Ntandiliko 2
2
1Bahi chilambo na kumahunde na vyammalele vivêle anemwo, nkumalilika kuumbwa. 2Kabla likànahwika liduva lya saba Nnungu ávele amalidìlè madengo lammalele la kuumba. Bahi nniduva anelyo lya saba Nnungu nkuyewelela kukola madengo lake. 3Nnungu nkulibaliki liduva anelyo lya saba na kulitenda lììve kwajili yake mwene, kwa kuva, liduva anelyo Nnungu ániyewelela kukola madengo lake lammalele la kuumba.
Maeleso lanji layâmba namuna chichiumbwije chilambo na vanu
4Bahi uvila njo chichiumbwije chilambo na kumahunde.
Yahwe Nnungu paumbile chilambo na kumahunde, 5nchilambo múvele bado mukanambimèlà chinu chohecho ing'anya Yahwe Nnungu ávele bado akanambichitonyèlà chilambo imbula, na wala nanga panapwawije munu wa kulima. 6Henga medi lachihuma mmimbwimbwi njo lachiulovya ulongo wa nchilambo. 7Bahi Yahwe Nnungu nkummumba nnume kwa litutunga lya ulongo, nkummehija dimumu dya umi n'dimula dyake, na aneyo munu nkuva chiumbe chivêle na umi.
8Bahi Yahwe Nnungu nkuvika bustani m'bali wa mashaliki, kueneo lichêmwa Adeni, na m'bustani aneyo nkummika ayula munu wammumbile. 9Anepo Yahwe Nnungu nkumeja kila namuna ya nnandi ukatapêle na ufâa kwa chakulya. Na ching'ati bustani aneyo pávele na milandi inji mivili ya vihepo. Vihepo vya nnandi umo vìvatenda vanu vààve na umi ukee na ntululilo, na vihepo vya nnandi unji vìvatenda vanu vààve na uweso wa kupembula mambo lambone na lahakalenge.
10Aneko ku Adeni kúvele na muto uchimwadilangila medi lake m'bustani aneyo, na kutandikila pabustani aneyo muto nkuyavanyika kuva myuto ncheche. 11Lina lya muto ntandi nni Pishoni. Muto anewo ùdinguka chilambo chammalele cha Havila, chilambo chivêle zahabu. 12Sahabu ya chilambo anecho nni yambone namene. Uchocho, nchilambo anecho mùvele malashi la bedola na mayanga lakatapêle la shohamu. 13Na muto wavili ùchemwa Gihoni. Muto anewo ùdinguka nchilambo chammalele cha Kushi. 14Na muto watatu ùchemwa Tigili. Muto anewo ùkululila m'bali wa mashaliki wa imanga ya Ashulu. Na muto wa ncheche ùchemwa Eflati.
15Bahi Yahwe Nnungu nkuntwala ayula nnume nkummika M'bustani ya Adeni uchinga ailime na kuichunga. 16Yahwe Nnungu nkumwamulisa ayula nnume wachidoni, “Unahulula chihi kulya vihepo vya nnandi wohewo wa m'bustani, 17henga vihepo vya nnandi wa kupembula mambo lambone na lahakalenge unalye, kwa kuva, liduva lyumbekulya vihepo vya nnandi anewo, muhiu uchiuhwe.”
18Anepo Yahwe Nnungu nkuchidoni, “Chikee chinu chambone ayu nnume kuva weka. Nìmbemmumbila nkúyangata ambenfâla.” 19Bahi Yahwe Nnungu nkummumba kwa ulongo kila nnyama wa munnyitu na kila chuni chiulûka kumahunde, nkumpelekejija ayula nnume uchinga alole chambevachema. Na malina lávichemìlè viumbe anevyo, nkuva njo malina lavo. 20Bahi ayula nnume nkuvachema malina anyama vammalele va kulangwa, na anyama va munnyitu na vyuni vyammalele viulûka kumahunde. Henga aneyo nnume nanga panammwene nkúyangata ambenfâla.
21Bahi Yahwe Nnungu nkunnaja ayula nnume luwono luidôpa, pánavele nkwona luwono, Nnungu nkuhalamola luvau lumo lwa aneyo nnume, na pachinu apala pahalamwele luvau nkupahunika kwa inyama. 22Bahi alula luvau lwaholomwene kuhaloka kwanga nnume, Yahwe Nnungu nkulujuha kuva mmahe, nkumpelekeja ayula mmahe kwanga ayula nnume. 23Anepo aneyo nnume nkuchidoni,
“Enhee, ayuno njo angufâla! Ayuno nni liwangwa kuhaloka mmawangwa langu,
na inyama kuhaloka muinyama yangu.
Ayuno àmbechemwa ‘Mmahe,’
kwa kuva, àhumile mwang'une ninnume.”
24Njo mana nnume ànneka atatake na anyokwe, nkulundana na n'jawe, na anevo vavili vààva mmili umo.
25Bahi aneyo nnume na n'jawe vammalele vávele chihi lukundu mwandu, henga wala nanga pávanawene dihoni.
Currently Selected:
Ntandiliko 2: Chimakonde
Highlight
Share
Copy
Want to have your highlights saved across all your devices? Sign up or sign in
© 2020 Pioneer Bible Translators
