Milʉ́mlʉ́ 3
3
Mbyɛ́lá nzwóó mʉr, wɨ́ tiʼe
1Ɨ́ yʉ́ʉ́ bíí kʉ̌ʼ ɨ́ mewala melɛ̂l, Pétrus, bé e Yʉánɛs nzě tô mpáh Nzyɛ̌m, lɨ́ etó sâ mínjɨʼla. 2Mpáh Nzyɛ̌m, nye ó le ebê bé jɨ́jébé “Jaá Ébê” lɨ́. Ɨ́ nkpâh ebê laá, yé á be ó e nyʉ́ʉ́ nzwóó mebyɛ́l á be e mekʉ̌ miswámá nyá. Ɨ́ móhó wɨ́wɛ̂h, bé á be lɨ́ enkɨnkɛ́ɛ nyê, lɨ́ enzě didyêʼ nyé tɨ̂ʼ ɨ́ nkpâh ebê laá ó, nye bónaa bʉr o b'á tʉtô mpáh Nzyɛ̌m bá, lɨ́ esú lé éjɨjaʼ bé bisâ. 3Nó ó mbeá nyé á bee Pétrus, bé e Yʉánɛs lɨ́ edǐ nî tɨ̂ʼ yɨ́, nye nzě dî e bé ó, bé dwêʼ nye mɔnɨ́. 4Pétrus, bé e Yʉánɛs nzě bɨʼɔɔ nyé mejwôʼlʉ. Pétrus, nye e né ó: «Jwɛ́ʼɛ́ɛ́ bɨ́h!» 5Mʉ̌r nɨ̌ ntɔ̂ʼ dwɛ̂ʼ bé ɨ́ tooobó, lɨ́ ebónǒ nkʉ̂ bé óbɛ̌m dwe nyé yʉ́ʉ́ sɔ̂ʼ. 6Pétrus nzě lɛ́ɛ e né ó: «Mé abe yɨ́ɛ e minzaŋ mí nkóhó mɔnɨ́, nkʉ̂ myaá mí gʉ̂l. Nó sá mɛ̂m dí e yé yɨ́, yé ó mé dwé gô: ɨ́ díé mé Yésʉs-Krîst, mʉr Nazarɛ̂t, bʉŋláa!»
7Nye nzě mɛ̂r nyé ɨ́ mbó éjʉ̂m, gbɛl nyé sí. Tyé e tyé yaá, mekʉ̌ ndu e metuʼrʉ mé, mé ntɔ̂ʼ sâ mbɨ̂mbɨá. 8Mʉr waá ntɔ̂ʼ gbɔlwa sí ɨ́ nkwɨ́ɨlɨ́, tyɛ̂b tîtyěl, nzě táare étye. Bé e bʉr o mílʉ́mlʉ́, bê nzě nî mpáh Nzyɛ̌m. Nye á be ó lɨ́ etye, le elyâh, le egúmlǒ Nzyɛ̌m. 9Nó mpʉ bʉ̂r bɨ́bɛ̂h bé á bee nye lɨ́ etye le egúmlǒ Nzyɛ̌m yɨ́, 10bê nzě dweʼe nyê, gʉ́a ntémé ó, yé á kʉ be ó mʉr á didi ɨ́ Jaá Ébê é mpáh Nzyɛ̌m lɨ́ ejɨjaʼ bísâ nyá. Bʉ́á ntɔ̂ʼ mɛ̂r bɨ́bɛ̂h ɨ́ miléme. Bê nzě kâm sâ yaá.
Pétrus lɨ́ elwib ɨ́ gwǎl mpáh Nzyɛ̌m
11Mpʉ mʉ̂r nɨ̌ á mɛ̂r Pétrus, bé e Yʉánɛs e mebô yɨ́, bʉr bɨ́bɛ̂h nzě tóŋɔɔ míkám nko bé á be yɨ́, jéhɔɔ̌ lɔ̌b waá minum mimběʼ. Bé á be ó, ɨ́ gwal mé Salomɔ̂ŋ dí dóló mpáh Nzyɛ̌m yɨ́. 12Pétrus nzě bee, nye ntɔ̂ʼ dî e bé ó: «Bʉr o b'Ɨ́zraɛ̂l, bɨ̌n pʉgʉ́ twɨrǎ mpʉ mʉ̂r nyâʼ ka tiʼɔɔ yɨ́, ɨ́ yé? Bɨ̌n dwídwɛ́ʼ bɨ́h mpʉ̌ sá lɛ́ɛ́, nyě tyé ó ɨ́ lɔ̌b nkûl nyɨ́h, nkʉ̂ ɨ́ lɔ̌b ótîtyěl wɨ́h ɨ́ yé? 13Nye tiʼe nó ó, ebě, Nzyɛ̌m mé Abraham, Isaac, ndu e Yákɔb, Nzyɛ̌m bimpám gá bíná, á kpɛl ó, nye dwêʼ syɛ̂l mesâ wé, Yésʉs kûm. Bɨ̌n bɨɛ bé á si bɛ́ma nye kwá mé Pilátos, ntɛŋɔɔ nyé ɨ́ mebó mé ó, nye jʉ́ʼoo nye. Bɨ̌n bé á sâ nye nó ó, Pilátos nyɨɛ, nyé osí tíʼe ɨ́ lémé wé ó, nyě bír ó nye. 14Bɨ̌n bé á bɛ́ma ó, mʉr á be ti, nye ntémé waá dí tîtyěl ɨ́ míh mé Nzyɛ̌m nyá. Bɨ̌n nzě dî e Pilátos ó, nye bírɨɨ bɨ̌n mʉr swîh, mʉr á be njʉ̂l bʉr nyá. 15Bɨ̌n bé á si bana jʉ̂ Etín é Twiʼ. Damá jóʼǒ mpʉ yé á syɛ́ɛlɨ nó yɨ́, Nzyɛ̌m nyɨɛ, nyɨ́ bánǎ pɛh nyê, dwih nyé lɨ́ odwe. Bɨ̌h ó dí oboʼlo ó lɔ̌b waá. 16Mʉr nyâ, waá bɨ́n dí ebee le eboó gʉ́a nyâ, nye bé ɨ́ dyɛ̂ʼwo e Yésʉs. Díé mé Yésʉs waá, bé e búʼó Yésʉs dí entɨh bʉ̂r yɨ́, byé ô sá ó, nye díʼee kwahaá mbɨ̂mbɨá mpʉ bɨ́n bɨ́bɛ̂h dí ebee nyé náǎ nɨ̌.
17«Bɨ́ɔɔ́ bâm! Okɛ́l bâm! Me lɨ́ egʉ́a ó, táare e bɨ̌n, kumo le ojwɨ́ɨ bɨ́n, bɨ̌n bé á gʉʼla ó, gʉʼláa ɨ́ lɔ̌b mé Yésʉs. 18Tó kœb ó, Nzyɛ̌m á lóŋlo ekǎn nyé á lɛ́ɛ ɨ́ minum mí ógwíha o mílɔ̌b bɨ́bɛ̂h lɨ́ ó, cɨɨ e nzɨ̌ syɛ́ɛla yɨ́n yaá. Nye á lɛ́ɛ ó, yé jɨ ó, mʉr nyé á lœm múló mé jwɨ́ɨ nyá nkɛ́yɨɨ mitúú mpʉ́nʉ̌. 19Nó túmáá gá mikoo e misyóm mín. Bɨ̌n a dwírá míléme, Nzyɛ̌m nkʉ̂ pɛʼ bíbaa bí ébébe nyé á niʼe bɨ̌n bí! 20Jɔʼ yaá ó Dâ Nzyɛ̌m ngá kǎ dwe bɨ́n epʉ́la ó, bɨ̌n e né díʼee ɨ́ mepyɛbla yɨ́. Nyé ontɨh bɨ́n Krîst: Mʉr nyé á lœm múló mé jwɨ́ɨ, waá nyé á boo pɛ̂h ɨ́ lɔ̌b wɨ́n nyá. Nó yé ó Yésʉs. 21Báánâ, nye ɨ́ jala le edi ɨ́ jʉ́o kʉ́, ɨ́ di di di, tó pyâl ɨ́ jɔ̌ʼ Nzyɛ̌m óbáʼǎ tyêl bísá bíbyɛ̂h ɨ́ bityé byɔ́ɔ́ mpʉ nyé á boo kɛʼ, duho myâ yɨ́. Nye á kɛʼ nó ó, cɨɨ e nzɨ̌ ogwíha o mílɔ̌b bé, baá dí egúmo e né bá. 22Moyɨ̂z á lɛ́ɛ ó: “Dâ, dí Nzyɛ̌m wɨ́n nyá, ólómlo bɨ́n ngwíha milɔ̌b mpʉ mé dí yɨ̂. Nye óbe ó mʉr kúl yɨ́n. Sá yɨ́yɛ̂h nyé ngá lɛ́ɛ bɨ́n yɨ́, bɨ̌n e sá yê! 23Mʉr nyɨnyɛ̂h óbe, asâ ngwíha milɔ̌b waá mejóʼo nyá, ópɛʼɔɔ ɨ́ kúl gá yɨ́ná, jʉ́ŋɔɔ.”
24«Táare ɨ́ jɔʼ mé Samuel, pyâl lɨ́ ogwíha o mílɔ̌b bɨ́bɛ̂h, bím bé á lwib yɨ́, bé á lwilwib ó, dumo e bisâ bi dí esyɛ́ɛ ɨ́ melú mâʼ bí. 25Bɨ̌n le onɔ́ɔ́ ó dí e nkɔb ɨ́ saá Nzyɛ̌m á tyêl páʼ bé e bimpám bíná nyɨ́. Nye á lɛ́ɛ le Abraham ó: Bím mímbɛ̌r mi bʉ̂r mi dí ɨ́ sí yɨ̂ʼ mímyɛ̂h mí, me ósʉ myé metyɛʼ me mpóm ó, ɨ́ nzɨ̌ nta gǒ. 26Nó ɨ́ jɔ̌ʼ Nzyɛ̌m á ka lómo syɛ̂l mesâ wé yɨ́, nye á nyɛɛ tyen nye ó, kwá nyɨ́n, ó nye sʉ́ʼoo bɨ̌n métyɛʼ me mpóm, le edwih mʉ̂r sɔ́má yɨ́n nyɨnyɛ̂h ɨ́ bɨ́blǎ syɛ́ɛla yɨ́yɛ̂h nyé dí esâ yɨ́.»
Currently Selected:
Milʉ́mlʉ́ 3: ozm
Highlight
Share
Copy
Want to have your highlights saved across all your devices? Sign up or sign in
Milʉ́mlʉ́ 3
3
Mbyɛ́lá nzwóó mʉr, wɨ́ tiʼe
1Ɨ́ yʉ́ʉ́ bíí kʉ̌ʼ ɨ́ mewala melɛ̂l, Pétrus, bé e Yʉánɛs nzě tô mpáh Nzyɛ̌m, lɨ́ etó sâ mínjɨʼla. 2Mpáh Nzyɛ̌m, nye ó le ebê bé jɨ́jébé “Jaá Ébê” lɨ́. Ɨ́ nkpâh ebê laá, yé á be ó e nyʉ́ʉ́ nzwóó mebyɛ́l á be e mekʉ̌ miswámá nyá. Ɨ́ móhó wɨ́wɛ̂h, bé á be lɨ́ enkɨnkɛ́ɛ nyê, lɨ́ enzě didyêʼ nyé tɨ̂ʼ ɨ́ nkpâh ebê laá ó, nye bónaa bʉr o b'á tʉtô mpáh Nzyɛ̌m bá, lɨ́ esú lé éjɨjaʼ bé bisâ. 3Nó ó mbeá nyé á bee Pétrus, bé e Yʉánɛs lɨ́ edǐ nî tɨ̂ʼ yɨ́, nye nzě dî e bé ó, bé dwêʼ nye mɔnɨ́. 4Pétrus, bé e Yʉánɛs nzě bɨʼɔɔ nyé mejwôʼlʉ. Pétrus, nye e né ó: «Jwɛ́ʼɛ́ɛ́ bɨ́h!» 5Mʉ̌r nɨ̌ ntɔ̂ʼ dwɛ̂ʼ bé ɨ́ tooobó, lɨ́ ebónǒ nkʉ̂ bé óbɛ̌m dwe nyé yʉ́ʉ́ sɔ̂ʼ. 6Pétrus nzě lɛ́ɛ e né ó: «Mé abe yɨ́ɛ e minzaŋ mí nkóhó mɔnɨ́, nkʉ̂ myaá mí gʉ̂l. Nó sá mɛ̂m dí e yé yɨ́, yé ó mé dwé gô: ɨ́ díé mé Yésʉs-Krîst, mʉr Nazarɛ̂t, bʉŋláa!»
7Nye nzě mɛ̂r nyé ɨ́ mbó éjʉ̂m, gbɛl nyé sí. Tyé e tyé yaá, mekʉ̌ ndu e metuʼrʉ mé, mé ntɔ̂ʼ sâ mbɨ̂mbɨá. 8Mʉr waá ntɔ̂ʼ gbɔlwa sí ɨ́ nkwɨ́ɨlɨ́, tyɛ̂b tîtyěl, nzě táare étye. Bé e bʉr o mílʉ́mlʉ́, bê nzě nî mpáh Nzyɛ̌m. Nye á be ó lɨ́ etye, le elyâh, le egúmlǒ Nzyɛ̌m. 9Nó mpʉ bʉ̂r bɨ́bɛ̂h bé á bee nye lɨ́ etye le egúmlǒ Nzyɛ̌m yɨ́, 10bê nzě dweʼe nyê, gʉ́a ntémé ó, yé á kʉ be ó mʉr á didi ɨ́ Jaá Ébê é mpáh Nzyɛ̌m lɨ́ ejɨjaʼ bísâ nyá. Bʉ́á ntɔ̂ʼ mɛ̂r bɨ́bɛ̂h ɨ́ miléme. Bê nzě kâm sâ yaá.
Pétrus lɨ́ elwib ɨ́ gwǎl mpáh Nzyɛ̌m
11Mpʉ mʉ̂r nɨ̌ á mɛ̂r Pétrus, bé e Yʉánɛs e mebô yɨ́, bʉr bɨ́bɛ̂h nzě tóŋɔɔ míkám nko bé á be yɨ́, jéhɔɔ̌ lɔ̌b waá minum mimběʼ. Bé á be ó, ɨ́ gwal mé Salomɔ̂ŋ dí dóló mpáh Nzyɛ̌m yɨ́. 12Pétrus nzě bee, nye ntɔ̂ʼ dî e bé ó: «Bʉr o b'Ɨ́zraɛ̂l, bɨ̌n pʉgʉ́ twɨrǎ mpʉ mʉ̂r nyâʼ ka tiʼɔɔ yɨ́, ɨ́ yé? Bɨ̌n dwídwɛ́ʼ bɨ́h mpʉ̌ sá lɛ́ɛ́, nyě tyé ó ɨ́ lɔ̌b nkûl nyɨ́h, nkʉ̂ ɨ́ lɔ̌b ótîtyěl wɨ́h ɨ́ yé? 13Nye tiʼe nó ó, ebě, Nzyɛ̌m mé Abraham, Isaac, ndu e Yákɔb, Nzyɛ̌m bimpám gá bíná, á kpɛl ó, nye dwêʼ syɛ̂l mesâ wé, Yésʉs kûm. Bɨ̌n bɨɛ bé á si bɛ́ma nye kwá mé Pilátos, ntɛŋɔɔ nyé ɨ́ mebó mé ó, nye jʉ́ʼoo nye. Bɨ̌n bé á sâ nye nó ó, Pilátos nyɨɛ, nyé osí tíʼe ɨ́ lémé wé ó, nyě bír ó nye. 14Bɨ̌n bé á bɛ́ma ó, mʉr á be ti, nye ntémé waá dí tîtyěl ɨ́ míh mé Nzyɛ̌m nyá. Bɨ̌n nzě dî e Pilátos ó, nye bírɨɨ bɨ̌n mʉr swîh, mʉr á be njʉ̂l bʉr nyá. 15Bɨ̌n bé á si bana jʉ̂ Etín é Twiʼ. Damá jóʼǒ mpʉ yé á syɛ́ɛlɨ nó yɨ́, Nzyɛ̌m nyɨɛ, nyɨ́ bánǎ pɛh nyê, dwih nyé lɨ́ odwe. Bɨ̌h ó dí oboʼlo ó lɔ̌b waá. 16Mʉr nyâ, waá bɨ́n dí ebee le eboó gʉ́a nyâ, nye bé ɨ́ dyɛ̂ʼwo e Yésʉs. Díé mé Yésʉs waá, bé e búʼó Yésʉs dí entɨh bʉ̂r yɨ́, byé ô sá ó, nye díʼee kwahaá mbɨ̂mbɨá mpʉ bɨ́n bɨ́bɛ̂h dí ebee nyé náǎ nɨ̌.
17«Bɨ́ɔɔ́ bâm! Okɛ́l bâm! Me lɨ́ egʉ́a ó, táare e bɨ̌n, kumo le ojwɨ́ɨ bɨ́n, bɨ̌n bé á gʉʼla ó, gʉʼláa ɨ́ lɔ̌b mé Yésʉs. 18Tó kœb ó, Nzyɛ̌m á lóŋlo ekǎn nyé á lɛ́ɛ ɨ́ minum mí ógwíha o mílɔ̌b bɨ́bɛ̂h lɨ́ ó, cɨɨ e nzɨ̌ syɛ́ɛla yɨ́n yaá. Nye á lɛ́ɛ ó, yé jɨ ó, mʉr nyé á lœm múló mé jwɨ́ɨ nyá nkɛ́yɨɨ mitúú mpʉ́nʉ̌. 19Nó túmáá gá mikoo e misyóm mín. Bɨ̌n a dwírá míléme, Nzyɛ̌m nkʉ̂ pɛʼ bíbaa bí ébébe nyé á niʼe bɨ̌n bí! 20Jɔʼ yaá ó Dâ Nzyɛ̌m ngá kǎ dwe bɨ́n epʉ́la ó, bɨ̌n e né díʼee ɨ́ mepyɛbla yɨ́. Nyé ontɨh bɨ́n Krîst: Mʉr nyé á lœm múló mé jwɨ́ɨ, waá nyé á boo pɛ̂h ɨ́ lɔ̌b wɨ́n nyá. Nó yé ó Yésʉs. 21Báánâ, nye ɨ́ jala le edi ɨ́ jʉ́o kʉ́, ɨ́ di di di, tó pyâl ɨ́ jɔ̌ʼ Nzyɛ̌m óbáʼǎ tyêl bísá bíbyɛ̂h ɨ́ bityé byɔ́ɔ́ mpʉ nyé á boo kɛʼ, duho myâ yɨ́. Nye á kɛʼ nó ó, cɨɨ e nzɨ̌ ogwíha o mílɔ̌b bé, baá dí egúmo e né bá. 22Moyɨ̂z á lɛ́ɛ ó: “Dâ, dí Nzyɛ̌m wɨ́n nyá, ólómlo bɨ́n ngwíha milɔ̌b mpʉ mé dí yɨ̂. Nye óbe ó mʉr kúl yɨ́n. Sá yɨ́yɛ̂h nyé ngá lɛ́ɛ bɨ́n yɨ́, bɨ̌n e sá yê! 23Mʉr nyɨnyɛ̂h óbe, asâ ngwíha milɔ̌b waá mejóʼo nyá, ópɛʼɔɔ ɨ́ kúl gá yɨ́ná, jʉ́ŋɔɔ.”
24«Táare ɨ́ jɔʼ mé Samuel, pyâl lɨ́ ogwíha o mílɔ̌b bɨ́bɛ̂h, bím bé á lwib yɨ́, bé á lwilwib ó, dumo e bisâ bi dí esyɛ́ɛ ɨ́ melú mâʼ bí. 25Bɨ̌n le onɔ́ɔ́ ó dí e nkɔb ɨ́ saá Nzyɛ̌m á tyêl páʼ bé e bimpám bíná nyɨ́. Nye á lɛ́ɛ le Abraham ó: Bím mímbɛ̌r mi bʉ̂r mi dí ɨ́ sí yɨ̂ʼ mímyɛ̂h mí, me ósʉ myé metyɛʼ me mpóm ó, ɨ́ nzɨ̌ nta gǒ. 26Nó ɨ́ jɔ̌ʼ Nzyɛ̌m á ka lómo syɛ̂l mesâ wé yɨ́, nye á nyɛɛ tyen nye ó, kwá nyɨ́n, ó nye sʉ́ʼoo bɨ̌n métyɛʼ me mpóm, le edwih mʉ̂r sɔ́má yɨ́n nyɨnyɛ̂h ɨ́ bɨ́blǎ syɛ́ɛla yɨ́yɛ̂h nyé dí esâ yɨ́.»
Currently Selected:
:
Highlight
Share
Copy
Want to have your highlights saved across all your devices? Sign up or sign in