Locya 20

Ikazyak da o nikapwan no oyowyat na ni Yeso

(Matay 21:23-27; Make 11:27-33)

1Ipisa kapangnanao na ni Yeso no Mapasaray a Ciriciring do rako a panaralayan am amyan so panipanirsirngen no mapatanatanang so nakem da si Ama ta do to a kano mangnanao no iwawalam ni Ama ta do to a kano kamanrarakehan da a mangay tomita sya, 2kapacici da sya. Maniring sira am, “Do wanjin na kapwan no oyowyat mo a yamapeyvazay so yamapeyzokab a vazay ang. Sinosino nitoro jimo a oyowyat ang. Pancyan pala jyamen.” 3Maniring si Yeso jira am, “Pacicin ko pala inyo an. Pancyan kamo pala jyaken. 4Oyowyat na no nimanaktak a si Yowani am yanimapo ji Ama ta do to an? No yanimapo do tao.” 5Am ori o kazyakan da nya. Maniring sira do kadwan jira am, “Kongwen tamo ori a patovisan. No si ipanci ta o kapo na ji Ama ta do to am ji na panenesha yaten ni Yeso a ji nganoyong ji Yowani a. 6Am no si kwan ta o kapo na do tao am jyabo kaji da ngagsahan jyaten no tao a. Ta da anoyngan si Yowani a panoyonoywan na so ciring ni Ama ta do to.” 7Meyratateng am maniring sira ji Yeso am, “Namen jyatenngi o na nikapwan no oyowyat na.” 8Maniring si Yeso jira am, “No komwan am ji ko mancyan jinyo o na nikapwan no oyowyat ko a yamapeyvazay so aro a vazay.”

Payyaingen na ni Yeso do marahet so nakem a tao a nimvood so nihakawan no tao

(Matay 21:33-46; Make 12:1-12)

9Meyratateng am ipanci na jira ni Yeso o payyaingen na sya. Maniring am, “Amyan so asa ka tao a meycibcib so mowan na so potaw. Am ikongo do mangay meykownayan do matarek a ili, am ori o nitorwan na no nihakawan na do tao a vooden da. 10Mazako asi na no nimowa na am manovoy so asa ka lamlamsoy na macipamozas jira so vonong na. O nimvood so nihakawan na tao ori am nipakapya da nisipsipzotan o lamlamsoy na no nang. Ori o to na meysinaoli abo so nyahap. 11Ipirwa o mapeynihakawan sya manovoy so lamlamsoy na am akman so sang, ta nisipsipzotan da a panyanigen a katovoy da rana sya abwata so paciralayan. 12Ipitlo na no mapeynihakawan sya a manovoy so lamlamsoy na mangay am nipakakasi da a kazaza da sya padondonen do zazacit no nihakawan na. 13Maniring rana o mapeynihakawan sya am, ‘Meypanngonngo ko so wanjin eya. Apyapya o kato ko na novoyan so anak ko a mangay, ta ala ikeykanig da pa.’ 14Am macita da no nimvood so nihakawan na tao o anak na no mapeynihakawan sya am meysirisiring sira. Maniring sira am, ‘Iya ya o yaomamoon so nihakawan na. So wakwakan ta na sya, kamoon tamo so nihakawan na.’ 15Meyratateng am lolwen da yangay do kwang a kawakwak da rana sya. Manngo kamo. Kongkongwen na paro o nimvood so nihakawan na tao ang no mapeynihakawan sya. 16Jyabo kaji na balinasan sira a kapapalit na so tao a amvood so nihakawan na.” Mamizing da no aro a tao o ciriciring na am ipanci da o, “Jyabo kato na akmanan sang no vazay a.” 17Citahen na sira ni Yeso am pacicin na sira. Maniring am, “No si ipanci nyo o kabo no akman sang a vazay ni Ama ta do to am ikongo na peypeypangayan no nivatvatkan do Seysyo. Ta maniring am,

‘O Vato a niwalit da no mapatnek so vahay am nimeyvoga a ney makdeng na aslet no ai no vahay.’#20:17 Anwanood 118:22.

18O meyhabak rana do Vato ori am to rana zemek o tototowang na. O kakasan no Vato a tao am akman sang, ta meyramis o kataotao na.”

Tomoro so deyking ji Kaysa

(Matay 22:15-22; Make 12:13-17)

19O mangnanao no iwawalam ni Ama ta do to a kano panipanirsirngen da no mapatanatanang so nakem da si Ama ta do to am makazazap da o nanao ni Yeso a paingen na jira. Am ori o naknakman da so karakep da sya. Am ikanyahey da o aro a tao. 20Am ori o to da macyozai jya. So nipantan da no tao so nizpi a to napyapya so nakem a mapacici si Yeso. Ta kalahen da o ciriciring na amraherahet so seyvo. 21Maniring sira ji Yeso am, “Mo Mangnanao, namen katenngan o nanao mo a yatey manoyong. Namen katenngan imo a yamapeyyangangay so tao. Namen katenngan imo a yamanoyong a yamangnanao no ciriciring na ni Ama ta do to. 22Ipanci mo pala jyamen do iwawalam ta. Apya o katoro namen so deyking do panirsirngen no Loma a meyngaran so Kaysa?” 23Katenngan na ni Yeso o keyleylamdam da sya. Am ori o nipancyan na no, 24“Inya kamo pala so asa ka nizpi, ta citahen ko.” Meyratateng am maniring jira am, “Sino ngaran na kano asyasing a yadomket do nizpi ang.” Maniring sira am, “Si Kaysa.” 25Maniring si Yeso jira am, “O monganay ji Kaysa am itoro nyo ji Kaysa. O monganay ji Ama ta do to am itoro nyo ji Ama ta do to.” 26So ikabo no makala da do ciriciring ni Yeso a iraherahet da sya do tangain da no tao. Ta nipeyzokab da o nitovis na jira ni Yeso. Am ori o ji da na meyzezyaki.

Nanao na ni Yeso so keypirwa na pa mavyay no nimawakwak rana tao

(Matay 22:23-33; Make 12:18-27)

27Aro o tao a macyagom do Satokay a mangay a mapacici si Yeso. Sira rana ori am ji nganoyong do keypirwa pa mavyay no nimawakwak rana tao. 28Maniring sira am, “Mo Mangnanao, o nanao ni Moyse am no mawakwak o tao a kabo no anak na am pasakain no kakteh na o mavakes na a keyyan no komownongan no kakteh na rakeh do karawan. 29No kakwa pa am amyan so papito a meyketeketeh. Mapapapen o rakeh jira am ji nimeytaodtod a kawakwak na rana. 30Mawakwak rana am pasakain na o mavakes ang no tomonton jira. Mawakwak ori am abo taodtod na. 31O ikatatlo da am akman sang a kato da twatontonan a meyketeketeh a mahap so mina kahanghangan no mina rakeh jira. Mawakwak sira am abwata o mina taodtod da. 32Mownay am mawakwak rana o mavakes ang. 33Manngwa, no marateng o araraw no keypirwa mavyay no tao am sino jira ang o manoyong a mapeykahanghangan so sang. Ta nimamimin sira o papito a meyketeketeh ori a nimapasakay sya.”

34Maniring si Yeso jira am, “O tao do karawan sicyakwaya am yamapapapen o mahakay. Sira macivahavahay o mavakes. 35O tao a peyvangonen ni Ama ta do to no makwa a mangay do teyngato am ji sira meypinazagpit an. 36Ta akman sira so tinsi do yanan ni Ama ta do to a jyawakwak rana. Anak na sira ni Ama ta do to, ta nipeyvangon na sira. 37Do nivatvatkan na ni Moyse a ciriciring am katenngan ta o kanoyong da nimavyay rana no nimawakwak a tao. Ta nimamizing na o ciring ni Ama ta do to do amlila tazici a manci no, ‘Yaken rana am Tao do to na yaken ni Apolahan a kani Isa kani Yakebo.’#20:37 Soayci Ci 3:6. 38O peypeypangayan no ciriciring eya am si Ama ta do to rana am Tao do to da no mavyay a omanoyong jya tao. Tana nimawakwak rana, avyain na sira. Ta o tao rana do tangain ni Ama ta do to am mamimin a mavyay sira.”

39Amyan so mangnanao no iwawalam ni Ama ta do to a manci no, “Mo Mangnanao, yatey yapya o ciriciring mo.” 40Nimacipinda no kano nang o kaji da na makadketan ji Yeso a pacicin.

Sivovoong na ni Tawey o Misayya

(Matay 22:41-46; Make 12:35-37)

41Maniring si Yeso jira am, “Ikongo da pancyan no Misayya no tao a sivovoong ni Tawey. 42Ta maniring si Tawey do nivatvatkan a anwanood am,

‘Maniring si Ama ta do to do Panirsirngen ko am: Amlisna ka do wanan ko,

43mangay si balinasen ko sira o macioya jimo a tao.’#20:43 Anwanood 110:1.

44Abneken na ni Tawey a Panirsirngen na o Misayya am ikongo peysivovoongan na syaha.”

Pazimanen na sira o mangnanao no iwawalam ni Ama ta do to

(Matay 23:1-36; Make 12:38-40)

45Amizngen da pa no aro a tao o ciriciring na ni Yeso am amyan pa so ciring na do macinanao jya. Maniring jira am, 46“Azimanen nyo sira o mangnanao no iwawalam ni Ama ta do to an. Ta da ikakza o da kapeyyaywayob so pipya ayob a mangonong do rararahan a komakzeb so tao a omraralay nira. No somdep sira do peyneynozyan am mangay sira amlisna do lilisnan no meynakem a tao. Akman so sang no macyakakan sira, ta amlisna sira do pamanongan na. 47Littan da o vao a mavakes do kahap da so kangangay da, kato da ngidan so inozi da mapakapyapya so nakem. Sira rana ori am mangay o kangay na jira no rako a peyoyaoyyan na ni Ama ta do to.”

Currently Selected:

Locya 20: snt

Highlight

Copy