Yowani 21
21
Mapacita si Yeso do papito a ka macinanao jya
1Kadadayan na so araraw am mangay pa mapacita do macinanao jya do ngaranan da Tipilyo a rako a meybebneng a ranom. O mina vazay da no kano nang am yata malavat do jya an. 2No kano nang am nimalovot sira Simong Pite a kani Tomase a meyngaran pa so Nimeytovong a nimatazak a tao a kani Natannay a tao do Cyana do Cyadidi a kano rarwa ka anak ni Sipitay a kano rarwa pa dang a kararay da a macinanao ji Yeso. 3Maniring si Simong Pite do karwan da am, “Ko mangay mangahahap.” Maniring o karwan da am, “Macihza namen jimo.” Am ori o nilwas da do asa ka vazangay. Am abo inahahapan da kasahep.
4Domada o araw am meytatanek si Yeso do pamsan na. Am ji da pa singkaji no macinanao jya si Yeso. 5Maniring si Yeso jira am, “Kokay kamo. Kamo nimakamong an?” Maniring sira am, “Jyabo yasa namen nimamong a yakasahep a!” 6Maniring si Yeso jira am, “Zoywan kamo o tawaz nyo do kawanan, ta ori na yanan no among.” Karahan am izoyo da na o tawaz am ji da rana anat a pazagpiten, ta tey yaro rana o among do tawaz. 7Maniring ji Pite o ney kaglaw na ni Yeso a macinanao jya am, “Si Yeso ya a Panirsirngen ta.” Mamizing ni Simong Pite o ka si Yeso na am meyyayob a kaokso na. 8Karwan da am kaoden da o vazangay makarala. Karahan am alikey rana kaji da makaransan do pamsan na am lolwen da na o tawaz a yanan no aro a among.
9Makaranes sira do pamsan na am macita da o myanpaw a kano inmala rana a yanan no panazaban ni Yeso so among. 10Maniring si Yeso jira am, “Pangap kamo pa do yanyo nimamong so apeleh.” 11So nyangay na ni Simong Pite do vazangay amngingit so tawaz a ipakarala. Am mamimin a rarako a among o nimatawaz. Vilangan da na am atlo o ikasikanem na so ikarwa poo (153). Am jya nimapising o tawaz da no among ang. 12Maniring si Yeso jira am, “Sijya kamo a karyag nyo.” Am abo o asa ka tao do macinanao jya o makadket jya pacicin, ta katenngan da o ka si Yeso na. 13Karahan am mangay jira si Yeso a kavonong na so myanpaw jira. Akman sang o among a vonongen na jira. 14Ipitlo na rana ya ni Yeso a mapacita do macinanao jya no keypirwa na rana mavyay.
Si Yeso a kani Pite
15Teyka sira romyag am maniring si Yeso ji Simong Pite am, “Imo rana mo Simong a anak ni Yowani am manngwa, ka makdekdeng pa kano karwan nyo eya a maglaw nyaken an?” Maniring si Pite am, “Noon. Mo katenngan yaken a yatey maglaw nimo, mo Panirsirngen.” Maniring si Yeso jya am, “Peyveyveknen mo o yaomanoyong jyaken a tao a akma koy lilikta kagling.” 16Ipidwa na pacicin am, “Imo rana mo Simong a anak ni Yowani am manngwa, yamo ikaglaw yaken an?” Maniring si Simong am, “Noon. Mo katenngan yaken a yatey maglaw nimo.” Maniring jya si Yeso am, “Peyveyveknen mo o omanoyong jyaken a tao a akma koy kagling.” 17Ipitlo na pacicin ni Yeso am akman sang o ciring na. Maniring am, “Imo rana mo Simong a anak ni Yowani am manngwa, mo ikaglaw yaken an?” Mina todarahet o aktokto na ni Pite do keypipitlo na mapacici sya no kaglaw na nya, kaji na aglawan nya. Maniring rana ji Yeso si Pite am, “Mo katenngan o makakaday. So mo ipakateneng jyaken a yatey maglaw nimo, mo Panirsirngen.” Maniring si Yeso jya am, “Peyveyveknen mo o yaomanoyong jyaken a tao a akma koy kagling. 18To ko na macitangayan jimo am no kalavayo mo pa am to mo meyneynakman o angangayan mo. Am no rarakeh ka na am abo rana oyowyat mo a mapatozatozak do amvaod jimo a tomaosya so ji mo akzakzan a angayan.” 19O peycirngan na so sang ni Yeso am pazimanen na ji Pite o pangavosan na no inawan na no makwa do kazwazway na si Ama ta do to. Maniring si Yeso ji Pite am, “Macilolo ka jyaken.”
Si Yeso a kano ney kaglaw na macinanao jya
20Meyvazingowngaw si Pite am macita na o ney kaglaw na macinanao ji Yeso a macihza jira. Iya rana ori am nimacitangked ji Yeso no kakan da a mapacici sya do keyyan no tao a manazang nya. 21Macita na ni Pite am maniring ji Yeso am, “Meypanngonngo si Yowani eya no makwa.” 22Maniring si Yeso jya am, “No si ipanci ko kato na avyayan a mangay no yai ko na am ikongo mo kazyakan nya. To ka macilolo jyaken am.” 23Karahan am o akman sang a ciring am todavangovangon. Ori malavat da no macinanao ji Yeso o kaji na wakwakan no asa ka macinanao ji Yeso. Am ji na nipanci ni Yeso o kaji na wakwakan no nang. Ta kapanci na no, “No si ipanci ko kato na avyayan a mangay no yai ko na am ikongo mo kazyakan nya.”
24O ney kaglaw na ni Yeso a macinanao jya o yamapatwaw so aro a vazay eya a na kavatvatek jya. So namen pacyanoyngan do ciring na a tey manoyong.
Ney manowji rana ciring na
25Aro pa o mina vazay na ni Yeso. Am no ko naknakmen am no si mamimin a vatvatkan am ji rana makangay do karawan o karwaro no vakong.
Currently Selected:
Yowani 21: snt
Highlight
Share
Copy
Want to have your highlights saved across all your devices? Sign up or sign in
The Bible Society in Taiwan
