Yowani 2

Meysinmo a tao do Cyana

1Ikadwa na araw am amyan do Cyadidi do meyngaran so Cyana a ili so tao a meysinmo. Amyan dang o ina na ni Yeso. 2Si Yeso rana kano macinanao jya am nipanoyon da sira no matarek so vahay a tao. Am ori o nyangay da. 3Ikongo do nimagid rana o yopen da potaw cyo, am ori o nipancyan na ni ina na ji Yeso so, “Apya sira ito a yabo rana so yopen.” 4Maniring si Yeso am, “Mo ina, ji mo to gacigaci yaken an. Ta beken pa ya araraw na no yako ipeyvazay.” 5Maniring o ina na do lamlamsoy no meysinmo a tao am, “To nyo ngamiznga o pahanhanan na jinyo.”

6Amyan dang so anem a peraranom. Ori rana am iwawalam da no tao do Yotay a pavavanawan da. O kazomzomyan no peraranom am akman so makanateng a rarako a kama. 7Maniring do lamlamsoy da no meysinmo a tao si Yeso am, “Apno kamo no ranom o peraranom.” Karahan am kakadain da apnowen no ranom o peraranom. 8Maniring pa si Yeso am, “Patwaw kamo na katoro nyo nya do yameymatmatngeh no vazay a tao.” Makarahan am yangay da na. 9Tahaman no meymatmatngeh nya tao o nipeyvaliw na ni Yeso a potaw cyo am isavasavak na o nyahapan da sya. Am katenngan da no lamlamsoy na. Am ori o nipancyan na no nimapasakay a tao. 10Maniring jya am, “Mamimin o tao a yamapanoma so apya potaw cyo. No mabsoy rana sira am ori o patwawan da so todna ka potaw cyo. Am imo am mo panowjin o ney yapya na potaw cyo.”

11Oya rana am ney manma na vazay ni Yeso a yongkad no kayapo na ji Ama ta do to. Ori rana am mina vazay na ori ni Yeso do Cyana do Cyadidi. O vazay rana ya am ipacita na o admadmay na do tao. Nimacipinda do dang o nyanoyngan da rana jya no macinanao jya.

12Mateyka o vazay ori am macihza si Yeso do ina na kada wari na kano macinanao jya mangay do Cyapaynong a miseysan so makanateng so araraw.

Nipangzan ni Yeso o rako a panaralayan

(Matay 21:12-13; Make 11:15-17; Locya 19:45-46)

13Masngen rana o ipamaring da so kanen a Iyeci#2:13 Iyeci - Citahen nyo do Panitanitan so jyatenngi a ciring do ney manowji na rana no vakong eya. am mangay si Yeso do Yelosaleng. 14Do livolivon no rako a panaralayan da am makacita so tao a manazang no baka kano kagling a kano hato a kano aro a tao a amlisna dang a mamalit so nizpi. 15Karahan am mangap si Yeso so kolili a kapaksoz na so baka kano kagling do rako a panaralayan a powboten, a kapasakeb na so pamalimalitan da no tao so nizpi a kavangan, a kapeyvwak no nizpi do teyrahem. 16Maniring do manazang no hato a tao am, “Powbot kamo na o nyo ipanazang. Ji kamo todey meypananazangan do yararalayan ni Ama a vahay.” 17Karahan am manakem da no macinanao jya o ciring do Seysyo. O ciring rana am, “Mo Ama do to. Yakmey apoy o onowned ko so kakwakwat a yamnakenakem so yararalayan nimo.”#2:17 Anwanood 69:9.

18Pacicin da no panipanirsirngen no tao do Yotay. Maniring sira am, “Pacittan pala o yongkad mo a vazay a apo ji Ama ta do to, do mo kato mapeyvwakan so tao do rako a panaralayan.” 19Maniring si Yeso am, “Tana kavakavahen nyo o panaralayan eya am cyaha, ta si katlo na araw am patanken ko.” 20Maniring sira am, “Yanem o ikasikalima na (46) kawan no nipatnek so rako a panaralayan am ikongo mo pancyan no kapakatlo mo a araw a mapatanek sya.” 21Am o paingan ni Yeso so ciring na am kataotao na. 22Mirwa mavyay si Yeso am manakem da na no macinanao jya o mina ciring na. Ori o nyanoyngan da na do Seysyo a kano ciring na ni Yeso.

Katenngan ni Yeso o onowned no tao

23Amyan si Yeso do Yelosaleng a macipamaring so kanen do Iyeci am aro tao a nimakacita so vazay na a yongkad no kapo na ji Ama ta do to. Am ori o nyanoyngan da rana jya. 24Am ji na meyhanhanan sira ni Yeso, ta katenngan na o kalas no onowned da. 25Tana ji da mancyan no tao ji Yeso o aktokto da am to na rana tenngi ni Yeso o onowned da.

Currently Selected:

Yowani 2: snt

Highlight

Copy