Milʉ́mlʉ́ 13

Mbɛ̌r-Nzyɛ̌m lɨ́ elómǒ Banabâs bé e Saʉ̂l

1Ɨ́ sɔ́má bʉ̂r ó Mbɛ̌r-Nzyɛ̌m Antiôs, yé á be ó, le ogwíha o mílɔ̌b le ompʉ́n. Bé á be ó Banabâs, ndu e Siméon, mʉr Nígɛr, Lʉ́siʉs, mʉr Sirénia, ti e Manaɛ̂n. (Bé e ngóvina Erôd ó b'á gbɔlwa sɔ́má.) Saʉ̂l á be ntémé ó tɨ̂. 2Ádwií ɨ́ gúú móhó, ɨ́ jɔʼ bé á be lɨ́ edwe Tî Yésʉs kûm le eti méde yɨ́ nɛ́ɛ: Sísǐm mé Nzyɛ̌m nzě lɛ́ɛ e bé ó: «Tyélɨ́ɨ́ gá me Banabâs, bé e Saʉ̂l, lɨ́ empah. Bé séaa syɛ́ɛ́ mé á jébe bé ó, bé tô séa yɨ́.»

3Jɔʼ bé á bě sí ti méde le ejɨʼla yɨ́, bé ntɔ̂ʼ kɛl bé mebô, le ebîr bé ó, bé tôʼ.

Banabâs, bé e Saʉ̂l ɨ́ tíhé Swiprʉ̂s

4Sísǐm mé Nzyɛ̌m nzě lómǒ Banabâs, bé e Saʉ̂l ó, bé tôʼ Selœkéa. Bé ntɔ̂ʼ tó kalwɔɔ ɨ́ sitíma, bê nzě tó pyâl ɨ́ tíhé Swiprʉ̂s. 5Jɔʼ bé á pyâl Salamíni yɨ́, bê nzě lɛ́ɛ óYúden lɔ́ɔ́ mé Nzyɛ̌m ɨ́ mempáh mínjɨʼla mɔ́ɔ́. Yʉánɛs á be ntémé ó, lɨ́ esúʼo bê.

6Bê nzě laǎ tíhé wɨ́wɛ̂h, tó pyálɔɔ ɨ́ Páfos. Bê nzě bɔma e nyʉ́ʉ́ Yúden, nkaa ndu e ngwíha milɔ̌b mikóo. Díé lé, lé á be ó Bar-Yésʉs. 7Nye á didi ó, kwá mé Sɛrgíʉs Pólus, njwɨ́ɨ tíhé waá, á be twóó mʉr nyá. Nó ó, njwɨ́ɨ waá á jébe Banabâs, bé e Saʉ̂l, ebě, nye á be lɨ́ edǐ jóʼǒ lɔ́ɔ́ mé Nzyɛ̌m. 8Lʉ́ʉ́ díé é nkáa waá lé á be ntémé ó, “Elwímas”. Díé lé, lê ɨ́ lwǐb grɛ̂k ó nó. Nye á be lɨ́ enwim bê. Nye á si gwa kamle ntémé njwɨ́ɨbʉr lɨ́ ebúʼlǎ búʼó yɨ́ná e nzɨ̌ mpǔʼ. 9Saʉ̂l, mʉr á be e lʉ́ʉ́ díe ntémé ó, “Pɔ̂l” nyá, nzě bɨʼ nyé mejwôʼlʉ, nye mû lwɨ́ŋlá e Sísǐm mé Nzyɛ̌m. Nye e né ó:

10«Gua mwân mé sɔ́ŋ meleme, ntɨ̂m e mbɨn ɨ́ páʼ sá yɨ́yɛ̂h dí lɨ́ otîtyěl yɨ́! Go ó lwɨ́ŋlá e mikóo le bibɛr mimbi mímyɛ̂h. Nzê gó akǎ gwâʼ édwǐr mbɨambɨa menzɨ̌ mé Tî Yésʉs onzyɛ́h ónzyɛ́h ɛ̌? 11Go ópǎ bee ɨ́ báánâ: Tî Yésʉs mû ó ŋmɛ̂h gô. Go óbil ntím. Go ákǎ beě myɛ́n, tó pyâl ɨ́ bwá mélû.»

Tyé e tyé yaá, míh mé Elwímas, mé ntɔ̂ʼ bil ntím. Míh mé, mé á bé akǎ bee, njɨ edúrʉ́ʉ́ le edúrʉ́ʉ́. Nye nzě dwira ɨ́ mipáʼ mímyɛ̂h, lɨ́ esáǎ tɨ́átɨ́a. 12Jɔʼ njwɨ́ɨ á bee syɛ́ɛla yaá yɨ́, nye ntɔ̂ʼ bûʼla, ebě, nye á si bu kâm lɛ́ʼlá wé á dumo e Tî Yésʉs wɨ́.

Pɔ̂l, bé e Banabâs ɨ́ Antiôs, yaá dí ɨ́ sí Pisidía yɨ́

13Pɔ̂l, bé e bʉr ó njoo yé, nzě kalwɔɔ ɨ́ sitíma lɨ́ ebʉ́m é Páfos, ntɔ̂ʼ tô lɨ́ ebʉ́m é Pɛ́rge, dí ɨ́ sí Pamfilía yɨ́. Tɨ̂ʼ ó Yʉánɛs Marc nyɨɛ á bwóolo ntúʼó, tô Yerʉ́zalɛm yɨ́. 14Bê nzě tô e tyen yɔ́ɔ́ yaá dóló, táare ɨ́ Pɛ́rge, tó kumǒ Antiôs, dí ɨ́ sí Pisidía yɨ́. Ɨ́ móhó sábat, bê nzě nî ɨ́ mpáh minjɨʼla, nzě diŋɔɔ sí. 15Píe métié le mekaná mé ógwíha o mílɔ̌b, mé á sîl eláŋɔɔ yɨ́, nó ójwɨ́ɨ o mpáh bisulá, bé á sâ ó, bé lɛ́yɨɨ ó: «Bɨ́ɔɔ́, yé bé nyʉ́ʉ́ mʉ̂r ɨ́ sɔ́má yɨ́n, nyě e sá élɛ́ɛ dí e nkul egbâ bʉ̂r nkul ɨ́ miléme nó, nye lɛ́yɨɨ bʉr yǎ ɨ́ báánâ.»

16Nó ó Pɔ̂l á nze mɔa sí, tyɛ̂b tîtyěl, ntɔ̂ʼ peblě mbô. Nye ó: «Bʉr o b'Ɨ́zraɛ̂l, le bɨ̌n, baá o dí edwáawǒ Nzyɛ̌m bá, jóʼlááá gá me. 17Nzyɛ̌m gá wɨ́ná á si twâr bimpám gá bíná. Nye á si beʼ kúl gá yɨ́ná ɨ́ jɔʼ yé á be lɨ́ okómó ɨ́ sí Egɨ̂ptɛn yɨ́. Píe tɨ̂, nye nzě pɛʼ bé gʉ̂ʼ ɨ́ nkǔl nɨ́nɨ́ɨ́ nyé. 18Nye nzě dûhwǒ bébebébe kʉ̌ tyen wɔ́ɔ́ kúnókúno e mimbû mekám ménâ, ɨ́ lʉá. 19Nó nyé á dímle bikûl nzaangbá ɨ́ sí Kanân, nzě kab bʉ̂r sí yaá mpʉ nkɔ̂b líʼe. 20Píe jɔʼ yaá, yê nzě laa kúnókúno e mimbû minter minâ e mimbû mekám métɛ̂n. Nye nzě ntɨh ósɔ́ŋ gá bɨ́ná otîʼ o mílɔ̌b ónɨ́nɨ́ɨ́, ɨ́ ntɨh ntɨh, tó pyâl ɨ́ jɔʼ ngwíha milɔ̌b Samuel á ka byɛ̂l yɨ́. 21Nó ó, píe tɨ̂, bê nzě dî ó, bé díʼee e njwɨ́ɨ. Nzyɛ̌m ntɔ̂ʼ dwe bé Saʉ̂l, mwân mé Kîs, mʉr onzweh mé Benjamin. Nye nzě jwɨ́ɨ bé mimbû mekám ménâ. 22Jɔʼ nyé á pɛʼ Saʉ̂l ɨ́ dǐ njwɨ́ɨ Ɨ́zraɛ̂l yɨ́, nye nzě jébě David, tyêl nyé ɨ́ dǐ yaá. Nye á boʼlo ó: “Me á bee ó, David, mwân mé Yesê. Nye ó mbi mʉ̂r mé dí ekpɛl wɨ́. Nye ósâ sá yɨ́yɛ̂h mé dí egwɨ̂m ó, nye sâʼ yɨ́.” 23Nyʉ́ʉ́ ntâ mé David waá á be ó Yésʉs, Tiʼbʉr gá wɨ́ná. Nye ó Nzyɛ̌m á tyêl ɨ́ kúl bʉ̂r o b'Ɨ́zraɛ̂l, lɨ́ edû mpʉ nyé á boo kɛʼ bé yɨ́. 24Yésʉs dína apǎ nze, Yʉánɛs á si boo túno lɔ́ɔ́ wé kwá bʉr o b'Ɨ́zraɛ̂l bɨ́bɛ̂h. Nye á lɛ́ɛ bé ó, bé túmaa mikoo e mebébe mɔ́ɔ́, le edwira míléme. Bé e dúŋɔɔ. 25Jɔ̌ʼ Yʉánɛs á be téme esîl syɛ́ɛ́ yaá yɨ́, nye nzě lɛ́ɛ ó: “Bɨ̌n pʉgʉ́ jwɨʼ ó, me nzé? Mé abe waá bɨ́n dí ebóno nyá. Nó ó, beyɨɨ gá, mʉr waá ó dí enze píe koo wâm nɨ̌. Mé abě tyé mʉ̂r dí ó, me díʼee nye túʼǎ nyá.” #13.25: Nye á tile ɨ́ lwǐb grɛ̂k ó: «Mé abě tyé mʉ̂r dí ó, me tíyɨɨ mikǒl mí ósípah myé», sá dí elɛ́ɛ ɨ́ lwǐb Nzíme ó: «Mé abe e nkul eŋmɛn nyê.» Tó kœb ó, yé á bé abě jwɨʼ mé Yʉánes Ndu-bʉr.

26«Bɨ́ɔɔ́ bâm! Okɛ́l bâm! Bɨ̌n bwá bé ónta mé Abraham, le baá o dí edwáawǒ Nzyɛ̌m bá! Lɔ́ɔ́ wɨ̂, wé á túnɔɔ ó, lɨ́ esú gá lɨ́ná, dumo e tiʼá Nzyɛ̌m mû sí tiʼ bʉ̂r wɨ́. 27Bʉr ó Yerʉ́zalɛm le ojwɨ́ɨ bɔ́ɔ́, bé á be ɨ́ jéʼě mbi mʉ̂r Yésʉs á be wɨ́. Bɨ́ɛ yɨ́ɛ lɨ́ eláa mékaná mé ógwíha o mílɔ̌b lɨ́ osábat bɨ́bɛ̂h, bé á bé ajóʼǒ lɛ́á mékaná maá. Ɨ́ jɔʼ bé á tíʼe Yésʉs lɔ̌b wé yɨ́, syɛ́ɛla yaá, yé ó b'á ka sâ ó, mekǎn mé ógwíha o mílɔ̌b mé Nzyɛ̌m, mé díraa. 28Nye á bé abe e mebě mé á jala ó, nye dwêʼ má. Damá jóʼo nó, bé á si bana dî Pilátos ó, nye jʉ́ʼoo nye. 29Jɔʼ bé á sil esâ sá yɨ́yɛ̂h yé á be cɛmá ɨ́ Mekaná mé Nzyɛ̌m, dumo e né yɨ́, bê nzě pɛʼ nyé ɨ́ kolôs kʉ́, ntɔ̂ʼ dɨlɔɔ̌ múú wé. 30Nzyɛ̌m nyɨɛ nzě dwih nyé lɨ́ odwe. 31Yésʉs á bɨbe ó lɨ́ enyɨ̂nyɨn, tâŋ melû ɨ́ buo buo, kwá bʉr o bé le onɔ́ɔ́ bé á duhǒ sí Galilê, tô Yerʉ́zalɛm bá. Bʉr baá ó dí eboʼlǒ lɔ̌b wé kwá bʉr o b'Ɨ́zraɛ̂l. 32Bɨ̌h bʉr o tɨ̂ʼ mû ó lɨ́ elɛ́ɛ bɨ́n Mbɨambɨa Lɔ́ɔ waá. Wé ó nɛ́ɛ: sá Nzyɛ̌m á kɛʼ bimpám gá bíná yɨ́, 33nye mû ó sí dwe mɨ́ná gá yǎ, mɨná bwá bé ónta bɔ́ɔ́, ebě, nyɨ́ pɛ̌h Yésʉs. Yé ó mpʉ yé dí cɛmá ɨ́ Sâm mbá yɨ́. Yê cɛmá ó:

“Go ó mwân wǎm.

Mɨ́ byâ gó mûh.”

34Nzyɛ̌m, nyɨ́ dwih nyé lɨ́ odwe, lɨ́ esâ ó, nye ayɨ́ bo. Nzyɛ̌m á si lwib ó:

“Mɨ́ dwe bɨ́n ntémé menkɛ̌ʼ mempwár

mé á nyɛɛ dwe David má.

Menkɛ̌ʼ maá, mé ó

bisá bí ébûʼlɔɔ.”

35Sá tɨ̂ʼ ó nyé dí ebáʼǎ lɛ́ɛ ɨ́ yʉ́ʉ́ gúmo ó:

“Nó ó, go ákóʼó kam ó,

mʉr gǒ dí ti nyá, nye bôʼ ɨ́ soo.”

36Jɔ̌ʼ David á be ɨ́ twiʼ yɨ́, nye ó b'á bu séa Nzyɛ̌m syɛ́ɛ́, lɨ́ edû mítíʼá mí lémé mé Nzyɛ̌m. Nye nzě dwe, nye ntɔ̂ʼ debě bǎʼ e bimpám byé. Múú wé, wé ntɔ̂ʼ bo. 37Tó kœb ó, mʉ̌r Nzyɛ̌m á pɛh, dwih lɨ́ odwe nyá, á bé abo. 38Nó bɨ́ɔɔ́ bâm, gʉ́ŋáá gá sá yɨ̂: ɨ́ nzɨ̌ mé Yésʉs waá ó bɨ́h dí elɛ́ɛ bɨ́n pô ó: Nzyɛ̌m mû ó lɨ́ epɛʼ bíbaa bí ébébe nyé á niʼe gá bíná bí. 39Bʉr bɨ́bɛ̂h ngá dyêʼ koo e né bá, bé óbi nkâm ɨ́ nzɨ̌ nyé. Bé ódweŋɔɔ nkâm ɨ́ mimbi mílɔ̌b mímyɛ̂h. Bé á bé agwá bi nkâm ɨ́ nzɨ̌ metié mé Moyɨ̂z. 40Bɨ̌n a bâʼ, ebě, sá ógwíha o mílɔ̌b bé á lɛ́ɛ yɨ́, yé ámû jaá pyâl bɨ́n. Bé á lɛ́ɛ ó:

41“Bʉr ó pyêh, paá bee gâ.

Kámáá gâ. Bɨ̌n a dím tyeetye.

Ebě, me ósâ yʉ́ʉ́ syɛ́ɛla

ɨ́ melú bɨ́n ngá bee má.

Mʉ̂r lɛ́ɛ́ bɨ́n lɔ́ɔ dumo e syɛ́ɛla yaá nó,

bɨ̌n bé ákóʼó bûʼlǎ lɔ́ɔ́ wé waá.”»

42Jɔʼ bʉ̂r, bé á tô kʉ̌l yɨ́, bê nzě dî e Pɔ̂l, bé e Banabâs ó, bé báʼa nze ɨ́ gúú móhó sábat, lɨ́ ebáʼǎ nzě lwib e bé ɨ́ lɔ̌b ngwár waá. 43Jɔ̌ʼ gwɨ́hlá yé á gbɛha yɨ́, oYúden ɨ́ buo buo ndu e baá bé á nî ɨ́ yébé wɔ́ɔ́ bá, nzě dúŋɔɔ̌ Pɔ̂l, bé e Banabâs, le ejôʼlɔɔ bê. Pɔ̂l, bé e Banabâs ó b'á be lɨ́ elwib e bê, le ekʉ́ lɛ́ɛ e bé ó, bé náraa e Nzyɛ̌m ɨ́ lɔ̌b mpâm nyé.

44Ɨ́ móhó sábat wé á ka bɔma wɨ́, kúnókúno e bʉr ó nkana yaá bɨ́bɛ̂h, bé á si syɛŋa lɨ́ enzě jôʼlǒ lɔ́ɔ́ dí edumo e Tî Yésʉs wɨ́. 45Jɔʼ óYúden, bé á bee bím éntumo e bʉ̂r láa yɨ́, bé kʉ́ nzě sáŋɔɔ nzwíí, le epérɔɔ mékǎn Pɔ̂l á lɨ̂lɛɛ má, le elwɨ́ɔɔ nyê. 46Nó ó Pɔ̂l bé e Banabâs, bé á lwib e bé ɨ́ kpɛŋlɛm, abáawo mʉ̂r ó: «Yé á jɨ ó, lɔ́ɔ́ mé Nzyɛ̌m, wé nyɛ́ɛ túnɔɔ kwá nyɨ́n, oYúden. Sâ gwár, bɨ̌n bɨɛ, bɨ́ beně lɔ́ɔ waá, bɨ̌n bɨɛ lɨ́ ebee ó, bɨ̌n bé ajala le ebǐ twǐʼ njʉ̌m dǐ. Yé bé nó wá, beyɨɨ gá, bɨ̌h bɨ́ laa, lɨ́ etó túnǒ lɔ́ɔ́ mé Nzyɛ̌m waá ɨ́ mesí mé bʉ̂r oswîh. 47Ebě, Dâ Nzyɛ̌m á lɛ́ɛ bɨ̌h ó:

“Mɨ́ tyêl gó mpʉ̌ njʉl

lɨ́ esú lé ékʉn bíkúl bíswîh nzɨ̌.

Wé ó lɨ́ esú lé étiʼ bʉ̂r ɨ́ bigúmó bíbyɛ̂h,

tó kumo ɨ́ léné sí e njɨ bʉr.”»

48Ɨ́ jɔʼ bʉ̂r o dí abe óYúden bá, bé á jóʼo milɔ̌b myaá yɨ́, bê nzě soho le esêʼlě lɔ́ɔ́ dí edumo e Tî Yésʉs wɨ́. Baá bɨ́bɛ̂h Nzyɛ̌m á boo twâr ó, bé óbǐ twǐʼ njʉ̌m dǐ bá, bé ntɔ̂ʼ bûʼla.

49Nó ó lɔ́ɔ́ dí edumo e Tî Yésʉs wɨ́, wé á myaŋla ɨ́ sí yaá yɨ́yɛ̂h. 50OYúden bɨ́ɛ nzě tîtine bʉ́bá ó yébé wɔ́ɔ́, baá bé á be ɨ́ mimpǎŋ bídǐ bá ó, bé tíblaa Pɔ̂l, bé e Banabâs. Bé á tíne ntémé ó, mimpaŋ mi bʉ̂r ó nkana, soŋɔɔ bé e Pɔ̂l ó, bé pʉ́ʼaa ɨ́ sí yɔ́ɔ́. 51Tœ́á bé e Pɔ̂l, bé á tô wɨ́, bé ntɔ̂ʼ tô le ekuro pím ɨ́ mekʉ̌ mɔ́ɔ́, lɨ́ edwe bé mebě. Bê nzě tô Ikóniʉm. 52Ompʉ́n mé Yésʉs bɨ́ɛ, bé á be ó lwɨ́ŋlá e bisʉhʉʉ ndu e Sísǐm mé Nzyɛ̌m.

Currently Selected:

Milʉ́mlʉ́ 13: ozm

Highlight

Copy