maluko 2
2
poa yov'o to iesu 'omo meaupsu'hu ci cou
(matai 9:1-8; luka 5:17-26)
1mohcu mipzohi, i'vaho yuovei to kapenong 'o iesu; ihe psoyom'a homo yonto emoo. 2botngonʉ ci cou mo yu'eteuyunu, yu'ec'ʉc'i to cou 'o aemana, ac'ʉhʉ to phingi uk'a ci mako pae'ohsa. nemo seolʉa no eʉsvʉsvʉtʉ 'o iesu, 3panto mo sʉptʉ ci cou ihe ngoevi 'omo cihi cimo tma'congo no meaupsu'hu te baito to iesu. 4maica homo angu botngonʉ 'o cou, o'a ihe peelʉi ngoe'uni to tuhcu to iesu. cu eh'ʉti 'o sofʉ to tuhcu to isi yoni to iesu, a'upa 'o sospoya tomo tma'congo ho pehtupeoha. 5isi aiti to iesu 'o singkoohe tamo maica ci cou, cu mi'usni 'omo tma'congo no meaupsu'hu ho yainca: <oko, isicu peteongasa na kuisisu.>
6piyo ci lema'cohio seiso mo yusuhngu to ic'o, yainca no 'tohʉngʉhe: 7<maincis'a smeecʉ'ho efnaso co e'e taini! tapeoha 'o hamo, siya nate yaa tonʉ no peteongaso no kuisi?>
8isi osnia hʉh'ʉti to iesu zou cuma na koyuhe, cu mi'usni ho yainca: <mainci mimu aac'o yaa maica ci koyu? 9hoci mi'usni 'emo tma'congo ho yainca <<cu peteongasa na kuisisu>> hocieno yainca <<yʉc'ʉ, yaasi sospoyasu hocu e'ohʉ>> nenusi nate sonʉhe? 10te'o mi'usnu muu ho soomei. 'e okocou mo yaa tonʉ no meteongaso no kuisi homo yonta ceoa.> isicu mi'usni 'omo meaupsu'hu ci cou ho yainca: 11<te'o cucufni suu, yʉc'ʉ, hafa si hoposu hocu maine'e!>
12micu yʉc'ʉ 'o ic'o, osnia yaa 'o sospoyasi, yonto ihe toehunga huceoevi hocu emoyafo. mo acʉhʉ na'no yamci, tohmomoengʉ to hamo ho mainca: <o'amocu momzala ahtu baito tamo maica ci hi'hioa!>
eoho'a to iesu 'o levi
(matai 9:9-13; luka 5:27-32)
13mo ivaho uhto aaskiti to etʉpʉ ne ngalilaya 'o iesu, mo yu'eteuyunu to isi yoni 'o botngonʉ ci cou, isicu po'pa'cohivi 'emo botngonʉ. 14nemo ivaho emosuhcu 'o iesu, teolʉi 'omo cihi ci letmuhno, zou oko to 'alofui ci levi, mo yusuhngu to ca'hʉsi. isi mi'usni to iesu ho yainca: <to'ofeihni a'o!> micu yʉc'ʉ 'o levi, cu to'ofeihni to iesu.
15ataveisi moso yonto emoo to levi 'o iesu ho bonʉ, 'enepio ci letmuhno ho i'o kuici cou mo to'ofeihni; to 'ayumonahe mo 'enepio 'omo mai'upu to iesu ho ito tesisi ho bonʉ. 16mo piyo ci lema'cohio seiso ho i'o coufalisai ihe aiti 'o iesu homo toehungu bonʉ 'o kuici cou ho i'o letmuhno, cu tuocosi 'o tesisi: <mainci isi toehungneni bonʉ si letmuhno ho isi kuici cou?>
17isi talʉi to iesu, cu yainca: <'omo yoayokeo ci cou o'ate poa baito to leaotothomʉ, 'ai'o lac'o tma'congo ci cou 'ola poa baito. na te'o atuhca hioa ho mi'o cmʉ'ho o'ate'o eyoho'a namo ʉmnʉ ci cou, 'ai'o moeno kuici cou 'o te'o eoho'a.>
e'usnu no tanzi
(matai 9:14-17; luka 5:33-39)
18moso i'nʉskʉ, 'o tesi to letoonono yohane ho i'o coufalisai mo seolʉa no tanzi. pantomo uhto iesu ho tuocosi: <mo tanzi 'o tesi to falisai ho i'o tesi to yohane, mainci o'te tanzi si tesisu?>
19yut'inga to iesu: <homon'a mai'upu tomo eabobonʉ 'o mon'a faeva mevcongʉ ci hahocngʉ, tees'aeno tanzi 'omo uso ho tooyokeo ci cou? hocin'a afu'u no'upu 'o mon'a mefaeva ci hahocngʉ, o'ate ahtu tanzi. 20at'inghi ho tenac'u mic'ʉhi 'o hie, tahe i'mi ta taicohe ho hafa 'o hahocngʉ, ho mio 'atac'ueno acʉhʉ tanzi.
21<uk'a ci te mayo no mon'a faeva ci yʉteʉ ho tpihneni no micu noana'o ci yʉsʉ, hoci maica, 'omo faeva ci tpiha tesi eekieki 'o noana'o ci yʉsʉ, asuhca poa meimeoisi 'omo aekieki. 22maezo uk'a cite mayo nomo faeva ci emi ho teapha no micu noana'o ci efucu no feo'u, hoci maica, tesi yuf'oi no faeva ci emi 'o noana'o ci efucu no feo'u, 'e emi ho efucu te aepohʉ kuzo. ko'koeno, te teapha no faeva ci efucu 'omo faeva ci emi!>
e'usnu no 'ansokunici
(matai 12:1-8; luka 6:1-5)
23moso conci 'ansokunici, mo mito heoheome. mo to'ofeihni 'o tesisi; mo coeconʉ ho tu'suesuecu to piyo ci mcuu to heome. 24cu'so mi'usni to coufalisai 'o iesu ho yaica: <aiti, ihe hioa ta tesisu si o'ante hioa homo 'ansokunici!>
25yut'inga to iesu: <ne moso uk'a ana 'o tavite cuma na ohsi hi'hioa, o'a ohmu laeno ahta engha? 'o tavite ho i'o fafeifeihasi ne mohcu sieo, 26cu yʉmeʉmʉ to seiten ho ana 'o lahe sʉ'teni to hamo ci pang, 'e hi'hioa eni moso seolʉa no taisaisi 'o yapiyata. hoci ieni to hoolicuto, i'oc'o saisi 'ote meelʉ bonʉ ta pang tan'e; at'inghi moso iachi bonʉ 'o tavite, isin'a p'o'upi 'o fafeifeihasi.>
27isicu yainca to iesu: <'e 'ansokunici maisi p'eac'eni ta cou; 'e cou o'a mo nomio no 'ansokunici ho poa yayoa. 28ko'koeno, 'e okocou 'aeno maezo nooe'oca ta 'ansokunici.>
Currently Selected:
maluko 2: bsnfe
Highlight
Share
Copy
Want to have your highlights saved across all your devices? Sign up or sign in
The Bible Society in Taiwan © 台灣聖經公會版權所有 2014
