luka 6

e'usna no 'ansokunici

(matai 12:1-8; maluko 2:23-28)

1moso coni ci 'ansokunici, mo mito heoheome 'o iesu; mo tu'suesuecu to piyo ci mcuu to heome 'o tesisi, ta'mucmuca ho ana. 2ihecu aiti to piyo ci coufalisai, yainca: <mainci imu hioa si o'ante hioa homo 'ansokunici?>

3yut'inga to iesu: <'o tavite ho i'o fafeifeihasi ne moso sieo cuma na ohe hioa, o'a ohmulaeno ahta engha? 4moso yʉmeʉmʉ to seiten to hamo, mayo to isi sʉ'teni to hamo ci pang ho ana, yaeza p'o'upi 'o fafeifeihasi; 'e pang eni, tapeoha 'o saisi, hoci ana no mocmo ci cou te acʉha tamza no yuszozʉ to hoolicu.>

5isicu yainca to iesu: <'e okocou zou nooe'oca ta 'ansokunici.>

poa yov'o 'omo yu'oemi'mi 'o emucusi ci cou

(matai 12:9-14; maluko 3:1-6)

6mo h'unasi ci 'ansokunici, mo uhto kaitoo 'o iesu ho mo'ma'cohio to cou; to ic'o panto cihi ci cou. mo yu'oemi'mi 'o vhona to emucusi. 7panto lema'cohio seiso ho coufalisai, ihe 'ucia i'ima na o'amo emio to iesu, ko'ko peelʉi ehpʉngneni, mo bise'u ho huafeozi, aiti 'o iesu hoci aotothomʉ no tma'congo homo 'ansokunici. 8isi cohivi to iesu 'o 'tohʉngʉhe, cu mi'usni 'omo yu'oemi'mi 'o emucusi ci cou ho yainca: <yʉc'ʉ, yac'ʉ ta tuhcu tan'e!> micu yac'ʉ na ic'o. 9cu mi'usnu to botngonʉ 'o iesu ho yainca: <te'o tuocosi muu, e'usna no 'ansokunici, mo mainenu na hia esvʉtʉ to hoolicuto? peis'ʉ'ʉmnʉ hocieno peiskuzkuzo? to'usnu no nsou hocieno akuzkuzo no nsou?> 10isi mikuyungvi 'omo nokuyungu ci cou, atavei isicu mi'usni 'o ic'o ho yainca#<mi'usni 'o ic'o ho yainca> panto h'unasi ci tposʉ noana'o isi yainca <mi'usni 'o ic'o tmusʉsʉ'no ho yainca>.: <hoʉsʉzneni si emucu!> ne isicu hosngʉcveni to ic'o 'o emucusi, 'o emucusi micu yuovei ʉmnʉ.

11ihe na'na sʉ'nova, cu yupa toʉsvʉsvʉtʉ te yainenu nate hia mi'usni 'o iesu.

epeiya to iesu 'omo maskʉ ueso ci sitoo

(matai 10:1-4; maluko 3:13-19)

12moso conci hie, uhto hcuyu 'o iesu ho 'inoli, yonto ic'o ho cono feʉngna 'inoli to hamo. 13ne micu moseo'ohngʉ, isi eteuyuna to tuhcusi 'o tesi, i'mi ta taicohe ho epei tomo maskʉ ueso ci cou, yainca sitoo na tehe ongko. 14'o ongkohe zou saimong (ohsi tovahi to iesu ho poa petelo) ho i'o ohaesasi ci 'antole, yakovu ho yohane, fuili ho patolomai, 15matai ho tomas, oko to 'alofui ci yakovu ho i'omo ma'hi'usnu to nesintoo ci saimong, 16oko to yakovu ci yuta ho i'o moso atavei himhohioa ho phieni 'o iesu ci yuta ci coukaleo.

mo'ma'cohio ho aotothomʉ 'o iesu

(matai 4:23-25)

17mo nʉthʉ toyovcu to hcuyu 'o iesu ho i'o sitoo; mo acʉhʉ yac'ʉ ta poneo 'o iesu ho i'o 'enepio ci tesisi, 'omo yu'ec'ʉc'ʉ ci cou mo i'ngabo ne yutaya, 'elusalemu, ho hosa to aezonʉ to etʉpʉ ne tailo, saitong ho yu'eteuyunu to ic'o, 18te tmalʉ to iesu hote eʉsvʉsvʉtʉ, maezo tata'e no aotothoma na tma'congohe. i'o isi 'afeo'fu'a no h'aokuv'o ci cou mo maezo uso, a'vinano mo yov'oa. 19ihe toehunga 'ucia peuasa 'o iesu, maica mo yaa i'mi to feangosi ci tonʉ, poa yov'o 'o tma'congohe.

kokaekaebʉ ho nac'o

(matai 5:1-12)

20mo miezuhu to tesisi 'o iesu, mi'usni ho yainca:

<'ola aviovio ci cou. a'ʉmtʉs'a ʉm'ʉmnʉ;

na muu zou 'o'oko to hpʉhpʉngʉ to hamo!

21'ola ma'sisieo ci cou maitan'e a'ʉmtʉs'a ʉm'ʉmnʉ;

temu elʉ no yoseʉ!

'ola mongsi ci cou maitan'e a'ʉmtʉs'a ʉm'ʉmnʉ;

tenamu kokaekaebʉ!

22<nomio to okocou, ho ta'sʉsʉ'nova muu, hopsʉpseni muu, aokoe'iya muu, tapica no kokuzo na muu, temucu ʉm'ʉmnʉ! 23ne noana'o na nia maameoihe ohela yaica na lahe hia mi'usnu to eyongensa. no hiesi ho mio, temu pahpapika no temu hia kaebʉa, maica isi songacveni tomo atngaso ci temu hnoo ne pepe.

24at'inghi, 'emimu atngaso maitan'e temu ku'kuici,

maica micu amso na lamu hia kokaekabʉ!

25namo yoseʉ ci cou maitan'e. te ku'kuici,

maica tenamu sieo,

inamo cohcocvo no hia kaebʉ maitan'e te ku'kuici,

maica tenamu nac'o ho mongsi!

26<holahe toehunga tohmomoengʉneni ta cou na muu, pano tamu meamzi, maica na nia maameoihe ho mosola mi'usnu no meyoyongensa moso mo'engho tomo totiski ci e'e.>

e'usnu no ngohia na hangʉ

(matai 5:38-48; 7:12)

27<at'inghi, 'e mimu tmalʉ ta e'e'u, te'o eʉsvʉta muu, la ngohia na hangʉmu, aʉlʉlʉa 'ola asʉsʉ'no muu; 28temula tooyokeoi 'ola matkuzkuzo muu, 'inolineni 'ola aokoe'i muu ci cou. 29hocihe t'oplikvi si ciengona ta pinosu, moeza poa t'o'upneni si ciengonasi! hocihe pano te ti'eingi no osko aoskopa, moeza poa tas'upneni na osko as'oya! 30hoci pano tehe p'enia suu, la faeni; hoci panonte mayo no macucumasu, teav'a usa ho p'eyoveiya. 31hocimu mici noa yainenu no mocmo ci cou, 'atemueno yaeza yaica na mocmo ci cou.

32<hocimuc'o ngohia nala himngonghi muu ci cou, cuma nate koa etanveni? ac'ʉhʉ tola yaa kuisi ci cou 'alaheeno yaeza ngohia 'ola himngonghi ci cou! 33hocimuc'o aʉlʉlʉa 'ola aʉlʉlʉ muu ci cou, cuma nate koa etanveni? ac'ʉhʉ tola yaa kuisia ci cou 'alaeno maezo maicac'o 'o lahe hioa! 34hocimuc'o poa yuevaho no peisu na te ta'unano te meelʉ yoovei ci cou, cuma nate koa etanveni? 'omo yaa kuisi ci cou 'alaeno maezo maica ho poa yuevaho to peisuhe 'omo yaa kuisi ci cou, la maito hia man'i ho tasvoveiya! 35o'ate maica, temula ngohia na hangʉ, aʉlʉlʉa; hoci yuevaho no peisu na cou, teav'a totea no tasvoveiya. hoci maica tenamula tiou no atngaso ci hnoo, a'vinano tesi 'o'oko to sopepea ci hamo, maica ho lasi ieni no ma'cocacni ci 'tohʉngʉsi ho mi'usni 'ola pef'uhu ho kokuzo ci cou. 36temula ma'cocacni, mais'a 'o amomu pepe la ma'cocacni.>

'ote eayaezoyʉ no mocmo ci cou

(matai 7:1-5)

37<'otela yʉsvʉtʉ no cou, tesieno o'te yʉsvʉta to hamo na muu; teav'a topci no kuisi na mocmo, tesi o'te topci no kuisi to hamo na muu; temu peteongaso no cou, tesieno peteongasa to hamo na muu. 38hoci taha'vi na mocmo ci cou, 'atesi ahtao'te taha'vi to hamo na muu, a'vinano boemi no meoino peosvʉta, totazʉza ho hoʉtʉtʉkceni, pnanfi na temu peelʉi hafa, ngangcʉngcʉ ho faeni muu. hocimu boemi nomo mainenu ci peosvʉta ho meosvʉtʉ, tesi yaeza titheni nomo totiski ci peosvʉta to hamo ho peosvʉtneni muu.>

39isi yaeza mi'usni to iesu ho mo'engho to mo coni ci epo'usa, yainca: <na bʉkngʉ ci cou o'ate meelʉ eahafo no bʉkngʉ ho mino ceonʉ; hoci maica, 'ate ahtuo'te aepohʉ su'ayumonʉ no feongo. 40o'ate yuepehe no sensei na seito, at'inghi hocic'u tmaepʉngʉ tena totiski ta sensei.

41<mainci osko teolʉihe na mo subkongʉ no mcoo no nat'ohaesa ci yompuhu, ho o'te cumasa na mo yonta mcoosu ci pefotngʉ? 42mo yaa pefotngʉ si mcoosu, te mainenu hoci meelʉ mi'usnu no nat'ohaesasu ho yainca <<ohaeva, te'oeno iseafa simo subkongʉ ta mcoosu ci yompuhu>>? sila hia me'ʉ'ʉmnʉ ci cou, ma aueva yaa simo subkongʉ ta mcoosu ci pefotngʉ, teeno buhsansano ho 'iseafa na mo subkongʉ no nat'ohaesa ci yompuhu.>

evi ho beahci

(matai 7:16-20; 12:33-35)

43<'omo ʉmnʉ ci evi o'ate beahci nomo kuzo, 'o kuici evi maezo o'ate beahci nomo ʉmnʉ; 44na hia ʉmnʉ ho kuzo no evi tee humzi to beahcisi. o'atemu meelʉ yono cʉcʉmʉ ho toa beahci no moezunge, maezo o'ate meelʉ yono cʉcʉmʉ ho toa amcuyu. 45'omo ʉmnʉ ci cou; la i'mi to isi a'pʉ'pʉya to 'tohʉngʉsi cimo ʉmnʉ ho peiseafo tomo ʉmnʉ. 'omo kuici cou la i'mi to isi a'pʉ'pʉya to 'tohʉngʉsi ci kuzo ho peiseafo tomo kuzo. 'emo cihi ci cou cuma namo nongcʉngcʉ no 'tohʉngʉsi, 'aeno cuma nate pateafa ta ngayo.>

yuso ci totnguca

(matai 7:24-27)

46<mainci lamu yainca a'o <<nooe'oca, nooe'oca>>, ho o'te pee'ofeihni 'o la'u eutotaveineni ci e'e? 47te'o eʉsvʉta muu, inala uhta tuhcu'u, tmalʉ ta e'e'u ho a'ʉmta peis'ofeihni, mio mais'a mainenu ci cou? 48te mais'a 'ola mooyai emoo ci cou, peimsʉ'eona 'o ceoa, p'eyac'a to yakivayʉ 'o totngucasi. hocisi toemiza no fozu ci chumu 'e emoo, 'e emoo eni o'ate aot'ou, maica ho isi'so p'eʉlʉlʉa. 49at'inghi, 'ola tmalʉ ta e'e'u ho o'te peis'ofeihni, mo mais'a 'emo cihi ci cou, p'eyac'a to o'aisi teoʉlʉlʉi 'o totngucasi ci emoo, hocisi toemiza no chumu, tec'u osni oefʉ'ʉ 'e emoo ho a'ʉmtʉ meoino aon'oi!>

Currently Selected:

luka 6: bsnfe

Highlight

Copy