Locya 8

O nisomidong si Yeso aro a mavakes

1Meyratateng am nimlivolivon do peycyeylilyan na si Yeso a pangananawan na no Mapasaray a Ciriciring do katalamozong na nyaten ni Ama ta do to. O macihza jya am rarwa so ikakarwan a macinanao jya, 2kano aro a mavakes a nivozwawan na so kalamsoyan ni Satan a kano niwakwakan na so kataotao. Amyan jira so meyngaran so Matelyan Madiya pinamozwawan ni Yeso so papito a kalamsoyan ni Satan a nikomovot jya, 3kani Yeanna a mavakes ni Vosa asa ka meynakem a lamlamsoy ni Helote a kani Sosanna kano aro a mavavakes a nisomidong si Yeso a kano macinanao jya.

Pehngehngayan na so ciring na do tao a manokos

(Matay 13:1-9; Make 4:1-12)

4Nimapo o aro a tao do peycyeylilyan na tomita si Yeso. Meylovolovot o aro a tao am nipanci na jira o payyaingan na sya.

5Maniring am, “Amyan so asa ka tao a mangay a manokos. Manokos am amyan so mangay zomsi do rarahan. So zazasagan da jya, toktokan da jya no meyyasasalap. 6Amyan so zomsi do kavatovatwan am makeykai a mahayo, ta abo tana. 7Amyan so nizomsi do katamtamkan am amlida am ji makapamno, ta kaongongan no aro a tamek. 8Amyan so nizomsi do apya so tanatana am ori o ney yapya na so ininsyan. Omsi am nikaranaranaw o asi na.” Pakavosen na o kapangnanao na am amlololos a manci no, “Amizngen nyo an, peyyanen nyo do onowned nyo ori an.”

9Meyratateng am ipanahes da no macinanao jya o peypeypangayan no ciriciring na. 10Maniring jira am, “O ji na nipatwaw pa peypeypangayan na no katalamozong na ninyo ni Ama ta do to o ipanci ko jinyo an. Am o karwan da no tao am nanawen ko sira no payyaingan ko sya ciring. Ta tana citacitahen da am akma dey jyacita. Tana amyamizngen da am ji da tenngi.#8:10 Isayya 6:9. 11O peypeypangayan no manokos am akman so Ciriciring na ni Ama ta do to. 12O nimakas do rarahan am akman so tao a omamizing so ciring ni Ama ta do to a kangay na mahap sya ni Satan do onowned da. So ji da nganoyngi jya, ji da makahapi so karilawan na nira ni Ama ta do to. 13O nimakas do kavatovatwan am akman so masasaray a omamizing so ciring na ni Ama ta do to am ji makayamot do onowned da. No myan so alalaw da am makeykai sira kalittan. Am ori o ji da rana meyhanhani ni Ama ta do to. 14O nimakas do katamtamkan am akman so tao a omamizing so ciring na ni Ama ta do to am aro o ikalaw da kano ikakza da nizpi a kano meykamadadayan a ikakza no tao. Am ori o ji na meypakatkaci no onowned da ji Ama ta do to. 15O nimakas do apya so tanatana am akman so tao a omamizing so ciring na ni Ama ta do to a meyngongyod a meyhanhan nya do onowned da.

Pehngehngayan na so ciring na do zampo

(Make 4:21-25)

16“Abo o tao a tomoong so nipaciscisan na zampo a kapangay sya do teyrahem no ireyrayan. Ta o zampo rana am pacimalagen a kapakacita da sya no somdep a tao. 17Ta abo o matayo a vazay a jyababa. Akman sang, ta tana nyo jyatenngi sicyakwaya o nanao ko jinyo am katenngan nyo no makwa. 18Am ori o amizngan nyo sya an. Ta o mamizing so ciring na ni Ama ta do to am arwaro pa o makarapa jira ciring. Am o ji ngamizing so ciring na ni Ama ta do to am tana myan so alikey a katenngan da am to meykabobo pa jira ori.”

Ina na kada wari na ni Yeso

(Matay 12:46-50; Make 3:31-35)

19Mangay da citahen si Yeso no ina na kada wari na a mahakay. Ikongo do tey yaro tao, ori o ji da macikasngeni jya. 20So iyan no tao a manci nya jya so, “Yanimai si ina mo a kada wari mo a yakomala jimo.” 21Maniring jira am, “Omamizing so ciriciring na ni Ama ta do to a kapeyyan da sya do onowned da kapangozay da jya peyvazain am ori o abnekan ko a inyapwan a kano kakakteh ko.”

Nipeyhanahanang na o rako abkas a kano pagpag ni Yeso

(Matay 8:23-27; Make 4:35-41)

22Ipisa si Yeso a kano macinanao jya somakay do vazangay am ipanci na jira o kangay da do katovangan na no rako a meybebneng a ranom. So nikaodan da so vazangay a mangay rana. 23Amyan sira do avak no rako a meybebneng a ranom am to ngitkeh rana si Yeso. Meyratateng am to na ngirasa sira no rako a pagpag a kalokong na jira no paopaong na do vazangay da so cinapodaro. 24Am ori o nyangay da amyokay si Yeso. Maniring sira am, “Mo Mangnanao, mo Mangnanao, tanyo na marahet!” Mayokay si Yeso am sirsirngen na o rako a pagpag a kano paopaong am nikakeykai na rana meyhanahanang. 25Maniring si Yeso jira am, “Nyo ji meyhanhanan nyaken.” So nisavasavakan da nya. Maniring sira do kadwan jira am, “Sinosino ya tao. Ta na to nirsirnga o rako a pagpag am na to ngamiznga.”

Nivozwaw na ni Yeso o nikomovot do tao aro a kalamsoyan ni Satan

(Matay 8:28-34; Make 5:1-20)

26Makaranes sira do meyngaran so Kelasen a ili a katovangan no Cyadidi am, 27nigomcin rana si Yeso a makasinmo so asa ka kovotan no kalamsoyan ni Satan a tao do dang. Iya rana am ji meyyayob. Ji meyvahay do ili, ta meyvahay do kanitwan. 28Macita na si Yeso am omlololos a kapeylilitod na do tangain na ni Yeso. Maniring am, “Mo Yeso a Anak no ney manokdwan na Tao do to, ikongo mo gogadan nyaken. Ji mo pasingsingci yaken an.” 29O pancyan na no nang am nivozwaw na ni Yeso o komovot do dang a aro a kalamsoyan ni Satan. Masangib ori a kovotan da no kalamsoyan ni Satan. No kaneb da jya am to na zavazavata o nivaod da so ai na vahalang a kapaksoz da sya no kalamsoyan ni Satan a yangay do kabwan no tao. 30Maniring si Yeso jya am, “Sino ngaran mo.” Pasapan na am, “Si Malavong.” Ta aro a kalamsoyan ni Satan a komovot jya. 31So nipasyasi da no aro a kalamsoyan ni Satan ji Yeso a manci no kaji na paksozan sira a tovoin do abo so takadan a gazawagaw. 32O macitangked jira tokon am macinao o keyyan da dang no aro a kois. Am ori o nipasyasi da no kalamsoyan ni Satan ji Yeso do katovoy na sira do aro a kois. Meyratateng am tovoin na sira ni Yeso. 33Am ori o nikarwan da do kataotao no tao a mangay do aro a kois kaksoz da do alalasyas a katovoz da do rako a meybebneng a ranom. Ori o nipeykehmehmes da a mawakwak.

34Macita da no tomalamozong no kois am malalayo sira manci nya do aro a tao do ili a kano meyvahay do takey. 35So nipeygonoz no tao a mangay a tomita so vazay ang. Makaranes sira ji Yeso am macita da o tao a nikovotan no kalamsoyan ni Satan a meyyaywayob rana apya rana so aktokto a omlisna do tangain ni Yeso. Am ori o nikarahet da so onowned a to rana nyahey a tomita sya, ta tey arako oyowyat ni Yeso. 36O nimakacita so vazay ori a tao am ononongan da rana do aro a tao o panpandan na. Maniring sira am, “Yanimapya rana o nikovotan no aro a kalamsoyan ni Satan asyo.” 37O tao do Kelasen am ipanci da si Yeso a komaro jira. Ta manyahey sira. So nisakay na rana do vazangay a mangay rana. 38O nimapya nikovotan no kalamsoyan ni Satan a tao am ikakza na o kapacikavang na ji Yeso am ji na mya. So nipancyan na nya, 39“Mangay ka rana do vahay nyo a kapanci mo no mina vazay na jimo ni Ama ta do to.” So nyangay na rana do ili a meylimwang no mina vazay na jya ni Yeso.

Rarwa ka tao a manoyong a nimeyhanhan ni Yeso

(Matay 9:18-26; Make 5:21-43)

40Meysinaoli si Yeso do katovangan na no rako a meybebneng a ranom am mangay da rapongen no nimnanala sya aro a tao. 41Amyan so asa ka tomalamozong no peyneynozyan a meyngaran so Yalo a mai a mapasyasi do tangain ni Yeso karara na si Yeso a mangay do vahay da, 42ta makeykai rana mawakwak o veyvowen na anak a mavakes. O kakawakawan no nang am adwa so ikarwa (12).

Mangonong si Yeso do rarahan am meysilisilin o aro a tao a macihza jya. 43Amyan so asa ka mavakes adwa so ikarwa so awawan a makaliliw so kataotao na gomcin no rala. Nimimin na o kangangay na yangay na do mangavavaw am abo angangayan na. 44So nyangay na do likod na ni Yeso a kapinan na do seysayan no talili na. Am ori o nikapya na rana no ingingnen na. 45Maniring si Yeso am, “Sino ya niminan jyaken ang.” Abo o tao a manci nya. Maniring si Pite am, “Mo Mangnanao, mo panangangayan nya. Mo jyacita sira o aro a tao a yameysilisilin a yamangay jimo?” 46Maniring si Yeso am, “Yamyan so yaniminan jyaken, ta ko nimaliliw o oyowyat ko a makowbot jyaken.” 47Meylamdam na no mavakes o kaji na rana makapowziban so kanimapya na rana am to zikzik a mangay a meylilitod do tangain ni Yeso kapanci na no peypeypangayan no mina kapinan na jya, na kapya rana no ingingnen na. So nimiminan na sya patwawen do aro a tao. 48Maniring si Yeso jya am, “Manganako, ka manoyong a meyhanhan nyaken. Makapiya ka so onowned a mangay rana. Ta yarana apya o ingingnen mo.”

49Ji na pa teyka o ciring na am amyan so tao a nimapo do vahay da Yalo a manci no, “Ji mo na rara si Yeso, ta yanimaliman rana o anak mo.” 50Mamizing na ni Yeso am ipanci na ji Yalo. Maniring am, “Ji ka nyaheyan. Si manoyong o kapeyhanhan mo nyaken am apya rana ori a.” 51Makaranes sira Yeso do vahay da ni Yalo am si Pite a kani Yowani a kani Yake a kano inyapwan no kanakan o nipya na macisdep jya. 52Lavyan da no aro a tao o kanakan. Maniring si Yeso jira am, “Ji kanyo lavi, ta yamitkeh ori. Yamakongo kwan nyo.” 53Mamizing da o ciring ni Yeso am no mangay o kaming da am mangay o kapeyoyaoya da, do kapakateneng da jya a nimawakwak rana. 54Meyratateng am pinanan na o lima na kalolos na manci no, “Mo ovay, peyvangon rana.” 55So nipeysinaoli no pahad na kapeyvangon na rana. Meyratateng am ipanci na sira ni Yeso. Maniring am, “Pantaney kamo so kanen na.” 56Yeyyak da no inyapwan no kanakan. Maniring si Yeso jira am, “Ji nyo meyvehvehyan o ko mina vazay do tao an.”

Currently Selected:

Locya 8: snt

Highlight

Copy