Yʉánɛs 9

Mʉr á byɛ̂l ántím nyá

1Yésʉs lɨ́ ekǎ laa yʉ́ʉ́ gúmo nɛ́ɛ: nye nzě bee nyʉ́ʉ́ mʉ̂r á byɛ̂l e ntím nyá. 2Ompʉ́n bé, nzě dî e né ó: «Lɛ̂ʼla, mʉr nyâʼ á byɛ̂l e ntím ɨ́ yé? Nzê ɨ́ lɔ̌b syóm wé, nye mʉr tɨ̂ʼ ɛ̌? Nzê ɨ́ lɔ̌b syóm óbyɛ́l bé, bé á sâ wɨ́ ɛ́?»

3Yésʉs, nye e bé ó: «Yé abe ɨ́ lɔ̌b syóm wé, nkʉ̂ waá óbyɛ́l bé. Nye á byɛ̂l e ntím ó, lɨ́ esú ó, bisyɛ́ɛla mé Nzyɛ̌m, byé nyɨ́nɨɨ e né. 4Mɨná sâʼ gá syɛ́ɛla me Mʉ̂r á ntɨh me nyá, yé dína móhó, ebě, pum, wé mû ó lɨ́ enzě dwíne, mʉr akǎ be e nkul eséa. 5Jɔʼ yɨ́yɛ̂h mé dína ɨ́ sí yɨ̂ʼ yɨ́, me ó dí njʉl dí ɨ́ sí yɨ̂ʼ wɨ́.» 6Jɔ̌ʼ Yésʉs á be ɨ́ lɛ́ɛ nó yɨ́, nye nzě syɛɛ métyéelé sí, nzě pulo bwá bíbwǎh e metyéelé mé, ntɔ̂ʼ lœm ántím byǎ ɨ́ mîh. 7Nye e né ó: «Tóʼ, tó jwɨɨ mîh ɨ́ béh Siloâm.»

(Díe laá, lé páʼlɔ́ɔ́ ó: “Lʉ́mlʉ́.”)

Ántím nzě tó jwɨɨ mpóm. Nyé ká búla nɛ́ɛ: nye mû ó lɨ́ ebee.

8Jyɛɛ́ yé ndu e baá bé á bɨbee nye ɨ́ diá nkóó bá, bé ó: «Ɔ́ɔ! Ntʉ mʉ̂r á didi wâʼ ndîndǐl lɨ́ egwâm bísâ nyâʼ ɛ̌?»

9Bâʼ bʉ̂r, bé ó: «Nye ó nɨ̌ ʉ.»

Bʉ́ʉ́, bé ó: «Yaá! Yé abe nyê. Bé e nɔ́ɔ́, bé nwɨɨla yɨ́ɛ ó, nwɨɨláa.»

Mʉ̌r nɨ̌, nye e bé ó: «Yé ó mɛm mʉr tɨ̂.»

10Bê nzě gɔ́na le edî nyé metíá. Bé e né ó: «Míh mô, mé á bɔ́a nyá?»

11Mʉ̌r nɨ̌, nye e bé ó: «Mʉr dí e díe ó, Yésʉs nyá, nye bé ɨ́ pulo bwá bíbwǎh, lœm mé byǎ ɨ́ mîh. Nye e me ó, me tôʼ ɨ́ béh Siloâm, tó jwɨɨ mpóm. Me ntɔ̂ʼ tô. Jɔʼ mê jwɨɨ mpóm yɨ́, me ntɔ̂ʼ kʉ́ táare ébee ɨ́ sʉ́lʉ́lʉ́.»

12Bê nzě dî e né ó: «Mʉr waá, nye nkoó?»

Nye ó: «Mé agʉ́ǎ nko nyé dí yɨ́.»

OFarizyɛ̂n, bé lɨ́ edî ántím metíá

13Bʉr baá nzě nʉa mʉ̂r á bɨbe e ntím nyá, tô e né súm óFarizyɛ̂n, bé á be yɨ́. 14Náǎ yé ó, Yésʉs á pulo bibwǎh, jomo mʉ̂r nɨ̌ mîh ó ɨ́ móhó sábat. 15Nó yaá ó óFarizyɛ̂n bé á dî e mʉ̌r nɨ̌ sá yé á sâ ó, nye béyɨɨ yɨ́. Nye ó: «Nye bé ó sí lœm mé bwá bíbwǎh ɨ́ mîh. Me nzě tó jwɨɨ mpóm. Nó ó, báánâ, me mû ó lɨ́ ebee.»

16Bâʼ óFarizyɛ̂n, bé ó: «Mʉr sá mbǐ syɛ́ɛla wɨ̂ʼ nyá, nyé abe e nkul eduho kwá mé Nzyɛ̌m, ebě, nyé adû mémpéné mé móhó sábat.»

Bʉ́ʉ́, bé ó: «Nyá? Syɛ̂l misyóm, nyé abe e nkul esâ mbi ésimá wɨ̂.»

Bʉr ntɔ̂ʼ bɔ́ʼa ménkɔb mebá.

17OFarizyɛ̂n nzě báʼǎ díŋɔɔ mʉ̂r á tiʼɔɔ nyá ó: «Guá lɛ́ɛ́ yé, dumo e mʉr bɛ́ɛ́ gó mîh nyá?»

Nye ó: «Yé ó ngwíha milɔ̌b mé Nzyɛ̌m.»

18(OYúden, bé á be ɨ́ jɔʼ yaá ó, akpɛl ébûʼla ó, nye á bɨbe ó ántím, nye ntɔ̂ʼ kǎ bee.)

Bê nzě jébe sɔ́ŋ ndu e nyɔ̌ŋ wé, 19nzě díŋɔɔ bé metíá. Bé e bé ó: «Nzê yê tyeetye ó, mʉr nyâ, nye ó mwân wɨ́n ɛ̌? Nó ó, bɨ̌n kʉ́ bánǎ lɛ́ɛ ó, nye á byɛ̂l ó e ntím ɛ́? Nó ó, yê ka sá ó, nye béyɨɨ ɨ́ báánâʼ mpʉʼ yɨ́ ɛ́?»

20Obyɛ̂l bé nzě yala e bé ó: «Bɨ̌h bé lɨ́ egʉ́a ó, yé ó mwân wɨ́h. Bɨ̌h bé lɨ́ egʉ́a ntémé ó, nye á byɛ̂l ó e ntím. 21Sâ gwár, bɨ̌h bé agʉ́ǎ sâ sá ó, nye béyɨɨ yɨ́. Bɨ̌h bɨɛ, bé agʉ́a mʉ̂r bɛ́ɛ́ nyé mîh nyá. Jíʼéé gá nye mʉr tɨ̂. Nye mû ó mbi mʉ̂r jálá le ebɛ̂ʼ myé mílɔ̌b wɨ́.» 22(Náǎ yé ó, Sɔ́ŋ ndu e nyɔ̌ŋ, bé á lwilwib nó ó, ebě, bé á be ó lɨ́ ekpɛ́ɛ óYúden, ebě, oYúden baá, bé á bě sí di twíí páʼ nyɔ́ɔ́ ó, mʉ̂r sí lɛ́ɛ ó, Yésʉs, nye ó Mʉ̌r Nzyɛ̌m á lœm múló mé jwɨ́ɨ nó, nye sóŋɔɔ ɨ́ mpáh minjɨʼla nyɔ́ɔ́. 23Nó yaá ó óbyɛ́l bé, bé á lɛ́ɛ ó: “Nye mû ó mbi mʉ̂r jálá le ebɛ̂ʼ myé mílɔ̌b wɨ́. Jíʼéé gá nye mʉr tɨ̂ʼ” yɨ́.)

24OFarizyɛ̂n nzě báʼǎ jébe mʉ̂r á tiʼɔɔ nyá. Bé e né ó: «Lɛ́yɨ́ɨ́ ótyeetye ɨ́ míh mé Nzyɛ̌m. Bɨ̌h bé lɨ́ egʉ́a ó, mʉ̌r nɨ̌, nye ó syɛ̂l misyóm.»

25Nye ó: «Mɛm mé agʉ́a yâm nkʉ̂ nye syɛ̂l misyóm, nkʉ̂ nyé abe nyê. Sá mé dí ejaá gʉ́a yɨ́, yé ó njɨ gwár: me á bɨbe ó ántím. Nó ó, ɨ́ báánâ, me mû ó lɨ́ ebee ɨ́ púúm.»

26Bê nzě báʼǎ dî e né ó: «Nye pa sá gó nyá? Nye bɛ́ɛ́ gó mîh nyá?»

27Nye ó: «Me bé ó sí boó lɛ́ɛ bɨ́n. Nó ó, bɨ̌n bé akpɛl éjóʼo. Bɨ̌n kǎ kpɛl ó, me báʼa lɛ́ɛ bɨ̌n yé swîh ɛ̌? Nzê bɨ̌n ntémé mû ó lɨ́ egwɨ̂m édi ómpʉ́n bé ɛ́?»

28Bê nzě táare élwɨ́ɔɔ nyê. Bé e né ó: «Gua, go óbɛ̌m di mpʉ́n wé. Sâ gwár, bɨ̌h bɨɛ, bé ó ompʉ́n mé Moyɨ̂z. 29Bɨ̌h bé lɨ́ egʉ́a ó, Nzyɛ̌m á be ó sí lwib e Moyɨ̂z. Sâ gwár, mʉr nyâ, bɨ̌h bé agʉ́ǎ nko nyé á duho yɨ́.»

30Mʉ̌r nɨ̌, nye e bé ó: «Sá ékâm, yé ó bɨ̌n bé agʉ́ǎ nko nyé á duho yɨ́, nyɨɛ bé yɨ́ɛ ó sí bɛ́ɛ mé mâm mîh. 31Mɨná bé lɨ́ egʉ́a gá ó, Nzyɛ̌m, nyé abe lɨ́ ejóʼo ósyɛ̂l o mísyóm. Nyě jaá jôʼlo ó, njɨ mʉr dí edwe nyé kûm, waá dí esâ gwɨ́má yé nyá. 32Mɨná bé apǎ jóʼo gá lʉ́ʉ́ dʉ́o bé lɨ́ elɛ́ɛ ó, kɛl, nyɨ́ pǎ tiʼ mʉ̂r á byɛ̂l e ntím nyá. 33Yé bé mʉr waá, nyé aduho kwá mé Nzyɛ̌m nó, lɛ́ɛ́, nye bé abe e nkul esâ sɔ̂ʼ nó.»

34Bé e né ó: «Gbaa gó á byɛ̂l, go ó njɨ témé misyóm. Gǒ lɛ́ɛ́ ó, gǒ lɛ́ʼlé ó, bɨ̌h ɨ́?»

Ntɔ̂ʼ soŋɔɔ nyé ɨ́ mpáh minjɨʼla nyɔ́ɔ́.

Mʉr nyɨnyɛ̂h dí esâ syóm nyá, nye ó ántím

35Yésʉs ntɔ̂ʼ jóʼo ó, mʉr nyé á tiʼ nyá, bé á be ɨ́ so nyé ɨ́ mpáh minjɨʼla nyɔ́ɔ́. Nye nzě bɔma e né. Nye e né ó: «Nzê go lɨ́ edyɛ̂ʼwo e Mwân mé Mʉr ɛ̌?»

36Nye e né ó: «Dâ ɛ̌, lɛ́yɨ́ɨ́ mé waá dí ejébɔɔ “Mwân mé Mʉr” nyá, ó me dyɛ̂ʼwaa e né.»

37Yésʉs, nye e né ó: «Go lɨ́ ebee nyê. Nye ntémé ó dí elwib e go ɨ́ báánâʼ nyá.»

38Mʉ̌r nɨ̌, nye e né ó: «Dâ ɛ̌, mɨ́ dyɛ̂ʼwo e go!»

Nye ntɔ̂ʼ bɨʼ mébóó sí ɨ́ mpǒm mé Yésʉs.

39Yésʉs, nye ó: «Me á nze ɨ́ sí yɨ̂ʼ ó, lɨ́ enzě tíʼe bʉ̂r milɔ̌b. Me á nze sâ ó, baántím, bé béyɨɨ; baá o dí ebee bá, líŋaa baántím.»

40Bʉ́ʉ́ óFarizyɛ̂n, bé e boo nɔ́ɔ́ bé á be bá, nzě jóʼɔɔ̌ lwǐb nɨ̌. Bé ntɔ̂ʼ dî e né ó: «Nzê bɨ̌h bɨɛ ntémé bé ó baántím ɛ́?»

41Yésʉs, nye e bé ó: «Yé bé bɨ̌n bé á bɨbe ó baántím nó, lɛ́ɛ́, bɨ̌n á gwa be ó mbɨ̂mbɨá, syóm akǎ be. Nó mpʉ bɨ́n lɛ́ɛ́ ó, bɨ̌n bé lɨ́ ebee yɨ́, nó yaá ó bɨ́n dína lɨ́ edi e misyóm mín yɨ́.»

Currently Selected:

Yʉánɛs 9: ozm

Highlight

Copy