Pitaj qan kanki? nispa. 20Juantaj sut'ita willarqa: Mana noqachu Diospa kachamusqan Cristo kani, nispa.

21Tapullarqankutaj: Chantá, pitaj kankiri? Eliaschu? nispa. Juantaj nerqa: Mana paychu kani, nispa.

Jinapis sacerdotekuna, chantá levitakuna ima tapullarqankupuni: Pichus jamunan karqa, Diosmanta chay sut'inchajchu kanki? nispa. Juantaj kuticherqa: Manapuni, nispa.

22Chantá nerqanku: Pipunitaj qan kankiri? Niwayku ari, pikunachus kachamuwarqayku, chaykunaman willanaykupaj. Qanmanta imá niwaykumantaj? nispa.

23Chantá Juanqa Diosmanta sut'inchaj Isaiaspa nisqanman jina kuticherqa: Noqaqa ch'innejpi qhaparej kani: Tukuyta Kamachej Dios jamunanpaj ñanta pichaychej, nispa.#Is 40.3; Mt 3.3.

24Chantá Juanwan parlanankupaj kachasqa karqanku, chay fariseokuna 25tapullarqankutaj: Sichus mana Cristochu kanki, nitaj Eliaschu, nillataj Diosmanta sut'inchajchu chayqa, imaraykutaj runakunata bautizankiri? nispa.

26Jinapi Juan kuticherqa: Noqa runata yakuwan bautizani. Chaywanpis qankuna ukhupi uj runa tiyan, qankunataj mana payta rejsinkichejchu. 27Paymin qhepayta jamushan. Noqarí mana paypa wata runan kanaypaj jinallapischu kani, nispa.#Mc 1.7.

28Chayqa Jordán mayu chimpapi, Betaniapi karqa, maypichus Juan runakunata bautizasharqa, chaypi.

Jesusqa Diospa churasqan Cordero

29Q'ayantin, Bautizaj Juan Jesusta payman jamushajta rikuspa, nerqa: Kaymá Diospa Corderonqa,#1.29 Jesusta sutichan: “Diospa Corderon”, nispa. Chay yuyarichin, maypachachus israelitakuna Pascua raymipi uj corderota ñak'aj kanku, wañunamanta Diosnejta qhespichisqa kasqankuta yuyarikuspa, chaymanta. Ex 12.1-24; 1 Co 5.7; 1 P 1.18-19; Jn 19.36. Yuyarichillantaj israelitakuna sapa p'unchay uj corderota ñak'aspa Diosman jaywaj kanku, chaymanta. Ex 29.38-42. Jinallataj Jesusta Diospa Corderon nispa, parlan Jesusqa kamachi jina may jinata ñak'arinan kasqanta. Is 53.4-7; Hch 8.32. Chantá Jesusta Diospa Corderon nispa, nishallantaj Jesusqa millay kajta ruwajta atipasqanmanta. Ap 17.14. pichus runakunaj juchankuta pampachaj. 30Paymanta noqa nerqani: Payqa noqamanta aswan kurajmin, imaraykuchus manaraj noqa kashajtiy, pay karqañapuni, nispa.#Jn 1.15,27. 31Noqataj mana yacharqanichu pipunichus kasqanta. Chaywanpis israelitakunata yakuwan bautizasharqani payta rejsinankupaj, nispa.

32Juan willallarqataj: Santo Espirituta urpita jina janaj pachamanta urayk'amojta rikorqani, chaytaj Jesusman tiyaykorqa. 33Noqa manaraj payta rejsishajtiy, pichus yakuwan bautizajta kachamuwaj niwarqa: Pimanchus Santo Espíritu urayk'amuspa tiyaykojta rikunki, chaymá Santo Espirituwan runakunata bautizanqa, nispa. 34Noqataj ajina kasqanta rikorqani, sut'inchanitaj Jesusqa Diospa Churin kasqanta, nispa.

Jesuspa ñawpaj kaj yachachisqankuna

35Q'ayantenqa Bautizaj Juan iskay yachachisqankunawan chayllapitaj kasharqa. 36Juantaj chaynejpi Jesusta purishajta rikuspa, nerqa: Rikuychej, Diospa Corderon kaypi kashan, nispa.

37Chay iskay yachachisqankunataj Juanpa nisqanta uyarispa, Jesuspa qhepanta rerqanku. 38Jesustaj qhepanta jamushasqankuta rikuspa, paykunata taporqa: Imatataj mask'ashankichejri? nispa.

Paykunataj kuticherqanku: Yachachej, pejpa wasinpitaj tiyakushankiri? nispa. 39Chantá Jesús kuticherqa: Jaku rikumunkichej, nispa.

Chantá Juanpa yachachisqankuna rispa, maypichus Jesús tiyakushasqanta rikorqanku. Chaypacha yunta phaskaray jinaña kasqanrayku, paykuna Jesuswan parlarikuspa qhepakorqanku.

40Pikunachus Juanpa nisqanta uyarispa Jesuswan risqanku, chaykunamanta ujnin Simón Pedroj wawqen Andrés karqa. 41Paytaj ñawpajta wawqen Simonta mask'arqa. Tarispataj, nerqa: Mesiasta#1.41 Mesías: Hebreo rimaypi, griego rimaypitaj niyta munan “Cristo”. Iskaynin suti niyta munan: “Jawisqa kaj”. tariyku, nispa. Hebreo rimaypi Mesías ninku, griego rimaypitaj Cristo.

42Chaymantá Andresqa Simonta Jesusman pusamorqa. Jesusrí payta allinta qhawarispa, nerqa: Qanqa Jonaspa churin Simón kanki. Kunanmantarí sutiykeqa Cefas kanqa, nispa. Arameo rimaypi Cefas ninku, griego rimaypitaj Pedro.

Jesusqa Felipeta, Natanaeltawan ima wajyan

43Q'ayantenqa Jesús Galileaman rishaspa, Felipeta tarerqa, nerqataj: Jaku, noqawan rina, nispa.

44Felipeqa Betsaida llajtamanta karqa. Andreswan, Pedrowanpis chayllamantataj karqanku. 45Chantá Felipe Natanaeltañataj mask'aj rerqa, tarispataj, nerqa: Nazaret llajtamanta Joséj churin Jesusta tariyku, pimantachus Moisés kamachisqa qhelqapi nerqa, chayta. Diosmanta sut'inchajkunapis paymanta parlallarqankutaj, nispa.

46Natanaeltajrí kuticherqa: Nazaret#1.46 Nazaret: Juch'uy llajta karqa. Nazaret llajtitaqa mana kasu ruwana llajta karqa. llajtamanta allin runa rikhurimunmanchuri? nispa. Felipetaj nerqa: Jamuy ari, chantá qan kikiyki rikunki, nispa.

47Chantá Jesús Natanaelta payman qayllaykushajta rikuspa, nerqa: Kay runaqa israelitapuni, imaraykuchus payqa mana pitapis q'otiyanchu, nispa.

48Natanaeltajrí taporqa: Maypitaj noqata rejsiwarqankiri? nispa. Jesustaj kuticherqa: Manaraj Felipe wajyashasojtin, noqa rikorqayki higo sach'a urapi kashajtillaykiraj, nispa.#1.48 Jesús Natanaelta ajinata nispa, niyta munan pay runaj sonqon ukhuta sumajta rejsisqanta. Jn 2.24-25; 4.17-19,29; 13.11; 16.30.

49Chaymanta Natanael, nerqa: Yachachej, qanqa Diospa Churin kanki, Israelpa Kuraj Kamachejnintaj, nispa.

50Jesustajrí kutichispa, nerqa: Higo sach'a urapi kashajtiyki rikorqayki, nispa nisusqayraykuchu noqapi atinikushanki? Chaymantapis aswan t'ukuna ruwaykunataraj rikunki, nispa. 51Jesús nillarqataj: Kayta sut'ita niykichej: Kunanmanta ñawpajmanqa qankuna janaj pachata kicharisqata rikunkichej, Diospa angelninkunatataj Runaj Churinman urayk'amushajta, wicharishajtataj, nispa.

Currently Selected:

Juan 1: DQDC

Highlight

Copy