yohane 18

tʉtpʉta 'o iesu

(matai 26:47-56; maluko 14:43-50; luka 22:47-53)

1ataveisi no maica ci 'inoli 'o iesu, cu nʉthʉ 'o tesi ho e'ohʉ, sucaefi to va'hʉ kiilong. panto conci ezoyʉ to ic'o, mo yʉmeʉmʉ 'o iesu ho i'o tesisi. 2isi cohivi to moso himhohioa ho phieni 'o iesu ci yuta na ic'o, maica ho la lua yu'eteuyunu to ic'o 'o iesu ho i'o tesisi. 3mo engochʉ to heetai to looma 'o yuta, yuptepteilʉ 'o ihe skuna to saisi ho coufalisai ci kengsacu to seiten ho yʉmeʉmʉ to 'ayumona to ezoyʉ. ihe hafneni to soanothʉ, maezo mʉpʉtʉ to lampu ho ito veingi. 4isi cohivi to iesu 'ote esmi ta feangosi ci hi'hioa, ko'ko emozu ohcum'u ho tuocosi: <siya na temu i'ima?>

5ihe yut'inga: <'o counazalo ci iesu.>

yainca to iesu: <'aeno a'o.>

ne mio, 'omo mhino to iesu ci yuta mo bi'upu yac'ʉ. 6ne isi yainca to iesu <'aeno a'o>, mo acʉhʉ boevovei, ho e'puyu ta ceoa. 7isi ivaha tuocosi to iesu: <siya na temu i'ima?>

ihe yut'inga: <'o counazalo ci iesu.>

8yainca to iesu: <'aos'ocueno eʉsvʉta muu, 'aeno a'o. hoci a'o na temu i'ima, poa mongoi na hin'i.> 9homo maica 'e e'e to iesu, aʉla emia to nia auyusi e'e: <amo, 'e osko pafeni a'o ci cou, uk'a cimo cihi ci os'o tipeoha.>

10mo smu'iei to conci poyave 'o saimong petelo; isi epuska 'o poyavesi ho teoca 'o maloku ci soskuskunu to taisaisi, hic'oha 'o vhona to koyusi. 11mi'usni to iesu 'o petelo ho yainca: <siya si poyave! oskon'asi ta'unano o'a te'o mimha ima 'e isi faeni a'o to amo'u ci mo mayʉmʉ?>

yonto tuhcu to 'aana

12'omo cono evasʉzʉ ci heetai to looma ho i'o fafeihahe, a'upu 'o kengsacu to seiten to couyutaya ihe tʉtpʉta 'o iesu, hocu seo'eisi. 13ihe aueva e'usna to tuhcu to 'aana; i'e 'aana zou ak'i tomo taisaisi to tonsoha ne mio ci kaiyafa. 14i'e kaiyafa ohsila i'nanʉska mi'usni 'o couyutaya ho yainca, poa nomio tamo botngonʉ 'emo cihi ho mcoi. te auseoseolʉ ci hi'hioa.

meoo'te honga to petelo 'o iesu

(matai 26:69-70; maluko 14:66-68; luka 22:55-57)

15'o saimong petelo ho i'o mo cihi ci tesi mo to'ofeihni to iesu; i'o tesi ic'o lasi na'na honga to taisaisi, ko'komo to'ofeihni to iesu ho yʉmeʉmʉ to coca to taisaisi. 16mo nongaco to phingi to yafana 'o petelo. cu yuyafo 'omo yupa bohngʉ 'o taisaisi ci tesi, mi'usni 'ola pocengi to phingi ci oko no mamespingi, ho ya'ei. isicu hafa 'o petelo ho yʉmeʉmʉ. 17i'ola lepocengi to phingi ci oko no mamespingi isi pas'osi 'o petelo, yainca: <o'as'aeno maezo tesi to ic'o na suu?>

yainca to petelo: <o'as'a a'o!>

18mo na'no soyʉmʉ ne mio, 'o soskuskunu ho i'o kengsacu mo soupuzu, acʉhʉ yac'ʉ ho ngicu; mo maezo smacmu'u 'o petelo, bi'upu yac'ʉ ho ngicu.

tuucocosi to taisaisi 'o iesu

(matai 26:59-66; maluko 14:55-64; luka 22:66-71)

19'o taisaisi isi mi'usni 'o iesu ho tuucocosi namo yupa natʉ'ca 'o tesisi ho ina lasi hia mo'ma'cohio. 20yut'inga to iesu: <ho la'u mi'usnu ta cou la'u conino apa'to ho ya'ei. la'u lua yonto kaitoo ho ito seiten, to lahe 'oyona yu'eteuyunu to couyutaya, mo'ma'cohio to cou, o'a la'u ahtu aotoefʉngʉ ho mo'engho no cuma. 21mainci osko tuucocosi a'o? ma tuocosi 'o mosola tmalʉ ta e'e'u ci cou, tehe cohivi cuma na o'ucula ma'e'engha.>

22ne isi engha to iesu 'e e'e eni, isi t'oplikvi tomo bisahciei ci kengsacu 'o iesu, yainca: <ci miko smeecʉ'ho maica ci hia yut'ingi ta taisaisi!>

23yainca to iesu: <honci'u mat'epo, 'atekoeno eʉsvʉta a'o namo o'te emio, honci emio, cuma na koasu tutva a'o?>

24ne mio ihec'on'a seo'eisi 'o iesu, 'o 'aana isi ivaha hafa uhto taisaisi ci kaiyafa 'o iesu.

ivaha meoo'te honga to petelo 'o iesu

(matai 26:71-75; maluko 14:69-72; luka 22:58-62)

25ne mio. mioc'on'a yac'ʉ 'o saimong petelo ho ngicu. panto mo mi'usnu ci cou ho yainca: <o'as'aeno maezo tesi to ic'o na suu?>

mo peeco 'o petelo ho yainca: <o'asa'a a'o!>

26panto cihi ci soskuskunu to taisaisi. zou 'oahngʉ to ohsi hiakoyua to petelo, yainca: <o'a os'os'aeno aiti ne miko no'upu to ic'o nemo yonto ezoyʉ?>

27isi ivaha yainca to petelo: <ma o'a!> tuhcusi ne mio, micu muni 'o teo'ua.

yʉsvʉta to tuhcu to pilato

(matai 27:1-2, 11-14; maluko 15:1-5; luka 23:1-5)

28ihe hafa i'mi to emoo to kaiyafa 'o iesu ho po'usna to sootokufu. ne mio micu moseo'ohngʉ. 'o matataicini to couyutaya o'amo yʉmeʉmʉ to sootokufu, maica te bucocofkoya homo seolʉa no memesi, te akoyu no bonʉ no eabobonʉ no meem'esa'o. 29micu yuyafo 'o pilato, tuocosi: <kuisi no cuma na temu epica ho temu ehpʉngneni 'e cou eni?>

30ihe yut'inga: <hoci o'a mita peiskuzkuzo, o'a temia aha'va hafa uso suu.>

31mi'usni to pilato ho yainca: <'atemu eno iachia hafa emo'usnu maita'e, maino hoolicumu ho yʉsvʉta na taini.>

ihe yainca: <at'inghi mimza eno'so yaa tonʉ no yʉsvʉtʉ ho poa mcoi 'e cou.> 32na eni isi aʉla emia 'o e'e to iesu, tena mainenu na tasi hia mcoia.

33mo ivaho yʉmeʉmʉ to sootokufu 'o pilato, eyoho'a 'o iesu, tuocosi: <zou honte ta couyutaya na suu?>

34yut'inga to iesu: <'e hiasu tuocosʉ mio i'mi ta iachisu, hocieno o'te tmamio no mocmo ho lahe yu'e'engha a'o?>

35yainca to pilato: <oskon'asi ta'unano couyutaya a'o? ma iachisu 'oahngʉ ho i'o masasaisicoo ihe toveineni a'o na suu. cuma na oskos'a hioa ci hi'hioa?>

36yainca to iesu: <'o hpʉhpʉngʉ'u o'a mo tma'usnu ta hpʉhpʉngʉ tan'e; hoci tma'usnu tan'e na hpʉhpʉngʉ'u, 'ate ahtuo'te nomio a'o na 'oahngʉ'u ho yu'susuyumo, poa o'te tʉtpʉtneni ta emucu ta couyutaya a'o. 'o hpʉhpʉngʉ'u o'a mo tma'usnu ta hpʉhpʉngʉ tan'e!>

37yainca to pilato: <'ia maeno honte na suu?>

yut'inga to iesu: <zou honte a'o, ma e'esu eni. 'e te'o atuhca hioa zou 'akasi 'e so'emio, eni 'e koa'u yunsou, maezo eni 'e koa'u uhta hpʉhpʉngʉ. namo afu'u tma'usnu no so'emio ci cou ahtuo'te tmalʉ ta e'e'u.>

38tuocosi to pilato: <zou cuma na so'emio?>

yʉsvʉta no mcoi 'o iesu

(matai 27:15-31; maluko 15:6-20; luka 23:13-25)

ivaho yuyafo 'o pilato, mi'usni 'o couyutaya ho yainca: <o'a os'o elʉa cuma na kuisi ta cou tan'e. 39at'inghi panto lamu at'oca ci hi'hioa, hola meem'esa'o lamu m'eya poesih'a 'omo cihi to isi poekotva. temu p'ea poesih'a 'e honte ta couyutaya?>

40ihe ivaha zozoya: <o'a temias'a taini! tuyafahe 'o palapa!> ('e palapa zou pak'i ci cou.)

Currently Selected:

yohane 18: bsnfe

Highlight

Copy