Nimlivolivon 4
4
Pacicin da si Pite a kani Yowani do rako a peykeykaygyan
1No kapangnanao da pa ni Pite a kani Yowani do aro a tao am to sira ngai o mapatanatanang so nakem da si Ama ta do to a kano panirsirngen da no mamzamzat do rako a panaralayan a kano tao a macyagom do Satokay. 2Meyoyaoya sira makamizing sya, ta ipangnanao da Pite a kani Yowani o kanimirwa na mavyay ni Yeso. Ta si Yeso am yongkad no kanoyong no nimawakwak rana tao a mirwa a mavyay. 3Am ori o nirakpan da sira kapasdep da sira do pamemtengan mangay do ikadwa na araw, ta makoyab rana. 4Am no kanang am aro tao a niomanoyong do nipangnanao da Pite. O vilang da no mahakay am kakaliman a ranaw (5000).
5Ikadwa na araw am o kamanrarakehan da no tao do Yotay a kano mangnanao no iwawalam ni Ama ta do to a kano karwan da no panipanirsirngen da am meylovolovot sira do Yelosaleng. 6O rako a panirsirngen no mapatanatanang so nakem da si Ama ta do to a meyngaran si Annase a kani Keyava kani Yowani a kani Yadisanta kano zipos na mahakay ni Annase am amyan sira do dang. 7Nyangay da sira Pite a kani Yowani do tangain da a kapacici da sira. Maniring sira am, “Do wanjin na kapwan no oyowyat nyo a yaniomiwakwak do nimapilay a tao ang. Sino yanimanta ninyo so oyowyat nyo.”
8No kanang rana am oyatan no Seyzi si Pite. Am ori o nipancyan na no, “Inyo rana panipanirsirngen namen a kano kamanrarakehan am, 9no si myan jinyo so mapacici jyamen sicyaraw eya do namen kanimapeypapya so nimapilay a tao ori am 10naknakmen nyo a Isedi a tao an. O na nipeytatanek do tangain nyo no tao eya a nimapya rana am oyowyat no ngaran na ni Yeso a tao do Nasale a nipadket nyo do jyojika a nipirwa na avyain ni Ama ta do to. 11O ciring do Seysyo no kakwa a omagaz ji Yeso am,
‘O Vato a niwalit da no mapatnek so vahay am meyvoga am ney makdeng na aslet no ai no vahay.’#4:11 Anwanood 118:22.
12Si Yeso o mapatazadang jyaten do teyngato. So ikabwata no ikararwa na do karawan a nitovoy na ni Ama ta do to a mapatazadang jyaten.”
13Macita da no panipanirsirngen do peykeykaygyan si Pite a kani Yowani a mowyat so onowned am manakem da rana sira todna ka tao a jya nimeyvatvatek. Am ori o nipeyzokaban da nira. Meyratateng am katovilan da rana sira nimacilocilolo ji Yeso. 14Am ori o ji da rana tenngi a meyzezyak, ta macita da o nipeypapya da so ai a meytatanek do tangain da. 15To da na mancyan sira makowbot do rako a peykeykaygyan a kapeysirsiring da rana no panipanirsirngen. 16Maniring sira am, “Kongwen ta sira ya, ta o meyvahay rana do Yelosaleng a tao am da katenngan sira yamapeyzokab so vazay. So ikabo no omalalas so sang a tao. 17Marahet si meyparo tao a makateneng do akman sang a vazay. Apyapya o kalalaw ta sira, kaji da makadketan do ngaran ni Yeso a ipeylimwang do tao.” 18Am ori o nitawagan da jira mai a kalalaw da sira a manci nya jira so kaji da mangnanawan no ngaran ni Yeso a ipamizing so tao.
19Am maniring si Pite a kani Yowani am, “Do tangain ni Ama ta do to am amizngen namen o ciring nyo an? Ano amizngen namen o ciring ni Ama ta do to. Naknakmen nyo pala. 20Jyabo kaji namen mancyan no namen nimacita kano namen nimamizing a.”
21Meyratateng am peyparowen da o ciring da yalalaw da sira kapasaway da rana sira. Ta ji da kala o karatan da, a macyoman pa o kanyahey da no aro a tao ang a somaray nya ji Ama ta do to, do mapeyzokab a vazay na do nimapilay ang. 22O kakawakawan na no nimapilay a tao ori am to ngyan so ikasikalima (50) no awawan na ang.
Inozi da no yamraralay ni Yeso do Yelosaleng
23Pasawain da si Pite a kani Yowani am mangay rana sira do kararay da omraralay ni Yeso a tao a manci no mina ciring da jira no panipanirsirngen no mapatanatanang so nakem da si Ama ta do to a kano kamanrarakehan. 24Mamizing da am malovot sira meynozi ji Ama ta do to. Maniring sira am, “Mo Panirsirngen a nimangamamaog so hanit a kano teyrahem a kano awa kano meycyamadadayan, 25si Tawey rana ineynapo namen a nimahap so vazay mo am nioyatan mo no Seyzi a manci no,
‘Ikongo isozi da no beken a tao do Yotay. Ikongo pakanakman da so vazay a yabo so peypeypangayan.
26O kabtekan a panirsirngen rana do teyrahem a kano karwan da panipanirsirngen am malovot sira amnakenakem so kazazat da ji Ama ta do to a kano Misayya.’#4:26 Anwanood 2:1-2.
27So nipangononong no nang a mina vazay da do Yelosaleng eya. Ta si Helote rana kani Pangsyo Pilato a kano karwan da tao do Yotay a kano beken a tao do Yotay am nimalovot sira nimnakenakem so kazakat da si Yeso a ji meylimoteng so onowned a nipamnekan mo a mahap so vazay mo. 28Da pangononongan o mina ciring mo a omagaz do nipamnemnekan mo. 29Am ori o pakatenngan mo jira so onowned a yaomalalaw jyamen. So sidongan mo jyamen, mo Panirsirngen a mahap so vazay mo a kaji namen a mogawan a meylimwang no ciriciring mo. 30So pacittan mo no oyowyat mo a mangiwakwak so ingingnen no tao a keyyan no mapeyzokab a vazay namen a mangozay do ngaran ni Yeso a nipamnekan mo a mahap so vazay mo.”
31Mateyka sira meynozi am todagoyogoyon o peynozyan da a kamimin da nioyatan no Seyzi. Ori o nikowyat da a meylimwang no ciriciring na ni Ama ta do to. Ori ji da rana mogawi.
Ipasyazazaw da o kangangay da
32Omraralay rana ni Yeso a tao am meyyangangay o onowned da. So ikabo no asa ka tao a maveyvow do kangangay na, ta akma dey todalovoci apzapzatan. 33O nipamnekan na rana ni Yeso a omlivolivon no ciriciring na am mowyat sira meylimwang no mina kapirwa na ni Yeso a mavyay. So nisidongan na sira ni Ama ta do to so omraralay nya tao. 34So ikabo no asa ka tao amyan so kalahen. Ta o myan so iheyhakawan a kano vahay am nipamalit da so nizpi o karwan na. 35O nipalit da nizpi am nyangay da do nipamnekan ni Yeso a omlivolivon no ciriciring na a kavonong da sya. To da palololwa do ikeykasi da tao o kavonongan na.
36Akman sang o vazay na no asa ka Diwey a tao do Saypolose a pongso a meyngaran so Yoseyvo. O ingaran da jya no nipamnekan na ni Yeso a omlivolivon no ciriciring na am si Parnapo. O peypeypangayan no ngaran na ori am “Mapayyait so nakenakem.” 37Ta nipamalit na o asa ka nihakawan na so nizpi a katoro na nya do nipamnekan na ni Yeso a omlivolivon no ciriciring na.
Currently Selected:
Nimlivolivon 4: snt
Highlight
Share
Copy
Want to have your highlights saved across all your devices? Sign up or sign in
The Bible Society in Taiwan
